Génesis 2
2
1Inapoaton Yosë: Isoroꞌpaꞌ, piꞌiroꞌtëꞌ, yaꞌipi inaquëpita yaꞌhuërinsopitarë chachin tënirin huachi.
2-3Yaꞌipi acorinsopita tënirahuaton, tahuëririnquë chinotërin. Napoaton, ina tahuëri noya niꞌnin. Noya nicaton, chinoto tahuëri acorin. Napoaton piyapi pënënin: “Naporo tahuëri chinotatomaꞌ, casáchin yonquico,” itërin.
4Ina pochin Yosë iráca: Isoroꞌpaꞌ, piꞌiroꞌtëꞌ, inapita acorin. Yaꞌipi noꞌtëquën shaꞌhuitaranquëmaꞌ.
Itin nararoquë piyapi acorinsoꞌ
Sinioroso#2.4 Sinioro: Siniorosoꞌ, iráca iprioroꞌsari Yosë nininën Yapi (YHWH) itopi. Ina pochin nohuitopisoꞌ, cacharonquë, Sinioro itopi. Yosë niꞌton, inapita yaꞌnan acoaponahuëꞌ, 5co sharoꞌsa yaꞌhuëyátërarinhuëꞌ. Co panpatoronta papoyátërarinhuëꞌ. Co oꞌnan tëranta acoyátërarinhuëꞌ. Naporahuaton co insonta isoroꞌpaquë shaꞌtacaso marëꞌ yaꞌhuëyátërarinhuëꞌ. 6Napoaponahuëꞌ, noꞌpa quëran chachin iꞌsha pipiton, sëꞌcotërotárin. 7Naporoꞌ Sinioroso Yosë niꞌton, yaniroꞌpaꞌ amocan quëran quëmapi ninin. Nani nisahuaton, nanpicaso marëꞌ pihuinitërin. Inapotohuachina, niirahuaton nanpirin huachi.
8Ina piquëran, Sinioroso noyápiachin nararo Itin itopiquë acorin. Inaso noꞌpaꞌ, Cortaniiꞌ quëran piꞌi pipirinso parti quëparitërin. Inaquë yaꞌhuëcaso marëꞌ quëmapi nininso acorin. 9Naporahuaton, nisha nisha noyápiachin cashinoꞌsa apapotërin. Yashi yashin caꞌchináchin nitërinsopita apapotërin. Nararo huancánachin nanpirin nara apapotërin. Inaquë chachin aꞌnantaꞌ, apapotërin. Anitotacaso nara itopisoꞌ. Ina caꞌpachinaꞌ, noya nininsopita nitotaponahuëꞌ, co noyahuëꞌ nininsopitanta nitotapi huachi.
10Itinquë aꞌnara iꞌ pipirin. Yaꞌipi nararo asëꞌcotërotacaso marëꞌ naporin. Ina quëran chachin catapini sëꞌparaiꞌ paꞌtërin. 11Yaꞌnatiirinsosoꞌ, Pisoniiꞌ itopi. Inasoꞌ, Apira parti conimarin. Inaquë oro yaꞌhuërin. 12Inaquë oro yaꞌhuërinsoꞌ, noya noya ninin. Pimo yaquinta noya noya nininso yaꞌhuërin. Nisha naꞌpinta yaꞌhuërin, onisi itopisoꞌ. 13Ina quëran niantarinsontaꞌ, Quiconiiꞌ itopi. Inasoꞌ, yaꞌipi Coso parti paꞌtërin. 14Aꞌnantaꞌ, Tiquirisiiꞌ itopi. Inasoꞌ, Asiria ninano piꞌi yaꞌconinso parti quëran acorin. Yaꞌnatomarinsoso nipirinhuëꞌ, Iopiratisiiꞌ itopi.
15Sinioroso Yosë niꞌton, Itin nararoquë quëmapi acorin. Inaquë sacataton aꞌpaicaso marëꞌ acorin. 16Naporoꞌ iso pochin camairin: “Yaꞌipi isopita nararoꞌsa nitërinsoꞌ, noya caꞌquëꞌ, iroquëꞌ, inapoquëꞌ. 17Anitotacaso nara nitërinsoíchin, co nohuantërahuë capamasoꞌ. Inaso caꞌpatan, noya nininso nitotaponahuëꞌ, co noyahuëꞌ nininsonta nitotaran. Ama ina nitërinso caꞌquësohuëꞌ. Ina caꞌpatan, tëhuënchachin chiminaran,” itërin.
Yosëri sanapi nininsoꞌ
18Ina quëran Sinioroso Yosë niꞌton, taantarin: “Quëmapi inaora yaꞌhuëcasoꞌ, co noyahuëꞌ. Aꞌna niantaꞌi nipachin, inari noya catahuacaso marëꞌ,” tënin. 19-20Ina quëran yaꞌipi maꞌsharoꞌsaꞌ, anpiantëhuanoꞌsaꞌ, inapita noꞌpa quëran ninin huachi. Inapita nisahuaton, quëmapi quëshirin inari nininën acotacaso marëꞌ. Pëꞌtahuaroꞌsaꞌ, anpiantëhuanoꞌsaꞌ, maꞌsharoꞌsa tananquë yaꞌhuërinsopita, inapita nininën acotërin. Ma nininënsona acotohuachina, ina chachin ninihuanpi huachi. Napoaponahuëꞌ, co aꞌna maꞌshari tëranta nanitërinhuëꞌ, quëmapi noya catahuacasoꞌ.
21Napohuachina, quëmapi noyá ahuëꞌëtërin. Huëꞌësoꞌ, aꞌnara nininpitën ocoitërin. Ocoitahuaton, anoyataantarin huachi. 22Ina nininpitë quëran chachin sanapi ninin. Capayatohuachina, sanapi nininso aꞌnotërin. 23Quënanahuaton, quëmapi paꞌyanin. Paꞌyataton, tapon: “¡Isocha tëhuënchinsoꞌ, ca pochachin Yosëri ninin! Cá quëran ninin niꞌton, sanapi itarahuë,” tënin.
24Napoaton quëmapi saꞌapachin, paꞌpin, aꞌshin inapita patahuaton, saꞌinëꞌ nichinpitacaso yaꞌhuërin. Catoyaꞌpi nipirinahuëꞌ, aꞌnaíchin pochin nipi huachi.
25Quëmapiso saꞌinë chachin noya yaꞌhuërapi. Co aꞌmoanaponaraihuëꞌ, co manta tapanpihuëꞌ.
Nke Ahọpụtara Ugbu A:
Génesis 2: cbt
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2011, Wycliffe Bible Translators, Inc. All rights reserved.