Lukah 9
9
Hi Yehu napaleawaha ɗama touma habulu maɗuah ɗa ana pahakoala-Na
(Mat. 10:5-15; Mrk. 6:7-13)
1Hi Yehu nakaɓuaja ɗama touma habulu maɗuaha ɗa ana pahakoala-Na. Manga hina woaja kullih ʄaka kuaha aɗa roatiha ɗa waddi tana ʄaka ɗapateggahuha ɗa tou waling ta kapoari. 2Manga napaleawa ʄellaha kaɗa halaku patomanya na lii witina agikineina hi Alla ana papareahakak ʄaʄi Raja, ʄaka kaɗa pateggahuha ɗa tou ɗama kadauku. 3Winaja hi Yehu, “Abi idimangu gagananya ami halaku. Abi idimangu takung, pa angu, kareara, riti, ʄaka koapi paheapang. 4Bayanya na moiri umma nama kaami enga nounguya, lapakung ami ɗujakunya na padoungu nou. 5Jaka bayanya na moiri umma dama kaami, miɗujakunyah na padoungu nou, kobahuya na kubbur waling ta ɓala wihim, tadananya hi Alla enga nahukuja.”
6Ɗa ana pahakoala-Na hi Yehu halakuɗanyaka ɗa libolluha ngaladukaɗ ɗa praing aɗa patomanya na Lii Kalung, ʄaka bayayaja ɗama kadauku aɗa pateggahuha.
Hi Herodeh naduꞌa ɗenganya nalarana hi Yehu
(Mat. 14:1-12; Mrk. 6:14-29)
7Hi raja Herodeh nama pareaha ta loaɗa Galilea, ana ranguhaka ngaladukaɗ ɗahawoluna hi Yehu ʄaka ɗa ana pahakoala-Na, ɗunna naduꞌang. Kaɗang einya nama panewi hi Yohanih Pembaptih morik ɓalinanyaka. 8Ei ʄellaja ɗama wiɗa, hi nabi Elia hunga ɓalinanyaka. Ɗa tou hawanguk eija ɗama wiɗa, hatou na nabi waling ta nabi-nabi hanaɗug nama morik ɓali. 9Hi Herodeh wina, “Kupaleawaka tou ana hellinanya na katikuna hi Yohanih. Jiaɗinguka natou nei, geara ikayaka? Na ɗangu naparangugu nalarana ɗunna.” Jiayaka hi Herodeh kaku paregga ɗenganya hi Yehu, hiwina.
Hi Yehu nawoaja pa angu ɗa tou ɗama lima ribuɗa
(Mat. 14:13-21; Mrk. 6:30-44; Yoh. 6:1-14)
10Aɗa ɓalika ɗa ana papaleawa-Na ɗalolukuya lahi Yehu, ngaladukana napalanga woluɗa. Manga hi Yehu kamaikanajak hiɗa halaku maraija, ɗakahikiru meaha waling ta tou ɗangu, ta mahangina na padoungu nama kahika ta lihi koata Bethaida. 11Jiaɗinguka natou ɗangu aɗa peanyaka pingi pahaganguɗa, keriɗanyaka hi Yehu. Nakaaha ʄaka napanewi lahi ɗuɗa witina hi Alla ana papareahakak ʄaʄi Raja. Jaka napateggahuha ɗama kadauku ta joangaɗa.
12Ana tik hatamaka na matalaɗɗu, ɗama touma habulu maɗua ɗa ana pahakoala-Na amija lahi Yehu ʄaka wiɗanya, “Ama, na padoungu ya nakahika. Reihi pakalunguya haɓalijaya ɗa tou, kaɗa manyerang pa angu ʄaka pingi padouɗa ta paraingu ʄaka ta deaha ta kaligiruna ya.”
13Jiaɗinguka napagapija hi Yehu, “Nyiamiha nama woaja pa angu.”
Ɗa ana pahakoala-Na hi Yehu wiɗanya, “Nyiama ɗama eingu lima paɗa ɗa kababa ʄaka ɗeiɗa ɗa kaboku. Peanya nam, nyiama mahalakuh lipa hii pa angu taguɗa ɗama ɗangu hei?” 14(Eija tou lima ribuha ɗa moani houlau, daɗi yapumaha ɗa mawinni ʄaka ɗa lakeaɗa.)
Hi Yehu winaja ɗa ana pahakoala-Na, “Paleawaha ɗa tou ɗangu kaɗa ngoɗu pakeahang, limam bulu tou, hangi kaɓuang.”
15Ɗa ana pahakoala-Na hi Yehu ɗapahalakuya napatikina hi Yehu. 16Manga hi Yehu naɗekiha limaɗa ɗa kababa ʄaka ɗeiɗa ɗa kaboku, natangara ta awang napamalanguya hi Alla. Manga hina hiwituha ɗa kababa ʄaka ɗa kaboku waingu limma-Na, manga hina woaha ta ana pahakoala-Na, hiɗa ɓarija ɗa tou ɗangu. 17Ngaladukaɗ ɗa angu huda aɗa bihu. Manga ɗa ana pahakoala-Na hi Yehu, ɗakeaha ɓaliha ɗapa angu ɗama reihi, ɗa ɗanguɗa habulu ɗubba boalaɗ.
Wina hi Petruh, hi Yehu ʄiayaka na Raja nama Pamanumara
(Mat. 16:13-19; Mrk. 8:27-29)
18Einya hangi laɗɗu hi Yehu atanga habayang meahana, ɗa ana pahakoala-Na ei ʄellaja ta padoungu nou. Manga hi Yehu hina tuturuha, wina, “Na hilu tou, Nyouwa geara-Wa?”
19Ɗapagapinya, “Einya ɗama wiɗa hi Yohanih Pembaptih. Ei ʄellaja ɗama wiɗa hi nabi Elia, hawanguk wiɗa hatou nabi hanaɗugaya nama morik ɓali.”
20Napatutur hi Yehu, “Manga nyiami wiki, Nyouwa geara-Wa?”
Napagapinya hi Petruh, “Ama ʄiawuka hi Karituh, na Raja nama Pamanumara.”#9.20 Hilu Wanukakakak wiɗanya Raja nama Pamanumara.Na hilu ʄawa ‘Mehiah’ paɗekiya waling ta hilu Ibrani. Ta hilu Yunani ‘Karituh’ wiɗanya. Ɗama ɗubba ɗa hilu hei ɗahamearaɗ ɗa ihiɗ, nama wina, “Napahailangu ʄaʄi Raja.”
21Hi Yehu napanewija ɗa ana pahakoala-Na, “Abi peakaɗiya nalara nei lahi ge-geara.”
Hi Yehu napanewinya nalara mawillana ʄaka nalara matina
(Mat. 16:21-28; Mrk. 8:31—9:1)
22Hi Yehu napangalanya napanewin, “Na Ana Tourara langa papaturananyaka hi Alla natagu ɗeitu bolluha ɗa mawilla, ʄaka ɗa gurr agama tou Yahudi, ɗa kapalang imam#9.22 Imamʄiayak natou nama ta paɗuana hi Alla ʄaka na tourara. ʄaka ɗa ɓei tou Yahudi daɗa kaamaya. Manga ɗahamatiya, ʄiaɗinguka ta laɗɗu katilluna namorik ɓali.”
23Napanewi hi Yehu ta ngaladukaɗa ɗa tou ɗama eija, “Natou nama buhang pakeri-Wa, nadenganyaha nahabuha wikin. Ɗunna laka nakolli paɗangu mawilla lapakung huda ana maeti, nakeri pangala-Wah, toungu natou nama ɗeituya na aiharikan ʄaka nahadia wikin ana mati. 24A gearakayaka nama maroba na morikuna kaɗang ana keri-Wa, enga nakolling morik-malodung. Jiaɗinguka natou nama patarunya na morikuna ta pinu-tana, enga namaroba na morikuna. 25Da eimang utun hatou tekka laka nakollinya ngaladukana na pinu-tana, adana kollikanyaka na morik-malodungǃ 26Gearakayaka nama makii ɗenga-Ga ʄaka na wini-Gu, na Ana Tourara enga makii ɗenga ʄellananya ta rahi aminya. Na Ana Tourara enga aminya baaru ta ɗalu kuahan, kuaha Aman ʄaka ɗa malaikat ɗama harri! 27Kutikigiminya: ta joangami ya, einya dama maeti adaɗi na itaya hi Alla ana pareaha.”
Ɗama touma tiluh ɗa ana pahakolana hi Yehu ɗa itaya na kuahana ta pinu letin
(Mat. 17:1-8; Mrk. 9:2-8)
28Langa hangi miggunaka akatutukayaka hi Yehu ana peakaha ngaladukaɗa hou, namaraija hi Petruh, hi Yohanih ʄaka hi Yakobuh ta pinu letin ana habayang. 29Atanga habayanguna hi Yehu na ngoarana napaheapang ʄaka na koapina naʄaʄi kaka habilang. 30-31Dapaliwaimaja ɗama touma ɗuaha, hi nabi Muha ʄaka hi nabi Elia ɗahunga pamaraija mawahang waling ta hurga. Ɗuɗa ɗapanewi ɗenganya hi Yehu witina namati-Na ta koata Yeruhalem, keriya nahawuku-Na hi Alla. 32Ta rahi nou, hi Petruh ʄaka ɗa oalin juɗaɗanya. Aɗa welaka, itaɗanyaka na mawahang lahi Yehu ʄaka ɗama touma ɗuaha ɗama dedi ɗenganya. 33Ɗama touma ɗuaha kama ɗujakunya awiɗa. Hi Petruh wina lahi Yehu, “Ama Gurru, duku dehaya nyiama ya a eigama, reihi kalunguya ama padedikak tillu mawu: hangi taguna hi Moiri, hangi taguna hi nabi Muha ʄaka hangi taguna hi nabi Elia.” (Hi Petruh ana panewi tounouna dana peꞌamanya gananya napatikina.)
34Tanga panewina hi Petruh, aminya na robang ana patodaja ʄiayak hiɗa mangeꞌat. 35Waling ta dawa robang nou ɗaranguya na lii nama wina, “Ya ʄiaya na Ana-Gu, nahapedi-Gu, mirangu-Ya.”
36Nadukak na lii nou, ɗa itaya hi Yehu aʄiameahaya. Ta rahi nou, ɗama touma tilluha ɗa ana pahakoala-Na daɗa lolukumaya lahi ge-geara gananya napalanga itaɗa.
Hi Yehu napateggahuya na lakeaɗa napatamang waddi tana
(Mat. 17:14-18; Mrk. 9:14-27)
37Ana wehanguka, hi Yehu ʄaka ɗama touma tilluha ɗa ana pahakoalan ɗa kaburrung waling ta letin, eija ɗa tou ɗama duku ɗanguha amija aɗa tomanya hi Yehu. 38Einya hatou na moani waling ta joanga tou ɗangu napatiwung, “Gurru, oha amuka tulukiganya na anagu, nama hatou waikina! 39Ana tamakak na waddi tana, nakiɗi ana patiwung ʄaka na ihina nakapogar lapakung na wura na aꞌan. Na waddi tana nou dana weakumangu papahellaya ʄaka napamawilla pangalaya! 40Kupa ohajaka ɗa ana pahakoala-Mu, kaɗa wugaganya na waddi tana awigu, ʄiaɗinguka daɗa piakumangu.”
41Nagapiya hi Yehu, “Nan nyiami tou dama wai-Nya hi Alla ʄaka nama jallur! Pirranguhingkak madeina aku oali pangalagim ʄaka aku tarung pahagagim? Idiya nim na anam!”
42Atanga idiɗanya na lakeaɗa ta hagan hi Yehu, na waddi tana nou napoꞌahunya na lakeaɗa hina kapogar. Jiaɗinguka hi Yehu napareahaya louhung na waddi tana nou, ʄaka hina pateggahuya na lakeaɗa, manga hina haɓalinya ta amana. 43Ngaladukaɗa ɗa tou ɗakaɓarra aɗa itaya na kuaha-Na hi Alla dapahangawi.
Hi Yehu napanewi ɓalinya nalara mawillana ʄaka nalara matina
(Mat. 17:22-23; Mrk. 9:30-32)
Ta ɗalu kaɓarraɗa ɗa tou ɗangu aɗa itaya ngaladukana namaʄaʄi nou, hi Yehu napanewi ta ana pahakoala-Na, 44“Pateti pakalunya ʄaka abi midenganya napatiki-Gu ya: Na Ana Tourara enga harakaɗanya ta kuaha pareaha pinu-tana. 45Jiaɗinguka ɗa ana pahakoala-Na daɗa peamanya nahatikin hi Yehu. Kaɗang hi Alla nakaɓuninya na ihi patikin. Jiaɗinguka ɗamageꞌat ʄella aɗa tuturu-Ya.
Gearaya nama reihi ɓakul?
(Mat. 18:1-5; Mrk. 9:33-37)
46Ta joanga ana pahakoala-Na hi Yehu, ʄaʄinanyaka nakangila larana agearaya nama reihi ɓakul ta joangaɗa. 47Jiaɗinguka hi Yehu langa peanajaka ɗapangaɗanguɗa, ʄiayaka hina ɗekiya na lakeaɗa merrah ʄaka napadediya ta karaha-Na. 48Manga hi winaja, “Natou nama kaaya natou merrahu toung na lakeaɗa nei kaɗang ana manni-Ga Nyouwa, ʄiayaka nama kaa-Wa. Jaka gearaya nama kaa-Wa nakaa ʄellaɗiya hi Alla nama paleawa-Wa. Kaɗang natou merrahu ta joangami, ʄiaya nama reihi ɓakul ta haga-Gu.”
Natou dama geꞌagimi, hangi noumi
(Mrk. 9:38-40)
49Hi Yohanih wina, “Moiri, nyiama ma itaya natou nama wuga moiri tana wainya na ngara-Mu. Jiaya hima heirunya, kaɗang ɗunna da walimana lahi iata.”
50Hi Yehu wina lahi Yohanih ʄaka ta ana pahakoalan hawanguk, “Abi heirumanya, kaɗang natou dama geꞌagimi, hangi noumika.”
Einya nama hangina na paraingu ta loaɗa Hamaria dana kaamaya hi Yehu
51Ana maranika na rahina hi Yehu namaɗeɗikunguna ta hurga, naɓotahuya ana halaku ta koata Yeruhalem. 52Jiayak hina paleawaha ɗama tou mapirraha halaku moulu, manga ɗatamanya nama hangin na paraingu ta loaɗa Hamaria kaɗa hadianya ngaladukana na taguna hi Yehu. 53Jiaɗinguka natou ta paraingu nou daɗa kaamaya hi Yehu, kaɗang langa peaɗanyaka hi Yehu ana hagang ta koata Yeruhalem ana lipa wuatu-haliya hi Alla.#9.53 Ɗa tou Hamaria ɗawuatu-haliya hi Moiri ta Leti Gerihim ta loaɗa Hamaria, ʄiaɗinguka ɗa tou Yahudi ɗa wuatu-haliya hi Moiri ta ɓei Umma Pingi Pahabayangun natou Yahudi ta Yeruhalem. Kaɗang ʄiayak ɗuɗa hi daɗa paꞌoali ɗengaja ɗa tou Yahudi nama linoungu ta loaɗaɗa aɗa lipa kaɓua-kawoting ta ɓei Umma Pingi Pahabayangun natou Yahudi ta Yeruhalem. 54Ta rahi nou, ɗa ana pahakoala-Na hi Yehu, hi Yakobuh ʄaka hi Yohanih ɗapeanya na laran nou, manga hiwiɗa, “Moiri mubuhakaɗinya, kama karei api mapurung waling ta awang kana pabuttaha ɗa tou hou?”
55Jiaɗinguka hi Yehu nagilakuja, hina kajoakaja. 56Namengaka nou, hi Yehu ʄaka ɗa ana pahakoalana hiɗa halaku ta paraingu hawanguk.
Napanungang nalara keriɗanya hi Yehu
(Mat. 8:19-22)
57Atanga halaku pangalanguɗa hi Yehu ʄaka ɗa ana pahakoala-Na, einya natou nama wina lahi Yehu, “Ama, kaku kerikiwu abayagu!”
58Napagapinya hi Yehu, “Ɗa ahu matabba eingu lianguɗa ʄaka ɗa mawurung eingu hiꞌuɗa ʄiaɗinguka na Ana Tourara pingi hajuɗa anaka da eimangu.” 59Hi Yehu wina ta tou hawanguk, “Keriwa Nyouwa.”
Jiaɗinguka nagapiya natou nou, “Ama, muwoaga kaloaga kaku ɓali letu lipa taanunya na amagu.”
60Hi Yehu winanya, “Ɗa tou dama manni-Ga mearana natou mati. Temmakaɗinya natou mati enga eingu mataanunya. Jiaɗinguka ou, halaku kamu patomanya bayayaka gikineina hi Alla ana papareahakak ʄaʄi Raja.”
61Ei ʄellanya natou hawanguk nama wina, “Ama, kaku keriwu wigu. Jiaɗinguka kamu woapaga kaloaga kaku peaka moulupaja ɗa oaligu ta umma manga hiku keri-Wu.”
62Nagapiya hi Yehu ta tou nou, “Natou nama pahalakuya na keranguna, ana gilakaka ta kaɗeangana na pakeranguna dana ʄaʄimangu. Tou ʄellan, natou nama kerangu taguna hi Alla, ana namukayaka na morik pinu-tana, napakerana dana ʄaʄimangu, ʄaka ɗunna dana tutumangu ana kerang lahi Alla.”
Nke Ahọpụtara Ugbu A:
Lukah 9: wnk
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2024 (Active), Wycliffe Bible Translators, Inc. All rights reserved.