ማቲወስት ወንጌል 27
27
ፈወነ 27
እየሱስት ቢላጠውስትል ፊስጘጘ
(ማር. 15፡1፤ ሉቃ. 23፡1-2፤ ይዃ. 18፡28-32)
1ቅሻንድም ካኽነጣነ ኻልቅጢዝመ ኽዝቪዝ ሽመቅሊዝ እጝቅቅ እየሱስት ቁጥጘ ማኽርኽርሽ። 2ጝትም እፅቍጝ ቅመተ ቢላጠውስስ ዲቍስጝ ይው።
ይዅዳ ኻንቕሽ ክረጘ
3ዲቍስ ይወው ይዅዳም እየሱስ ክርጘ ፊርድሸጘ ቓላንድ ኣኑሹ፤ ፊሰቍ ቍርሻንድዛትም ካኽነጣነ ኻልቅጢዝመ ሽመቅሊዝ ፊስ ይው በር፦ 4«ንፅዅ እጅር ክርጘል ዲቍስ ነየነውዝ ቢድልኩን» ዩ። ጛይ ግን፦ «እደስለ ክቕመስ ወሱጚ ይናጭስ ውር ይናኻለይ?» ይ። 5ጘጝም ጊንዝቫንድዛት መቅደስ ጝኒል ቢትን ጛት በር ፉ፤ ፊርም ኻንቕሽ ክሩ።
6ካኽነጣነ ኻልቅጥድም ጊንቫንድ ጕይጝ፦ «ብርዙ ወየ ኣቓንስቅ ሚቨይል ቈሽነ ጥውሻውም» ይ። 7ማኽርኽርሽጝም እንዛይ ጊንዝቫኒዝ፣ ኣብንዙ መቃቭር ስፍረ ኣቓንስ ማጥን ሻኽለ ተሰተይዙ ቺዝጝድየንት ጅቭ። 8እንዝ ምላሰንዝ ጘጝ ዝቨድ ነኳን ኣሽ፦ «ብረዙ ዝቨ» ይሽታ ጭጝሸኵ።#ኻወ. 1፡18-19። 9እንዝም ነቭይ የርምያስትዝ፦ «እስራየልት ቝር ጊምትጘውድየንት ጝጭስ ጝወየ ኣቓንስ ማጥን ሰውርጝን ቍርሻን ኪፍል። 10ኣደረም ይት ኣዘጘ ሻኽለ ተሰተይዙ ዝቨዝ ኪፍል» ይሽት ዊግሸው ትንቪትድ ፋፅምሹ።#ዘካ. 11፡12-13።
እየሱስ ቢላጠውስት በዊል ኣልተጘ
(ማር. 15፡2-15፤ ሉቃ. 23፡3-25፤ ይዃ. 18፡33-40፤ 19፡1-16)
11ኣይንድም እየሱስ ቅመተ ቢላጠውስት በዊል ችብሩ፤ ቢላጠውስም፦ «ክት ኣይዅዳነ ንጕስመ?» የው ዋቕሩ። እየሱስም፦ «ክት ይረጘ የጝ» ዩ። 12ካኽነጣነ ኻልቅጢዝመ ሽመቅሊዝ ጝት ዊኝጅልዝጛንድ ግን ውርቅ ዊሲየውም። 13ኣይንድ ቢላጠውስ፦ «ጛይ ክት ዋቐ ዊገዝቅ ኪስጛንድ ወሻርመ?» ዩ። 14እየሱስ ግን ቢላጠውስ ዲንቅሽጢስቅ ላይ ዊገት እኳ ዊሲየውም።
15ቅመተድም ፈዝየ በሊዝ ኣምረ ኣምረዝ ኽዝቭድ ላው እፁሸው እጅር እክሳንስ ዋቕረውድየንት እክሰነው ክንስ ዊኑ። 16ኣይንድ ኣመፅ ጕየነውዝ ኣርቕሽተው በርቫን የነው ላው እፁሸው እጅር ዊኑ። 17ኽዝቭድም ኣኽቭሸጘ ቢላጠውስ፦ «በርቫንቲስመ ክርስቶስ ይሽተው እየሱስቲስ ኣውት እክስጨ በንርነኵ?» የው ዋቕሩ። 18ምላሰንድም ቢላጠውስ እየሱስት ቅንየዝ ዲቍስጝ ይውጘጘ ኣርቕ ዊኑ። 19ጘጝም ፍርድ ወምበርል ጐይ ፅባ ጝውነ፦ «ንጭ ኻር ኒቪዝ ጝማጥን ጭቕጘ ተሰቃይጭኩንነ እኒን ንፅዅ እጅሪል ውረውረ ዊገቅ ፃቭረር» ይር እፃ በርስች። 20ዊገድ ግን ካኽነጣነ ኻልቅጢዝመ ሽመቅሊዝ፦ «በርቫን እኪትነ እየሱስ ግን ቍውሽትነ» የው ጨዋንስ ማጥን ኽዝቭድየንት ኣቭልቭል። 21ቅመተድም፦ «ጝታቪልቲስ ኣውየን እኪትጠ በንርነኵ?» የው እንደ ገነ ዋቕሩ። ኽዝቭድም፦ «በርቫንት እኪትጠ በንነኵን!» የው ዊሱ። 22ቢላጠውስም፦ «እደስለ፦ ‹ክርስቶስ› ይሽተው እየሱስት ወረጘ ፃቭጨ?» ዩ። ጛይም እጝቅቅ ሊንስ፦ «ሲቅልሽነ!» ይ። 23ቅመተድም፦ «ውረይ? ጘጝ ፃቨው በደልድ ወረጘ የጝ?» ዩ። ጛይ ግን፦ «ሲቅልሸነ! ሲቅልሽነ!» ይጛ ቓፅ። 24ቢላጠውስም ኹክት ጒሽትጠ ኣቕሽጚ ላየ ውርም ገቨ እጀው ኣቐጘ ቓላንድ፦ «ያን እኒን እጅሪዝ ብሪስ ንፅዅ የጝ፤ ዲቍትድ ክታቕምቱ የጝ!» የው ኽዝቪዝ በዊል ጝናንጣንድ እቓሩ።#ዘዳ. 21፡6-9።
25ኽዝቭድም እጝቅቅ፦ «ጝብርድ ይናግልም ይናዅሊልም ኣነ!» ዩ። 26ኣይንድ በርቫንት እክስ በርሱ፤ እየሱስት ግን ጊርፍ በር ሲቅልጛንስ ማጥን ጛጭስ ዲቍስ ይዉ።
ዊተድርድ እየሱስት ኣሹፍጘጘ
(ማር. 15፡16-20፤ ይዃ. 19፡2-3)
27ኣይንድ ቅመተይዝ ዊተድርድ እየሱስት ፃይጝ ቅመተይዝ ኻፅሪል ፊስ፤ ላጥ ዊተድርድዛትም እጝቅትቅ ጝጅልወይል ኣኽቭ። 28ጝኣልቨድየንትም ጊፍጝ ላየ ሰረው ኣልቨ ሲስ። 29ኣሚዙ ኣክሊልም ጒንጕንጝ ጝኣውሪል ደፋቕ፤ ኣቲነዙ ዚግም ጝለወ ናኒዝ ፃይስ፤ ጝበዊልም ግርቨቭሽጛ፦ «ኣይዅዳነ ንጕስወ! ዲግተ ክጭስ ኣነ» ይጛ ኣሹፍ። 30ጝታብፅቕንድም ጝዲጊል ትፍ ይጛ ዊን፤ ዚግድየንትም ጝናኒስ ለምርጝ ጝኣውርድየንት ደግምግምጛ ጣዝ። 31ኣሹፍጘት ግረ ሰረው ኣልቨድየንት ጭውዝጝ ጝኣልቨድየንት ሲስ፤ ሲቅልጥጘም ፃይጝ ፊር።
እየሱስ ሲቅልሸጘ
(ማር. 15፡21-32፤ ሉቃ. 23፡26-43፤ ይዃ. 19፡17-27)
32እየሱስት ፃይጝ ፊርጛንድም ስሙን ይሽተው ቀሪነቱ እጅር ችጝጝ ሚስቅልድየንት መውርጠ ኣስገድድዝ። 33ጝትርጕምድ፦ «ኣውር በወ» ኣቐው ጐልጐተ የነው ስፍረይል ችጛንድም፣ 34ኻሙት ጅቅ ዲቭልቅሸው ወይንዙ ሚዝ ዝያንስ ይው፤ እየሱስ ግን ጣም በር ዝየነው በኒየውም።#መዝ. 69፡21። 35እየሱስትም ሲቅልጘት ግረ ጝኣልቨድየንት እፀ ማልጝ ኣድልሽ።#መዝ. 22፡18። 36ጝግልም ጐይጝ ጝት ሊሚድጛ ዊን። 37ጝኣውሪዝ ንየይልም፦ «እኒን ኣይዅዳነ ንጕስ እየሱስ የጝ» የው ጝኪስሽተዊዙ ፅፈሽ እቝር። 38ኣይንድ እየሱስ ጅቅ ሊጘ ወምበዲጥ ላውድየንት ጝለዊዝ፣ ላውድየንት ጝፃግቪዝ ሲቅል። 39ጝግዝ ዲቈዲቈቍድም ጝታኣውርድ ኒንቅጛ ዛሽጛ፦ 40«መቅደስ ጝንድየንት ፋዝር ሸወትረ ግርየዝ ተስረር ክተ! እስቲ ነን ክቕምት ቓዝ! እደረት ዅር ኣረውዝየ እስቲ ሲቅልሽረው ሚስቅሊስ ጊም!» ይጛ ዊን።#ማቲ. 26፡61፤ ይዃ. 2፡19።
41እኒዝጘም ካኽነጣነ ኻልቅጥድ ቈሽ ወሪትት ኽግ ክንሰጢዝመ ሽመቅሊዝጅቅ ኣቕጝ ኣሹፍጛ፦ 42«ላጥድ ቓዙ፤ ጝቕምት ግን ቓዝጠ ቸላውም፤ እስራየልት ንጕስ ኣቐውዝየ ይንም ጝት ኣምናንስ! እስቲ ነን ሚስቅሊስ ጊምነ! 43እደረት ኣምንኩ፤ ‹ያን እደረት ዅር የጝ› ያ ዊኑ፤ እደረ ጝት ቀነውዝየ እስቲ ነን ቓዝነ!» ይጛ ዊን።#መዝ. 22፡8። 44ጝጅቅ ሲቅልሸቍ ወምበዲጥድም እደይጝ ዛሽጛ ዊን።
እየሱስ ክረጘ
(ማር. 15፡33-41፤ ሉቃ. 23፡44-49፤ ይዃ. 19፡28-30)
45ዋልጠ ሳይስ ኪርም ፃይጨ ሳይል ኣሽም ዝቨይልቅ ጥመ ኣቑ። 46ፃይጨ ሰት ኣቓንድም እየሱስ ጝድመድ ኣጕስ ሸው፦ «የለዅየ! የለዅየ! ላማ! ሰቨቅታኒ?» የው ቓፁ፤ ጝትርጕምድም፦ «ይኣምላክወ! ይኣምላክወ! ውረ ይት በትሩ?» የነት የጝ።#መዝ. 22፡1። 47ጝግል ችብርጝ ዊነቊስ ላው ላውድ እየሱስ ቓፃንድ ወሽጛንድ፦ «ይልያስት ጭጘኵ!» ይ። 48በውዝም ጛጊስ ላውድ ውጥያ ፊር ሰፍነግ#27፡48 ሰፍነግ፦ ባኽር ኣቒል ቢቊለው እስበውጂዝጘ ኣቝ ማጥ ፃየው ተክል የጝ። ነስ ዃምጥጠው ወይንዙ ሚዚል ናኽሩ፤ ሰፍነግድየንትም ኣቲነ ዚግዝ ጫፊል እፅቍ እየሱስ ዝያንስ ፊስ ኣልሱ።#መዝ. 69፡21። 49ላጥድ ግን፦ «በጥን እስቲ፤ ይልያስ ተር ቓዛንድ ቓልነር!» ይ። 50እየሱስም እንደ ገነ ጝድመድ ኣጕስ ሸው ቓፁ፤ ኣይንድም ጝፈውጥድ ፍ።
51ኣይንድም መቅደስ ጝኒዙ ገርደነድየን ንየ ጫፊስ ኪርም ሳ ጫፊል ኣሽ ሊጘትል ቀድሹ፤ ዝቨም ተናውፅሽትች፤ ፃፅቕድም ስንጥቅጥቅ ይ።#ዘፀ. 26፡31-33። 52መቃቭራንም ቢት፤ ክርጝ ዊነቍ ቅዱሳን እቂስም ንቕፀቍ ክርጘይስ ጕ። 53መቃቭሪስም ፍጝ እየሱስ ክርጘይስ ጐት ግረ ቀድስሽትረይ ኻትመየንትል ጥውጝ ንቕፀቍ እቅዝ እትል። 54ላዝ ኻልቀይዝመ ጝጅቅ እየሱስት ሊሚድጛ ዊነቊዝ፣ ዝቨይዙ ተናውፅሽተነዊዝመ ኣቐው ዊገይዝድቅ ቓልጛንድ ጭቕጘ ጐውት፤ ጝትም፦ «እማን እደረት ዅር የጝ» ይ። 55እየሱስት ኣግልግልጛ ገሊለስ ቲክንጛ ዊነቍ ንቕፀቍ እቍንም ጝግል ዊን፤ ጛይም እን ገቨድየንት እክልድ ይጝ ቓልጛ ዊን። 56እንዛይ እቍኒዝ ማኽሊስ መግደላዊት ማርያም፣ ያይቈቭስመ ዮሴፍስታኘ ማርያምስመ ዘቭዲወስት ቝሪዛኘየንታይ ችጝሽጘኵ።#ሉቃ. 8፡2-3።
እየሱስ ዲቭሽተጘ
(ማር. 15፡42-47፤ ሉቃ. 23፡50-56፤ ይዃ. 19፡38-42)
57ኵናንድም ዮሴፍ ይሽተው ኣርማትያስቱ ኻፍታም እጅር ጝጐ ተሩ፤ ጘጝ ጝቕምም እየሱስት ክንደተ ዊኑ። 58ጘጝ እጅርድ ቢላጠውስትል ኣልት፦ «ኣለቀይ እየሱስት እርሸድ ነቅ» የው ጨዉ፤ ቢላጠውስም እርሸድየንት ጝጭስ ይውጛንስ ኣዙ። 59ዮሴፍም እርሸድየንት ኣይር ፃረው ኻር ኣልቨዝ ጊንዙ። 60ጝቕምስ የው ፃፀድየንት ፊልፍል ተሰው ኣይር መቃቭርልም ዲቩ፤ መቃቭሪዝ ሚረድየንትም ኽየው ቕርጘ ትጕለልዝ ዲቭ ፊሩ። 61ኣይንድም መግደላዊት ማርያምስመ ላየ ማርያምስ መቃቭሪዝ በውዝ በዊል ጐይጝ ዊን።
እየሱስት መቃቭርድ ዊተድርዝ ሊሚድሸጘ
62ጛምርስ ቅዳምሲንቭቲዝም ካኽነጣነ ኻልቅጢዝመ ፈሪሳኒዝ ቢላጠውስትል ፊርጝ፦ 63«ኣደረወ! እድ ቀሰተ እጅርድየን ገነ ርዅየዝ ፅባ፦ ‹ሻቘ ግርቅዝ ግረ ክርጘይስ ጕጭር› የው ዊግተው ዊገድ ትዝ ይኑን።#ማቲ. 16፡21፤ 17፡23፤ 20፡19፤ ማር. 8፡31፤ 9፡31፤ 10፡33-34፤ ሉቃ. 9፡22፤ 18፡31-33። 64እንዝ ማጥን ጝክንደጥድ ፊርጝ እርሸድየንት ስይጘጘ፣ ኽዝቪዝም፦ ‹እንወ ክርጘይስ ጕኩ› ይጝ ጂጝዛይጘጘ መቃቭርድ ሻቘ ግርቂል ኣሽ ሊሚድሻንስ ትዛዝ ዲቍሽ፤ ኣለዝየ በውግቱ ቀተይስ እግረ ተረውድ ወሰው ኣቐኵ» ይ። 65ቢላጠውስም፦ «እንወ ሊሚደቍ ዊተድር ፃይርንኵርኑ፤ ፊትርን ክታኣርቕርነጘ ሊሚድስጥን» ዩ። 66ጛይም ፊርጝ መቃቭሪዙ ቕርጘድየንት ማኽተምዝ ኻትምጝ መቃቭርድየንት ዊተድርዝ ሊሚድስ።
Nke Ahọpụtara Ugbu A:
ማቲወስት ወንጌል 27: ኽምጣኣኪ
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye