KEJADIAN 7
7
I fu nen inoatikhe wene
1A'nogo hilingitikhemo, nineisena Tuhan nen Nuh mel yagatikhe: ”O yogondak ya, hat hamunek he, An nendawimo anggikhi lagi mene higithogo hilingiti lagenma re, yogondak hat hagainafuri hinebe mondogat kapal elema kwi lani o. 2A'nogo kwi laga logolik he, wam, sue yi mene ti mene unggulenu lomboget higik, nenggarek mene agun agwe inom wurethigik, inebe 7 nen kwelakfisikhi logolik he, nenggarek lek mene ogo unggulenu lombok agun agwe inom wurethigik ebe misiktek higik, 3ekhe yirue-tirue unggulenu lombok agun agwe inom wurethigik inebe 7 nen inom kwelakfisigik ino. A'nogo hilingisumo re yi mene ti mene kweangma werek mene mondogat lek asumo re andoma nen sik-pikhogo hilinglasigin o. 4Nenggi 7 nen logombigen he, afuni inebe inom, yi mene ti mene inom, An nen elalinafigi mene andi inoasuagaluk meiso pelabi wagunem aninurogo nunggu kwelek lingge hundik hup hundik were'ma inenggi 40 hari nunggu mondok logogin o,” iluk yagatikhe. 5A'nogo yagatikhemo, at Nuh nen, Allah nen he, yi'nogo hilingi'no ti'nogo hilingi'no, iluk yagatikhe hagat higithogo nek hilingitikhe.
6At Nuh ebe umur 600 tahun were'ma nen, i fu andi kweang sebelik wagaikhe. 7A'nogo wagu kwelek, at Nuh ebe inom, agwe inom, againafuri omanogo inagagwi inom, i fu andi nen inoati'lek telinabuageluk e kapal a'nogo elema kwisukwa.#Mat. 24:38-39; Luk. 17:27 8-9A'nogo kwikhi logolik, Allah nen he, yi'nogo hilingi'no, ti'nogo hilingi'no, iluk yagatikhe higirat, wam, sue, paik, yi mene ti mene unggulenu lombok nenggarek mene inom, nenggarek lek mene inom, agun agwe emberek wurethigik waluk inebe inom kapal elema kwisukwa. 10A'nogo kwisukwasik, inenggi 6 en welagaukwasik, ekhe 7 meneba re i fu a'nogo arat waga logolik he o kweangma mondogat sebelik wagaikhe.
11At Nuh ebe umur 600 tahun werek kwelek tugi it wenati lagaukwa hak pirenek mene tanggal 17 oba were'ma, i elesi kweangma nen houwakhogo wulibi wagik, pogoroba nen meiso hokho mene pelabi wagik, isikhe.#2Ptr. 3:6 12A'nogo pelabi wagaikhemo, meiso pi wagu mondok werek kwelek, lingge hundik hup hundik inenggi 40 hari nenat welagaukwa. 13Andem sambul he, Nuh agwe inom, againafuri Sem, Ham, Yafet, inagagwi inom, kapal a'nogo elema kwisukwa. 14It inebe kwikhi logolik, wam, sue, paik, yi mene ti mene inunggulenu lombok eil ena mene inom, eil polok mene inom hokho mene endep mene waluk kwisukwa. 15-16Nuh kapal elema kwikhi logolik, at Allah nen yagatikhe hagat wam, sue, paik, yi mene ti mene enggi lek werek inunggulenu lombok andi agun agwe emberek wurethigik waluk kwisikhe. A'nogo mondogat waluk kwisikhemo, At Tuhan nen e kapal a'nogo kwe yagatfesikhe.
17I fu a'nogo hetogerik lagagu kwelek inenggi 40 hari nen welagaukwa. Werek kwelek i a'nogo uanat hetogerik lagakhi logolik, kapal a'nogo i amboloba hambokhogo waluk lagasikhe. 18I mogo a'nogo hetok-hetok lagakhi logolik, kapal a'nogo i agum oba hambokhogo mondok waluk lagasikhe. 19I a'nogo mogo uanat yenggelik lagakhi lagaikhesik, tom uandek mene mondogat salhikhe. 20A'nogoat hetogerik-hetogerik tom unggul mondogat sebelogo huli 7 meter hetokhogo yenggelhikhe. 21-23A'nogo hetogerik lagakhi logolik, At Tuhan nen afuni inebe inom, wam, sue, paik, yi mene ti mene enggi lek werek ebe hokho mene inom, mage mene inom o kweangma welagarek mene mondogat inoatikhe. A'nogo inoati logolik, we, at Nuh inom, kapal elema kwisukwa mene nek inoati'lek telinafikhe. 24I a'nogo firitok igi'lek werek kwelek enek inenggi 150 hari nen welagaukwa.
Nke Ahọpụtara Ugbu A:
KEJADIAN 7: inohap
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye