Tobit 13
13
Ik'ay Tobit
1Jiñi Tobit tsi' ich'ujutesa Lak Yum yik'ot ili k'ay:
2«Wokolix awälä, kCh'ujutat,
jatet kuxuletbä yik'ot yumäletbä ti' pejtelel k'iñ.
Jatet mi' awäk' ti toj mulil jiñi xjoñtolil,
yik'ot mi' acha' p'uñtañ ja'el;
mi' achok ju'bel ti' chumli'ob jiñi chämeño'bixbä,
yik'ot mi' akoltañ ja'el.
Ma'añik juñtikil mejlbä ti puts'el ti' ik'äb.
3-4»¡Israelitajob, ch'ujutesañla Lak Ch'ujutat
ti' tojlel yañtakbä tejklumob!
Jiñi tsi' itsiktesa ñukbä ip'ätälel
ya' ti yumäñteltak baki tsa' ichokoyob majlel.
K'äyäla ti' itojlel jiñi pejtelel wiñikob x-ixikob,
kome jiñi jiñäch Yumälbä lak cha'añ;
jiñäch Lak Ch'ujutat yik'ot Lak Tat,
k'älä wäle yik'ot ti' pejtelel k'iñ.
5»Lak Yum tsi' iyäk'eyob itojob imul
ti ikaj cha'añ pejtelel joñtolil tsa'bä imeleyob,
ixku ja'el mi ikaj icha' p'uñtañob.
Mi' ikaj ilok'sañob ya' ti tejklumtak
ya' baki chumulob ti kächol
yik'ot mi' ikaj icha' muchk'iñob ya' ti iyumäñtel.
6»Mi mux la' acha' sujtel ach'ujbiñla Lak Yum
ti' pejtelel ip'ätälel la' apusik'al,
jiñi Lak Yum mi ikaj icha' k'uxbiñetla
ya'i ma'añix mi ichäñ käyetla ti bajñelil.
7»K'äyäla jiñi Lak Yum ti' pejtelel ip'ätälel la' apusik'al,
kome jiñi ti' pejtelel k'iñ uts'at mi' ik'eletla.
K'äybeñla Lak Yum, mu'bä icha'leñ chuki tojbä,
k'äyäla jiñi Lak Yum machbä añik ijilibal.
8»Lak Ch'ujutat tsi' loksayoñ ti tejklum Israel
ya'i tsi' päyäyoñ tilel ti Nínive.
Ilayi ti tejklum baki woli ktoj kmul
mij k'äybeñ Lak Ch'ujutat cha'añ ñuk ip'ätälel.
Ti' tojlel ti' pejtelelob ili xmulilob
mij k'äye' iñuklel Lak Yum.
Mij k'ajtibeñetla cha'añ mi' aña'tañla amul,
yik'ot käyä la' amel joñtolil
cha'añ Lak Ch'ujutat mi' iñusabeñetla amul.
9»Mi kaj k'äybeñ Lak Yum,
jiñi Yumälbä ti pañchañ,
yik'ot mi kaj kch'ujutesañ iñuklel.
10¡Chumuletbäla ti Jerusalén,
k'äybeñla Lak Yum!
»¡Jerusalén, jatet itejklumetbä Lak Yum!
Ixku Lak Yum mi ikaj iyäk'eñet atoj mulil
cha'añ ti' kaj imulil xchumtälob acha'añ,
cha'añ ya' ti wi'il mi ikaj ip'uñtañob
jiñi majki uts'atbä mi' imelob.
11»¡K'äybeñla Lak Ch'ujutat,
chumuletbäla ya' ti Jerusalén!
K'äyiñla che' bajche' yom mi' k'äyibeñtel.
K'äybeñla jiñi Yumäl machbä añik ijilibal,
che' jiñi yik'ot tijikñäyel mi' ikaj acha' k'el
che' cha' wa'chokobilix ich'ujulbä ajñibäl.
12»Che'bä mi icha' sujtel
ti' Jerusalén jiñi israelitajob,
Lak Yum mi' kaj iyäk'eñob itijikñäyel ti pusik'alob,
yik'ot majki tsi' ñusayob wokol
mi' ikaj ichäñ k'uxbiñob ti' pejtelel k'iñ.
13»Jerusalén, isäklel ak'äk'al mi' ikaj ik'otel
k'äläl ba' kojax jaxäl ixujk pañämil.
K'äläl ti ñajtbä tejklumtak ti' joytilel pañämil
mi' kaj itilelob ich'ujutesañ Iyum Israel.
Ti' ik'äbob mi' ikaj ich'ämob tilel ka'bäl majtañäl
cha'añ Yumäl ti pañchañ.
Pejtelel xchumtälob ti pañämil
mi' kaj iñuk'esañob yik'ot tijikñäyel.
Ixku jatet Jerusalén
ma'añik bakibä k'iñ ma' akajel ajisäñtel.
14»¡Jerusalén,
la' yajlikob wokol ti' tojlel
pejtelel majki mu'bä its'a'leñetob!
¡La' yajlikob ti wokolil ti' tojlel
pejtelel majki mu'bä ijisañetob,
yik'ot majki mu'bä ijemob chañbä ats'ajkil!
¡La' yajlikob ti wokol ti' tojlel
pejtelel majki mu'bä ijemob ak'elob pañämil
yik'ot mu'bä iyotsäbeñob ik'äk'al awototak!
»¡Jerusalén,
la' itajob ich'ujutesäñtel ti Lak Ch'ujutat
ti' pejtelel k'iñ majki mu'bä icha' wachokoñetob!
15Che' jiñi añ tijikñäyel mi' ach'äme'
pejtelel majki mi' imel chuki uts'at,
yik'ot jiñob mi' ikajel itempañob ibä
cha'añ mi' ik'äyiñob Lak Ch'ujutat,
Yumälbä ti pañämil.
»¡Jerusalén,
la' itajob ich'ujutesäñtel ti Lak Ch'ujutat
majki mu'bä ik'uxbiñetob!
¡La' ich'ujutesañob ja'el majki mi' ik'eletob ataj añuklel
yik'ot la' ajñikob ti tijikñäyel!
16¡La' ich'ujutesañ ja'el
majki mi' yu'biñob ch'ijiyemlel
che'bä mi' k'elob awokolil cha'añ woli atoj amul!
»Ti' pejtelelob mi' ikaj itijikñesañob ibä
che' bakibä k'iñ Lak Ch'ujutat
mi iyäk'eñet jiñi tijikñäyel machbä añik ijilibal.
»¡Mij k'äyiñ Lak Ch'ujutat
machbä añik ip'isol ip'ätälel!
17Cha'añ jiñi tejklum Jerusalén
mi' kaj icha' wa'chokoñtel,
yik'ot jiñi Ch'ujulbä ajñibäl icha'añ Lak Yum
ma'añik mi' ikaj icha' jejmel.
»¡Jerusalén,
ts'äkäläch mi kaj kilañ ktijikñäyel
mi che'äch yom Lak Yum cha'añ jiñi kp'olbalob
mi' ik'otel ik'elob at'ojläwel
yik'ot mi' ich'ujutesañob Lak Yum,
Yumälbä ti pañchañ!
»Jerusalén,
jiñi awochibaltak yik'ot ats'ajkiltak
mi' kajel icha' wa'chokoñtel ti t'ojoltakbä xajlel.
Jiñi chañbä ts'ajk cha'añ mäktäjib
mi' kajelob imelob ti t'ojolbä xajlel ja'el.
Jiñi ak'elob pañämil yik'ot amäktäjib, ti k'äñlemañbä,
yik'ot jiñi yojlib mi' ikaj ipamuñtel
ti uts'ataxbä xajlel.
18Mi' kaj itilelob pejtelel wiñikob x-ixikob
yik'ot mi' ikaj ich'ujutesañob Lak Yum ti' pejtelel k'iñ.
Jiñi wiñikob x-ixikob mi' kajelob ti k'ay
yik'ot tijikñäyel ya' ti akolem ochibaltak
yik'ot ya' ti yototakob mi' ikajelob ti oñel:
“¡K'äyiñla Lak Ch'ujutat!
¡Ch'ujuläch Iyum Israel!”»
Nke Ahọpụtara Ugbu A:
Tobit 13: CholDc
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Biblia Chol de estudio con DC- Derechos reservados por SBM