Panagnaan 3
3
Katiksaan manusiyaꞌ sabapan dusa Boꞌ Adam ka Sitti Hawa
1Na ni mimon sattuwa tawun ma bay pinapayak meꞌ Tuhan, yaꞌ luu bay akkahan labi man sō. Dari disu llaw, lai sō looy pa mman danda looy, yuk na, “Bana kilay lay kam binandaan leꞌ Tuhan yaꞌ nohoꞌ mangan buwaꞌ oy-oy jaꞌ kayu ni tinanom tuu?”
2Yuk danda looy, “Kakakan baw bilay kami buwaꞌ siga kayu ni tinanom tuu. 3Sugaꞌ bay baw kami binandaan meꞌ Tuhan yaꞌ nohoꞌ mangan buwaꞌ kayu looy disu ma ni tangngaan tinanom tuu. San murut, yaꞌ du dari. Bong kami konoꞌ bay kakakan atawa murut, mastiꞌ matoy jaꞌ kami.”
4Sugaꞌ yuk sō looy, “Ē, yaꞌ baw kam bilay matoy. 5Arapun ngkon kam ilay bay binandaan meꞌ looy batan katoonan Tuhan bong kam bay na kakakan, mastiꞌ bukaꞌ na pamiki bi. Maka sumibuꞌ na du kam niiya kasayu mahap-maat.”
6Na ni lilingan danda looy, kagak-gāk inandaꞌ poon kayu looy maka buwaꞌ na bantuk mahap lassa na bong kinakan. Sarī gi, doman ya koleꞌ pangahati lawom bong ya bay kakakan. Dari siꞌ ilooy ma lay du ya ngattuꞌ boꞌ na mangan. Pag-anu, lay gi buwanan na lla na sampay lay du mangan. 7Dari siꞌ, bukaꞌ du pamiki da nilang mahap-maat sampay tasayu da na ga nantang sila. Dari siꞌ, lay sila nahiꞌ dawun kayu man da napisan baran da.
8Pag taabut deꞌ kohap maka kulang na pasuꞌ llaw, luu na takale da bahunus Tuhan lumān ni tinanom looy. Dari ilooy ma lay sila palimbu ni siga poon kayu ndooy. 9Pag-anu siꞌ, lay llinganan lalla looy meꞌ Tuhan, yuk na, “Ninggai doꞌ tu man nu?”
10Pag tampung lalla looy, “Pag bay takale ku siꞌ bahunus nu lumān, lay ko tapukan ku. Tawu ku takita nu nantang.”
11Yuk Tuhan, “Pooy baw tu meꞌ nu kasayu ga nantang ko? Lay na kina ko kakakan buwaꞌ kayu looy ma bay bandaan ku yaꞌ nohoꞌ kinakan?”
12Iya tampung lalla looy siꞌ, “Taksi danda tee baw ba siꞌ ma bay pabuwat nu limbang ku bay muwanan aku. Ilooy silay kon ku bay kakakan.”
13Pag-anu, tinilaw na baw meꞌ Tuhan danda looy siꞌ, yuk na, “Ongoy ko bay buwat meꞌ looy?”
Tampung danda looy baw siꞌ, “Lay ku ba la takoleꞌ inakkahan leꞌ sō looy. Ngkon ku bay kakakan.”
Sumpaꞌ Tuhan njataꞌ Boꞌ Adam ka Sitti Hawa sampay na njataꞌ sō looy
14Dari yuk Tuhan ni sō looy, “Kau ina, sabapan pabuwatan nu, tuwaꞌ sumpaꞌ na sina ko. Ni mimon kahayop-hayopan ka sattuwa tawun, kau du sina sumpaan ku. Labba man batnaa, halloman nu llum, maglelehan na jaꞌ sina ko ka battong nu maka kakakan jaꞌ sina ko momok tanaꞌ. 15Lagiꞌ na, pagsikagigit ta na sina kam ka danda tuu sampay na siga panubuꞌ bi sikaduwa. Sugaꞌ luu du sina mintu disu panubuꞌ danda tuu maā kau. Bbuwatan nu ina mintu ninduk tikod na, sugaꞌ pinipis du sina meꞌ na kōk nu.”
16Yuk Tuhan na baw ni danda looy, “Kuwan kau, sabapan dusa nu, sumpaꞌ njataꞌ nu, kabisahan jaꞌ sina ko tuktuk nu maddi. Sugaꞌ masi du ko sina mintu doman ubay ka lla nu. Maka pinagbayaan ko meꞌ lla nu.”
17Pag-anu, yuk Tuhan na baw ni lalla looy, “Pagka lay jaꞌ ko kuhi tagayu meꞌ nda nu nohoꞌ mangan buwaꞌ kayu looy ma bay tinagga meꞌ ku, sumpaan ku na sina tanaꞌ sabapan nu. Labba man batnaa, halloman nu llum, malasahi sina ko miha balanjaꞌ. 18Labba man batnaa, luu na sina sumpot-lanting mimon pannoꞌ meꞌ iting tomoꞌ ni tinanom nu. 19Basta yaꞌ na sina ko koleꞌ balanjaꞌ bong yaꞌ doꞌ bay pingkaꞌ tumpa songot nu paeka ngabut sampay ko llabbong. Bay ko pinapayak ka tanaꞌ. Bbos-bbos padari tanaꞌ du sina ko pabalik.”
20Na awon lalla looy siꞌ yana si Adam. Kuwan nda na, lay awnan na si Hawa. Hatiyan awon na ilay, “llum,” batan iya na silay bboꞌ sikamimon manusiyaꞌ.
21Pag-anu siꞌ, lay na baw sila binuwatan meꞌ Tuhan pamakoy ka kuwit hayop, boꞌ da lay pinapatukan.
Boꞌ Adam ka Sitti Hawa pinōꞌ man Eden
22Pag-anu yuk Tuhan, “Batnaa, kadarihan ga manusiyaꞌ naa meꞌ kitabi na du batan tasayu da na mahap-maat. Yaꞌ sila tapabiya ku ngattuꞌ sampay mangan buwaꞌ kayu looy ma kabuwan kaallum saumu, taggahaꞌ bong sila bay kakakan, yaꞌ na baw mintu sila matoy saumu-umu.” 23Dari lay na sila pinōꞌ meꞌ Tuhan man tinanom-tinanom looy ni Eden. Maka lai na si Adam sinohoꞌ buwat pa tanaꞌ ma bay man mapayak iya.
24Lay jaꞌ siꞌ sila pinōꞌ, lay na baw Tuhan ngannaꞌ siga tukang nganjaga lakka man sulgaꞌ inawnan Serabim ndooy ni Eden huwin pa mataallaw. Maka luu gi bay inannaꞌ ndooy meꞌ Tuhan kataliꞌ apihan noleyab maglabaran pa dambilaꞌ pa dambilaꞌ. Kon meꞌ looy supaya yaꞌ na luu kapilay pa poon kayu looy ma kabuwan kaallum saumu-umu buwaꞌ na.
Nke Ahọpụtara Ugbu A:
Panagnaan 3: sjm
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2021, Wycliffe Bible Translators, Inc. All rights reserved.