San Lucas 2
2
Golhaj Jesús
(Mt 1.18-25)
1Lo tiembo tina'a, bene rne'abe Cesar Augusto gne' xhchisake to guichi soa loka bene ki sdo xhen lichhileyo'. 2Guichi nerho ni ga' zoa loke be'anke kati Quirinio goke gobiarne ki Siria. 3Yogoke go'onhe tzeajke dzajzoa loke lo yechhi kie'akagse. 4Tanka, José broaje lo yechhi ki Nazaret, ga' nababa Galilea, te beyiaje Belén, ga' nababa Judea, ga' golhaj bene rne'abe grelawe David, le'a José goka xozixhtoe David. 5Guiaje na' yajzoa lawe, tzaxhen le'an María, nigolha kie', noe' bindo. 6Na tzalaka dzake Belén, bchhin ki María tiembo tan soa xhi'inhe. 7Te na' golhaj xhi'inhe nerho, na bolachhiebi lo beka' te gdixajebi ga' rhagoka beaguixi, le'a tan bigoka ga' yega'anke.
Ka angle le'an ka bene ryoke beaguixi
8Ga'agozi Belén bkoaka balaka bene rhega'anke chigolala loguixi ryoke bekoxhilha kie'ake. 9Kazoazi yajse'a to angle ki Diozo, te yelaye'ani ki Xosrha Diozo, bze'ani torhoe' ga' ze'ake; te bdzebikagaze. 10Te angle na rhe le'ake: «Labi sdzebilhe, le'a noa kie'alhe to rson wen, tayebelhe yogolhe: 11Nan golhaj kie'alhe lo yechhi ki David to nogsla rho'o, le' nake bene za'a yeba' te nake Xhi'in Diozo. 12Kinda ye'akiebelhe, yalelhe lén bindo na narhelebi beka' te diabi ga' rhagoka beaguixi.»
13Tina'ateka yajse'aka, kuita angle, tixekarhe angle zake yeba', rhonke xhen Diozo te rne'ake:
14«¡Rhonrha xhen Diozo chhie'e yeba'!
¡Chhia'agazi lo lichhileyo' naka ki bene rzi'ike banheza ki Diozo!»
15Kati ka angle beyiajke yeba', bene ryoke beaguixi gzolhoke rhe'ake leza'ake:
—Dialhe yiajrha Belén, dzajyorha tan goka le'an tan Xosrha Diozo chigdixaje'ene rho'o.
16Guiajke porharhe te beyalekene María le'an José, te bindo na diabi lo ga' rhagoka beaguixi. 17Kati ble'ekenebi, gzolhoke rguixaje'eke ka' gochhi angle le'ake ki bindo na, 18te yogote'a bene benkene rhe'akiekene banachhi tan rtzalajka bene ryoke beaguixi. 19María nago'oze diarha ten lo laxhdawe, le'an zoate'aze kuenda. 20Ka bene ryoke beaguixi, beyiajke rhonke xhen Diozo le'an rholake ki Diozo ki diarha tan ble'ekene kan benkene, yogote'a ten goka ka' gochhika angle le'ake.
Bindo Jesús yajuakebi lo yo'o sdo'o
21Goka xonho dza, beakebi te gde'alake guidi nako gabachi'i kie'abi na bsike lobi Jesús ka' lobi gochhi angle María kati zigoalhebi. 22Kati bchhin dza, tan rhala yonke chhia'a kuinke ka' rne'a xhba'a ki Moisés, gche'ake bindo na Jerusalén kinda gdechhikebi lo Xosrha Diozo. 23Be'anke kan le'a lo xhba'a ki Xosrha Diozo zoa kan: «Yogote'a bin bguio' rzoakabi nerho rdechhikebi lo Xosrha Diozo.» 24Guiajke yajoake balan ka' rne'a xhba'a ki Xosrha Diozo: To koe boto' gbeo. 25Tiembo tina'a gzoa Jerusalén to bene grelawe Simeón. Goke to bene weze'anaga le'an bene wen, te rbeze yaka chhia'a Israel. Na Be'egrasia ki Diozo gze'a le'an Simeón, 26na bsnisie le' labine gatie' kati sle'erhene Jesús, bene sela Xosrha Diozo. 27Na Be'egrasia ki Diozo, gche'a Simeón lo yo'o sdo'o; te kati xozi xhna bindo Jesús le'aksikan gche'akebi, kinda gonke ka' rne'a xhba'a, 28Simeón bnidebi na be'anhe xhen Diozo na gne':
29«Nan, Diozo, ka' gne'alho choka kumplirhe:
bdelataj ki bene rhonhe kio' gatie' chhia'a.
30Le'a chible'eda yelawela
31tan chigzolholo gonlo
lo yogote'a yechhi,
32gui' na gze'ani ka yechhi yela te gaka xhen yechhi kio' Israel.»
33Xozi xhna Jesús gokiekene banachhi kati benkene ka' rne'a Simeón ki bindo na. 34Na'arhe Simeón be'an la'aye le'ake, te rhe María, xhna Jesús:
—Byokalho, bindo ni chide'ebi gonbi nonga tixeka bene yechhi xhen ki Israel sbixike o yeyasake. Le'abi kixaje'ebi ta chhia'a ki Diozo te tixeke biye'ankene, 35kinda snisielhe tan rhonle kuenda. Na diarha ten gaka kio' ka' to kchiyo te lo laxhdolho.
36Le'aksikan ze'a na' to nigolha btzalaje laza Diozo rhelawe Ana, xhi'in Penuel, koe ki Aser. Chirhonhe golha, btzagane' kati nerhonte xhkuidi, te gzoe' le'an bene kie' gachhi yiza; 37chizeaj tapa galaj tapa yiza tan bega'anhe weze'abi. Bigslabata roaje lo yo'o sdo'o, tan rhonhe ki Xosrha Diozo do dza do ye'alha, rchiajene ta gawe le'an rledze Diozo. 38Ana bchhinhe'e tina'ateka, te gzolhoe rde'e xhle'an Diozo kan rtzalaje ki bindo Jesús ki yogote'a no' rbezaka yeyaka Jerusalén.
Zeyiajke Nazaret
39De goka kumplirhe diarha tan rne'a lo xhba'a ki Xosrha Diozo, beyiajke Galilea, yechhi kie'akagse Nazaret. 40Bindo na rhe'anibi te rhakate'azibi mazirhe fuerti, napagazibi yelarheajnie le'an rzi'ibi tachhia'a ki Diozo.
Bindo Jesús beyalekenebi lo yo'o sdo'o
41Xozi xhna Jesús rheajke yogo yiza Jerusalén lo lani ki Paskua. 42Te kan, kati Jesús gokiene tzachhino yiza, guiajke na' yogoke, ka' nolanke lo lani na. 43Kati beyochhi lani, kati zeyiajke lo yo'o kie'ake. Bindo Jesús bega'anbi Jerusalén le'an bigsla gnisie xozi xhnabi. 44Rhe'akiekene Jesús zeyiajbi notzebi bene, be'anke to dza neza; te kati rheguilhajkebi ki dia'adza kie'ake le'an ki bene nonbe'ake, 45bigsla bedzelhekenebi. Te beyiajkake Jerusalén kinda yeguilhajkebi.
46Gokarhe tzona dza bedzelhekenebi lo yo'o sdo'o, rhe'ebi le'an ka muestro ki xhba'a, rze'anagabi kan rnabebi le'ake. 47Te yogote'a no' rhenke rhe'akiekene banachhi tan rheajniebi le'an ka' rhochhibi. 48Kati xozi xhnabi ble'ekene le'abi, gokiekene banachhi; na xhnabi gochhie le'abi:
—Bindo kia', ¿nobixhkia' be'angalo kan kne'ato? Xoslo le'an ne'adia chibeguilhajto loe' bebanguezeto.
49Jesús bochhie':
—¿Nobixhkia' rheguilhajalhe ne'adia? ¿Abinezelhe tan rhe'anhe se'a lo yo'o ki Xoza?
50Te biguiajniekene tan rhe'abi le'ake.
51Te beyiajbi le'an le'ake Nazaret, ga' gzoabi, rze'anagagazibi yogote'a. Xhnabi nago'oze diarha ten lo laxhdawe. 52Te Jesús rhe'anite'azi yelarheajnie kie' le'an yelatona, te rhebebi tan ze'a Diozo le'an le'abi le'an ka bene.
Nke Ahọpụtara Ugbu A:
San Lucas 2: ZAALuk
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Evangelio de Lucas en Mixe de Yalalag, Oaxaca, México © Sociedad Bíblica de México, A.C.