मत्ती 4
4
ईसू की परक
(मरकुस 1:12–13; लूका 4:1–13)
1 #
इब्रा 2:18; 4:15 ईंका केड़े पुवितर आत्मा ईसू ने हुन्ना कांकड़ में लेगी, ताँके सेतान का हाताऊँ वींकी जाँच-परक किदी जा सके। 2चाळीस रात-दन भुको रिया केड़े ईसू ने जोरकी भूक लागी। 3तो वींकी परक करबावाळो वींका भड़े आयो अन क्यो, “यद्याँ थूँ परमेसर को पूत हे तो अणा भाटा ने के, ईं रोट्याँ बण जावे।”
4 #
वे.वि 8:3
ईसू क्यो, “सास्तर में ओ लिक्यो हे के,
“‘मनक बेस रोट्याऊँईस ने जीवे हे
पण हरेक बचनऊँ जीं परमेसर का मुण्डाऊँ निकळे हे, जीवतो रेई।’”
5पछे सेतान वींने पुवितर नगर यरूसलेम में लेग्यो। वटे मन्दर का हाराऊँ ऊँचा गुम्बद पे ऊबो किदो। 6#भज 91:11,12पछे सेतान वणीऊँ क्यो, “यद्याँ थूँ परमेसर को पूत हे तो अटेऊँ रेटे कुद जा, काँके सास्तर में ओ लिक्यो हे,
“‘वीं थारी हार-हमाळ का वाते हरग-दुताँ ने खन्दाई
अन वीं थने हातु-हात तोक लेई
ताँके थाँरा पगाँ के भाटा की ने लाग जावे।’”
7 #
वे.वि 6:16
ईसू वींने क्यो, “पण सास्तर यो भी केवे हे के,
“‘थूँ आपणाँ परबू परमेसर की परक मती कर।’”
8ईंका केड़े सेतान ईसू ने हाराऊँ ऊँचा मंगरा पे लेग्यो अन वाँने दनियाँ का हाराई राज अन मानता बताई। 9सेतान वींने क्यो, “ईं हारई चिजाँ थने दी देवूँ यद्याँ थूँ मारा पगा में पड़न मने माने।”
10 #
वे.वि 6:13
पछे ईसू वींने क्यो, “हे सेतान, छेटी वेजा। सास्तर यो केवे हे,
“‘थूँ आपणाँ परबू परमेसर ने मान
अन बेस वाँकीईस सेवा-चाकरी कर।’”
11पछे सेतान ईसू ने छोड़न भागग्यो अन हरग-दुत आन वाँकी सेवा-चाकरी करबा लागा।
ईसू की सेवा की सरुवात
(मरकुस 1:14–15; लूका 4:14–15)
12 #
मत्ती 14:3; मर 6:17; लूका 3:19,20 जद्याँ ईसू हुण्यो के, यहुन्नो पकड़ाग्यो हे, तो वो गलील में परदेस परोग्यो। 13#यहु 2:12पण वो नासरत नगर में ने रियो अन जान कफरनूम नगर में, ज्यो जबलुन अन नप्ताली हाकम का देस में गलील समन्द का अड़े-भड़े हो, वटे रेवा लागो। 14यो ईं वाते व्यो, ताँके परमेसर का आड़ीऊँ बोलबावाळा यसाया ज्यो क्यो हो वो पूरो वेवे के,
15 #
यसा 9:1,2 “जबलुन अन नप्ताली का देस
समन्द का गेला पे, यरदन नंदी का आतमणी दसा में,
ज्यो यहूदी ने हे वाँका देस गलील में।
16ज्यो लोग अंदारा में जीरिया हा
वाँकाणी एक मोटो ऊजासो देक्यो
अन ज्यो मोत की दरप में जीरिया हा,
वाँका पे भाग फाट्या को उजितो चमके।”
17 #
मत्ती 3:2
वीं टेमऊँ ईसू हव हमच्यार की सरुआत कर दिदी के, “पापऊँ मन फेरो, काँके हरग को राज आबावाळो हे।”
ईसू का हाताऊँ चेला को चुणाव
(मरकुस 1:16–20; लूका 5:1–11)
18जद्याँ ईसू गलील का समन्द का नके वेन जारियो हा। वटे वणा दो हगा भई समोन ज्यो पतरस केवातो हो अन वींका भई अन्दरियास ने समन्द में आपणाँ जाळ नाकता तका देक्या। काँके वीं माछळी पकड़बावाला हा। 19ईसू वाँने क्यो, “मारा पाच्छे आवो, मूँ थाँने हिकाऊँ के, लोगाँ का वाते माछळी पकड़बा के वजे मनकाँने परमेसर का राज में कस्यान लावे हे।” 20वीं तरत आपणाँ जाळ वटेई छोड़न ईसू का लारे वेग्या।
21पछे वी वटेऊँ आगे चाल पड़्या अन वणा देक्यो के, जबदी को छोरो याकूब अन वींको भई यहुन्नो आपणाँ बाप जबदी का हाते नाव में बेट्यो तको आपणी जाळाँ ने हळजारिया हा। ईसू वाँने भी बलाया। 22अन वीं तरत नाव अन आपणाँ बापू जब्दी ने वटेई छोड़न वींका पाच्छे वेग्यो।
ईसू को उपदेस अन माँदा मनकाँ ने हव करणा
(लूका 6:17–19)
23 #
मत्ती 9:35; मर 1:39 ईसू हाराई गलील देस में यहुदया का परातना घर में हरग का राज को हव हमच्यार को उपदेस देतो अन तरे-तरे का रोगा ने हव करतो तको फरबा लागो। 24हाराई सिरिया देस में वाँको हव हमच्यार फेलग्यो। ईं वाते लोग अस्या हाराई मनकाँ ने ज्यो तरे-तरे की मांदकीऊँ माँदा हा, जणामें हुगळी-आत्मा, जाँने मरगी का जोला आता हा, अन जीं लकवा का माँदा हाँ, वाँने ईसू का नके लाया अन ईसू वाँने हव किदा। 25ईं वाते गलील देस, दस नगराँ को गामाँ की जगाँ जिंने दिकापुलिस केता हा, यरूसलेम, यहूदियाँ अन यरदन नंदी की पेले पाल्डे का मनकाँ की मोटी-मोटी टोळी वाँका नके आबा लागी।
Nke Ahọpụtara Ugbu A:
मत्ती 4: एम टी आर
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
(c) 2010-2017, New Life Computer Institute. All rights reserved