መልእክተ ያዕቆብ ሐዋርያ 5
5
ምዕራፍ 5
በእንተ ተግሣጽ ዘአብዕልት
1 #
ምሳ. 11፥28፤ ሉቃ. 6፥24። ንዑ ይእዜኒ አብዕልት ወብክዩ እንዘ ትግዕሩ ላዕለ ሕርትምናክሙ እንተ ሀለዋ ትምጻእክሙ። 2#ማቴ. 6፥19። ብዕልክሙኒ ነቅዘ ወአልባሲክሙኒ ቈንቈነ። 3ወርቅክሙኒ፥ ወብሩርክሙኒ ዝሕለ ወዛሕሉኒ ስምዐ ይከውን ላዕሌክሙ ወይበልዖ ለሥጋክሙ ከመ እሳት በእንተ ዘገበርክሙ ለደኃሪ መዋዕል። 4#ዘዳ. 24፥14-15። ናሁ ዐስቦሙ ለገባር ለእለ ሐረስዋ ለምድርክሙ ሄድክምዎሙ ወዐመፅክምዎሙ ዐስቦሙ ወእለኒ ሄድክምዎሙ የዐወይዉ ወገዐሮሙኒ ለዐጸድ ቦአ ውስተ እዘኒሁ ለእግዚአብሔር ጸባኦት ወበጽሐ። 5#ሉቃ. 16፥19-25። ወፈጋዕክሙ ላዕለ ምድር ወአስተትክሙ ወተደለውክሙ ወአስባሕክሙ ልበክሙ ከመ ዘያሰብሕ ላሕመ ለዕለተ ጥብሐት። 6ወተዐደውክሙ ወቀተልክምዎ ለጻድቅ ዘእንበለ ይትቃወመክሙ ወኦሆ ይብለክሙ።
በእንተ ትዕግሥት
7 #
ሉቃ. 21፥19፤ ዕብ. 10፥36። ተዐገሡ እንከ አኀዊነ እስከ ደኃሪት ዕለት አመ ይመጽእ እግዚእክሙ ከመ ሐረሳዊ ዘይጸንሕ ፍሬሃ ለምድር ክብርት እንዘ ይትዔገሣ ሠርከ ወነግሀ እስከ ትሰዊ ወትፈሪ ሎቱ ወትትዐጸድ። 8ተዐገሡኬ አንትሙ ወአጽንዑ ልበክሙ እስመ ቀርበ ምጽአቱ ለእግዚእክሙ። 9#ማቴ. 24፥33። ወኢትግዐሩ አኀዊነ ላዕለ ቢጽክሙ ከመ ኢትትኰነኑ እስመ ናሁ መኰንን ኀበ መድረከ ኆኅትክሙ ይቀውም ወይጸንሕ። 10#ማቴ. 5፥12። አርኣያሃሰ አኀዊነ ለትዕግሥተ ተጽናስክሙ ብክሙ ነቢያት እለ ተናገሩ በቃሉ ለእግዚአብሔር። 11#ኢዮብ 1፥21-22፤ መዝ. 102፥8። ናሁ ናስተበፅዖሙ ለእለ ተዐገሡ ወሰማዕክሙ ትዕግሥቶ ለኢዮብ ወርኢክሙ ዘከመ ፈጸመ ሎቱ እግዚአብሔር እስመ ብዙኅ ምሕረቱ ለእግዚአብሔር ወመስተሣህል ውእቱ። 12#ማቴ. 5፥33-39። ወእምኵሉሰ ዘይቀድም አኀዊነ ኢትምሐሉ ኢበሰማይ ወኢበምድር ወኢበካልእ መሐላ ኢትምሐሉ ግሙራ ወኢበምንትኒ አላ አሐደ ይኩን ቃልክሙ እመኒ እወ እወ ወእመኒ አልቦ አልቦ ከመ ኢትትኰነኑ ወኢትባኡ ውስተ ደይን።
በእንተ ስላጤሃ ለጸሎት
13 #
መዝ. 90፥15፤ ቈላ. 3፥16። እመ ቦ ዘይቴክዝ ለይጸሊ ወእመቦ ዘተፈሥሐ ለይዘምር። 14#ማር. 6፥13። ወእመቦ ዘይደዊ እምኔክሙ ለይጸውዕ ቀሳውስተ እለ ውስተ ቤተ ክርስቲያን ወይጸልዩ ላዕሌሁ ወይቅብዕዎ ቅብዐ ጸሎት በስሙ ለእግዚእነ ኢየሱስ ክርስቶስ። 15#መዝ. 31፥1፤ ኢሳ. 33፥24። ወጸሎተ ሃይማኖት ያሐይዎ ለድውይ ወያነሥኦ እግዚአብሔር ወእመኒ ቦቱ ኀጢአት ይትኀደግ ሎቱ። 16#ዘፍ. 20፥17፤ ዘኍ. 11፥2፤ መዝ. 144፥18-19። ተአመኑ በበይናቲክሙ ኀጢአተክሙ ወጸልዩ ላዕለ ቢጽክሙ ከመ ትሕየዉ ብዙኀ ትረድእ ጸሎቱ ለጻድቅ ትክል ወታሰልጥ። 17#1ነገ. 17፥1፤ ሉቃ. 4፥25። ኤልያስ ዘከማነ ሰብእ ውእቱ ወዘከመ ነሐምም የሐምም ወጸሎተ ጸለየ ከመ ኢይዝንም ዝናም ወኢዘንመ ውስተ ምድር ሠለስተ ዓመተ ወስድስተ አውራኀ። 18#1ነገ. 18፥41-46። ወካዕበ ጸለየ ከመ ይዝንም ወወሀበ ሰማይ ዝናሞ ወምድርኒ አብቈለት ፍሬሃ። 19#ገላ. 6፥1። አኀዊነ እመ ቦ ዘስሕተ እምኔክሙ እምጽድቅ ወእመቦ ዘሜጦ እምነ ጌጋዩ። 20ለያእምር ከመ አድኀነ ርእሶ እምነ ሞት ወከደኖን ለብዙኃት ኀጣውኢሁ።
ተፈጸመት መልእክተ ያዕቆብ ሐዋርያ እኁሁ ለእግዚእነ ኢየሱስ ክርስቶስ።
ወስብሐት ለእግዚአብሔር አሜን።
Nke Ahọpụtara Ugbu A:
መልእክተ ያዕቆብ ሐዋርያ 5: ሐኪግ
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye