Acts 4
4
Agghistet Tugustekegket Peter‑enkuk John‑enkuk
1Peter‑enkuk John‑enkuk paninang ungipaamalukek Solomon‑em Porch‑ngani, priest‑etlu umiilgatlu Temple‑em kelengakistengita, Sadducees‑etlu tagilaghaatkat. 2Piyukumangilkangat apostle‑ek apeghtuusaak yugnun Jesus unguvaqaaniluku tuqulleghmeng, taam ipapighqegkanga tuqukat unguvaghyaghqaaniluki unguvalleghmun. 3Tamaaken apalluqluku apostle‑ek tugulukek anusimingllaqagket. Siingenllu unugnaqegkanga unaaqusitkagket nanqigtegpenakek. 4Iwernga tamaana ilanga uglapiglleghhii nagatkaq Peter‑enkugneng John‑enkugneng ugpeghtuutkaq. Enkaangam yuggiinaat ugpeqat entaqun 5,000‑ngughtekat, aghnatlu taghnughhaatlu ugpeqat ilategpenaki.
5Unaamingani Jerusalem‑emi qerngughutkat Jews‑et igleghutistengit, siivanlleghet, apeghtughikayugetlu Liilightuusaneng, 6High Priest‑a Annas, Caiaphas, John, Alexander, ilangillu high priest‑em ilakwaaghi. 7Taagken apostle‑ek tagiteslukek aaptekagket, “Kitum aghtughyaghqaanghillghakun yuuk piyugtesagutestegnegu? Kitum aatgha atuqluku tawaten pistek?”
8Peter‑em kiimsiqii Agleghnalghiim Taghnegham aghtughyaghqaanghillghakun, “Igleghutistenillu siivanlleghnillu, 9aaptaghpesikung aneghneghtillemtegneng, naten naallghusimatanga piyugigalnguq yuuk. 10Enkaangam liigikesugamsi qamagllusi, ilangillu Israel‑eghmiit qamaglluki naten una yuuk naallghutkaatanga. Naallghutkaaguq Aatghakun Jesus Christ‑am Nazareth‑eghmiim. Ellngan aghtughyaghqaanghillghan naallghutkaqaa, elpesi qaquuraqaghpesi, Kiyaghneghem unguvaghtestekaan tuqulleghmeng. Enkaam una yuuk piyugigasalghii whaa maaten nekevghaaq sivugpesini. 11Jesus‑nguuq ukut Akuzitet Igaqegkat pikaat,
‘Uyghak ighsakegkaghsi elpesi mangteghangllaghteni,
piyalghiimi megnunalleghpigaaftuq uyghak.’
12Enkaam Kiyaghneghem kayagtekaqaa nunamun, ellnginaghhaaguq yugulighiyaghqaq. Alla naten yuuk yugulillengnaanghituq iwerngaqun aataghakun Jesus‑em.”
13Jews‑et agghistengita saghiighayagutkagket Peter‑enkuk John‑enkuk tetunghitellghegkeneng, qayughllak liisimakegkegket igaghyaamangilnguuk. Liigiksaqmegtekek Jesus‑metkaatmegneng tawaten akuzinguftuk. 14Enkaam aaghtiiraaghpagningitkagket, qayughllak esghaqaat yuuk naallghutngwaaghluni nekevghalghii Peter‑enkugni John‑enkugni. 15Agghivigmeng agghistet aanestekiit Peter‑enkut John‑enkut naallghutkaqlu yuuk, enkaam ellngit agghitnginaamaghmeng pikat. 16Aapqughaaghutkat ellmeggneng, “Naten pinaqestekek yugek? Seghleghhalek ipanguninaqaghput allaaghlluwhaghtillghak, qayughllak Jerusalem‑eghmiit qamaglluteng liisimakaat. 17Taawanginaq ineghsaqumtekek allallu akuzitkefqaan Jesus pisqelluku kitumun alngunak wata kinkut alngunak nagaqughnayukatgu.”
18Enkaam iteghteslukek ineghtengngwaaqagket, “Allamengllu akuzitkefqaan, apeghtuusaqefqaan Jesus pinakesek.” 19Iwernga Peter‑enkuk John‑enkuk kiimsiqiit, “Qaatkellamsii Kiyaghneq avelghaghluku? Naliq efqughnaghta Kiyaghneghmi? Ataasiighteki umyugasi. 20Whangkutung akuzitkenneghmeng taaqnaanghitaghpung esghaqaghpungllu nagaquqaghpungllu.” 21Agghistet aghyuughpagningitkagket, qayughllak qamaglluteng yuget usuqegkangat Kiyaghneq allaaghlluwhaghtilleghmun. Enkaam temngi alingsequlukek aanestekagket. 22Taana yuuk 40 ayumiqulleq siipngaan uksughtutkalghii, piyugpagningisalghii iwernga maaten naallghullghii.
Ugpeqat Yughalghiit Tetugnanighnaluteng
23Peter‑enkuk John‑enkuk aanesistek aglaqak ugpeqaalgutmegnun. Ungipaqak chief priest‑etlu siivanlleghetlu pillghitneng. 24Nagallukek ataasiighlluteng yughaqat Kiyaghneghmun, “Ataneq, ulimakaqaten qilak, nuna, meq, sangwaallu alngunak taakunilnguq, igleghutngwaatenllu qamaglluki. 25Ayumirugllak Agleghnalghiignekun Taghneghagnekun akuzikaaguten sivunemteggun David‑kun qepghaghtegpegun whaten,
‘Sangan Gentile‑et temngi sakrituteghllagtatkek Atanghenkuk Christ‑akullghiik,
sanganllu yuget seghletun piyupigtatkek pipagningiteghngaaghmegtekek?
26Nunam umiilgillu igleghutistetlu qerngughulluteng yataaghqutut pilluwaghnalukek Atanghenkuk Christ‑akullghiik!’
27“Ipapestaaq maani Jerusalem‑emi tawaten pikaagut. Herod‑enkuk Pontius Pilate‑enkuk ilatkaaguk Gentile‑enunllu Israel‑eghmiinunllu kipullginaaghnaluku, Jesus Seghleghqumangilnguq Qepghaghten, nakmikegkan Christ‑anguluku. 28Ataneq liisimakngwaaqenllu yataaghqegkaqegkenllu tawaten pilleghqaa enkaam tawaten pikaagut. 29Nagataqaten maaten whaa alingsiqukanginkut ikfiqesleqniluta. Ataneq, iknaqughsaqaghtikut enkaam tetugpenaamta ungipaalta ungipaghpeneng, 30whangkutgun naallghutiki qinuyuget, allaaghlluwhaghtistikutlu aatghakun Jesus‑em, Seghleghqumangilngughqun Qepghaghtegpegun.”
31Yughaneghmeng taaqaqutlu qerngughutfigat mangteghaq ufsugutkaq. Agleghnalghiim Taghnegham imiqii qamaglluki, enkaam tetugpenateng ungipaghyagutkat Kiyaghneghem ungipaaneng.
Ugpeqat Atunem Pilghiit
32-33Apostle‑et aghtughyaghqaanghillelighllagluteng ungipaqegkaat Ataneq Jesus unguvaqaaniluku tuqulleghmeng. Kiyaghneghem quyasteghllagukangillu qamaglluki ugpeqat. Ugpeqat ataasistun lliiqat ilumegteggunllu unguvasimegteggunllu. Enkaam kina alngunak pingigalnguq saghyateng ellnginaghmeggnun pikniluki, atunem atuqaqegkangit. 34-35Nunalget, mangteghalget akikneghmegteki nunatengllu mangteghatengllu, allgeghtateng manit apostle‑enun tuunaqegkangit. Enkaam ugpeqat sameng aklunghata manilitaqegkangit, tawaten kina alngunak aklumangilnguq.
36-37Joseph tawanlenguq, Cyprus‑eghmii, Levi‑em kingungha, ellnganllu akikluku nunani tuunegkaa allgeghtani apostle‑enun. Apostle‑et atiqaat Barnabas‑meng whaten pisimeng, “Kayemesta.”
Nke Ahọpụtara Ugbu A:
Acts 4: ess
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2018, Wycliffe Bible Translators, Inc. All rights reserved.