Luka 9
9
Yesu slən ɗa slənɗay ene jaŋwa brecaw
(Matta 10:5-15; Markus 6:7-13)
1Yesu masləktənŋa a ɗa slənɗay ene ka jaŋwa brecaw, vərəktən nzəɗa atə hakuma a ɓurɗiyede jini hay ba cecena ada ɗaha hay‑a, atə a mburə kuza hay gəgəra. 2Slənəktan ala a nanɗil Labara gurɗay s'Askwaf atə a mburɗitəna ɗa kuza. 3Dzəktəna, wa: «Tivɨnde ba away a alay de a shula kwan de sahan, gha daŋay, gha mbalaw, gha ipəɗay, gha shiŋgu kini. Ifətɗay kini cumɨna bə caw caw‑a. 4Ba kəla adaw gə abə ɗa tivikkwena ede ga, zhɨnkwen aba akənahan, ha ala sərte huɗay kwan de. 5Hu gə abə ɗa tivikkwene ba ede ga, huwɨnede a hu sahan‑a, tɨnnepətəna aba atə argutak hu tan a səlay kwan‑a, ta à ɗá sənede apə ahan‑a gəni ɗa mbəskənka me a Askwaf‑a.» 6Mezlene ɗa slənɗay ane ba huɗay tan ala a nanɗil Labara Sələmna a hu hay de gərgəra, ɗa mburəktəna atə ɗa kuza gha ede kini.
Ŋa Hirudus wushakakude arde a Yesu
(Matta 14:1-12; Markus 6:14-29)
7Hirudus bay higay Galile sənay a igə gaka ba cecena saŋa ga, ŋa ene wushakakude, aɗaba ɗa s'iŋgeɗe ɗa dzawa, wa: «Zhaŋ ɗu bunə ɗaha slabayede ada dagava ɗa gə ka wutə a mika de.» 8Ɗa s'iŋgeɗe gə wa: «Aŋa ba s'Eliya dziŋa.» Ɗa s'iŋgeɗe zlama adəɓa, wa: «Ba ɗu ɓile slabayede ada mika ka a ɗa mbəɗɗitənande me s'Askwaf a ɗaha hay de zuwuna.» 9Mezlene Hirudus ane, wa: «Zhaŋ ga, ba s'ənne aŋa əŋ ŋgəɗkənpəna ŋa. Ɗu gə na əŋ shinkay a labara ene kugwan saŋa mà, wiya ta ɗuhan!» Wuran ane gwasək tsaɗika Yesu sahan aba al aray ene.
Yesu vərtəna ipəɗay a ɗaha hay dəbu ɗara
(Matta 14:13-21; Markus 6:30-44; Zhaŋ 6:1-14)
10Ɗa slənɗay ane ɗa mbəɗiŋa ga, ɗa naya a papərɗinede igə wutan ɗa gəka ba cecena a Yesu. Mezlene həktənede, hukəltəna ala a hu Baytisayda de, ba wutan wutan. 11Amá abaga ɗaha hay ane ɗa sənkede ga, ɗa kutəktan. Yesu təvəktəna, dzəktən me ala apə gurɗay s'Askwaf‑a, ɗa gə ɗa zak i wudar mburaɗaya kini mburəktəna.
12Sləŋa apas niŋke ga, ɗa slənɗay ene jaŋwa brecaw ane ɗa kəzəkpan, ɗa dzakəna, wa: «Hadzəla abaga ɗaha hay saŋa, ɗá le a gus s'ipəɗay atə ma hənɗay a hu hay de atə a wayə hu hay de gə dikw dikw‑a i ma saŋa, aɗaba akəna saŋa mene akiɓde.» 13Amá Yesu, wa: «Virɨntəna ba kwene ipəɗay.» Wutan ane ɗa zləmkənhənaŋa, wa: «A ma man de amigə ba dipeŋ ɗara atə kuciɗek caw sləŋa ma! Təku kə gus ma like a səmɗitənka ipəɗay a abaga ɗaha hay‑a saŋa təku?» 14Ɗa sahan mizhe hay ɗa slɨkiya dəbu ɗara (5000). Yesu dzəktəna a ɗa kutə wuran ane, wa: «Zhezhɨnletənakade i tsəkwakwa i tsəkwakwa, ɗaha kurkur ɗara ɗara‑ya.» 15Wutan ane ɗa gəka ba kugunhan, ɗa zazəkəltənakade ba cecena. 16Yesu tsəmika dipeŋ hay ɗara atə kuciɗek caw ane, pakakude aray ala a askwaf de, sləkəɗkənka me ene a Askwaf‑a, ta kakəɗkənariya a dipeŋ hay‑a sahan, vurəktəna a ɗa kutə wuran a hulɗitəna a abaga ɗaha hay ane. 17Ɗaha hay ba cecena ɗa pika, slakəlna ba gererra. Ɗa məslkənŋa a mbəzaɗay ene ka ga, ruhukede wara jaŋwa brecaw.
Piyer dzakede wa Yesu wuran Kristu
(Matta 16:13-19; Markus 8:27-29)
18Bigeɗe ga, Yesu niya ge maduwa dzaɗɗa apə ɗaha hay‑a, ɗa kutə wuran kini ɗa niya a ma ene de. Dzəktəna, wa: «Abaga ɗaha hay saŋa mà, ɗa dzawa wa ənne wiya?» 19Ɗa zləmkənhənaŋa, wa: «Ɗa s'iŋgeɗe ɗa dzawa wa ike Zhaŋ ɗu bunə ɗaha, ɗa s'iŋgeɗe wa ike Eliya, ɗa s'iŋgeɗe ga, wa ike ɗu ɓile s'i ɗa mbəɗɗitənande me s'Askwaf a ɗaha hay zuwuna gə slabayede ada mika ka.» 20Mbutsəktənamiya ayitəna, wa: «Kwene mà, kwene ika ənne wiya?» Piyer zləmkənhənaŋa, wa: «Ike Kristu s'Askwaf.»
Yesu dza me mətsɗay ene atə slabaɗayede ene ada mika ka
(Matta 16:20-28; Markus 8:30–9:1)
21Yesu ɗəfəktənka me abi nzəɗa, gəni gha a wiya kini ɗá dzana ba. 22Ɗəfkənhətənaŋade adəɓa, wa: «Kine ɗu səlammərzheŋ ga, si shaka zlaɗa hay gərgərgəra ba duna, si məlmal hay hu atə məlmal hay ɗa slumə ɗaha hay atə Askwaf, ŋa malum hay me gurɗay ɗa ɓərpəna a zhek‑a, ɗa viɗka, amá a hənɗay de ala apə məŋgan ga, ǎ slabayede ada mika ka.» 23Mezlene dzəktəna a ɗaha hay ba cecena, wa: «Ɗu gə abə mica i kutəɗinaw ga, á harənde a dzəm shifa ene, á pawaŋade zlaɗa ene ba kəla mandaɗay gha apə mətsaɗaya ka kini, á kutɨnaw. 24Aɗaba ɗu gə abə gus zluɗika shifa ene ga, ǎ səzəla. Amá ɗu gə abə səskəla shifa ene aɗaba s'ənne ga, ǎ zluka. 25Gha duniya saŋa ba cecena gaka ande a ɗuhan mà, ŋgulam ene ama abə səskəla shifa ene, bi səskəla ŋa ene? 26Ənne Kine ɗu səlammərzheŋ ga, ə̌ŋ mbəɗiŋa a duna tsəre hwa de atə a duna tsəre s'i Paba de, ŋa a duna tsəre s'i malika hay cuɗiɗɗina de. Ɗu gə abə mbəray vəɗika a dzaɗiya gəni wuran ɗu hwa, bi mbəray vəɗa ande a me hwa ga, ənne kini mbəray ǎ vəɗnaw a dzaɗiya ənna wuran ɗu hwa a ahan de sahan. 27Na əŋ dzakuna ba jire, aba ɗa gə de akəna saŋa kini, ɗa s'iŋgeɗe à ɗá kəɗa ba, si à ɗá caka gurɗay s'Askwaf al aray tan.»
Duna tsəre s'i Kine s'Askwaf
(Matta 17:1-8; Markus 9:2-8)
28Slɨkiya hənɗay zhire adede a me dzaɗay sahan ga, Yesu ane nzəgika wutə Piyer atə Zhaŋ, ŋa Zhak, ɗa dzənak ala akunde atə ayina a gə maduwa. 29A aŋəde wuran ge maduwa sahan ga, adaw s'aray ene mbəɗika iŋgeɗe, ifafətɗay hay ene kini gaka meɗekwe ba təlla, piya aray. 30Ciɗa ɗa tsa ba mizhe hay caw ɗa jeke atə ayina ane, wutə Musa atə Eliya. 31Ɗa dzəkŋa aba a duna tsəre de sahan, niya ɗa jeke ala apə mətsɗay ene ka gə sləŋa ǎ le a gəɗay a Zheruzalem saŋa.
32A ahan de sahan ga, wutə Piyer atə ɗa gə tə caca ane han kəɗkəltəna. Ɗa sənakede ga, ɗa tsa ba duna tsəre s'i Yesu atə ɗaha caw gə wutə a ma ene de saŋa. 33A aŋəde ɗaha caw ane niya ɗa harənde a Yesu ga, Piyer dzakəna, wa: «Malum, həslka ma niya akəna saŋa, ma ŋgeka gumgwam hay məŋgan, ɓile iyaka, ɓile i Musa, ɓile kini i s'Eliya.» Mbatse, səna ba a igə dzawa. 34Zlama ba me sahan kini kəɗkəlede bə dzaɗiya ene ga, kumba fatitənaŋade təbəzləmma. Mezlene zləŋwaɗ vəɗəktəna a aŋəde ɗa tsək kumba ɗukiltəna saŋa. 35Ɗa shinkay ba taŋw ada a kumba ka ane, wa: «Ɗu gə na saŋa ga, Kine hwa ayuwa, ənne əŋ təfkede, cukwɨna igə wuran dzakuna.»
36Adede a me gə taŋw sahan dzaya saŋa ga, ɗa tsa ba Yesu wuran ɓile mezlene. A ahan de sahan, ɗa pakənande aba me tan, niba ɗu gə wutan ɗa dzakəna igə ɗa tsaka saŋa.
Yesu ɓər jini a kine de
(Matta 17:14-18; Markus 9:14-27)
37Mandaka ene, ɗa fatayede ada kuwan‑a ga, abaga ɗaha hay zləkte tan niba ɗa naya a ŋgərɗinande a Yesu. 38A dagava ɗaha hay de sahan, ɗu s'iŋgeɗe ŋgulahaka ba ŋguləhɗay, wa: «Malum, ba kəmkam, nay tsawuka dagwa hwa, kine hwa ɓile‑ɓilehan ba wuran. 39Jini tsətsuknaŋa. Abə tsukkənaŋa ga, ciɗa ba ŋgulihke. Dediyakude kaslkaslkasla, mikɨnede minya kubɗay tsəkuɓtsəkuɓ‑a. Si kukuzede te, ta harənde ba zlahha. 40Əŋ gəkən kəmkam a ɗa kutɨɗiken, ənna ɗá ɓərede jini sahan ada ayina kini, ɗa dzəgwika ba.» 41Yesu zləmkənhətənaŋa, wa: «Kwa ɗa zamane bəkwa saŋa dəgiya, ɗəfɗipənŋa kwan niba, sləra kwan si ba ɓutsam tsəre! I mà, ə̌ŋ za a ma kwan de ha ala a bəgəna de? Ə̌ŋ ɗəfkun bembec ha ala a bəgəna de? Miya ɗece kine aka sahan ala akəna.» 42A aŋəde kine sahan niya like ala a ma ene de ga, jini ane zləɓkənŋa ala agide, dadəkakude kaslkaslkasla. Amá Yesu sləkkənaŋade a jini sahan, mbərika kine ane, ta vərkəna a pəban. 43Ɗaha hay ba cecena ɗa ge ba s'ajipu ala apə duna tsəre s'Askwaf‑a.
Yesu dzawa ala apə caw me mətsɗay ene
(Matta 17:22-23; Markus 9:30-32)
Zlama ɗaha hay kini ba cecena ɗa ge ba s'ajipu apə sləra hay‑a gə wuran giya ba cecena saŋa ga, Yesu ane dzəktəna a ɗa kutə wuran, wa: 44«Cukwɨn me gə na əŋ dzakuna saŋa ba hasha: Kine ɗu səlammərzheŋ saŋa ga, sləŋa à ɗá ɗəftənde a alay de a ɗaha hay.» 45Amá ɗa kutə wuran ɗa səniyede ba a me sahan. Me sahan i shiɓɗay, gəni ɗá sənede ba a igə gus dzaɗiya. A mbutsəɗay ala apəna a ma ene de kini zləŋwaɗ vəɗəktəna.
Wiya ǎ za məlmal pitta?
(Matta 18:1-5; Markus 9:33-37)
46Wutan ane ɗa takənmandar‑a a dzaɗay a duvak tan de a sənɗiyede a ɗu gə ǎ za məlmal pitta ayitənde. 47Yesu sənkede a me gə ɗa dzawa a duvak tan de saŋa ga, təfkakude kine, təfkəla a ma ene de, 48dzəktəna, wa: «Ɗu gə abə təvika kine gə na saŋa aɗaba s'ənne ga, təfkənwa ba s'ənne. Ɗu gə təfkənwa ənne kini, təvək ba ɗu gə sləninaw saŋa. Aɗaba ɗu kutewuna cak‑caka ayikunde saŋa ga, ba wuran aŋa məlmal kwan pitta.»
Ɗu gə abə gaka bə tsaw ɗu dawa kwan ga, ba ɗu kwan
(Markus 9:38-40)
49Mezlene Zhaŋ dzakəna a Yesu, wa: «Malum, mene ma tsək ɗu s'iŋgeɗe ɓuriyede jini hay ada ɗaha hay‑a i sləmay aka ga, ma zləhkəna ba, aɗaba wuran kutɨken ba atə ayiməna.» 50Yesu zləmkənhənaŋa, wa: «Kay! Ghɨnniŋa ba, aɗaba ɗu gə abə giya bə tsaw huma atə ayikuna ga, ba ɗu kwan.»
Ɗa Samariya ɗa təfka bə Yesu
51A aŋəde sərte ene maka duna bə cine a huɗay ala askwaf de ga, zakəlpəna huɗay ala a Zheruzalem. 52Slənika te ɗa s'iŋgeɗe apə miya ayina, ɗa laka a ləɗide a hu s'iŋgeɗe de a Samariya a ləɗay a slumə nəɗay ene. 53Amá ɗa hu sahan ɗa təfka ba, aɗaba wuran zəkpəna a ciba ka a huɗay ala a Zheruzalem. 54Wutə Zhak atə Zhaŋ ɗa kutə wuran ane ba ɗa tsaka ahan ga, ɗa dzakəna, wa: «Ɗuduwuna, kə zləha təku ma hekətənaŋade akwa ada askwaf‑a a ɗa saŋa, ne a pəɗitənakude?»
55Amá Yesu mbəɗkakude aray ala a ma tan de, sləkəktənaŋade. 56Mezlene ba huɗay tan ala a hu s'iŋgeɗe de.
Ɗa gə ɗa mickiya i kutə Yesu
(Matta 8:19-22)
57Wutə apə ŋa ciba ka a huɗay ga, ɗu s'iŋgeɗe naya a dzaɗina a Yesu, wa: «Ənne gə əŋ kutɨken gha kə like ala ede kini.» 58Yesu zləmkənhənaŋa, wa: «Ba mbayka hay kini, mika hay tan niya, fan hay gə ɗa hifke apə ŋa s'askwaf‑a kini, adaw hay tan niya. Amá Kine ɗu səlammərzheŋ ga, ba ma gə hənlakade ŋa ene apəna kini niba.»
59Wuran ane dzakəna a ɗu s'iŋgeɗe, wa: «Nay kutɨnaw!» Ɗuhan zləmkənhənaŋa, wa: «Ɗuduwuna hwa, vəru ciba, əŋ le a raɗika te paba.» 60Yesu dzakəna, wa: «Hərtənde a mətska hay ɗá rere mətska hay tan. Ike ga, le nenilhətan gurɗay s'Askwaf a ɗaha hay.»
61Ɗu s'iŋgeɗe zlama adəɓa, wa: «Ɗuduwuna, ənne gə əŋ kutɨken, amá gə vərwa te ciba a ləɗay a dzaɗitənka si bigeɗe a ɗagadiyawa.» 62Mezlene Yesu dzakəna, wa: «Ɗu gə abə bərika agam slasla a mbətsɗay ni, ghaya ceciya aray ala adede adəɓa ga, ɗuhan niba igə gɨka a gurɗay s'Askwaf de.»
Nke Ahọpụtara Ugbu A:
Luka 9: mlr
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© (Active), Wycliffe Bible Translators, Inc. All rights reserved.