Luk 9
9
Jisɔs ato Afɔsil wobo na aba
(Mat 10:5-15; Mak 6:7-13)
1Ngara yi Jisɔs abeng asɔgba wobo na aba amakɔn, akɛ mbɔ nsam na nɔyɔ sa akama abibi atughu atab anɛ ba aya, 2ka ato mbɔ sa amo ama atɔ anɛ ateb Oton Ɔsɔwɔ atab anɛ ba aya. 3Jisɔs atɔ mbɔ: “Ki ton jaji ka nɛjɛn ni sɛ ɛtamtam, sɛ ɛba, sɛ ejonɛnɛghɛ, sa akpugha, sɛ ɛnɛmɛ ji ɛyanga. 4Kpere nju yi ɛnama, jɔ fa tɛtɛ ngara asi yi ɛtam ka ɛjɛbɛ ji. 5Ka anɛ arina war kpere, ko ebubu ajaa ɛyɛrɛ ka ɛtam esighi ɛjɛbɛ mbɔ, si etuu ɔtɔng akɛ mbɔ.” 6Ka atam amo ajɛn ka bɛjɛbɛ bɛjɛbɛ, arag nyɛbɛ ɔka Ɔsɔwɔ ataba anɛ ba aya ka kpere mfo.
Ɛrɔd ayog ateb Jisɔs
(Mat 14:1-12; Mak 6:14-29)
7Ɛrɔd Antifas nnɛ isi ka Galili ayog mbe wɔɔ bi Jisɔs ajɔ ane. Ka ɛjɔ ejo eburu ɛkiɛ, atebsi anɛ bamɔng ajɔ arag si Jɔn aminyimi afɛnɛ ajɔ ka nekpen, 8bamɔng asi Ɛlija amuru, ka bantingi titi asi ekokono mbono Ɔsɔwɔ wiwi amɛ fɛnɛ njam ka nekpen. 9Ka Ɛrɔd arag, “Mmɛ nkɛbɛ isi Jɔn. Yɛnnɛ yɔ, yi nyog mbe bi nteb?” Ka Ɛrɔd alɔg sa ayɛ Jisɔs.
Jisɔs akɛ anɛ ɛgɔr atanarɔn ejonɛnɛghɛ.
(Mat 14:13-21; Mak 6:30-44; Jɔn 6:1-14)
10Ngara yi ba afɔsil akru, atɔ Jisɔs ji mbɔ ane, Jisɔs akɔ mbɔ ka ayama nimbɔ aru ka ɛbɔngɔ amo ka ɛjɛbɛ ji abeng si Bɛsaida, 11ka si ɛbɔngɔ eyogho atɔngɛ. Akpere mbɔ ka arag na mbɔ ateb Oton Ɔsɔwɔ, atab anɛ ba aya.
12Ka ngara ntoma njon asɔgba wobo na aba aba ama kɔrɔ Jisɔs ka arag, “To ɛbɔngɔ jifa emo ka bɛjɛbɛ na bɛgbɛ bi ere kperekpere ama sɛb ejo ja anɛghɛ na mfo ba aka, atebsi anɛ arem ka mfo bifa.”
13Akpɛ, “War afɔnɔ ma kɛ mbɔ ja anɛghɛ.”
Mbɔ akpɛ, “Ekpe mgba brɛk ɛrɔn na nnya alab ɛba nanting gbɛrɛsi emogho eme go ejonɛnɛghɛ ɛkɛ ɛbɔngɔ ji wɔɔ.” 14(Abunu nasi ɛgɔr atanarɔn ajɔ fa.)
Ka Jisɔs atɔ asɔgba ɛyɛ, “Tɔ mbɔ ajɔ nji anɛ atan aba na wobo ka kpere ɛbɔngɔ.” 15Asɔgba ɛyɛ ane sa atɔ mbɔ, ka kpere nnɛ ajɔ nji. 16Akɔ mgba brɛk ɛrɔn na nnya alab ɛba abri ka bɔsɔ, akag njɔ akɛbbɛ brɛk na nnya alab ka abɛghabɛk. Akɔ akɛ asɔgba sa akɔ abanga kɛ anɛ. 17Mbɔ wɔɔ anɛ ayuru, ka asɔgba asang abɛk ya asa ason ɛtaa wobo na baba.
Fita arag si Jisɔs are Kras
(Mat 16:13-19; Mak 8:27-29)
18Mkpɛ yiyi Jisɔs ajɔ akag njɔ nanting ka asɔgba ɛyɛ ajɔ fa nanɛ. Jisɔs abɔmmɔ mbɔ, “Ɛbɔngɔ akana si mmɛ yɛnnɛ yɔ?”
19Mbɔ akpɛ, “Bamɔng asi Jɔn Nwura alab; baga asi Ɛlija; baga titi, asi mbono Ɔsɔwɔ wiwi ya ɛmɛnɛ amɛ fɛnɛ njam ka nekpen.”
20Ka Jisɔs abɔmmɔ mbɔ, “Ka war ɛrag nang?” Fita akpɛ, “Wɔ ore Kras yɔ Ɔsɔwɔ ato.”
21Jisɔs atuu mbɔ atɔng sa aki tɔ nnɛ wawi. 22Ka arag, “Mmɔ a Munnu ayɛ niyiri ka ebe mbe ka abokogho, aton a baɛjɔ Ɔsɔwɔ na bekpena ejighi atɛnɛtɛn, ka ayonɛyon ka afo asa anyimi ajɔ ka nekpen.”
23Ka Jisɔs atɔ mbɔ wɔɔ: “Kpere nnɛ ya arag sa atɔɔngɔm, atɛn nɛnɛ ka atab ete njang ɛnɛ ɛjɛ atɔɔngɔm ka ofo ofo. 24Ka kpere nnɛ ya asɛb na sa anagha nekpen ɛnɛ, ɛtanɛtan, ka kpere nnɛ ya asigha abɔ ka nekpen ɛnɛ atebem, afɔ nekpen niˈnkankan. 25Bagha nnɔbɔ ya ajɔ akɛ nnɛ sa anɛghɛ nsing eying wɔɔ, atanna nekpen ɛnɛ? 26Kpere nnɛ ya abɛ nsɔn arim tɔɔngɔ na ano ɛyaa, Mmɔ a Munnu atam atɛnɛ ngara yi abagha ka negere ɛnɛ na negere ni nsɛ na ni afɔ baɛnjɛl.
27“Ntɔa kɛdɛdɛghɛ, anɛ bamɔng ba ayim fa nuku akpɔghɔm ka ayɛ oton Ɔsɔwɔ.”
Jisɔs ayanga ka biji
(Mat 17:1-8; Mak 9:2-8)
28Sa afo anaghanɛ asingsing yi Jisɔs arag mbe bi, amo na Fita, Jɔn, na Jemsi ayar na mbɔ ka bɔsɔ nkonkon sa ama kag njɔ. 29Sa ajɔ akag njɔ, nibri ɛnɛ na abɔ́ ɛyanga, aya nasi mgbambri anyanga. 30Abunu aba, Mosis na Ɛlija, aru ama yimi Negere ɛyagha, aragha na Jisɔs. 31Arag ateb nayama ɛnɛ ka eying, ni akpa ba na ni ɛmɛwɛmɛ ka Jɛrusalɛm. 32Fita na anɛ ba ajɔ nanɛ ajɔ anannan, ka ngara ya anyimi, ayɛ ɛfɔngɔ na abunu aba ayim nanɛ. 33Sa abunu ba aba ayama asighi Jisɔs, Fita atɔɛ, “Ntaa, ɛnɔnɔb ɛjɔ na fa. Nɔngɔ warr esii ɛkpakpa basa ɛkia jiji, ɛkɛ Mosis jiji, ɛkɛ Ɛlija jiji.” (Fita arigbɛrɛ ji ajɔ arag.)
34Ngara yi Fita akpagha aragha, ngualab aru abono mbɔ, ka ɔbɔn ene mbɔ si ngualab abono mbɔ. 35Ntɔng aru ka ngualab, arag, “Fa Mmɔ ɛwaa, yɔ mma sang; yongo atɔng kiɛ.” 36Ngara yi ntɔng ama rag, afan ayɛ Jisɔs nanting. Asɔgba aritɔ nnɛ wawi ka ngara yi ji mbɔ ayɛ.
Jisɔs ayighi mmɔannu ebibi etughu
(Mat 17:14-18; Mak 9:14-27)
37Ɛtɔɔngɔ ofo, Ngara yi Jisɔs na asɔgba ɛyɛ asa asɛnɛ ka nkonkon, ntakpa ɛbɔngɔ amo akɔrɛ. 38Nnɛ aru ka ɛbɔngɔ abenge, “Nkpekpene, mmagɔrɔ fɔ ɛkpɔgisi ɔkɛ mmɔannu ɛwaa, mkpe ɛyɛ nanting. 39Ebibi etughu ɛboɛ abenge; eneɛ agbɔ mgbɔgbɔghɔ ɔfan eruɛ ka nnyɔ. Agbɔhgɔ kpere ngara eteɛ bɛnɛn ɛyagha yɛ ɛrɛmɛ kɛ. 40Ngɔrɔ asɔgba ɛya sa ayighɛ, ka arima.”
41“War ba erifɔ ntama na akorabisi anɛ,” Jisɔs akpɛ, “Njɔ mba arab nang nanɛrɛ ka ɛfɔ ntama?” Ka Jisɔs atɔ munnu yɔ, “Bana mmɔannu ɛwa fa.” 42Ka si mmɔannu yɔ abagha sa amakɔrɔ Jisɔs ebibi etughu eboɛ agbɔ mgbɔgbɔghɔ. Ka Jisɔs atɔ ebibi etughu eru esighɛ, atab mmɔannu yɔ akɔɛ akɛ nsɛ. 43Ka anɛ wɔɔ biji ɛkpɔ mbɔ ka mbe bi Ɔsɔwɔ ane.
Jisɔs arag nuku ɛnɛ ka mkpɛ ɛba
(Mat 17:22,23; Mak 9:30-32)
Sa anɛ biji ajɔ ɛkpɔ mbɔ ka mbe bi Jisɔs ane wɔɔ, atɔ asɔgba ɛyɛ, 44“Yongo atɔng nnɔbɔnnɔbɔ ka ji mkpa war ntɔ: Mmɔ a Munnu akpɛ sighi abɔ akɛ anɛ baujing.” 45Ka erimbɔ ribi ji Jisɔs ajɔ arag. Abar mbɔ sɔng aki gbɛrɛ si eru, ka ajɔ abɛbɛ nɔbɔmmɔ Jisɔs si eru.
Yɛnnɛ aga yar
(Mat 18:1-5; Mak 9:33-37)
46Nfab ajam ka ɛbɔngɔ asɔgba Jisɔs yɛnnɛ aga yar. 47Jisɔs, ya anyi nkana mbɔ, akɔ mmɛnsɛ ama yimɛ ka mgbanga. 48Ka atɔ mbɔ, “Nnɛ ya akpere na mmɛnsɛ ka mbeng ɛyaa akpere mmɛ; ka nnɛ akperemna akpere nnɛ ya atom. Nnɛ ya agasɛnɛ ka ɛbɔngɔ ɛjɛrɛ wɔɔ yɛ ya aga yar.”
49Jɔn arag, “Ntaa,” “Ɛyɛ munnu ayighi anɛ abibi atughu ka mbeng ɛya ka ɛlɔg sɛ ɛgbangɛ, atebsi ka ɛbɔngɔ ɛjɛrɛɛ arem.” 50Jisɔs arag, “Kiɛ gbanga, nnɛ ya ayim nana are nana.”
Anɛ ka ɛjɛbɛ ji ere ka ɛkpeghe Sameria ari kpere Jisɔs
51Si ngara akpere yi Jisɔs afɛnɛ njam ka etek Ɔsɔwɔ, Jisɔs akana sa amo ya Jɛrusalɛm. 52Ato bɛrɔghanto agbɔmba, amo ka ɛjɛbɛ Sameria ama tongo mfo anɔngɛ; 53ka anɛ ariɛ kpere atebsi ajɔ amo ka Jɛrusalɛm. 54Ngara yi asɔgba ɛyɛ Jemsi na Jɔn ayɛ yi ariɛ kpere, abɔmmɔ, “Ntaa, ɔsɛbsi ene ngon eru ka nobo ɛsɛnɛ efi mbɔ#9:54 Akokono awɛr yantingi akpɛnɛ si nasi Ɛlija ane. ?” 55Ka Jisɔs amanga ayam mbɔ#9:55 Akokono awɛr yantingi akpɛnɛ si Mmɔ a Munnu ariba ama rɔbɔ nekpen a anɛ, aba ama naghanagha.. 56Ka yɛ na asɔgba ɛyɛ amo ka ɛjɛbɛ jintingi.
Ekoro nɔtɔɔngɔ Jisɔs
(Mat 8:19-22)
57Sa ajɔ ajɛn ka mba, munnu wiwi atɔ Jisɔs, “Ntɔɔnga tɔɔngɔ mfo mfo bi omo si nsɔgba ɛya.”
58Jisɔs akpɛ, “Akpinya akpe abe ya aka ososok ɛfɔ buju, ka Mmɔ a Munnu etek akpem ja abo isi.”
59Jisɔs atɔ munnu yɔntingi, “Tɔɔngɔm.”
Ka munnu yɔ akpɛ, “Ntaa, nɔngɔ ntɔghɔ mo ma nsam nsɔjaa.”
60Jisɔs atɔɛ, “Nɔngɔ anɛ ba arigbɛrɛ Ɔsɔwɔ asɛmmɛ akuanɛ mbɔ, ka wɔ sɔng ɔmɔ tɔ anɛ ateb oton Ɔsɔwɔ.”
61Yɔga titi arag, “Mmɛ ntɔɔnga tɔɔngɔ, Ntaa; ka nɔngɔ ntɔghɔ fɛnɛ njam ma ntɔ anɛ ɛbaa war ɛjɔ e.”
62Jisɔs akpɛ, “kpere nnɛ ya akpan ɛjam ka ero abri njam ka ngara yi yiyiyiyi afumum ka oton Ɔsɔwɔ.”
Nke Ahọpụtara Ugbu A:
Luk 9: NDD Nta
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
©️2022 Luke Initiative for Scripture Translation