Matyu 8
8
Yesus a na tamo bei yu na aqa jejamu ugeeleŋej qaji di boletej
1Ariya Yesus a manaq dena aieqnaqa tamo uŋgasari tulaŋ gargekoba naŋgi a dauryosib aieb. 2Onaqa tamo bei yu na aqa jejamu ugeeleŋej qaji a Yesus aqa areq bosiqa aqa siŋgaq dia siŋga pulutosiqa minjej, “O Tamo Koba, ni e boletbqa are soqnimqa e boletbe. E qalie, ni na e boletbqa kere.” 3Degsi minjnaqa Yesus a baŋ waiysiq tamo di ojsiqa minjej, “E ni boletmqa are unu. Deqa ino jejamu olo boleeme.” Degsi minjnaqa aqa yu kalil koboonaqa aqa jejamu olo boleej. 4Onaqa Yesus na olo minjej, “Ni une. Ino jejamu boleqo deqa ni tamo qudei naŋgi minjraim. Ni gilsim ino jejamu atra tamo osoryosim atraiyo qaji iŋgi iŋgi Moses a nami marej qaji di osim Qotei atraiyime. Yimqa tamo naŋgi ni numsib qalieqab, ino jejamu boleqo.”
Yesus a na qaja tamo gate aqa kaŋgal tamo boletej
5Onaqa Yesus a walwelosiq Kaperneam qureq di brantej. Dia qaja tamo naŋgo gate bei soqnej. A Rom qaji tamo. A Yesus aqa areq bosiqa pailyosiq minjej, 6“O Tamo Koba, ijo kaŋgal tamo a makobaiyqo. Aqa tanu kalil laiyosiq jejamu tulaŋ jaqatiŋugetqoqa talq di ŋeiejunu.” 7Onaqa Yesus na minjej, “E gilsiy boletqai.” 8Degsi minjnaqa qaja tamo naŋgo gate na olo minjej, “O Tamo Koba, e tamo bolesai. Deqa ni ijo talq baim. Ni endia sosim anjam segi marimqa ijo kaŋgal tamo a boleqas. 9E degsi ni mermonum. Di kiyaqa? E dego tamo kokba qudei naŋgo sorgomq di unum. Ijo qaja tamo naŋgi ijo sorgomq di unub. E bei minjqai, ‘Ni gile.’ Yimqa a gilqas. Bei minjqai, ‘Ni au.’ Yimqa a bqas. Ijo kaŋgal tamo bei minjqai, ‘Wau di ye.’ Degsi minjitqa a ijo anjam dauryqas. Dego kere ni endia sosim anjam segi marimqa ijo kaŋgal tamo a boleqas.” 10Onaqa Yesus a qaja tamo naŋgo gate aqa anjam di qusiqa a tulaŋ prugugetej. Osiqa bulosiq tamo uŋgasari gargekoba a dauryoqneb qaji naŋgi minjrej, “Niŋgi quiye. E bole merŋgwai. Qaja tamo naŋgo gate endi a e qa aqa areqalo tulaŋ siŋgilatqo. Israel tamo bei nami e qa degsi aqa areqalo siŋgilato qaji bei unosai. Qaja tamo naŋgo gate endi a sawa bei qaji. A Israel tamo sai. Di uŋgum. A e qa aqa areqalo tulaŋ siŋgilatqo.
11“Deqa e niŋgi endegsi merŋgwai. Sawa bei bei qaji tamo uŋgasari tulaŋ gargekoba naŋgi sawa guta na guma na ti bosib koroeleŋosib Abraham, Aisak, Jekop naŋgi koba na awoosib iŋgi uyqab. Yimqa Qotei laŋ qureq di unu qaji a naŋgo Mandor Koba sosim naŋgi taqatnjrqas. 12Ariya tamo qudei Qotei na nami taqatnjrqa osiq metnjrej qaji naŋgi aqaq bqa asginjrej deqa Qotei a naŋgo Mandor Koba sosim taqatnjrqasai. A na naŋgi osim qalaq di breinjrimqa naŋgi sawa ambruq di sqab. Sawa dia naŋgi akamkobayoqnsib pailoqnsib naŋgo jaqatiŋ qa qalagei anjam atoqnqas.”
13Osiqa Yesus a qaja tamo naŋgo gate di minjej, “Ni gile. Ni endegsi are qalonum, ‘Yesus a na ijo kaŋgal tamo boletqa kere.’ Ni degsi are qalonum deqa ino kaŋgal tamo a boleqo unu. Ni gilsim une.” Degsi minjnaqa bati qujai deqa aqa kaŋgal tamo aqa ma koboonaqa a boleej.
Yesus na Pita aqa mimibe boletej
14Onaqa Yesus a Pita aqa tal gogetosiqa Pita aqa mimibe makobaiyonaqa jejamu kaŋkaŋyonaq bijalq di ŋeiesonaq unej. 15Unsiqa aqa baŋ ojsiqa tigeltonaqa aqa jejamu kaŋkaŋ di koboonaqa a tigelosiqa iŋgi goietej.
Yesus na tamo uŋgasari gargekoba naŋgi boletnjroqnej
16Seŋ aiqa laqnaqa tamo uŋgasari mondor uge uge na ojeleŋo qaji naŋgo was naŋgi na joqsib Yesus aqa areq osi beleŋoqneb. Osi beleŋeqnabqa Yesus a anjam segi minjreqnaqa mondor uge uge naŋgi aqa anjam qusib jaraioqneb. Tamo ma utru segi segi so qaji naŋgi dego osi beleŋeqnab Yesus na boletnjroqnej. 17A kumbra di yej deqa anjam bei Qotei aqa medabu o tamo Aisaia nami marej qaji di aqa damu brantej. A endegsi marej, “Kristus a na gago ma utru segi segi kalil yaiyetgoqnsiq taqal waiyeqnu.”
Tamo qudei naŋgi na Yesus dauryqajqa minjeb
18Bati deqa Yesus a ŋam atej tamo uŋgasari tulaŋ gargekoba naŋgi aqa areq di koroesoqneb. Deqa a na aqa aŋgro naŋgi minjrej, “Iga qobuŋ gogetosim jaraiosim ya agu taqal beiq gilqom.” 19Degsi minjrsiqa naŋgi joqsiq koba na gilqa laqnabqa dal anjam qalie tamo bei a Yesus aqa areq bosiqa minjej, “O Tamo Koba, ni sawa sawaq giloqnimqa e ni daurmoqnqai.” 20Onaqa Yesus na minjej, “Bauŋ juwaŋ naŋgi tal ti. Agi sub miligiq di ŋereŋeqnub. Qebari naŋgi simi ti. Deqa naŋgi simiq di ŋereŋeqnub. Ariya e Tamo Aŋgro ŋeiqajqa tal saiqoji. Deqa ni e daurbqajqa gulube koba.” 21Onaqa Yesus aqa aŋgro bei na minjej, “O Tamo Koba, ni na e odbimqa e mati aisiy ijo abu qa tariŋoqnqai. A moiimqa subq atsiy di e ni daurmoqnqai.” 22Onaqa Yesus na minjej, “Uŋgum. Tamo moio qaji naŋgi segi na tamo moio qaji naŋgi subq ateleŋoqnqab. Ariya ni bosim e daurbe.”
Yesus na jagwa ti ya korkor ti anjam minjrnaq laeb
23Degsi minjsiqa qobuŋ gogetonaqa aqa aŋgro naŋgi a dauryosib koba na qobuŋ gogetosib gileb. 24Naŋgi gileqnabqa Yesus a qobuŋ miligiq di ŋeisiq qambumtej. Onaqa jagwa tulaŋ koba tigelosiq ya korkortosiqa qobuŋ qaloqnsiqa mormaŋ miligiq ainaqa ya maqej. 25Deqa Yesus aqa aŋgro naŋgi tulaŋ ulaugetosib aqa areq bosib dudumyosib minjeb, “O Tamo Koba, ni iga aqaryaige. Iga padalqa laqnum.” 26Onaqa Yesus a tigelosiqa minjrej, “Niŋgi e qa nuŋgo areqalo siŋgilatqa yonub tulaŋ keresaiiŋgwo. Niŋgi kiyaqa ulaonub?” Degsi minjrsiqa jagwa ti ya ti ŋiriŋtnjrnaqa jagwa ti ya ti laeb. 27Onaqa Yesus aqa aŋgro naŋgi aqa siŋgila di unsibqa naŋgi are koba qalsib segi segi maroqneb, “Yesus a tamo kiero deqa jagwa ti ya ti minjrqoqa aqa anjam qusib laonub?”
Yesus na mondor uge naŋgi tamo aiyel naŋgo jejamuq dena winjrej
28Onaqa Yesus aqa aŋgro naŋgi ti qobuŋ na gilsib ya agu taqal beiq di brantosib Gadara naŋgo sawaq di tiryeb. Tiryonabqa tamo aiyel naŋgi tamo sub ato sawaq dena brantosib walwelosib Yesus aqa areq beb. Tamo naŋgi di mondor uge uge na ojeleŋo qaji. Naŋgi aiyel qaja ani. Deqa tamo kalil naŋgi gam dena walwelqa keresai. 29Naŋgi aiyel Yesus aqa areq bosib leleŋkobayosib minjeb, “O Qotei aqa Ŋiri, ni iga kiergwajqa bonum? Iga padalqajqa bati bosaisonaqa ni laŋa ambleq di iga jaqatiŋ egwa bonum e?” 30Bati deqa isaq yala dia bel tulaŋ gargekoba naŋgi suwaroqneb. 31Deqa mondor uge naŋgi na Yesus siŋgila na waiŋyosib minjeb, “Ni iga qariŋgimqa iga bel naŋgo jejamuq gileleŋqom.”
32Onaqa Yesus na minjrej, “Di kere. Niŋgi jaraiosibqa bel naŋgo jejamuq gileleŋoiye.” Degsi minjrnaqa mondor uge naŋgi na tamo aiyel di uratnjrsib segi segi bel naŋgo jejamuq gileleŋeb. Gilnabqa bel kalil naŋgi gurgurosib botau dena prugeleŋosib yaq aisib ya uysib moreŋeb.
33Onaqa bel taqatoqneb qaji tamo naŋgi kumbra di unsibqa deqa jaraiosib qure miligiq aisib tamo uŋgasari naŋgi sainjreb. Osib naŋgi walwelosib tamo uŋgasari kalil naŋgi bel qa ti tamo aiyel mondor uge uge na ojeleŋo qaji naŋgi qa ti sainjroqnsib laqneb. 34Onaqa naŋgi qusibqa naŋgi Yesus unqajqa aqa areq beb. Bosib Yesus unsib minjeb, “Ni gago sawa endi uratosim sawa beiq gile.”
Nke Ahọpụtara Ugbu A:
Matyu 8: bojNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2013, Wycliffe Bible Translators, Inc. All rights reserved.