Lukah 12
12
Hi Yehu napanamuɗaja abi patanogu tou deha ɗeata
(Mat. 10:26-27)
1Einya nama hangina na laɗɗu, duku ɗanguha ɗa tou ɗama paɗihi-ɗihikung lapakung ɗapaleti-leti wikiɗa. Atanga kaworunguɗa ɗa tou, napanewi hi Yehu ta ana pahakoala-Na, ‘‘Mipa-ating na bibit rotiɗa#12.1 Na hilu bibit rotita matan na hurat ya ʄiayak ‘napa irihuna’ tou waling ta kaɓuangu Parihi. Ɗa tou waling ta kaɓuangu Parihi ɗapahaɗang wikiɗ tou kalung, ʄiaɗinguka ɗa atiɗ ɗuɗa duku kaɓunakuh. Na deha ɗeataɗ ɗuɗa na irihuha ɗa tou ɗangu aɗa keriya nahawoluɗ ɗama irrak toungu bibit roti napahawunal waiɗa ɗa kababa. ɗa tou Parihi, ɗuɗa tou deha ɗeataha. 2Ngaladukana napakaman natou ana kaɓuninya baaru enga peaɗanya, ʄaka ngaladukana napakaman natou ana pakappaya baaru enga taweharun. 3Napapanewimi riɗung enga ranguɗanya ana wehang; ʄaka napakabutikumi ta kahilu ta korung patoaɗi, enga matalarungun.’’
Karaɗanya ʄaka pahalakuya nahatikina hi Moiri
(Mat. 10:28-31)
4“Ak oaligim ranguya napatiki-Gu! Abi mangeꞌatmaja ɗa oali tourarami. Ɗuɗa ɗapiaku aɗa hamatigiminya natuꞌatoumi, ʄiaɗinguka daɗa piakumangu aɗa hamatigiminya na deawam ʄaka na waddim. 5Kaku patekagiminya agearaya napamangeꞌatumi. Mangeꞌatunya hi Allah! Kaɗang hi Alla da tidiʄiamaya ana hamatigiminya natuꞌatoumi, ʄiaɗinguka ʄia ʄellaya nama kuaha ana leꞌaya na urra-dewamu ta api dabaɗa!#12.5 Api dabaɗa nahawiɗang ʄiayaka na Neraka apa hilu ʄawa. Ya ɗekiɗanya waling ta hilu padakulung Wanukaka nama wina “Api dabaɗa wei daka mihi.” Manninyay, ʄiayak nyiami napamangeꞌatumi.
6Lima ɓeiɗa ɗamanginu ɗahaɗagang ɗama hiingu ɗubba mata riti merrahu. Laka atounouɗina da heingu tekkamangu hadengana hi Alla. 7Na loagi ta katikumi na yapu bollu ʄellayaka, nou ʄiaya abi mangeꞌatmang; nyiami reihi pahiingu waling ta manginnuǃ’’
Abi mangeꞌatɗing pa-akuya hi Karituh ta haga maɗangu
(Mat. 10:32-33, 12:32, 10:19-20)
8“Namu pakalunyaː Natou nama aku-Wa ta haga maɗangu aʄiaha ɗama keri-Wa, na Ana Tourara enga aku ʄellanaja ta haga ɗa malaikatuna hi Alla. 9Jiaɗinguka natou nama kaɓali ta haga maɗangu aɗa keri-Wa, na Ana Tourara enga kaɓali ʄellanaja ta haga ɗa malaikatuna hi Alla.
10Natou nama panewi laran dama kalung ta Ana Tourara, napiak apoahi-poɗahunanya na halana; ʄiaɗinguka nama panewi laran dama kalung ta Hangahu Harrina hi Alla, dana piakumang apoahi-poɗahunanya na halana.
11Jaka a idikamika ta umma-umma ɗapingi pakaɓuang tou Yahudi, ʄaka a tuturumi ta haga tou nama hamanu kuaha, abi dadarmang gananyah nahatikim, a da, gikineina nyiami ami pagapi bolluja ɗa patuturɗagim. 12Kaɗang nyiami gananya nahatikimi, na Hangahu Harrina hi Alla enga peakanagim ta rahi nou.’’
Lii-pangearang natou poati nama katoꞌa
13Einya nama hatouna ta joanga tou ɗangu nama panewi lahi Yehu, “To gurr, mupeakaganya na tutaneigu nama pa aya kana woagaja hawanguk ɗahapoatin ɗapaɗujakuna na amama.’’
14Hi Yehu napagapinya, ‘‘Oaliʄaʄi, geara nama ɗeɗiku-Ga ʄaʄi tou maɓotah palakara ta joangami nyiami tou maɗua?’’ 15Manga ta tou ɗangu ɗama eija hou, hi Yehu winaja, ‘‘Pa-atiking ʄaka maromatung, nyiami abi mimirung hapoati nama ɗangu. Kaɗang namorikuna natou dana haraimanya ta hapoatina, laka nabinu-boang.’’
16Manga hi Yehu nalolukuya nalii-pangearang nei, ‘‘Einya natou poati nama eingu tanana. Narawinya hina koli paɗaanya na ihina. 17Natou poati pangaɗangnanyaka ta ati ɗaluna, wina, ‘Da hillu eimanguha padou pingi paɓijaluguja ngaladukaɗa ɗa ihi parawigu. Gikineikaguka?’ 18Manga wina ʄella ta atin, ‘Reihi dehaya, ɗamanaingu paɓijal waigu kuweharuha manga hiku wolu mareihi ɓakul. Houhaka ak ɓijal bolluha ɗapa angugu ʄaka ɗangawugu hawanguk. 19Mengaka nou, hiku panewi ta ihi wikiguː Ou mukanyuruǃ Dukaɗa ɗama kalung eingumuka ʄaka daɗa ɗukamang lapakung bia-bia douɗa. Ya atounak hangahuya, anguya, inunguya ʄaka arunya na morikumu nama binu-boangǃ’ 20Jiaɗinguka hi Alla winanya, ‘Ou tou katoꞌaǃ Ta riɗung ya matimunyaka, manga gearakaka nama kollija ɗahapoatimu ɗapakehamu?’
21Tounounak namaʄaʄi ta tou nama kehaya napoati tagu wiki meahana ta pinu-tana, a dana manyerakanyaka napoati nama paɗenitekkang ta hagana hi Alla.’’
Abi dadarmanya namorikumi ʄiaɗinguka manninya hi Alla
(Mat. 6:25-34)
22Manga hi Yehu napanewi ta makeriya, “Kaɗang nou ʄiayak hi wigugim, ‘Abi dadarmang ta morikumi, agananya naha aami, agananya nahawaimi.’ 23Kaɗang na morikumi reihi pahiinguya waling ta pa angu, ʄaka na ihim reihi pahiinguya waling ta ngawu. 24Patetija ɗa gaga dama tadung, dama maruhi, da ei ʄellamang paɓijal waiɗa. Jiaɗinguka hi Alla naraɗajaǃ Nyiami reihi pahiingumi waling ta mawurung houǃ 25Gearaya ta joangam nyiami ta ɗalu dadaruna nama piaku patabaya namorikun hapaga? 26Nalaran nama merrah ak nou, a dami piakukaka pawoluya, manga gahimi dadarunya nalaran hawanguk? 27Patetija ɗa bunga bakung aɗa tubu, daɗa keramang, daɗa tinumang. Jiaɗinguka hi raja Halomo nama poati hingu dana waimang koapi mamanadang toungu manadangun na bunga nouǃ 28Na rutu nama tubu ya laɗɗu ta mareɗa na walla manadang, ʄaka barwehang naleꞌaya tou ta api. Jiaɗinguka hi Alla napamanadanya na rutu nou duku dehaya! Parei-reihing nyiami! Jiaɗinguka nyiami dama manni tekkamanyaǃ 29Jiayak, abi dadarmang, abi pangaɗaɗinya nalaran na angumi ʄaka na inungumi. 30Nalaran nama toungu nou, natou dama peanya hi Alla ʄiaya nama kaleli nounya. Na Amam napeanyaka gananya dama eingum, abi dadarɗingu. 31Jiaɗinguka nyiami pahalaku letuya napawukuna hi Alla, ʄaka hi Alla nataba bollugiminya nakura-jakangumi.’’
Poati ta hurga
(Mat. 6:19-21)
32‘‘Abi mangeꞌatɗing nyiami nama hakuɗukimi ʄaka nama hamawul! Kaɗang na Amami ʄiayak na Raja nama karawami ʄaka namawoagim kanyuru-kanaga. 33Ɗagajah ɗahapoatim ʄaka woaha ɗa ritiɗa ta tou milla. Wolu tagum padou riti dama maꞌu, nou ʄiaya napoati nahaɓijal ta hurga. Napoati nou dana marobamang kaɗang dana piakumanya ana ɗekiya makeaɗu ʄaka dana aamanya keaba. 34Kaɗang bayaja ɗahapoatim a eija, nou ʄellaya na atimǃ’’
Hi Yehu napeaka-panungaja ɗa ana pahakoala-Na kaɗa maromatung wikiɗa
35-36Hi Yehu napangalanya napapeaka-panunganguna, wina, ‘‘Hadia wiki pangalang ami payeamanya hi Moiri ta riɗung-laɗɗu, meara houɗa ɗa ata ɗama hadia pangalang aɗa naɗinya namoiriɗa ana ɓali waling ta tunu lilawi. Ana ɓalikak ʄaka ana kadokukkanyaka na ɓinna, ɗageaha aɗa wehaya. 37Kanyuruɗanya ɗa ata hou ɗapatomang aɗa naɗinanya na moiriɗa ana ɓali. Wigugimː na moiriɗa nahadiaka ʄaka napaleawaha ɗa atana ngoɗu, manga hina payeamaja pa angu pa inung. 38Jaka kanyuru ʄella ɗa ata hou, ana tomaja namoriɗa atanga hadiaɗa, laka paɗua kariɗunguya laka rainɗamuya a aminyaǃ 39Namuya napatiki yaǃ Ana peakanyaka namori umma na rahi aminya na makeaɗu, enga naʄawaya na umman ka abi natamanya makeaɗu awina. 40Tonou ʄellana nyiamiː mihadia pangalanguh, kaɗang na Ana Tourara enga aminya ta rahina dahapeami.’’
Ɗa ata ɗama manudu ʄaka dama manudu
(Mat. 24:45-51)
41Napatutur hi Petruh, “Moiri, nalii-pangearang nou amu pa arunya lahi nyiamay a da ta ngaladukaɗa ɗa tou?’’
42Nagapiya hi Moiri, “Gearaya na ata nama manudu ʄaka nama manyakat? Ɗunna ʄiaya natou napaɗeɗikuna namoirina kana ɓeija ɗa oalin hawanguk ana woang pa angu ta rahin. 43Nakanyuru na ata nou ta ɗalu ɓalina namoirin, ana tomanya atanga pahalakunanya napakeranǃ 44Nyouwa wigugimː Namoirina nou enga napamanninaja ngaladukaɗa ɗahapoatin ta ata nou. 45Jiaɗinguka a winakak na ata nou ta ati ɗalun, ‘Namoirigu madeiha ana ɓali,’ manga hina paluha ɗa oali atan mawinni moani ʄaka ɗunna na angu-inung lapakung hina mawuk, 46ʄiayak namoiriɗa ana ɓalikaka ta laɗɗu ʄaka ta rahi dahapaliwaingu. Jaka namoiriɗ enga natau te-tekkaya na ata nou ʄaka nawoluya nama hamearang ta tou dama manudu lahi Alla.
47Na ata nama peanya napabuhana na moirin, ʄiaɗinguk a dana haɗiakak ʄaka a dana pahalakukayak napabuhana na moirin nou, enga na palu te-tekkaya. 48Jiaɗinguk na ata dama peanya napabuhana na moirin, manga hina pahalakuya nama hala enga palunanya, ʄiaɗinguka nahaleala na palunanya. Kaɗang natou napalanga woa paɗangu, enga naɗangu nahakareiɗanya. Jaka natou napalanga manni paɗangu, enga naɗaʄellang nahakareiɗanya.’’
Naʄaʄi napageꞌang witina napapeakanguna hi Yehu
(Mat. 10:34-36)
49“Na ami-Ga pahunga gunya nama mutungu#12.49 Tou reihi peangu ta Hurat Bakul wiɗa, na api nou na ihin na, hi Alla enga nahukuja ɗa tou dama manning ʄaka ɗa tou doku-jala. ta pinu-tana. Reihi dehaya na api pageꞌang abaɗi erikunaǃ 50Einyaha namawilla napahaga-Guh nama buatu. Jaka na ati-Gu dana kaɗaharmang adaɗi Kutomaya na rahi mawilla napahaga-Gu nou. 51Napapangaɗam nyiami a ami-Ga ta pinu-tana idigunya na moili ati? Daꞌah, da moili atimaya, ʄiaɗinguka pageꞌanguya. 52Waling ya, enga eija ɗa rongu umma ɗama beara. Tou matillu geꞌang tou maɗua, a da tou maɗua geꞌang tou matillu. 53Na amana enga geꞌananya na anan moani ʄaka na anan moani enga geꞌananya na amana. Na inana nageꞌanya na anan mawinni ʄaka na anan mawinni nageꞌanya na inana. Na yanuna enga geꞌananya na wiana ʄaka na wiana enga geꞌananya na yanuna.’’
Katutuya nataduk doung ya
(Mat. 16:2-3)
54Hi Yehu napanewi ta tou ɗangu, “Nyiami ami itakayaka na robang ana ɗeahang ta laɗɗu malung, nyiami wim, ‘Enga uranguna.’ Jaka na uratekkang. 55Ami paɗakanyaka a aminya na ngillu waling ta toara tahik, nyiami wimi, ‘Na laɗɗu na wajal.’ Jaka na laɗɗu na wajal tekka. 56Nyiami tou dama hawali atiǃ Nyiami nama manyuranya ami itaya na awang ʄaka na tana. Jiaɗinguka gawali hidami peanya na ihina napakaɓarraɗengang napawoluna hi Alla paliinya lahi Nyouwa ta dalar ya?’’
Moili ati ɗenganya nageꞌa
(Mat. 5:25-26)
57“Ga nyiami dami ɓotahu wikiliya nama paɗening? 58A eikanguka tou nama kallami ta umma pingi paɓotah palakara,#12.58 Hilu ʄawa ‘pengadilan’, ta hilu Wanukaka ‘umma pingi bapotah palakara.’ manyeranya ɓinnan kaem kalu ɓaling, atanga meara engamih ta paɗua larangi. Ada tonoukanak, baaru nadutumi ta haga nama ɓotah palakara ʄaka nama ɓotah palakara nou enga naharakagim ta ʄawabani, ʄaka naʄawabani napatamagim ta gallu. 59Wigugimǃ Nyiami dami louhumangu waling ta gallu adaɗi mimengapaha ɗa daddam.’’
Nke Ahọpụtara Ugbu A:
Lukah 12: wnk
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2024 (Active), Wycliffe Bible Translators, Inc. All rights reserved.