Matyo 2

Àgɔn byɛ â me nyɛrɛ zeʼe abɛɛ gli etaranchwe ngɛ

1Â bê Yeso efwɔ abɛ Bɛtlɛhɛm, efwɔ antiri afwɔ yɛ â ma zɔʼrɔ kpe Judeya ngɛ, efwɔ endzobo yɛ Hɛrɔd à mwɔ m̀fɔ̀ ngɛ. À sa ndada mpiʼ nɔ, bɔ deʼ byɛ â ma bɛ̀ɛrɛ ńtɔrɔta ngɛ, nyɛn abɛɛ gli etaranchwe zeʼe a Jerusalɛm. Angɔ à bwɛn a Jerusalɛm è biiri kpe; 2“Mbyɛɛ a zɔ etɔrɔta deʼ e gli zeʼe abɛɛ gli etaranchwe, ma tee kpe a shi bê M̀fɔ̀ bɔ Juu. E ne bê engɔ awe? Mbyɛɛ ne zeʼe é ghɔ engɔ.” 3Èndzobo chɛ M̀fɔ̀ Hɛrɔd à zo ebwa wunɔ ngɛ, ato ngɔ mane ato gho ŋwàʼaŋwàʼ a Jerusalɛm sam efwɔ. 4Éngɛ engɔ zɔʼ M̀fɔ̀rɔ̀ zhiri gimkpaʼ mane bàtee atsɛrɛ gimkpaʼ afwɔbi, gɛ̀rɛ̀ biiri ebe angɔ kpe, “E na ngo bê Ǹtɔmzhwaʼa Ngwe ngɛ awe?” 5Angɔ gíì kpe, “Efwɔ abɛ Bɛtlɛhɛm, efwɔ antiri angɔ yɛ e ma zɔʼrɔ kpe Judeya ngɛ. Ewunɔ ne ebwa wɛ ghontɔm Ngwe à ŋwɛʼrɛ ngɛ kpe, 6‘Bɛtlɛhɛm, efwɔ chwâ Judah, mbɔn ke me tɛŋɛ kpɛɛ fɔɔ entiri ebɛ abê efwɔ Juda bo mbɔʼnga ato deʼ ya ngo zeʼ endɔn, wɛ è ma ngo gbèe bɔ mbu Israel ngɛ.’ ” 7Éngɛ Hɛrɔd zɔ̂ʼ abɔ byɛ â ma bɛ̀ɛrɛ ńtɔrɔta ngɛ achimchim gɛrɛ biiri ebe angɔ mbɔʼ endzobo yɛ angɔ à zɔ etɔrɔta fyɛ gli ngɛ. 8Éngɛ engɔ saa angɔ a Bɛtlɛhɛm, è ndɛ̀ʼ etsɛrɛ ebe angɔ kpe, “Mbɔn ngɔɔ gɛ̀rɛ̀ zɛ̀ʼ afwɔ yɛ e me bê ŋwɔ mɔmbwo ngɛ anchwɔnchwɔ. Ma mbɔn zɔ́ mbɔn wu zeʼe le mmɛ nɛɛ, mbɔʼtye mmɛ gɛrɛ ngɔɔ ghɔ engɔ.” 9Angɔ zo aŋu m̀fɔ̀ à ga ngɛ nyɛ̀rɛ̀ aŋu ngɔɔ. Angɔ zɔ etɔrɔta ŋwaʼ fyɛ â zɔ́ abɛɛ gli etaranchwe ngɛ, e ma ngɔɔ embè angɔ karadidi ngɔɔ tam edɔm afwɔ yɛ eŋwɔ wɛ à me mwɔ ngɛ. 10Aŋu angɔ à zɔ́ etɔrɔta fyɛ ngɛ, angɔ gɛnɛ àmɔ̀ ngwo nɛɛ! 11Angɔ nyii ngɔɔ efwɔ ndɔ, gɛ̀rɛ̀ zɔ ŋwɔ wɛ mane abli mɔ Meri. Angɔ ngɔɔ a chwâ ene etongu àmɔ̀ gɛ̀rɛ̀ ghɔ engɔ. Angɔ chidi ela etɔ̧ɔrɔ àmɔ̀ efwɔ echwɔ̀ byɛ â mwɔ aklibi àfɔ̀n, adwe deʼ yɛ â ma zɔʼrɔ kpe frankinsɛns mane ngud zhwaʼ ekwa deʼ â ma zɔʼrɔ kpe Mɛyɛ ngɛ, gɛ̀rɛ̀ ndɛ̀ʼ ela byɛ ebe engɔ. 12Éngɛ angɔ ghɛɛbɛ ngɔɔ abɛ àmɔ̀ me fɔɔ me na aghɛʼ tsɛrɛ na aŋu Ngwe à shi gbeʼre eto angɔ ene nklama kpe angɔ ke wu ngɔɔ anjì ebe Hɛrɔd bo ngɛ.

Yɔsɛf nyɔɔ ngɔɔ abɛ Ejip

13Aŋu abɔ azɔm byɛ â shi ngɔɔ ngɛ, Angere Masakɛ zeʼe ene nklama gɛ̀rɛ̀ ga ebe Yɔsɛf kpe, “Hɛrɔd wa ngo ma zɛʼ eŋwɔ wɛ ma ke é zhudu, enga tam nu eŋwɔ wunɔ mane abli mɔ nyɔɔ ngɔɔ abɛ Ejip gɛ̀rɛ̀ tsɔmɔ aŋu bwɛn èndzobo chɛ mmɛ ma ngo ga kpe mbɔn nyɛrɛ ngɛ.” 14Éngɛ Yɔsɛf tam ambwɛrɛ, gɛ̀rɛ̀ nu eŋwɔ wunɔ mane abli mɔ gɛ̀rɛ̀ nyɛ̀n ǹklì nyɔɔ ngɔɔ abɛ Ejip. 15Angɔ à tsɔmɔ aŋu bwɛn èndzobo chɛ Hɛrɔd à ku ngɛ. Ene aghɛʼ zɔnɔ, ebwa wɛ Masakɛ à shi ga nyɛ̀rɛ̀ zeʼe achim àmɛnɛkɔn mɔ kpe, “Mmɛ chi ŋwɔanɔm ngu efwɔ abɛ Ejip” ngɛ gli éŋwaʼa.

M̀fɔ̀ Hɛrɔd ndɛʼ etsɛrɛ kpe e zhudu bwɔ

16Èndzobo chɛ Hɛrɔd à nɛɛ kpe bɔ azɔm byɛ à shi ndooro angbe ngɛ, engɔ bɔɔ etaa, è ndɛ̀ʼ etsɛrɛ kpe e zhudu bwɔanɔm gimkpaʼ byɛ e me nyɛrɛ ene enɔ̂m fyee sa ngɔ̀ɔ a chwâ ngɛ efwɔ abɛ Bɛtlɛhɛm mane ebɛ byɛ â mwɔ ebara aŋu ngɛ. Engɔ à fwɛʼ ebwa wunɔ nyɛ̀rɛ̀ zeʼe ene ebwa wɛ engɔ à bɛɛrɛ ebe bɔ azɔm mbɔʼ endzobo yɛ etɔrɔta fyɛ à gli ngɛ. 17Ene aghɛʼ zɔnɔ, ebwa wɛ Ngwe à ga nyɛ̀rɛ̀ zeʼe achim àmɛnɛkɔn mɔ Jerimaya ngɛ gli éŋwaʼa. 18Engɔ à ga kpe, “Èflabaku kwaʼ abɛ Rama, akwâ me koo ene eku̧u yɛ â me kama ngɛ, Rashɛl ma ku̧u ene bwɔ mɔ, engɔ tɔrɔ kpe e ke bɔŋɔ angbe bo, mbɔʼnga a shi kudu!”

Yɔsɛf ghɛɛbɛ abɛ Ejip

19Èndzobo chɛ Hɛrɔd à ku ngɛ, Angere Masakɛ zeʼe ebe Yɔsɛf ene nklama abɛ Ejip 20gɛ̀rɛ̀ ga ebe engɔ kpe, “Tam ekere nu eŋwɔ wunɔ mane áʼɔ̧̀ mɔ gɛ̀rɛ̀ ngɔɔ achim efwɔ chwâ Israel, mbɔʼnga abɔ byɛ â ma ke é zhudu eŋwɔ wɛ ngɛ à shi kudu.” 21Éngɛ Yɔsɛf tam ambwɛrɛ, nu eŋwɔ wɛ mane áʼɔ̧̀ mɔ gɛ̀rɛ̀ ngɔ̀ɔ achim efwɔ chwâ Israel. 22Bɛʼngɛ, èndzobo chɛ Yɔsɛf à zo kpe Archelaus shi nu afwɔ àtɛ mɔ Hɛrɔd na m̀fɔ̀ efwɔ abɛɛ abɛ Judeya ngɛ, engɔ sa bumu é ngɔ̀ɔ aŋu. Angere Masakɛ à shi gbeʼre ato ngɔ, engɔ ngɔɔ abɛɛ afwɔ tsɛrɛ efwɔ abɛɛ abɛ Galilii. 23Engɔ nyɛrɛ ngɔɔ tsɔmɔ efwɔ antiri abɛ deʼ yɛ â ma zɔʼrɔ kpe Nazarɛd ngɛ. Ene aghɛʼ zɔnɔ, ebwa wɛ Ngwe à shi ga nyɛ̀rɛ̀ zèʼe achim bàmɛnɛkɔn mɔ kpe, “E ba ngo sa zɔʼrɔ engɔ kpe gho Nazarɛd” ngɛ gli éŋwaʼa.

Nke Ahọpụtara Ugbu A:

Matyo 2: nbt

Mee ka ọ bụrụ isi

Kesaa

Mapịa

Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye

Mụtakwuo maka Aŋwɛʼrɛ Ebuumu Fe Nè Ngwe

Matyo 2

Amaokwu Akwụkwọ Nsọ Ndị Ama Ama siteré na
Matyo 2

Akwụkwọ Nsọ:

Ngwo

Udi: Aŋwɛʼrɛ Ebuumu Fe Nè Ngwe - nbt

Matyo 2

Matyo 2

Amaokwu Akwụkwọ Nsọ Ndị Ama Ama siteré na Matyo 2

Akwụkwọ Nsọ:

Ngwo

Udi: Aŋwɛʼrɛ Ebuumu Fe Nè Ngwe - nbt

Matyo 2

Amaokwu Akwụkwọ Nsọ Ndị Ama Ama siteré na
Matyo 2