यहून्ना 5
5
ईसु मिनखनै निरोगो कर्यो
1क्युंक दिना पाछै यहूदि मिनखा को एक त्युंहार आयो जि बजेऊँ ईसु यरूसलेम गयो। 2यरूसलेम म लल्डी फाटक क कनै एक जोह्ड़ी ह। जिनै इबरानी भासा म बेतसदाई खेवीं हीं, इकै च्यारूमेर पाच टपर्या ही। 3अपाईज मिनखा की भीड़ की भीड़ जामै आँदा, लंगड़ा, भाळ भेयड़ा बठै बा टपर्या म पड़्या रेह्ता हा। 4(बे पाणी का हालबानै उडिकता हा, क्युं क बाको बिस्वास हो क टेम-टेम परमेसर आपका दुतनै पाणी हलाबा ताँई भेजतो हो। अर जद पाणी हालतो जणा जखो बी मिनख पेली बिकै मांयनै उतरतो बो निरोगो होज्यातो हो। चाए बिकै किसोई रोग क्युं नइ हो।)#5:4 क्युंक हातऊँ मांडेड़ी पोथ्या म अ बाता कोनी मांडेड़ी 5बठै एक मिनख हो जखो अड़तीस बरसाऊँ अपाईज हो। 6जद ईसु बिनै बठै पड़्या देख्यो अर जाणगो क ओ मिनख बोळा लामा टेमऊँ इ दसा म ह। जणा बो मिनखऊँ बुज्यो, “तू निरोगो होबो चावै ह के?”
7बो अपाईज बोल्यो, “स्याणो, मेरै कनै कोई कोनी जखो पाणी हालताई मनै इ जोह्ड़ी म उतार सकै। अर जद ताँई म खुद कोसिस करूं बिऊँ पेलीई कोई दुसरो इमै कूद पड़ै ह।”
8ईसु बोल्यो, “खड़्यो हो, तेरी गुद्ड़ी उठा, अर चाल।” 9बो मिनख जदकी जदई निरोगो होगो अर आपकी गुद्ड़ी उठार चालबा लाग्यो।
ओ यहूदि मिनखा को अरामहाळो दिन हो, 10जणा यहूदि अधिकारी निरोगो होबाळा बि मिनखऊँ बोल्या, “तेरो अंय्यां गुद्ड़ी उठार चालबो आपणा नेम-कायदा क खिलाप ह, क्युं क आज अरामहाळो दिन ह।”
11पण बो बोल्यो, “जखो मिनख मनै निरोगो कर्यो ह बो मेरूँ बोल्यो ह, ‘तेरी गुद्ड़ी उठा अर चाल फिर।’”
12बे बिऊँ बुज्या, “तनै अंय्यां करबा ताँई खेबाळो मिनख कूण ह क, ‘तेरी गुद्ड़ी उठा अर चाल फिर?’”
13पण जखो मिनख निरोगो होयो हो बो ईसुनै कोनी जाणतो हो, बि झघा बोळी भीड़ ही अर ईसु बठैऊँ चलेगो हो।
14इकै पाछै बो ईसुनै मनदर म मिल्यो, जणा ईसु बिऊँ बोल्यो, “देख, इब तू निरोगो होगो ह, जणा पाप करबो छोडदे, कदै अंय्यां नइ होज्या क इऊँ बी भारी तुमत तेर प आ पड़ै।” 15जणा बो मिनख यहूदि अधिकारीयानै आर आ बताई क, “मनै निरोगो करबाळो ईसु ह।”
16जणा यहूदि अधिकारी ईसुनै सताबा लाग्या, क्युं क बो आ कामानै यहूदि मिनखा का अरामहाळा दिनई करतो हो। 17पण ईसु बानै जुबाब दिओ, “मेरो परम-पिता कदैई काम करनो बंद कोनी करै, इ ताँई म बी काम करर्यो हूँ।” 18आ बात यहूदि अधिकारीया क ओर घणी गडगी जि बजेऊँ बे बिनै मारबा ताँई ओर बेत्ती मोका ढुंढबा लाग्या। क्युं क बो बाकी नजर्या म यहूदि मिनखा का अरामहाळा दिन कोई नियम कोनी तोड़्यो, पण खुदनै परमेसर को बेटो बतार परमेसर की बराबरी कर्यो।
19जणा ईसु बाऊँ बोल्यो, “म थारूँ सची-सची बोलुँ हूँ, बेटो खुद क्युंई कोनी कर सकै, बो बोई करै ह जखो परम-पितानै करता देखै ह, अर जोक्यु परम-पिता करै ह बो बेटो बी करै ह। 20क्युं क परम-पिता बेटाऊँ प्यार करै ह अर बो बिनै सक्यु दिखावै जखो बो करै ह। अर इऊँ बी बडा-बडा काम बिनै देसी जिऊँ थे ताजूब करस्यो। 21जंय्यां परम-पिता मरेड़ानै जीवावै ह, बंय्यांई बेटो बी जिनै चावै बिनै जीवन देवै ह। 22परम-पिता खुद कोईकोई न्याय कोनी करै। न्याय करबा को सारो हक बो आपका बेटानै सूप दिओ ह। 23जिऊँ सगळा, बि बेटा को बंय्यांई मान-समान करै जंय्यां परम-पिता को मान-समान करीं हीं। जखो बी बेटा को मान-समान कोनी करै बो परम-पिता को मान-समान बी कोनी करै जखो बिनै भेज्यो ह।
24“म थारूँ सची बोलुँ हूँ, जखा मेरी सुणर मनै भेजबाळा प बिस्वास करीं हीं, अजर-अमर जीवन बाको ह अर बो मिनख सजाऊँ बचज्यासी। बो मोतऊँ पार होर जीवन म बड़गो ह। 25म थारूँ सची बोलुँ हूँ, बो टेम आर्यो ह, आर्यो के ह बो टेम आगो, जद मरेड़ा परमेसर का बेटा की उवाज सुणसी अर जखा बी बिकी सुणसी बे जिज्यासी। 26क्युं क जंय्यां परम-पिता जीवनदाता ह, ठिक बंय्यांई बो आपका बेटानै बी जीवन देबा को अधिकार दे राख्यो ह। 27अर बो बिनै न्याय करबा को बी अधिकार दे राख्यो ह। क्युं क बो मिनख को बेटो ह।
28“इपै ताजूब मना करो क्युं क टेम आर्यो ह, जद बे सगळा जखा कबरा म हीं बे बिका बचननै सुणसी, 29अर कबराऊँ बारनै आज्यासी। जखा चोखा करम कर्या हीं बे अजर-अमर जीवन ताँई ओज्यु जी उठसी, अर जखा बुरा करम कर्या हीं बे सजा भोगबा ताँई जी उठसी। 30म खुदऊँ क्युंई कोनी कर सकूँ। जंय्यां म सुणू हूँ, बंय्यांई न्याय करूं हूँ। मेरो न्याय सचो ह, क्युं क म मेरी कोनी पण मनै भेजबाळा की मन की चाऊँ हूँ।
ईसु क बारां म गुवाई
31“ज म मेरा बारां मई गुवाई द्युँ; जणा बा सची कोनी मानी जावै। 32पण मेरै बारां म गुवाई देबाळो म कोनी पण ओरई मेरी गुवाई देवै ह, अर म जाणू हूँ क, मेरै बारां म बिकी गुवाई सची ह।
33 #
यह 1:19–27; 3:27–30 “जद थे यहून्ना कनै थारै मिनखानै बुजबा ताँई भेज्या हा जणा बो सच की गुवाई दि। 34पण इको ओ मतबल कोनी क म मेर ताँई मिनखा की गुवाई चाऊँ हूँ। पण अ बाता म इ ताँई बोलुँ हूँ क थे बच ज्याओ। 35यहून्ना तो बळता अर भळकता दिआ की जंय्यां हो अर थे थोड़ी देर बिका च्यानणा म राजी होबो चावा हा।
36“पण मेरै कनै एक ओर गुवा ह, जिकी गुवाई यहून्ना की गुवाईऊँ बढर ह। क्युं क परम-पिता जखो काम मनै करबा ताँई सूप्यो ह, जखा काम म करूं हूँ। बेई मेरै बारां म गुवाई देवीं ही क, परम-पिता मनै भेज्यो ह। 37#मत्त 3:17; मर 1:11; लूक 3:22मनै भेजबाळो परम-पिता मेरै बारां म गुवाई देवै ह। थे नइ तो कदै बिकी सुण्या अर नइ बिनै देख्या, 38अर बिका बचन थारै मन म कोनी, क्युं क जिनै बो भेज्यो ह, थे बिको बिस्वास कोनी करो। 39थे पबितर सास्तर का आंक बाचो हो, क्युं क थे सोचो हो क आ आंका म थानै अजर-अमर जीवन मिलसी। पण अ आंक बी मेरै बारां मई मांडेड़ा हीं। 40जणा बी थे अजर-अमर जीवन पाबा ताँई मेरै कनै कोनी आबो चाओ।
41“म मिनखाऊँ जे-जैकार कोनी ल्युं, 42क्युं क म थानै जाणू हूँ क थारै म परमेसर को परेम कोनी। 43म मेरा परम-पिता का नामऊँ आयो हूँ पण थे मनै कोनी अपणायो। ज कोई खुदका नामऊँ आज्या जणा थे बिकै गेल होज्यास्यो। 44थे कंय्यां बिस्वास कर सको हो? थानै तो एक दुसराऊँ मान-समान भावै ह। पण खाली परमेसरऊँ मिलबाळा मान-समान ताँई थे लापरवा हो।
45“पण आ मना सोचो क परम-पिता क सामै म थार प दोस लगास्युं। पण थार प दोस लगाबाळो मूसा ह जिपै थे आस राखो हो। 46क्युं क ज थे मूसा को बिस्वास करता, जणा मेरो बी बिस्वास करता, क्युं क बो मेरै बारां मई मांड्यो ह। 47पण ज थे बिकी मांडेड़ी बाता प बिस्वास कोनी करो, जणा मेरी बाता प कंय्यां बिस्वास कर सको हो?”
Nke Ahọpụtara Ugbu A:
यहून्ना 5: एस डब्लु वी
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
(c) 2010-2017, New Life Computer Institute. All rights reserved