Mateus 7
7
Ẽg tỹ ũ to vĩ kónãn ke tũ
(Lc 6.37-38, 41-42)
1“Ã régre to vĩ kónãn tũg nĩ, ti jykre kórég ra. Kỹ Topẽ vỹ ã to vĩ kónãn ke tũ nĩ gé. 2Ã tỹ ũ to vĩ mũ ẽn ri ke han jé tóg ke mũ, Topẽ ti, ã to. Ã tỹ ũ mỹ kãmun mũ ri ke han jé tóg ke mũ, ã mỹ, Topẽ ti. 3Jykre kórég mág ã tóg nĩ gé, hã ra ã régre jykre pãno sĩ ẽn tóg ã mỹ kórég nĩ'. 4Kỹ ã hã ne tóg ã régre mỹ, fi mỹ: “ã jykre kórég kurynh jé sóg ke mũ,” he tĩ', ã tỹ ã jykre pãno ẽn kurynh jãvãnh ra'. 5Ke tũg nĩ. Ke tũ nĩ mũ ra ã tóg jykre régre nĩ. Kỹ ã jykre kurynh vén nĩ. Kar kỹ ã tóg sir ã régre jykre kurynh há han ke mũ,” he tóg.
6“Hã ra kasor jykre ri ke ag mỹ Topẽ jykre sĩnvĩ ẽn tó tũg nĩ. Porko jykre ri ke ẽn ag mỹ ke gé, fag mỹ ke gé. Jykre kavéj ag nỹtĩ, hã kỹ ag tóg, Topẽ jykre to é henh ke mũ. Tỹ tũ' he sór ag tóg tĩ, ti sãn kỹ, kar kỹ ag tóg sir, ã to jũ sór mũ gé, ha vem nĩ, ã tỹ ag mỹ Topẽ jykre sĩnvĩ tó ja hã ra,” he tóg, Jesus ti.
Topẽ tỹ tỹ ũn vĩ há nĩ
(Lc 11.9-13)
7“Topẽ mỹ nén kar to vĩm nĩ, kỹ tóg ãjag mỹ han ke mũ. Ãjag tỹ ti mỹ nén ũ to vĩ mũ ẽn jãvãnh nĩ, kỹ ãjag tóg venh ke mũ. Ti mré vĩ kỹ ẽg tỹ ti jãnkã tỹ tórón tórón ke ẽn ri ke han nĩ. Kỹ tóg ãjag mỹ nón ri ke han mũ sir, ti tỹ ãjag mỹ ãjag tỹ nén to vĩ mũ ẽn han kỹ. 8Hỹ, hã vẽ. Ãjag tỹ ti mỹ nén ũ to vĩn kỹ tóg, ãjag mỹ han mũ sir. Ãjag tỹ jãvãnh kỹ ãjag tóg, venh ke mũ sir,” he tóg.
9“Kejẽn ãjag kósin tóg: “isỹ ẽmĩ konh há tóg tĩ,” he mũ. Kỹ ãjag pijé, ti mỹ pó nĩm ke mũ'. 10Ti tỹ ãjag mỹ: “isỹ pirã konh há tóg tĩ,” hen kỹ ãjag pijé ti mỹ pỹn nĩm ke mũ'. 11Jykre pãno ãjag nỹtĩ. Ge ra ãjag tóg ãjag krẽ mỹ nén ũ há vin tĩ. Ge ti nĩ gé, ãjag tỹ Topẽ mỹ nén ũ to vĩn kỹ. Nén ũ há tãvĩ hã vin jé tóg ke mũ. Hã ra tóg ãjag kãfór han tĩ, ẽg jóg tỹ kanhkã tá nĩ ẽn ti,” he tóg, Jesus ti.
Ẽg tỹ jagnẽ mỹ nén han ke
(Lc 6.31)
12“Ãjag tỹ ũ to: “ti tỹ inh mỹ tag han ra tóg há tĩ vẽ,” hen kỹ inhhã ti mỹ han nĩ, fi mỹ ke gé. Moisés tỹ ẽg jyvẽn hã vẽ, Topẽ vĩ tó tĩ ag tỹ ẽg jyvẽn hã vẽ,” he tóg, Jesus ti.
Jãnkã kãme
(Lc 13.24)
13“Ũ tỹ inh ki rã mũ vỹ, jãnkã sĩ fĩn rãm sór ri ke nĩ. Fĩn rãm jé ẽg tóg, vãsãn tĩ. Jãnkã mág vỹ nĩ gé. Fĩn rãm há ti nĩ, ti mág nĩn kỹ. Hã kỹ ũ tỹ hẽn ri ke ag vỹ fĩn rãm tĩ. Hã ra ũ tỹ fĩn rãm mũ ẽn ag vỹ, kãgter pẽ han ke mũ, nũgme ki vár kỹ. 14Ag jãvo jãnkã sĩ ẽn fĩn rãm sórm nĩ, ãjag tỹ rĩr krỹg ja tũ ve jé. Ti sĩ nĩn kỹ tóg fĩn rãm jagy nĩ, hã kỹ ũn pipir ag hã vỹ jãnkã sĩ fĩn rãm ke mũ,” he tóg, Jesus ti.
Ón kỹ Topẽ vĩ tó tĩ ag
(Lc 6.43-44)
15“Ón kỹ Topẽ vĩ tó tĩ ẽn ag vĩ kri nĩm tũg nĩ. Há nỹtĩ ve ag tóg nĩ, hã ra ag tóg, ãjag kókén sór nỹtĩ. Ãjag kókén sór to ag tóg, mĩg jũ ẽn ri ke nỹtĩ, mỹr, ha mẽ. 16Ãjag tỹ ag jykre tugnỹm kỹ ãjag tóg, ag tỹ Topẽ vĩ mranh mũ ẽn ki kanhró nỹtĩ, fag ke gé. Ha vé, vãnh tỹ jóhó ki ẽg tóg, uva vég tũ nĩgtĩ mỹr. Kỹ ẽg tóg sónh ki pẽnva vég tũ nĩgtĩ gé. 17Ka vỹ ge nỹgtĩ. Ti há jẽn kỹ tóg kanẽn há han tĩ, kỹ ẽg tóg ko tĩ. Ti kórég jẽn kỹ tóg kanẽn kónãn tĩ gé, kỹ ẽg pijé ko tĩ'. 18Ka há vỹ kanẽn kónãn ki kagtĩg jẽ, kỹ ka kórég vỹ kanẽn há han ki kagtĩg jẽ gé. 19Kỹ ẽg tóg ka kórég ẽn gỹn tĩ, tỹ ẽg pĩnh tĩ, ka tỹ kanẽn há han vãnh ẽn tỹ. 20Ge ag nỹtĩ, ón kỹ Topẽ vĩ tó tĩ ag. Ag tỹ Topẽ vĩ mranh mũ ra ag tóg, ón kỹ Topẽ vĩ tó tĩ. Ag tỹ nén han mũ ki ẽg tóg, ag jykre kórég vég mũ, fag ke gé“ he tóg, Jesus ti.
Ẽg tỹ Topẽ vĩ ki króm ke
(Lc 13.25-27)
21“Vẽnh kar tóg iso: “pã'i vẽ, pã'i vẽ,” he tĩ. Hã ra ũ ag tóg, Topẽ tỹ nén tó mũ ẽn han tũ nĩgtĩ. Hã kỹ ag tóg, Topẽ tỹ tỹ ẽg pã'i mág nĩ venh ke tũ nĩ. Ũ tỹ inh jóg vĩ han mũ ẽn ag hã vỹ, Topẽ tỹ tỹ ẽg pã'i mág nĩ venh ke mũ, fag ke gé. 22Kurã tỹ ẽgno kã, isỹ vẽnh kar jykre tugnỹm ke kurã ẽn kã ag tóg, inh mỹ: “Senhor, Senhor, ã jykre tó ẽg mỹr,” henh ke mũ. “Ã jykre hã ki ẽkrén kỹ ẽg tóg, ẽg tỹ nén han vãnh han ja nĩgtĩ mỹr. Ã jykre hã tỹ ẽg tóg, vẽjagrẽ kórég pan mỹr,” he jé ag tóg ke mũ, inh mỹ. 23Hã ra sóg ag mỹ: ãjag pijé tỹ, inh mré ke nỹtĩ', henh ke mũ. Ãjag ki kagtĩg sóg nĩ mỹr. Ha mũ jẽg. Jykre kórég ãjag tóg nỹtĩ, he jé sóg ke mũ, ũ tỹ inh panh vĩ han jãvãnh ẽn ag mỹ, fag mỹ ke gé,” he tóg, Jesus ti.
Ðn nũna gunh gunh kãme
(Lc 6.47-49)
24“Ha mẽ, inh vĩ mẽg ãjag tóg nỹtĩ,” he tóg. “Ãjag tỹ inh vĩ ki króm kỹ ãjag tóg sir tỹ, ũn jykre há ri ke nỹtĩ. Ðn han ken kỹ tóg, to jykrén mũ. To jykrén há han kỹ tóg, ga kũm kỹ pãró kri ĩn nũna ka fẽg mũ sir. 25Kejẽn ta tóg kutẽ mũ, kỹ goj vỹ var mũ sir. Kóho jũ vỹ kãtĩ mũ gé, ĩn to, hã ra tóg kutẽ tũ nĩ sir, ĩn ti. Pãró kri tóg nỹtĩ, ti nũna ti, hã kỹ tóg kutẽ tũ nĩ. Ge ti nĩ, ãjag tỹ inh vĩ kri fi kỹ. 26Ãjag tỹ inh vĩ mẽg mũ ra ki króm tũ nĩn kỹ ãjag tóg tỹ ũn jykre kórég ri ke nỹtĩ. Ðn han ken kỹ tóg, to jykrén kónãn mũ, kỹ tóg ga rỹnhrỹj hã ki ka fẽg mũ, krĩg mỹ, ĩn nũna ti. 27Kejẽn ta tóg kutẽ mũ, kỹ goj vỹ var mũ sir. Kóho jũ vỹ kãtĩ mũ gé, ĩn to, kỹ ĩn tóg vom ke tére kỹ kutẽ mũ sir. Mráj kãn tóg mũ sir, ĩn ti. Ge ti nĩ, ãjag tỹ inh vĩ kri fig tũ nĩn kỹ,” he tóg, Jesus ti.
Jesus vĩ tỹ vẽnh kar vĩ kãfór nĩ
28Hã ki Jesus tóg krỹg he mũ sir, ag kanhrãn ki. Kỹ tóg vẽnh kar mỹ e tĩ sir, ti vĩ ti. 29Ti vĩ tóg vẽnh kar vĩ kãfór nĩ, Topẽ vĩ to ẽg kanhrãn tĩ ag vĩ kãfór ti nĩ, kỹ tóg pã'i vĩ kãfór pẽ nĩ gé, ti vĩ ti. Hã kỹ tóg ki hã tó mũ. Kỹ tóg ag mỹ e tĩ sir, fag mỹ ke gé.
Nke Ahọpụtara Ugbu A:
Mateus 7: kgp
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido