लूका 4
4
यीसु के परिच्छा
(मत्ती 4:1-11; मरकुस 1:12,13)
1पुनि यीसु पबित्र आत्मा से भरे, यरदन नदी से लउटें; अउर पबित्र आत्मा के सिखाए से सुनसान जघा माहीं फिरत रहिगें; 2अउर सइतान चालिस दिन तक उनखर परिच्छा लेत रहिगा। उन दिनन माहीं यीसु कुछू नहीं खाइन पीन, अउर जब चालिस दिन पूर होइगें, तब उनहीं भूँख लाग। 3तब सइतान यीसु से कहिस, “अगर तूँ परमातिमा के लड़िका आह्या, त इआ पथरा से कहा, कि रोटी बन जाय।” 4यीसु सइतान काहीं जबाब दिहिन, “पबित्र सास्त्र माहीं लिखा हय, ‘मनई केबल रोटिन भर से जिन्दा न रही’।” 5तब सइतान यीसु काहीं खुब ऊँच जघा माहीं लइगा, अउर उनहीं छिन भरे माहीं संसार के सगले राज देखाइस, 6अउर सइतान यीसु से कहिस, “हम ईं सगले राज के अधिकार अउर उनखर धन-सम्पत्ती तोहईं दइ देब, काहेकि ईं सगलेन काहीं हमहीं सउँपा ग हय: अउर हम जेही चाही, ओही दइ सकित हएन। 7एसे अगर तूँ हमरे गोड़न गिरिहा, त इआ सगला हम तोहईं दइ देब।” 8यीसु सइतान काहीं जबाब दिहिन, “पबित्र सास्त्र माहीं लिखा हय, ‘तूँ अपने प्रभू परमातिमा काहीं दन्डबत किहा; अउर केबल उनहिन के सेबा किहा’।” 9तब सइतान यीसु काहीं यरूसलेम मन्दिर माहीं लइ जाइके मन्दिर के गुम्मट माहीं ठाढ़ किहिस, अउर उनसे कहिस, “अगर तूँ परमातिमा के लड़िका आह्या, त अपने-आप काहीं इहाँ से नीचे गिराय द्या। 10काहेकि पबित्र सास्त्र माहीं इआ लिखा हय, ‘परमातिमा तोंहरे खातिर अपने स्वरगदूतन काहीं हुकुम देइहँय, कि ऊँ तोंहार रच्छा करँय’, 11अउर ‘ऊँ तोहईं उपरय लोक लेइहँय, कहँव अइसा न होय कि तोंहरे गोड़ेन माहीं पथरा से चोंट लगि जाय।” 12यीसु सइतान काहीं जबाब दिहिन, “पबित्र सास्त्र माहीं इहव लिखा हय, कि: ‘तूँ अपने प्रभू परमातिमा के परिच्छा न किहा’।” 13जब सइतान सगली परिच्छा कइ चुका, तब कुछ समय के खातिर यीसु के लघे से चला ग।
यीसु के सेबा के काम के सुरुआत
(मत्ती 4:12-17; मरकुस 1:14-15)
14पुनि यीसु पबित्र आत्मा के सामर्थ से भरे गलील प्रदेस माहीं लउटि आएँ, अउर यीसु के खबर लघे-लघे के सगले सहरन माहीं फइलिगे। 15यीसु सभाघरन माहीं उपदेस देत रहिगें, अउर सगले सुनँय बाले उनखर बड़ाई करत रहे हँय।
नासरत गाँव माहीं यीसु के निरादर
(मत्ती 13:53-58; मरकुस 6:1-6)
16ओखे बाद यीसु नासरत गाँव माहीं आएँ, जहाँ उनखर पालन-पोसन भ रहा हय; अउर अपने रीति के मुताबिक, पबित्र दिन काहीं सभाघर माहीं जाइके पबित्र सास्त्र पढ़ँइ के खातिर ठाढ़ भें। 17तब उनहीं परमातिमा के सँदेस बतामँइ बाले यसायाह के लिखी किताब, यहूदी सभाघर के सेबक लइआइके दिहिस, अउर यीसु उआ किताब काहीं खोलिके, उआ जघा निकारिन जहाँ इआ लिखा रहा हय:
18“प्रभू के आत्मा हमरे भीतर हय, एसे कि परमातिमा कंगालन काहीं खुसी के खबर सुनामँइ के खातिर हमार अभिसेक किहिन हीं, अउर हमहीं एसे पठइन हीं, कि बंदिन काहीं छोड़ामँइ के अउर अँधरन काहीं आँखी पामँइ के खुसी के खबर के प्रचार करी, अउर दबे-कुचले लोगन काहीं बन्धन से छोंड़ाई।
19अउर प्रभू के अपने लोगन के ऊपर दया करँइ बाले समय के प्रचार करी।”
20तब यीसु इआ पढ़िके किताब बंद कइके सेबक के हाँथे माहीं दइ दिहिन, अउर बइठिगें; तब यहूदी सभाघर माहीं बइठ सगले मनइन के ध्यान उनखे कइती लगा रहा हय। 21तब यीसु उनसे कहँइ लागें, “आजय तोंहरे सुनतय-सुनत पबित्र सास्त्र के इआ बचन पूर भ हय।”
22उहाँ बइठ सगले मनई उनहीं सराहँइ लागें, अउर यीसु के मुँह से जउन, किरपा के बातँय निकरत रही हँय, ऊँ बातन से सगले जन अचरज मानिन; अउर कहँइ लागें, “काहे ईं यूसुफ के लड़िका न होहीं?” 23यीसु उनसे कहिन, “तूँ पंचे हमरे बारे माहीं इआ कहाबत जरूर कइहा, कि ‘हे बैद्य, अपने-आप काहीं नीक करा! जउन कुछू हम पंचे सुनेन हय, कि कफरनहूम माहीं जउन काम तूँ किहा हय, उहय काम इहाँ अपने गाँव माहीं घलाय करा’।” 24अउर यीसु इहव कहिन, “हम तोंहसे सही कहित हएन, कि कउनव परमातिमा के सँदेस बतामँइ बाला, अपने गाँव माहीं मान-सम्मान नहीं पाबय। 25हम तोंहसे सही कहित हएन, कि एलिय्याह नबी के दिनन माहीं जब साढ़े तीन बरिस तक अकास से पानी नहीं बरसा, इहाँ तक कि सगले देस माहीं अकाल परा, तब इजराइल माहीं खुब बिधबा रही हँय। 26पय एलिय्याह नबी उन बिधबन म से कोहू के लघे नहीं पठए गें, केबल सैदा प्रदेस के सारफत गाँव माहीं एकठे बिधबा के लघे पठए गें तय। 27अउर परमातिमा के सँदेस बतामँइ बाले एलीसा के समय माहीं इजराइल माहीं खुब कोढ़ी रहे हँय, पय सीरिया देस के रहँइ बाले नामान काहीं छोंड़िके उनमा से कउनव सुद्ध नहीं कीन गें।” 28ईं बातन काहीं सुनतय जेतने मनई यहूदी सभाघर माहीं रहे हँय, सगले आगबबूला होइगें। 29अउर उठिके यीसु काहीं सहर से बहिरे निकारिके, जउने पहार माहीं उनखर सहर बसा रहा हय, ओहिन के ऊपर चोंटी माहीं लइगें, कि यीसु काहीं उहाँ से नीचे गिराय देंय। 30पय यीसु, उनखे बीच से निकरिके चलेगें।
बुरी आत्मा से परेसान मनई काहीं नीक करब
(मरकुस 1:21-28)
31ओखे बाद यीसु गलील प्रदेस के कफरनहूम सहर माहीं आएँ, अउर पबित्र दिन काहीं लोगन काहीं उपदेस देत रहे हँय। 32ऊँ सगले जन उनखे उपदेस काहीं सुनिके चउआइगें, काहेकि यीसु बचन काहीं अधिकार के साथ बताबत रहे हँय। 33यहूदी सभाघर माहीं एकठे मनई बइठ रहा हय, जउने माहीं बुरी आत्मा रही हय। उआ खुब चंडे चिल्लाइके कहिस, 34“हे नासरत गाँव के यीसु, हमार अपना से कउनव काम नहिं आय। का अपना हमहीं नास करँइ आएन हँय? हम अपना काहीं जानित हएन, कि को आहेन? अपना परमातिमा के पबित्र जन आहेन!” 35यीसु ओही डाँटिके कहिन, “चुप्पय रव्ह, अउर उआ मनई से बहिरे निकर जा!” तब बुरी आत्मा उआ मनई काहीं सगलेन के बीच माहीं पटकिके बिना चोंट पहुँचाए ओसे निकरिगे। 36इआ सगला हाल देखिके सगले जन बड़ा अचरज मानिन, अउर ऊँ पंचे आपस माहीं कहँइ लागें, “इआ कइसन बचन हय? काहेकि यीसु अधिकार अउर सामर्थ के साथ बुरी आत्मन काहीं हुकुम देत हें, अउर ऊँ मनइन से निकर जाती हईं।” 37इआमेर से चारिव कइती हरेक जघा माहीं यीसु के चरचा होंइ लाग।
पतरस के सास अउर खुब बिमारन काहीं नीक करब
(मत्ती 8:14-17; मरकुस 1:29-34)
38यीसु यहूदी सभाघर से उठिके समौन के घर माहीं गें। उहाँ समौन के सास काहीं बोखार चढ़ी रही हय, अउर घरबाले उनहीं नीक करँइ के खातिर यीसु से बिनती किहिन। 39यीसु उनखे लघे ठाढ़ होइके बोखार काहीं डाँटिन, तबहिनय उनखर बोखार उतरि गे, अउर ऊँ तुरन्तय उठिके उनखर सेबा-सहाई करँइ लागीं।
40सुरिज बूड़ँइ के समय, जेखे-जेखे घर माहीं कइअक मेर के बिमारिन से मनई परे रहे हँय, ऊँ सगले जन उनहीं यीसु के लघे लइ आएँ, अउर यीसु सगलेन के ऊपर आपन हाँथ धइके नीक कइ दिहिन। 41अउर बुरी आत्मा घलाय चिल्लात अउर इआ कहत, कि “तूँ परमातिमा के लड़िका आह्या”, खुब मनइन से निकर गईं। पय यीसु उनहीं डाँटिके बोलँइ नहीं देत रहे आहीं, काहेकि ऊँ बुरी आत्मा जानत रही हँय, कि ईं मसीह आहीं।
यहूदी सभाघरन माहीं प्रचार करब
(मरकुस 1:35-39)
42जब सकार भ, तब यीसु उहाँ से निकरिके सुनसान जघा माहीं गें, अउर भीड़ के भीड़ मनई उनहीं ढूँढ़त-ढूँढ़त उनखे लघे पहुँचिगें, अउर उनहीं रोंकँइ लागें, कि अपना हमरे लघे से न जई। 43पय यीसु उनसे कहिन, “हमहीं दुसरेव सहरन माहीं परमातिमा के राज के खुसी के खबर सुनाउब जरूरी हय, काहेकि हम एहिन खातिर पठए गएन हय।” 44अउर यीसु गलील प्रदेस के सभाघरन माहीं जाइ-जाइके प्रचार करत रहिगें।
Nke Ahọpụtara Ugbu A:
लूका 4: bag
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Wycliffe Bible Translators, Inc. All rights reserved.