Northern Zazaki, Dersim - WBT (Luke) Non Drama

Northern Zazaki, Dersim - WBT (Luke) Drama

İsay ni pêro kı mıleti rê vati, ay ra tepia şi suka Kefernahumi. Uca de jü serdarê Roma esti bi, xızmetkarê ni serdari çımê iy de zaf hewl bi. No xızmetkar bi bi nêwes, waxto kı bımıro. Serdar key kı xeberê kı heqa İsay de veciyay bi, eşiya pê, pilanê Yahudiyan ra tayêni rusnay lê İsay kı cı rê mınetı bıkerê kı xızmetkarê iy nêweşiye ra bıxelesno ra. Pilê Yahudiyan şi lê İsay, inan cı rê zaf mınetı kerdı u vat: “No serdar yardımê to heq keno. Sarê ma ra hez keno, xavra ma ki iy da vırastenı.”
Ni qesan dıma, İsa bı inan'a pia şi. Key kı amay nejdiyê kêyi, serdari havalê xo rusnay kı na xeberı bıderi İsay: “Ya Wayir, xo meqefelnı. Ez layıq niyan, tı cı kuyê kê mın. Nay ra ezi ki nêthawrenan beri lê to. Tı hente kı emır bıdı, xızmetkarê mın beno wes. Emır kerdenı çıka ez zanan; ezi ki hem emır gênan, hem ki emır danan. Jü eskeri rê, ‘So’ vanan, sono. Eskerê bini rê, ‘Bê’ vanan, êno. Xızmetkarê xo rê, ‘Niy bıkı’ vanan, keno.”
İsa kı ni qesan eşiya pê, serdari rê heyran mand. Gêra ya mıleto kı dıma bi, inan rê vat: “Sıma rê nay vaceri: İsrail de bilı mın itıqato de gırso nanên nêdi.” Mêrıkê kı serdari rusnay bi lê İsay, se kı peyser amay kê, sêr kerdê kı xızmetkar biyo wes.

Roca de binı, İsa u telebê xo şi suka Nainı. Sılxetiya de gırsı ki inan dıma biye. İsa kı ama nejdiyê kêberê sukı, uca de mıleti cınaza jü mêrıki dardenê we. No, lacê jü cinıka de viyay bi, xora teyna jü lacê xo esti bi. Sukı ra xeylê mılet ki bı cinık'a uca de bi. İsay key kı cinıka viyay hini diye, zerria xo zan da, vat: “Meberbı.”
Na rey şi lê meyiti, dest na pıra. İyê kı meyit serê hermanê xo de berdenê, fındeti. İsay merdi rê nia vat: “Lacek, to rê vanan, urcı!” Laceko kı merdi bi, ust ra, qeşi kerd. İsay lacek peyser da muay.
Her kes tersay bi. İnan Heqi rê şukır kerd u vat: “Mabênê ma ra pêxembero de gırs veciya. Heq ama kı mıletê xo rê yardım bıkero.” Na xeberı Welatê Yahudiyan bı dormê Welatê Yahudiyan de biye vıla.

Telebanê Yahyay çiyê kı İsay kerdi bi, ni pêro Yahyay rê qeşi kerdi. Nay dıma, Yahyay veng da dı telebanê xo, inan rê vat: “Sêrê lê İsay, iy ra pers kerê, vacerê, ‘Ma zanım Mesih êno; tı oway, yan ma jüyê bini bıpim?’ ”
Telebi şi lê İsay, inan cı rê vat: “Yahyao kı mılet vaftiz kerdo, ma ra wast kı to ra pers bıkım. ‘Ma zanım Mesih êno; tı oway, yan ma jüyê bini bıpim?’ ”
A sırı ki, İsay xeylê mordemi, nêweşiyan ra, iletan ra, cınan ra xelesnenê ra, u çımê xeylê mordemanê koran kerdenê ya. İsay telebanê Yahyay rê nia vat: “Owo kı sıma di, eşiyay pê, sêrê, pêronan Yahyay rê vacerê: Mordemê kori vênenê, kudi fetelinê, nêwesê cuzamıni benê wes, kherri eşinê pê, merdi merdenı ra peyser ênê, Mijdania Xeleşiyayenı resena feqiran. Kamo kı rüyê mı ra itıqatê xo ra nêvêreno ra, ğeji bê inan!”
Telebê Yahyay key kı uca ra şi, İsay mıleti de heqa Yahyay de qeşi kerd, vat: “Sıma şi yaban yaji de çık bıvênerê? Vaso kı verê vay de perreno, iy bıvênerê? Vacerê, sıma şi çık bıvênerê? Jüyo de kıncê paki gırotê pıra, iy bıvênerê? İyê kı kıncanê rındekan gênê pıra, wertê variyetı derê, i sarayanê qıralan de manê. Vacerê, sıma şi çık bıvênerê? Jü pêxember bıvênerê? Ez sıma rê nay vaceri: Owo kı sıma di, pêxember ra ki berco! Kıtabo Bımbarek heqa Yahyay de nia vano:

‘Qay, ez owo kı xebera to bıdero, to ra raver rusnenan.
Raya to o hazır keno.’

Sıma rê nay vaceri: Mordemê kı hata nıka amê rüyê na dina, inan ra qe jüyê Yahyay ra berc niyo. Feqet kamo kı Hukumdariya Heqi de en qıco, o Yahyay ra ki berco.”
Ni qesan ser, mılet u tay taşildaran bilı qebul kerd kı raya Heqi raya rasta, çıkı Yahyay i pêro vaftiz kerdi bi. Feqet Ferisiyan bı ilimdaranê itıqati, owo kı Heqi saba inan wasti bi, inan o qebul nêkerd çıkı inan bı destê Yahyay'a vaftiz nêbi bi.
İsay nia vat: “Mordemê na waxti mandê kami? Ez sıma rê senên vaceri? Domanê kı cayê bazari de nistê ro, i mandê inan; i jübini rê nia vanê: ‘Ma sıma rê qewelı cınıtı, sıma kay nêkerd; ma sıma rê norna, sıma nêberbay.’
“Yahya key kı ama, rocı pê gırot, şerabı nêsımıtı. Sıma Yahyay rê vat, ‘Cındıkıno.’ Lacê Mordemi key kı ama, werd, sımıt, sıma iy rê ki vat, ‘Qay, ni çhılekê serxoşi ro. O biyo havalê taşildaran bı gunakaranê binan.’ Kamo kı raya hekmetı ra sono, weşiya xo de muskıno kı na ray, raya rasta.”

Ferisiyan ra jüyê, İsa dawetê kê xo kerd, cı rê vat: “Bê, nan borı.” İsa şi kê iy, lê xonça de nist ro. A sukı de cinıka de gunakarı esti biye. Na cinıkı eşiyê pê kı İsa kê Ferisi de nan weno, ay wertê qaba de hewlı de, rono de boya xo wes gırot, şiye kê Ferisi. Bınê nınganê İsay de nistı ro, berbê. Istırê çımanê na cinıkı, nıngê İsay kerdi hi, nay bı porê xo'a ki nıngê İsay kerdi husk. Nıngê İsay phaçi kerdi, ron kerd pıra.
Ferisiyo kı veng day bi İsay, key kı na diye, xo xo de vat: “Ekı no mêrık pêxember bibiyenê, zanenê cinıka kı dest na iy ra senên cinıka, zanenê a cinıka de gunakara.”
İsa gêra ya Ferisi rê, vat: “Simun, gereko ez to rê çiyê vaceri.”
Simuni vat: “Vacı, malım.”
İsay vat: “Rocê, dı mêrıkan jü mêrıki ra dên gırotê. Jüyê phancas perê simi gırotê, jüyê ki phanc sey perê simi gırotê. Perê ni hurdenan ki çini biyê, nêşkiyê dênê xo bıderê. Ay ra, mêrıko kı cı ra dên gırotê, dênê ninan ef kerdo. Gorê to, ni dêndaran ra kamci, i mêrıki ra daa zêdı hez keno?”
Simuni vat: “Gorê mın, owo kı dênê xo zêdıwo, o daa zêdı hez keno.”
İsay vat: “To rast vat.” Bado İsay cinıkı ro sêr kerd, Simuni rê vat: “Na cinıkı vênenay? Ezi kı aman kê to, to awkı nêdê mın kı nınganê xo buşiri; ay bı ıstıranê çımanê xo'a nıngê mın şüti, bı porê xo'a husk kerdi. To ez phaçi nêkerdan, nêvat, ‘Xêr amay’; a ez aman niaman, nınganê mın phaçi kena. To ronê zeytıni nêkerd serê mı ra; a ez aman niaman, rono kı boya xo wesa, iy kena nınganê mı ra. To rê nay vaceri: Gunê ay zêdı bi, i ef bi; a ay ra hente zêdı hez kena. İyê kı gunê xo senıkê, ef benê, i senık hez kenê.”
İsay cinıkı rê vat: “Gunay to ef bi.”
Meymananê binan mabênê xo de nia vat: “No kamo kı gunan bilı ef keno!”
İsay cinıkı rê vat: “İtıqatê to tı xelesnay ra, wertê sılametiye de so.”

Listen to Luka 7