लूका 21
21
परमेस्वरना मुने येताना योग्य दान
(मर १२:४१-४४)
1अनि येसु नालुंगास बासा ध्यानते हुळतुर असके दनवान लोकुरक मन्दिरतिगा दान सन्दुकतिगा दान निहानपा हुळतुर। 2असके उन्दि गरिब रान्डिन वने दान सन्दुकतिगा रन्ड हुडलांग डबुंग निहनपा येसु हुळतुर। 3असके ओर सबोय लोकुरकुन इतुर, “इद गरिब रान्डि परमेस्वरना हुळानाते सबोयताल वले दान निहता इन्जोर नना मिकुन चेते किसुन वेहान्तोना। 4बाक्याकि ओरक सबोय आपुना धनसंपतिताल हुचुक दान सन्दुकतिगा निहतुरक मति इद रान्डि आपुनतुन जिवोत इरान साटि तानिंग हुडुक्सा मता अद सबोयतुन दान पेटितिगा निहचिता।”
येरुसलेम मन्दिरता नाशता बारेता बविस्यवाणि
(मत्ति २४:१-२; मर १३:१,२)
5अनि हुचुक लोकुरक प्रार्थना लोता बारेते अद मन्डलितुन बचोन सोबाय कल्कने अनि दान हितांग चिजकने सजेकितोरक इन्जोर वळकिला आस मन्दुर, 6असके येसु इतुर, “अगा इव सबोय निमाट हुळान्तोरिट अवेहनिगाडाल उन्दि कल दुसरो कलदिगा टेकेमास मनोंग आयनुंग। अव सबोयकुन अरहानुरक इदाम उन्दि दिया वायार।”
दुनियाता अन्तता चिन्ह
(मत्ति २४:३-१४; मर १३:३-१३)
7अनि चेलालोरक येसुन पुच्चेमातुरक, “हे गुरु, इव सबोय बसके आयार? अनि इव सबोय पुरा आयाना बेरा बदामना चिना-चमत्कार आयार?” 8अनि येसु आपुनोरक चेलालोरकुन इतुर, “बोरे मिकुन दोखा हेमाट इन्जोर निमाट चोव्कोस मन्ट, बाक्याकि पकाय लोकुरक, ‘नना मसि आन्दान’ अनि ‘अन्त आयाना बेरा वाता’ इदाम इन्तोर नावा पोरोयदे वायनुरक मति निमाट ओरांग केन्जमाट। 9अनि निमाट लळायि आयाना अनि होंग कियाना पोल्लोनुंग केन्जुन वरियमाट, बाक्याकि इव सबोयकना मुने आयाना जरुरि मन्ता; मति दुनियाता अन्त अद बेरा सान्डे आयो।”
10अनि येसु असा चेलालोरकुन इतुर, “यहुदि आयोर लोकुरक वरोर दुसरोना विरोद अनि राज्य-राज्यता लोकुरक दुसरो राज्यता लोकुरा विरोद लळायिंग कियानुंग। 11अनि हजो-हजो बुकांप अनि बगा-अगाह हजो-हजो दुष्काळ अनि हजो-हजो बिमारिंग वायनुंग अनि आबारतिगा भयानक पोल्लोंग अनि हजो-हजो चिनांग-चमत्कारिंग आयनुंग।”
मसिना चेला लोकुरा पकाय तकलिप
12अनि येसु असा आपुनोरक चेलालोरकुन इतुर, “इव सबोय पोल्लोंग आयानाता मुने, निमाट नावा चेला बनेमायानाता कारणते मिया विरोदिलोरक मिकुन पयसुन समाज मन्डलितिगा ओसुन सत्तेह किस जेहलतिगा इरानुरक। न्याय कियान साटि मुक्या अदिकारि लोकुरा हेरे अनि राजाना हेरे वने ओयनुरक। 13अनि मिकुन विरोदि लोकुरक इदाम होंग कियानुरक, असके निमाट ओरा मुने नावाबारेता गवाहि वेहानाता सन्दि आयार। 14इन्जोर निमाट आपुना रक्षा बदाम कियाकिट इदाम मुनेय चिन्ता केमाट। 15नना मिकुन वळकान साटि पकाय ग्यान हियाका इन्जोर मिया विरोदि लोकुरक मियांग पोल्लोनुंग जुटा किया परोरक आयनुरक#२१:१४,१५; लूका १२:११,१२ । 16अनि मिया अवाल-बाबो, बायिरक अनि परिवारतोरक लोकुरकुन अनि मिवोरक गोतियाह वने निमाट नावागा विस्वास किन्तोरक इन्जोर मिया विरोदि लोकुरा कयदे मिकुन पयपियानुरक; अनि मिया पयकि हुचुक लोकुरकुन हव्काहनुरक। 17अनि निमाट नावा चेला आयानाता कारणते सबोय लोकुरक मियासंग दुश्मन कियानुरक। 18मति मिया तलाता उन्दि वने कल्क नाश आयो आयार#२१:१८ मिया आत्मिक जिवातुन ओरक बाराय नुकसान किया परोरक। 19अनि निमाट हिमते सहेन किस मनकिट ते मिकुन अनन्ता काळदा जिवा पुटार।”
येरुसलेमता नाशता बारेते येसु वेहान्तोर
(मत्ति २४:१५-२१; मर १३:१४-१९)
20अनि येसु आपुनोरक चेला लोकुरकुन असा इतुर, “सेय्निक लोकुरकुन येरुसलेम सहेरतुन हिरमुटा आतोरक हुळकिट असके येरुसलेम सहेरता नाश आयाना बेरा हेरे मन्ता इन्जोर समजेमायकिट। 21असके यहुदि येरयाते मनवालोर लोकुरक मटातिगा वितिरक, अनि बोरक लोकुरक येरुसलेम सेहेरता लोपा मन्तोरक ओरक बाहरो पसयिरक, अनि बोरक लोकुरक सेहेरता बाहरो मन्तोरक ओरक बाताले ततिला लोपा हनमाकिरक। 22बाक्याकि पवित्र पुस्तकतिगा कोटताल पोल्लोता अनुसार, येरुसलेम सेहेरता सबोय लोकुरकुन परमेस्वर दन्ड हियाना अद दिया आयार#होशे ९:७। 23अनि अद दियांग मेन्दुतक मन्तांग अनि पाल उहातांग अव आसकुन पकाय तकलिब मन्तानुंग, बाक्याकि देशतिगा पकाय तकलिप अनि येर लोकुरा पोरो परमेस्वरना हजोर कोप भळके मायार। 24अनि हुचुलोरकुन तलवारते हव्कानुरक अनि दुसरो हुचुलोरक लोकुरकुन पयस यहुदि आयोर लोकुरा देशकनिगा दोहचुन ओयनुरक। येरुसलेमतिगा राज्यकियना साटि परमेस्वर दुसरो जातितोरक लोकुरकुन हिता बेरा पुरा आयानवनाह ओर लोकुरक येरुसलेम सहेरतोरक लोकुरकनिगा पकाय कटोरते अदिकार अनि राज्य कियानुरक।”
मानेयतोर मरिना असा मलस वायाना
(मत्ति २४:२९-३१; मर १३:२४-२७)
25अनि येसु ओरकुन असा इतुर, “पोळद अनि नलेन्ज अनि हुकोंगनिगा चिना-चमत्कारिंग दिसानुंग। अनि दरतितिगा सबोय देशतोरक लोकुरकनिगा सन्कट वायार। समुद्रता लेंग अनि लाटाना गरजे मायानाते सबोय लोकुरक पकाय वरयानुरक#यश १३:१०; यहेज ३२:७; जोये २:३१; तोह ६:१२,१३ । 26अनि आबारता लाव हाले मायार असके आबारतिगा मन्तांग पोळद, नलेन्ज अनि हुकोंग हिकेडांग होके आयनुंग इन्जोर वरेता कारणते अनि दरतितिगा वायानांग गटनानुंग पोसनेक-पोसनेक लोकुरक बेहोस आताप आयनुरक। 27असके नना मानेयतोर मरिन हजोर लावदे अनि आदार महिमातासंग ढगितिगा वायाना ओरक हुळानुरक#दानि ७:१३; तोह १:७ । 28अनि मिया सबोय दुःख अनि तकलिबताल लेहचियाना बेरा हेरे वाता इन्जोर इव सबोय पोल्लोंग आयानपा निमाट निचुन हिमते तयारकिस मन्ट।”
अन्जीर पोरोयदा मराता पिटो
(मत्ति २४:३२-३५; मर १३:२८-३१)
29अनि येसु ओरकुन उन्दि पिटो वेहतुर: “अन्जीरता मरा अनि दुसरो सबोय मराकुन हुळाट। 30अनि अव मरातांग पुनाह आकिंग कोडसातांग, असके इदेक डोकाल हेरे वाता इन्जोर माक समजेमान्तोरक। 31अनि अदामे लेहकाय इव पोल्लोनुंग आयानपा हुळकिट असके परमेस्वरना राज्य हेरे वाता इन्जोर निमाट पुन्दाकिट। 32अनि इव सबोय पोल्लोंग बचोवनाह आयो-आयार अदवनाह इद पिळितोरक लोकुरा बसकेन अन्त आयो-आयार इन्जोर नना मिकुन चेतेकिसुन वेहान्तोना। 33अनि इद आबार अनि दरति नाश आयार, मति नावा वेहता पोल्लो बसकेय नाश आयो।”
तयार मन्ट
(मत्ति २४:३६-४४; मर १३:३२-३७)
34येसु चेलालोरकुन असा इतुर, “इन्जोर मिया मन दरोज तिन्दाना अनि दाळंगो उन्डाना अनि इद दुनियाता जिवनता पोल्लोंगना बारेते चिन्ता किसुन प्रबुना वायाना दिया मिया पोरो पसा लेहका हुरहाय वायमा इन्जोर निमाट सावदान मन्ट। 35बाक्याकि अव दियांग दरतितिंगा मनवालोरक सबोय लोकुरकनिगा उन्दि पसा लेहका हुरहायने वायार। 36इन्जोर निमाट इव सबोय पोल्लोताल पिसियस मन्दान साटि अनि नना मानेयतोर मरिना मुने निताना लायेक बनेमायान साटि दरोज प्रार्थना किसोरिंग निमाट सावदान मन्ट।”
37अनि येसु मेयदेना येरुसलेम मन्दिरता डुवारतिगा परमेस्वरना पोल्लोनुंग वेहन्दुर अनि नरका बाहरो हन्जुन जयतुन पोरोयदा मटातिगा मन्दुरक#मत्ति २१:१७; युह ११:१, 38अनि येसु बिरबरिंगे समाज मन्डलितिगा वान्दुर, सबोय लोकुरक येसुना पोल्लोंग केन्जान साटि बिरबरिंगे येरुसलेम मन्दिरता दुवारतिगा ओना हेरे हतुरक।
Nke Ahọpụtara Ugbu A:
लूका 21: fmu
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© (Active) Wycliffe Bible Translators, Inc. All rights reserved.