لُوقا 22
22
خيانة يَهُوذَا للمسيح
1وَ عِيدْ الْخُبْزَةْ بَلَا تَوَّارَةْ الْمَعْرُوفْ بِعِيدْ الْفِصْحَ قَرَّبْ. 2وَ كُبَارَاتْ رُجَالْ الدِّينْ وَ الْعُلَمَاءْ خَايْفِينْ مِنْ زَعَلْ النَّاسْ وَ أَشَانْ دَا، قَمَّوْا يِفَتُّشُوا طَرِيقَةْ الْيَكْتُلُوا بَيْهَا عِيسَى بِعَشِيرْ.
3وَ فِي الْبَكَانْ دَا، الشَّيْطَانْ دَخَلْ فِي قَلِبْ يَهُوذَا الْأُسْمَهْ الْإِسْخَرِيَوْطِي. وَ هُو مِنْ التَّلَامِيذ الْأَتْنَا عَشَرْ. 4وَ يَهُوذَا قَمَّ وَ مَشَى حَجَّى مَعَ كُبَارَاتْ رُجَالْ الدِّينْ وَ كُبَارَاتْ الْعَسْكَرْ حُرَّاسْ بَيْت اللّٰهْ. وَ شَاوَرَاهُمْ بِكِكَّيْف يَقْدَرْ يِسَلِّمْ لَيْهُمْ عِيسَى. 5وَ هُمَّنْ فِرْحَوْا وَ قَالَوْا يَنْطُوهْ قُرُسْ. 6وَ خَلَاصْ، يَهُوذَا قَصَّدْ وَ مِنْ الْوَكِتْ دَا، هُو قَاعِدْ يِفَتِّشْ فُرْصَةْ أَشَانْ يِسَلِّمْ لَيْهُمْ عِيسَى وَكِتْ هُو مَا قَاعِدْ فِي أُسْط النَّاسْ.
العشاء
7وَ عِيدْ الْخُبْزَةْ بَلَا تَوَّارَةْ جَاءْ. وَ دَا الْيَوْم الْيَدْبَحَوْا فَوْقَهْ الْحَمَلْ فِي شَانْ عَشَاءْ هَنَا عِيدْ الْفِصْحَ. 8وَ عِيسَى رَسَّلْ بُطْرُسْ وَ يُوحَنَّا وَ أَمَرَاهُمْ وَ قَالْ: «أَمْشُوا حَصُّلُوا لَيْنَا عَشَاءْ عِيدْ الْفِصْحَ.» 9وَ سَأَلَوْه وَ قَالَوْا: «وَ نِحَصُّلُوهْ وَيْن؟» 10وَ رَدَّ لَيْهُمْ وَ قَالْ: «وَكِتْ تَدْخُلُوا فِي الْمَدِينَةْ، تَلْقَوْا رَاجِلْ وَاحِدْ شَايِلْ جَرّ هَنَا أَلْمِي. تَابُعُوهْ فِي الْبَيْت الْيَدْخُلْ فَوْقَهْ 11وَ حَجُّوا لِسِيدْ الْبَيْت دَا وَ قُولُوا لَيَّهْ: ‹سَيِّدْنَا الْمُعَلِّمْ يُقُولْ لَيْك: ”وَيْن بَيْت الضِّيفَانْ النَّاكُلْ فَوْقَهْ عَشَاءْ عِيدْ الْفِصْحَ مَعَ تَلَامِيذِي؟“› 12وَ هُو يِوَصِّفْكُو غُرْفَةْ وَسِيعَةْ وَ جَاهِزَةْ فَوْق فِي الْقَصِرْ. وَ فِي الْبَكَانْ دَا بَسْ، حَصُّلُوا لَيْنَا الْعَشَاءْ.» 13وَ مَشَوْا وَ لِقَوْا كُلَّ شَيّءْ مِثِلْ هُو قَالَهْ لَيْهُمْ. وَ حَصَّلَوْا عَشَاءْ عِيدْ الْفِصْحَ.
14وَكْت الْعَشَاءْ تَمَّ وَ عِيسَى قَعَدْ لِلْأَكِلْ مَعَ الرُّسُلْ الْأَتْنَا عَشَرْ. 15وَ قَالْ لَيْهُمْ: «أَنَا أَتْمَنَّيْت نَاكُلْ مَعَاكُو عَشَاءْ عِيدْ الْفِصْحَ دَا قُبَّالْ مَا نَتْعَبْ. 16وَ نُقُولْ لَيْكُو مَا نَاكُلَهْ بَتَّانْ لَحَدِّي كُلَّ شَيّءْ الْبُخُصّ عِيدْ الْفِصْحَ يِتِمّ فِي مَمْلَكَةْ اللّٰهْ.»
17وَ شَالْ كَاسْ هَنَا عَصِيرْ الْعِنَبْ وَ شَكَرْ اللّٰهْ. وَ قَالْ لَيْهُمْ: «شِيلُوهْ. خَلِّي كُلَ وَاحِدْ يَشْرَبْ مِنَّهْ. 18وَ نُقُولْ لَيْكُو مِنْ الْيَوْم أَنَا مَا نَشْرَبْ بَتَّانْ عَصِيرْ الْعِنَبْ لَحَدِّي مَمْلَكَةْ اللّٰهْ تَجِي.» 19وَ شَالْ خُبْزَةْ وَاحِدَةْ وَ شَكَرْ اللّٰهْ. وَ كَسَرْهَا وَ أَنْطَاهَا لَيْهُمْ وَ قَالْ: «دَا جِسْمِي النَّنْطِيهْ فِي شَانْكُو. سَوُّوا مِثِلْ دَا لِتِذَّكَّرَوْنِي بَيَّهْ.»
20وَ بَعَدْ الْعَشَاءْ، هُو سَوَّى نَفْس الشَّيّءْ بِالْكَاسْ. هُو شَالَهْ وَ قَالْ: «الْكَاسْ دَا يِوَصِّفْ الْمُعَاهَدَةْ الْجَدِيدَةْ النِّسَوِّيهَا مَعَاكُو بِدَمِّي الْيِدَفِّقْ فِي شَانْكُو. 21وَ نُقُولْ لَيْكُو النَّادُمْ الْيُخُونِّي قَاعِدْ يَاكُلْ مَعَايِ! 22أَشَانْ إِبْن الْإِنْسَانْ يُمُوتْ مِثِلْ اللّٰهْ قَدَّرَهْ. لَاكِنْ الْعَذَابْ يَرْجَى النَّادُمْ الْيُخُونِّي.» 23وَ بَدَوْا يِسَّاءَلَوْا أَمْبَيْنَاتْهُمْ فِي يَاتُو الْمِنْهُمْ يَبْقَى الْخَايِنْ.
24وَ تَلَامِيذَهْ قَمَّوْا يِلْغَالَطَوْا أَمْبَيْنَاتْهُمْ فِي يَاتُو الْيَبْقَى الْأَكْبَرْ مِنْهُمْ. 25وَ عِيسَى قَالْ لَيْهُمْ: «أَيِّ مَلِكْ الْأُمَمْ يَمْلُكْ بِشِدَّةْ فِي نَاسَهْ وَ الْعِنْدَهْ قُدْرَةْ فَوْق النَّاسْ كُلَ يَحْكِمْ فَوْقهُمْ مِثِلْ هُو سِيدْ الْخَيْر. 26لَاكِنْ مَا يَبْقَى مِثِلْ دَا أَمْبَيْنَاتْكُو. خَلِّي الْكَبِيرْ مِنْكُو يَبْقَى مِثِلْ الصَّغَيَّرْ وَ الْيُقُودْكُو مِثِلْ الْيَخْدِمْ لَيْكُو. 27مَثَلاً، كَنْ نَادُمْ وَاحِدْ قَاعِدْ يَاكُلْ وَ نَادُمْ آخَرْ يِجِيبْ لَيَّهْ الْأَكِلْ، يَاتُو مِنْهُمْ الْكَبِيرْ؟ أَكِيدْ، يُقُولُوا الْقَاعِدْ يَاكُلْ هُو الْكَبِيرْ. وَ لَاكِنْ أَنَا ذَاتِي قَاعِدْ فِي أُسُطْكُو مِثِلْ الْخَدَّامْ الْيَخْدِمْ.
28«وَ إِنْتُو قَعَدْتُوا مَعَايِ ثَابْتِينْ فِي كُلَّ صُعُوبَاتِي. 29وَ مِثِلْ أَبُويِ اللّٰهْ أَنْطَانِي مَمْلَكَةْ، أَنَا كُلَ نَنْطِيكُو مَمْلَكَةْ. 30وَ تَاكُلُوا وَ تَشَرْبَوْا فِي نَفْس الدَّبَلَايْ مَعَايِ فِي مَمْلَكَتِي وَ تَقْعُدُوا فِي كَرَاسِي وَ تَحْكُمُوا قَبَايِلْ بَنِي إِسْرَائِيلْ الْأَتْنَا عَشَرْ.»
المسيح قال بُطْرُس ينْكُره
31وَ عِيسَى قَالْ: «يَا سِمْعَانْ، يَا سِمْعَانْ. أَسْمَعْ. إِبْلِيسْ سَأَلْ إِذِنْ أَشَانْ يِجَرِّبْ إِيمَانْكُو وَ يِغَرْبِلْكُو مِثِلْ غَلَّةْ. 32لَاكِنْ أَنَا سَأَلْت لَيْك اللّٰهْ أَشَانْ إِيمَانَكْ مَا يَنْقُصْ. وَ وَكِتْ إِنْتَ بِقِيتْ بَتَّانْ قَوِي فِي الْإِيمَانْ، ثَبِّتْ أَخْوَانَكْ.» 33وَ بُطْرُسْ قَالْ: «يَا سَيِّدْنَا، أَنَا جَاهِزْ نَمْشِي مَعَاكْ فِي السِّجِنْ وَ نُمُوتْ كُلَ.» 34وَ عِيسَى رَدَّ لَيَّهْ وَ قَالْ: «يَا بُطْرُسْ نُقُولْ لَيْك، فِي اللَّيْلَةْ دِي قُبَّالْ الدِّيكْ مَا يِعَوْعِي، إِنْتَ تَنْكُرْنِي تَلَاتَةْ مَرَّاتْ وَ تُقُولْ مَا تَعَرِفْنِي.»
35وَ عِيسَى قَالْ لَيْهُمْ: «شُنُو قَصَّرْ لَيْكُو وَكِتْ رَسَّلْتُكُو فِي أُسْط النَّاسْ بَلَا جُزْلَانْ وَ لَا مُخْلَاةْ وَ لَا نَعَالْ؟» وَ رَدَّوْا لَيَّهْ وَ قَالَوْا: «شَيّءْ مَا قَصَّرْ لَيْنَا.» 36وَ قَالْ لَيْهُمْ: «لَاكِنْ هَسَّعْ نُقُولْ لَيْكُو خَلِّي النَّادُمْ الْعِنْدَهْ جُزْلَانْ وَلَّا مُخْلَاةْ يَكُرْبَهْ. وَ خَلِّي أَيِّ نَادُمْ الْمَا عِنْدَهْ سَيْف يِبِيعْ خُلْقَانَهْ أَشَانْ يَشْرِي سَيْف. 37أَشَانْ نُقُولْ لَيْكُو الْكَلَامْ الْيُخُصِّنِي فِي الْكِتَابْ وَاجِبْ يِتِمّ. مَكْتُوبْ: <حَسَبَوْه مَعَ الْعَاصِيِينْ.>#22:37 الكلام دا تلقوه في إشَعْيا 53:12. وَ أَكِيدْ الْكَلَامْ الْأَنْكَتَبْ فِي شَانِي قَاعِدْ يِتِمّ.» 38وَ أَشَانْ دَا، قَالَوْا: «سَيِّدْنَا، شِيفْ. عِنْدِنَا سُيُوفْ إِتْنَيْن.» وَ هُو رَدَّ لَيْهُمْ وَ قَالْ: «خَلَاصْ، كَفَاكُو.»
دُعا المسيح في جبل الزَيْتون
39وَ عِيسَى مَرَقْ مِنْ الْبَيْت وَ مَشَى مِثِلْ فِي عَادْتَهْ فِي جَبَلْ الزَّيْتُونْ. وَ تَلَامِيذَهْ مَشَوْا وَرَايَهْ. 40وَ وَكِتْ لِحِقْ الْبَكَانْ دَا، هُو قَالْ لَيْهُمْ: «أَسْأَلَوْا اللّٰهْ أَشَانْ التَّعَبْ مَا يِجَرِّبْ إِيمَانْكُو وَ يِتَلِّفَهْ.»
41وَ خَلَّاهُمْ وَ مَشَى مِنْهُمْ شِيَّةْ مِثِلْ زَرْقَةْ حَجَرْ. وَ سَجَدْ وَ بَدَا يَسْأَلْ اللّٰهْ 42وَ قَالْ: «يَا أَبُويِ، كَنْ دِي نِيّتَكْ، بَعِّدْ مِنِّي كَاسْ التَّعَبْ دَا. لَاكِنْ خَلِّي يَبْقَى مِثِلْ إِنْتَ تِدَوْرَهْ وَ مَا مِثِلْ أَنَا نِدَوْرَهْ.»
43وَ وَاحِدْ مِنْ مَلَائِكَةْ اللّٰهْ بَانْ لَيَّهْ وَ ثَبَّتْ قَلْبَهْ. 44وَ عِيسَى قَاعِدْ فِي تَعَبْ شَدِيدْ وَ سَأَلْ اللّٰهْ بِشِدَّةْ زِيَادَةْ. وَ وَغَرَهْ يِنَقِّطْ فِي التُّرَابْ مِثِلْ دَمّ. 45وَ قَمَّ مِنْ الدُّعَا وَ مَشَى لِتَلَامِيذَهْ. وَ لِقِيهُمْ نَايْمِينْ. وَ نَامَوْا أَشَانْ الْحِزِنْ كَسَّلَاهُمْ. 46وَ قَالْ لَيْهُمْ: «مَالْكُو نَايْمِينْ؟ قُمُّوا فَوْق. أَسْأَلَوْا اللّٰهْ أَشَانْ التَّعَبْ مَا يِجَرِّبْ إِيمَانْكُو وَ يِتَلِّفَهْ.»
المسيح كربوه
47وَ عِيسَى لِسَّاعْ مَا كَمَّلْ الْكَلَامْ دَا وَ نَاسْ جَوْا وَ النَّادُمْ الْأُسْمَهْ يَهُوذَا قَاعِدْ يُقُودْهُمْ. وَ هُو مِنْ التَّلَامِيذ الْأَتْنَا عَشَرْ. وَ قَرَّبْ لِعِيسَى أَشَانْ يِسَلِّمَهْ بِحُبّ. 48وَ عِيسَى قَالْ لَيَّهْ: «يَهُوذَا، تِدَوْر تُخُونْ إِبْن الْإِنْسَانْ بِحُبّ وَلَّا؟»
49وَ وَكِتْ تَلَامِيذ عِيسَى عِرْفَوْا الشَّيّءْ الْيِدَوْر يَبْقَى، هُمَّنْ سَأَلَوْا عِيسَى وَ قَالَوْا: «سَيِّدْنَا، نِدَاوُسُوهُمْ بِسُيُوفْنَا وَلَّا؟» 50وَ وَاحِدْ مِنْهُمْ قَمَّ ضَرَبْ عَبِدْ هَنَا كَبِيرْ رُجَالْ الدِّينْ بِالْسَّيْف وَ قَطَعْ أَدَانَهْ الزَّيْنَةْ. 51لَاكِنْ عِيسَى قَالْ: «خَلَاصْ! أَقِيفُوا!» وَ لِمِسْ أَدَانَهْ وَ شَفَاهْ.
52وَ عِيسَى حَجَّى لِكُبَارَاتْ رُجَالْ الدِّينْ وَ الشُّيُوخْ وَ كُبَارَاتْ الْعَسْكَرْ حُرَّاسْ بَيْت اللّٰهْ الْجَوْا يَكُرْبُوهْ. وَ قَالْ لَيْهُمْ: «دَا كِكَّيْف؟ جِيتُوا تَكُرْبُونِي بِسَيْف وَ عَصَاةْ دَا. أَنَا مُجْرِمْ وَلَّا؟ 53كُلَّ يَوْم أَنَا قَاعِدْ أَمْبَيْنَاتْكُو فِي فَضَايَةْ بَيْت اللّٰهْ وَ مَا كَرَبْتُونِي. لَاكِنْ اللَّيْل بَسْ وَكِتْكُو إِنْتُو أَشَانْ إِنْتُو قَاعِدِينْ تِتَابُعُوا مُلُكْ الضَّلَامْ.»
بُطْرُس نكر المسيح
54وَ خَلَاصْ، كَرَبَوْا عِيسَى وَ سَاقَوْه وَ وَدَّوْه فِي بَيْت كَبِيرْ رُجَالْ الدِّينْ. وَ بُطْرُسْ مَشَى وَرَاهُمْ مِنْ بَعِيدْ. 55وَ الْجَمَاعَةْ الْكَرَبَوْا عِيسَى أَوْقَدَوْا نَارْ فِي لُبّ الْحَوْش وَ قَعَدَوْا تِحِتْ. وَ بُطْرُسْ قَعَدْ مَعَاهُمْ. 56وَ خَدَّامَةْ وَاحِدَةْ شَافَتَهْ فِي ضَيّ النَّارْ وَ عِرْفَتَهْ. وَ قَالَتْ: «النَّادُمْ دَا، هُو كُلَ مَعَ عِيسَى.» 57وَ بُطْرُسْ نَكَرْ وَ قَالْ: «مَرَةْ زَيْنَةْ، أَنَا مَا نَعَرْفَهْ.»
58وَ بَعَدْ شِيَّةْ نَادُمْ آخَرْ شَافَهْ وَ قَالْ: «إِنْتَ كُلَ مِنْهُمْ.» وَ بُطْرُسْ قَالْ: «يَا رَاجِلْ، لَا. دَا مَا صَحِيحْ.»
59وَ بَعَدْ سَاعَةْ وَاحِدَةْ، نَادُمْ آخَرْ حَجَّى وَ قَالْ: «أَكِيدْ النَّادُمْ دَا هُو مَعَ عِيسَى، أَشَانْ هُو كُلَ مِنْ دَارْ الْجَلِيلْ.» 60وَ بُطْرُسْ قَالْ: «يَا رَاجِلْ، مَا نَعَرْفَهْ مَرَّةْ وَاحِدْ. كَلَامَكْ دَا شُنُو؟»
وَ قُبَّالْ مَا يِكَمِّلْ كَلَامَهْ، الدِّيكْ عَوْعَى. 61وَ الرَّبّ عِيسَى أَنْلَفَتْ وَ شَافْ بُطْرُسْ. وَ بُطْرُسْ فَكَّرْ فِي كَلَامْ الرَّبّ عِيسَى الْأَوَّلْ قَالَهْ لَيَّهْ: «اللَّيْلَةْ دِي قُبَّالْ الدِّيكْ مَا يِعَوْعِي، تَنْكُرْنِي تَلَاتَةْ مَرَّاتْ.» 62وَ بُطْرُسْ مَرَقْ مِنْ الْحَوْش وَ بَكَى بَكِي شَدِيدْ.
63وَ الرُّجَالْ الْقَاعِدِينْ يَحَرْسُوا عِيسَى قَاعِدِينْ يِشَّمَّتَوْا لَيَّهْ وَ يُدُقُّوهْ. 64وَ رَبَطَوْا عُيُونَهْ وَ قَالَوْا: «أَوْرِينَا يَاتُو الضَّرَبَكْ!» 65وَ حَجَّوْا لَيَّهْ كَلَامْ كَتِيرْ بِكَلَامْ مُرّ وَ عَيَّرَوْه.
المسيح قِدّام المجْلس
66وَ وَكِتْ الْوَطَاةْ أَصْبَحَتْ، كُلَّ شُيُوخْ الشَّعَبْ لَمَّوْا مَعَ كُبَارَاتْ رُجَالْ الدِّينْ وَ الْعُلَمَاءْ. وَ هُمَّنْ سَاقَوْا عِيسَى وَ وَدَّوْه قِدَّامْ الْمَجْلَسْ. 67وَ قَالَوْا لَيَّهْ: «كَنْ إِنْتَ الْمَسِيحْ، أَوْرِينَا!» وَ هُو رَدَّ لَيْهُمْ وَ قَالْ: «كَنْ نُقُولَهْ لَيْكُو كُلَ، أَبَداً مَا تِآمُنُوا بَيِّ. 68وَ كَنْ نَسْأَلْكُو سُؤَالْ، أَبَداً مَا تُرُدُّوا لَيِّ. 69لَاكِنْ نُقُولْ لَيْكُو مِنْ الْيَوْم إِبْن الْإِنْسَانْ يَقْعُدْ فِي كُرْسِي جَنْب اللّٰهْ الْقَادِرْ فِي نُصَّهْ الزَّيْنَايْ.»#22:69 الكلام دا تلقوه في زَبُور 110:1.
70وَ كُلُّهُمْ قَالَوْا: «وَ بِالْكَلَامْ دَا تُقُولْ إِنْتَ إِبْن اللّٰهْ وَلَّا؟» وَ عِيسَى رَدَّ لَيْهُمْ وَ قَالْ: «أَيْوَى، مِثِلْ إِنْتُو قُلْتُوهْ.» 71وَ حَجَّوْا أَمْبَيْنَاتْهُمْ وَ قَالَوْا: «سِمِعْنَا الْكَلَامْ دَا مِنْ خَشْمَهْ هُو ذَاتَهْ! مَا نِدَوْرُوا شَهَادَةْ آخَرَةْ.»
Nke Ahọpụtara Ugbu A:
لُوقا 22: ع.د.ت19
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
La Bible en arabe tchadien © Alliance biblique du Tchad, 2019