Génesis 33
33
Jix Oc Naj Jacob Yin Watxꞌcꞌulal Yetoj Naj Esaú
1Jaꞌ yet jix yilon naj Jacob, tol chi apni oc Esaú yetoj 400 winaj, jix spoꞌon ecꞌ ebꞌ unin xol ebꞌ ix ix, jaꞌton ix Lía, cꞌal ix Raquel yetoj pax ebꞌ ix cawan yakꞌomal servil ebꞌ tuꞌ. 2Jaꞌ ebꞌ ix yakꞌomal servil tuꞌ, jix bꞌabꞌi to ebꞌ yetoj yuneꞌ, catuꞌ jix too ix Lía yetoj yuneꞌ. Tzunan xa jix too ix Raquel yetoj naj yuneꞌ chi yij José. 3Yin eymanil jix bꞌabꞌitoj naj Jacob sattaj ebꞌ ix. Jujel jix ey noanoj yet chi bꞌey yapni oc sattaj yuẍtaj tuꞌ. 4Jaꞌ naj Esaú jix jul jininoj yin eymanil, jix oc lakꞌan yin snukꞌ, catuꞌ jix stzꞌubꞌlen el stiꞌ junjun ebꞌ, jix okꞌa ebꞌ scawanil. 5Jix lawi tuꞌ, jix yilon oc naj Esaú ebꞌ ix ix cꞌal ebꞌ unin, jix skꞌanlen jaxca tiꞌ:
—Jal pax ebꞌ tiꞌ, ¿mactxequel ey yet ebꞌ? ẍi Esaú.
—Wuninal ebꞌ jix yakꞌ Jehová ey jin yu swatxꞌcꞌulal, ẍi naj Jacob.
6Catuꞌ jix sjitzontej sbꞌa ebꞌ ix yakꞌomal servil yetoj yuneꞌ, catuꞌ jix cꞌoli yey noan ebꞌ sat txꞌotxꞌ. 7Jix sjitzon cꞌal pax toj sbꞌa ix Lía yetoj ebꞌ yuneꞌ, catuꞌ jix ey pax noan ebꞌ. Yin xa tzunanil jix apni oc ix Raquel yetoj yuneꞌ, jaꞌton José, catuꞌ jix ey pax noan ebꞌ. 8Jix skꞌanlen naj Esaú tet naj Jacob jaxca tiꞌ:
—¿Tzet cha naꞌ yin wan noꞌ jobꞌbꞌeal noꞌ jix jin chaꞌle jin bꞌa yetoj yul-laj bꞌe? ẍi Esaú.
—Jaꞌ wet chi yun wakꞌon masanil noꞌ noꞌ, yet watxꞌ cꞌamxa sjowal ja cꞌul win, ẍi naj Jacob.
9—Cꞌamaj wuẍtaj, caw ecꞌal noꞌ wet, can ojabꞌ noꞌ yul ja kꞌabꞌ, ẍi naj Esaú.
10Jix oc cꞌal ian Jacob yalon tet naj jaxca tiꞌ:
—Cꞌamaj wuẍtaj, ta watxꞌ jin yul ja sat, chaꞌ wan jin saꞌbꞌeal chi wakꞌ ey jaach tiꞌ, yutol jaꞌ yet chi wilon oc ja win tiꞌ, jaxca tol jaꞌ Jehová chi wiloc yin, yutol watxꞌ jix yun jin ja chaꞌon juli. 11Chi wal ey jaach, chaꞌ wan jin saꞌbꞌeal jix wiꞌtej ey jaach tiꞌ, yutol jaꞌ Jehová jix el yin scꞌul jix yakꞌon jin bꞌeomal tiꞌ, yutol tzꞌajan cꞌal ey, ey jin, ẍi Jacob.
Jix oc cꞌal tean naj Jacob yin, jix ẍaꞌ scꞌul naj Esaú wan saꞌbꞌeal tuꞌ, catuꞌ jix ẍaꞌon ecꞌoj. 12Jix yalon Esaú jaxca tiꞌ:
—Eloj jon titiꞌ xin, catuꞌ chi cu toi. Jain chin bꞌabꞌi ja sattaj, ẍi naj Esaú.
13Catuꞌ jix takꞌwi naj Jacob jaxca tiꞌ:
—Jaach wuẍtaj, ja wotaj tol ja ebꞌ unin tiꞌ, caw eyman chi cꞌuumbꞌi a ebꞌ, catuꞌ chin naꞌon pax yu noꞌ meꞌ cꞌal noꞌ wacax tol yaliẍ to yuneꞌ, ta chi wujte bꞌey noꞌ, yin jun cꞌu chi cam noꞌ masanil. 14Yel xacꞌal watxꞌ chach bꞌabꞌitoj jin sattaj. Oj jin can niꞌojxa, cꞌuancꞌulal oj yun jin to an, jatacꞌalaꞌ jantaj chi yun sbꞌey ebꞌ unin, cꞌal noꞌ meꞌ yetoj cꞌal noꞌ wacax. Oj jaach wil apnoj bꞌey Seír tuꞌ, ẍi naj Jacob.
15Yun ojabꞌ xin, chi skeꞌ chi can jaywanoj ebꞌ naj wakꞌomal servil tiꞌ colwa ja wetoj, ẍi Esaú.
Catuꞌ jix yalon naj Jacob jaxca tiꞌ:
—Cꞌamaj, yuwal dios, cꞌam cꞌal tzet cha naꞌ, ẍi naj.
16Jaꞌ yet jun cꞌual tuꞌ, jix meltzo Esaú bꞌey conobꞌ Seír. 17Jaꞌ naj Jacob, jatuꞌ jix apni can oc bꞌey Sucot. Jaꞌ tituꞌ jix swaꞌne sna, catuꞌ jix swaꞌnen pax niẍtej na bꞌey jix octoj noꞌ sjobꞌbꞌeal noꞌ; yu jun tuꞌ, yuxan jix yakꞌ yij sbꞌi jun txꞌotxꞌ tuꞌ Sucot.#33:17 Sucot chi yal yeloc apnoj “yaliẍ pat”.
18Jaꞌ yet jix el naj Jacob bꞌey Padán-aram, yin tzalacꞌulal jix yun yapni oc bꞌey txꞌotxꞌ Canaán, jaꞌ tituꞌ jix swaꞌne a jun bꞌulan sna ebꞌ sattajto conobꞌ Siquem. 19Ey 100 tujan chꞌen tumin jix yakꞌ naj yin smanon jun txꞌotxꞌ tet ebꞌ scꞌaal naj Hamor, smam naj Siquem. Jaꞌ tituꞌ jix swaꞌne a bꞌulan sna ebꞌ. 20Jix lawi tuꞌ, jix swaꞌne a jun yet xaambꞌal, jix yakꞌon yij sbꞌi, El-Elohe-Israel.#33:20 El-Elohe-Israel chi yal yeloc apnoj, “Jehová sDiosal ebꞌ Israel”.
Nke Ahọpụtara Ugbu A:
Génesis 33: knj
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2016, Wycliffe Bible Translators, Inc. All rights reserved.