Matyu 6
6
Tamo naŋgi na ino ŋam soqtetmoqnqajqa deqa kumbra bole bole yoqnaim
1Osiqa Yesus a olo anjam endegsi minjrej, “Tamo bei a marqas, ‘E tamo uŋgasari naŋgi gisaŋnjrsiy naŋgo ŋamgalaq dia kumbra bole bole laŋa yoqnit naŋgi e nubsib ijo ñam soqtetboqnqab.’ Ariya niŋgi degyaib. Niŋgi degyqab di nuŋgo Abu laŋ qureq di unu qaji a niŋgi awai bole eŋgwasai.
2“Tamo uŋgasari iŋgi iŋgi saiqoji unub qaji di ni na aqaryainjrqa osimqa gisaŋ tamo naŋgi kumbra yeqnub di ni degyaim. Gisaŋ tamo naŋgi dena tamo uŋgasari iŋgi iŋgi saiqoji unub qaji naŋgi aqaryainjrqa oqnsib tamo qudei naŋgi qariŋnjreqnab gul anjamosib namoeqnab tamo kalil naŋgi na naŋgi unjroqnsib naŋgo ñam soqteqnub. Tamo naŋgi di Qotei tal miligiq dia, gam kokbaq dia kumbra degyeqnub. Deqa niŋgi quiye. E bole merŋgwai. Qotei a tamo naŋgi di awai bole enjrqasai. Naŋgo awai agi tamo uŋgasari naŋgi na naŋgo ñam soqtetnjreqnub di kere. 3Deqa ni degyaim. Ni tamo uŋgasari iŋgi iŋgi saiqoji unub qaji naŋgi aqaryainjrqa osimqa baŋ qonaŋ na ulitsim aqaryainjrimqa baŋ wo a qalieqasai. 4Di yawo anjam. Aqa damu endegsi unu. Ni uli na tamo uŋgasari iŋgi iŋgi saiqoji unub qaji naŋgi aqaryainjrimqa tamo kalil naŋgi qalieqasai. Ni kumbra bole di uli na yeqnam ino Abu a segi na uneqnu. Deqa a segi na ni awai bole emqas.”
Yesus a pailyo kumbra qa tamo uŋgasari naŋgi minjrej
5Osiqa Yesus a olo anjam endegsi minjrej, “Niŋgi Qotei pailyqa osibqa gisaŋ tamo naŋgi pailyeqnub degsib pailyaib. Gisaŋ tamo naŋgi Qotei pailyqa oqnsib tamo uŋgasari naŋgo ŋamgalaq dia tigeleqnab unjroqnsib naŋgo ñam soqteqnub. Tamo naŋgi di Qotei tal miligiq dia, qure ambleq dia, gam kokba qalaq dia kumbra degyeqnub. Deqa niŋgi quiye. E bole merŋgwai. Qotei a naŋgi awai bole enjrqasai. Naŋgo awai agi tamo uŋgasari naŋgi na naŋgo ñam soqtetnjreqnub di kere. 6Deqa ni degsim pailyaim. Ni Qotei pailyqa osimqa ino segi warum miligiq gilsim siraŋ qandimosim ino Abu uliejunu qaji a pailyimqa tamo kalil naŋgi ni numqasai. Ni kumbra bole di uli na yeqnam ino Abu a segi na uneqnu. Deqa a segi na ni awai bole emqas.
7“Tamo naŋgi Qotei qaliesai qaji naŋgi laŋa laŋa pailyo olekoba yoqnsibqa endegsib are qaleqnub, ‘Iga pailyo olekoba yoqnimqa Qotei a gago pail quqwas.’ Di gisaŋ. Deqa niŋgi Qotei pailyqa osibqa degsib pailyaib. 8Niŋgi naŋgo kumbra di dauryaib. Niŋgi qalie, niŋgi iŋgi bei qa truquosib nuŋgo Abu pailyosaisoqnibqa a nami qalieqo.
9“Deqa niŋgi endegsib Qotei pailyoqniye,
‘O gago Abu, ni laŋ goge di unum.
Ino ñam tulaŋ boledamu. Deqa iga na ino ñam getentoqnqom.
10Ni bosim gago Mandor Koba sosim iga taqatgoqnime.
Laŋ qureq dia naŋgi ino areqalo dauryeqnub.
Deqa mandamq endia dego iga ino areqalo dauryoqnqom.
11O Abu, bini bati endeqa ni na gago iŋgi uyo keretgime.
12Tamo naŋgi iga qa une ateqnub qaji naŋgo une kalil iga na kobotetnjreqnum.
Deqa ni na gago une kalil dego olo kobotetgime.
13Satan na iga walawalaigosim uneq waigwa laqnimqa ni na Satan getentime.
Yim kumbra uge bei na iga ugetetgwasai.’
14“O ijo aŋgro, niŋgi degsib Qotei pailyoqniye. Niŋgi quiye. Niŋgi tamo bei qa ŋiriŋ ti soqnimqa aqa une di niŋgi na kobotibqa nuŋgo Abu laŋ qureq di unu qaji a na kamba nuŋgo une kalil kobotetŋgwas. 15Ariya niŋgi aqa une kobotetqasai di nuŋgo Abu a dego nuŋgo une kobotetŋgwasai.”
Yesus a qurieŋ qa tamo uŋgasari naŋgi minjrej
16Osiqa Yesus a olo anjam endegsi minjrej, “Niŋgi ya uratosib qurieŋqa marsibqa gisaŋ tamo naŋgi qurieŋeqnub niŋgi degyaib. Gisaŋ tamo naŋgi qurieŋoqnsibqa ulatamu ugeinjreqnaqa tamo uŋgasari naŋgo ŋamdamuq di laqnabqa unjroqnsib naŋgo ñam soqteqnub. Deqa niŋgi quiye. E bole merŋgwai. Tamo naŋgi kumbra degyeqnub qaji Qotei na awai bole enjrqasai. Naŋgo awai agi tamo uŋgasari naŋgi na naŋgo ñam soqtetnjreqnub di kere. 17Ariya ni kumbra degyaim. Ni qurieŋqa osimqa ino ulatamu geregere yansoqnsim ino gate baŋga praŋyoqnsim ino jejamu gereiyoqnsim laqne. 18Yimqa tamo uŋgasari naŋgi ni numoqnsib ni qurieŋeqnum di naŋgi qalieqasai. Ni kumbra bole di uli na yeqnam ino Abu a segi na uneqnu. Deqa a segi na ino ñam soqtetmosim awai bole emqas.”
Niŋgi mandam qa iŋgi iŋgi koroiyaib
19Osiqa Yesus a olo anjam endegsi minjrej, “Niŋgi mandam qa iŋgi iŋgi koroiyaib. Di sisimbiŋ na ugetqab. Baisuwi ojqas. Bajiŋ tamo naŋgi tal paratosib oqab. 20Deqa niŋgi laŋ qure qa iŋgi iŋgi koroiyiye. Di sisimbiŋ na ugetqasai. Baisuwi ojqasai. Bajiŋ tamo naŋgi tal paratosib oqasai dego. 21Sawa qabia ino iŋgi iŋgi kalil unu qaji dia ino areqalo kalil dego siŋgilatim sqas.”
Ino ŋamdamu di ino jejamu qa puloŋ bul
22Osiqa Yesus a olo anjam endegsi minjrej, “Ino ŋamdamu di ino jejamu qa puloŋ bul. Deqa ino ŋamdamu boleqas ino jejamu kalil suwaŋesqas. 23Ariya ino ŋamdamu ugeqas di ino jejamu kalil ambruqas. Deqa puloŋ ino are miligiq di unu qaji di olo ambruqas di ino are miligi kalil ambruekritqas.”
Tamo bei a na tamo kokba aiyel naŋgo wau ojqa keresai
24Osiqa Yesus a olo anjam endegsi minjrej, “Tamo qujai a tamo kokba aiyel naŋgo sorgomq di sqa keresai. A na tamo kobaquja bei qalaqalaiyosim olo tamo kobaquja bei jeutqas. Bei aqa anjam dauryoqnsim olo bei qoreiyoqnqas. Dego kere niŋgi mandam qa iŋgi iŋgi ti Qotei ti turtnjrsib naŋgo sorgomq di sqa keresai.”
Niŋgi mandamq endia bole sqajqa areqalo kobaiyaib
25Osiqa Yesus a olo anjam endegsi minjrej, “Deqa e niŋgi endegsi merŋgwai. Niŋgi mandamq endia nuŋgo segi jejamu bole sqajqa deqa areqalo kobaiyaib. Osib endegsib maraib, ‘Iga iŋgi ti ya ti qabe na osim uyqom? Gara qabe na osim gago jejamu kabutqom?’ Niŋgi iŋgi uyo na segi ŋambile sqasai. Niŋgi gara jugoqnqab dena segi nuŋgo jejamu bole sqasai. 26Niŋgi qebari naŋgi unjriye. Naŋgi iŋgi yagosaieqnub. Iŋgi otorosib talq di atosaieqnub. Ariya nuŋgo Abu laŋ qureq di unu qaji a na qebari naŋgi iŋgi anainjreqnu. Niŋgi qalie, qebari naŋgi qunuŋ saiqoji. Ariya niŋgi tamo qunuŋ ti. Niŋgi na qebari naŋgi tulaŋ buŋnjrejunub. 27Niŋgi mandamq endia sokobaiyqajqa are koba qaloqnaib. Niŋgi are koba qalqab areqalo dena niŋgi nuŋgo segi soboleiyqajqa bati olo totoryqa keresai.
28“Deqa niŋgi kiyaqa gara qabe na osib jejamu kabutqajqa are koba qaleqnub? Niŋgi ŋam so unjriye. Naŋgo wala kiersib branteqnub di niŋgi qaliesai. Naŋgi segi wauosaieqnub. Naŋgo segi wala gereiyosaieqnub. Qotei a segi na naŋgo wala gereiyeqnu. 29Ariya e niŋgi endegsi merŋgwai. Nami Solomon a gara wala ti boledamu jugoqnej. Ariya ŋam so aqa wala di tulaŋ boledamu. Wala dena Solomon aqa wala tulaŋ buŋyejunu. 30Maŋ laŋaj bini oqwas nebe tamo naŋgi na giŋgeŋyosib olo ŋamyuoq waiyqab. Maŋ laŋaj di Qotei na wala enjreqnu. Deqa niŋgi kiyaqa Qotei qa nuŋgo areqalo siŋgilatqa yonub keresaiiŋgwo? Niŋgi maŋ laŋaj sai. Niŋgi tamo qunuŋ ti. Deqa niŋgi endegsi poiŋgem. Qotei a niŋgi dego gara eŋgoqnqas. 31Niŋgi areqalo kobaiyosib endegsib maraib, ‘Iga iŋgi ti ya ti qabe na osim uyqom? Gara qabe na osim gago jejamu kabutqom?’ Niŋgi degsib maraib. 32Tamo uŋgasari Qotei qaliesai qaji naŋgi iŋgi iŋgi deqa are koba qaleqnub. Ariya niŋgi deqa are koba qalaib. Nuŋgo Abu laŋ qureq di unu qaji a qalie, niŋgi laŋa sqa keresai. Niŋgi iŋgi iŋgi deqaji oqnsib sqab. 33Ariya niŋgi kumbra endi qujai yoqniye. Niŋgi Qotei aqa sorgomq di geregere soqnibqa a nuŋgo Mandor Koba sosim niŋgi taqatŋgoqnqas. Osib niŋgi aqa kumbra tiŋtiŋ dauryoqniye. Niŋgi degyqab di Qotei na kamba iŋgi bole bole dego niŋgi eŋgoqnqas. 34Deqa nebe kumbra kie nuŋgoq di brantqas niŋgi deqa are koba qalaib. Nebe a bati bei. Nebe qa gulube di aqa segi gulube. Bati segi segi aqa gulube di naŋgo segi segi. Deqa niŋgi are koba qalaib.”
Nke Ahọpụtara Ugbu A:
Matyu 6: bojNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2013, Wycliffe Bible Translators, Inc. All rights reserved.