Yohana 9
9
Yesu ˆakamuhöri omohuku
1Mbe, orosiko rumu Yesu naare araheta, akamorighi omooto umu uno are omohuku korwera kwibhoru kooche. 2Abhaanabheegha bhaache bhakamobhoori bhakabhugha, “Oo Omweghi, omooto uno ꞉niibhwiru omohuku gho ghiri e masari gha we? Gha mooto uno hamu gha bhiibhori bhaache?” 3Yesu akabhagharokeri akabhugha, “Uno tabheere omohuku gho ghiri e masari ghaache, hamu amasari gha bhiibhori bhaache. Amare ꞉niibhwiru omohuku, kubha changuru che Ryobha cherighibhu cheraköra emeremo mo‑riimanya reeche. 4Eriibhagha hakeere omwishe, ntokwëndëru ghuköra emeremo ghe Ryobha rino rentomiri. Obhotiko mbokuucha, hano omooto ataaghotora ghuköra emeremo ghiyo. 5Eriibhagha nekeere neenyi mo‑se ino, eni n‑obhwero bho se.”
6Hano Yesu abhughiri ghayo, aghatu amatë haase mwiröbhë, aghakönya eriitötö na amatë, akahaka eriitötö mo‑miisho gha mohuku uyo. 7Niho akamobhoorera akabhugha, “Nooghi wishaabhe obhosho mwishima re Sirowamu.” Sirowamu egheteemoro keeche, “N‑uno atomuru.” Mbe, omohuku uyo aghaye, aghishaabha obhosho, akahöra, aghagharuka awaache ararighi.
8Niho abhaatani bhaache na abhande bhano ꞉bhaare bharamorighi ekeenyuma hayo arasabhasabha, bhakabhugha, “Kana, omooto uno taanyi wuure are ariikara haase na ghusabhasabha?” 9Abhande bhakabhugha, “Niwe.” Abhande bhakabhugha, “Taanyi iwe, amare mbatuubhiine chwee.” Amare iwe akabhabhoorera akabhugha, “M‑mahëënë, n‑eni.” 10Mbe, bhakamobhoori bhakabhugha, “Erabha mahëënë n‑iye, amiisho ghaacho nibhu ghaköriri ghakarighi?” 11Akabhagharokeri akabhugha, “Omooto wuure akobherekeru Yesu, ꞉naakönyiri eriitötö, akahaka mo‑miisho ghaane, akamboorera akabhugha, ‘Nooghi wishaabhe obhosho mo‑riishima re Sirowamu.’ Niho neeghaye, neghishaabha, neghasëëma korighi.” 12Ibho bhakamobhoori bhakabhugha, “Omooto uyo hayi anyi?” Iwe akabhagharokeri akabhugha, “Eni ntyeche.”
Amabharisaayo ˆbhakamobhoori uno are omohuku
13Bhakamara abhaato bhaare bhakamohira omooto uno are omohuku hayo ekeenyuma kwo Mabharisaayo. 14Orosiko runo Yesu ꞉akönyiri eriitötö na komuhöri omohuku uyo ndoore orosiko ro Riikane. 15Mbe, Amabharisaayo bhoose bhakamobhoori omooto uyo bhakabhugha, “Nibhu uköriri okarighi?” Akabhagharokeri akabhugha, “Omooto umu ꞉naahakiri eriitötö mo‑miisho ghaane, neeghaye neghishaabha obhosho, ibheere nekorighi.” 16Niho Amabharisaayo abhamu bhakabhugha, “Omooto uno taruure kwo Waryobha, gho kubha naghusari emeghiro ghe Riikane.” Amare abhande bhakabhugha, “Kana, nibhu ekubha kwo mooto o masari ghuköra ebhyërëkërëri kinya bhiyo?” Mbe, bhakaahukana abheene kwo bheene. 17Amabharisaayo bhakamobhoori wiiki bhakabhugha, “Omooto uno akuhöriri amiisho ghaacho, obhugha bhu ighoro yaache?” Iwe akabhagharokeri akabhugha, “Eni ndighi omooto uyo n‑omurööti o Ryobha.” 18Amare bhataakumiri amangʼana ghaache, kubha omooto uno akorighi, n‑uno ekimbërë are ibhwiru omohuku, akamara akarighi. Mbe, bhakabhabherekera abhiibhori bhaache, 19bhakabhabhoori bhakabhugha, “Kana, omooto uno n‑omoona waanyu? M‑mahëënë kubha ꞉niibhwiru mohuku? Ibheere nibhu aköriri akarighi?” 20Abhiibhori bhaache bhakabhagharokeri bhakabhugha, “Mahëënë itu ntweche kubha uno n‑omoona wiito, wiiki ꞉niibhwiru anyi omohuku. 21Amare toteeche kebhuno asëëmiri korighi, wiiki totamweche omooto uno amuhöriri amiisho ghaache. Momobhoori omwene, gho kubha iwe n‑omontomonkoro, naghotora ghosiikëra omwene.” 22Abhiibhori bhaache ꞉mbaabhughiri hangʼu gho kubha mbaare bharatiina abhakangati bhaare, gho kubha abhakangati ꞉mbiishereriini kubha, omooto wowoose uno aghwishereri kubha Yesu n‑Kirisito, mbakomuhëëbha mo‑risinaghooghi. 23Nikyo ghighëriri abhiibhori bhakabhugha, “Momobhoori omwene, gho kubha iwe n‑omontomonkoro, naghotora ghosiikëra.”
24Gho ghayo, abhakangati bha Bhayahuuti bhakamobherekera mara e kabhere omooto uno are omohuku, bhakamobhoorera bhakabhugha, “Noobhughe obhuhëënë ambërë e Ryobha! Itu ntweche kubha omooto uyo akuhöriri, n‑omuköri o masari.” 25Iwe akabhagharokeri akabhugha, “Eni ntyeche aribha omooto uyo n‑omuköri o masari, amare nyeeche egheghiro kimu hangʼu, kubha n‑omohuku neere, amare ibheere nekorighi.” 26Wiiki bhakamobhoori bhakabhugha, “Kana, omooto uyo n‑ghento ke aghuköriire? Nibhu akuhöriri amiisho ghaacho?” 27Iwe akabhagharokeri akabhugha, “Eni nimariri kobhabhoorera amangʼana ghayo, amare motantëghëëriire. Mbe, ngwake mokwënda nebhabhoorere wiiki? Kana, na niinyu mokwënda kubha abhaanabheegha bhaache?” 28Amare ibho bhakamotoka bhakabhugha, “Iye niiye omoonamwegha waache! Amare itu n‑abhaanabheegha bha Musa. 29Ntweche kubha Eryobha ꞉ndeesiikiire na Musa, amare omooto uyo toteeche hayi arweriire.” 30Akabhagharokeri akabhugha, “Eni ˆnekaroghoora chwee! Inyu moteeche hano aruure, amare iwe nahöriri amiisho ghaane! 31Ntweche kubha Eryobha retahooghu amasabhi gha bhaköri bha masari, amare ndehooghu omooto wowoose wuure akoresooka na ghuköra amiigha ghaache.#9:31 Mööhi Sabhuri 34:15–16; Ebhirëngi 15:29. 32Korwera kare, totaamara kooghu koru hasuuhu kubha, omooto uno ibhwiru anyi omohuku nahöriri. 33Aribha omooto uyo taruure kwo Waryobha, mbe, tangatoriri ghuköra ghayo.” 34Ibho bhakamugharokeri bhakabhugha, “Iye wibhwiru na kurëru kinya omuköri o masari. Kana, noonyi no obhotoro ke bho ghotweghi itu?” Mbe, bhakamuhëëbha aröbhökë anche.
Obhohuku bho mo‑körö
35Hano Yesu oghwire kubha mbamuhëëbhiri omooto uyo, aghaye komutabhara. Eriibhagha ꞉amobhwine, akamobhoori akabhugha, “Kana, nokomokumi Omoona o Mooto?”#9:35 Omoona o Mooto. Amandëkö aghande gha Keyunaani ngakobhugha kubha, Omoona o Ryobha. 36Omooto uyo akamugharokeri akabhugha, “Oo Omutëmi, mboorere Omoona o Mooto n‑niwe, kubha nibhe ndamokumi?” 37Yesu akamugharokeri akabhugha, “Iye nomorooche, wiiki niwe uno aghosiikëra na niiye.” 38Omooto uyo akabhugha, “Neghoghokumi, Omutëmi.” Niho akamusëngëra.
39Niho Yesu akabhugha, “Eni niichiri mo‑se hano ghotena ekiina, kubha abhahuku bharighi, wiiki bhano bhakorighi, bhabhe abhahuku.” 40Mbe, Amabharisaayo abhamu bhano ꞉bhaare hayo, eriibhagha ꞉bhooghwire amangʼana ghayo, bhakamobhoori bhakabhugha, “Kana, nokobhugha koru itu bhoose m‑bhahuku toonyi?” 41Yesu akabhagharokeri akabhugha, “Aribha mongabheere abhahuku motangabheere na amasari. Amare mokeere moonyi na amasari, gho kubha mokobhugha mokorighi.”
Nke Ahọpụtara Ugbu A:
Yohana 9: ntk
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2022 Wycliffe Bible Translators, Inc. All rights reserved