Piligu 42
42
Yisifu biɛyanim’ chaŋ Ijipti ni bɛ ti da bindirigu
1Yaakubu ni daa ti wum ni kawana be Ijipti, ka o bɔh’ o bihi, “Bɔzuɣu ka yi lihiri taba?” 2#Tuma 7.12 O daa yɛli ba, “N wumya ni kawana be Ijipti, chamiya nimaani nti da li ti ti na, ka ti tiligi ka ku kpi.” 3Di saha ka Yisifu biɛyanim’ ninvuɣ’ pia la daa chaŋ Ijipti ni bɛ ti da kawana. 4Amaa Yaakubu daa bi chɛ ka Bɛnjamin ŋun nyɛ Yisifu tizo la dol’ o biɛyanim’ maa chaŋ, dama o daa zɔrimi ni binshɛli ti niŋ o.
5Dinzuɣu ka Yaakubu bihi mini ninvuɣ’ shɛb’ daa kana ni bɛ ti da bindira maa, dama kum maa daa lula Keenan tiŋgbɔŋ ni gba. 6Yisifu ni daa nyɛ Ijipti tiŋgbɔŋ maa gomna la zuɣu, ŋuna n-daa nyɛ ŋun kɔhiri bindira maa tiŋgbɔŋ maa nim’ zaa zuɣu. Ka Yisifu biɛyanim’ maa daa kana ti damd’ o tooni n-zaŋ bɛ zuɣuri silim tiŋa. 7Yisifu ni daa nya o biɛyanim’ maa, o daa baŋ ba, amaa ka niŋ ba kaman saamba n-nyɛ ba la, ka daa bi tɔɣisi ba suhumahili yɛtɔɣa. O daa bɔhi ba mi, “Ya ka yi lee yina?” Ka bɛ yɛli, “Ti yila Keenan tiŋgbɔŋ ni na ni ti ti da bindirigu.”
8Yisifu daa baŋ o biɛyanim’ maa, amaa ka bɛn’ lee bi baŋ o. 9#Pil 37.5-10 Ka Yisifu daa teei o ni daa zahim zahin’ shɛŋa zaŋ chaŋ bɛ polo la, ka yɛli ba, “Yi nyɛla puɣisiriba, yi kamina ni yi ti nya ti tiŋgbɔŋ ŋɔ gbariginsim ni nyɛ shɛm.”
10Ka bɛ yɛl’ o, “Aai, ti dana, a daba kala bindira dabu na. 11Tinim’ a daba ŋɔ zaa nyɛla do’ yino bihi, ti nyɛla ninvuɣ’ maŋa, ti pala puɣisiriba.” 12Ka Yisifu yɛli ba, “Aai, yi kana ni yi ti nyala ti tiŋgbɔŋ ŋɔ gbariginsim ni nyɛ shɛm.”
13Ka bɛ yɛl’ o, “Tinim’ a daba ŋɔ nyɛla do’ yino ŋun be Keenan tiŋgbɔŋ ni bihi pinaayi, ŋun nyɛ ti zaa ha biasani be ti ba maa sani ka yino ŋun’ kani.”
14Amaa ka Yisifu lan yɛli ba, “Di kul nyɛla kaman n ni pun yɛli ya shɛm la, yi shiri nyɛla puɣisiriba.” 15Ti ni yɛn niŋ shɛm buɣisi ya m-bɔŋɔ: m po Firawuna ni yi ku kuli ka pa ni yi tizo ŋun nyɛ yi zaa biasani maa gba kala kpe na. 16Chɛliya ka yi ni yino kuli ti zaŋ yi tizo maa na, ka yinim’ bɛn kpalim be sarika ni, ka ti buɣisi yi ni yɛli shɛm maa nya yɛlimaŋli ka yi yɛli maa, di yi pa lala, m po Firawuna ni yi shiri nyɛla puɣisiriba. 17Ka o daa shiri zaŋ bɛ zaa niŋ sarika ni daba ata.
18Daba ata maa dali, ka Yisifu daa yɛli ba, “Niŋmiya dimbɔŋɔ ka tiligi, dama n zɔri Naawuni. 19Yi yi shiri nyɛla yɛlimaŋyɛriba, yin’ chɛliya ka yi mabi’ yino kpalim be sarika ŋɔ ni, ka chɛ ka yi bɛn kpalim ʒi bindira kuli ti ti kum ni mali yi yiŋnim’ shɛb’ maa, 20ka zaŋ yi tizo maa na ka n ti nya o, ka di wuhi ni yi yɛligu maa nyɛla yɛlimaŋli, ka yi tiligi.”
Ka bɛ daa shiri niŋ lala. 21Di saha ka bɛ daa yɛri taba, “Yɛlimaŋli, ti ni daa niŋ ti mabia la shɛm la samli n-yɔri ti ŋɔ, o ni daa balim ti ka ti daa nya o suhusaɣiŋgu ni nyɛ shɛm, amaa ka zaɣisi wumbu la; dinzuɣu ka suhusaɣiŋgu ŋɔ ti paai ti gba maa.”
22 #
Pil 37.21-22
Ka Rubin daa bɔhi ba, “N daa bi yɛli ya ni yi di niŋ bia maa shɛli? Amaa ka yi daa zaɣisi wumbu. Dinzuɣu pumpɔŋɔ, o kubu maa biɛri m-bɔhiri ti maa.” 23Bɛ daa bi mi ni Yisifu wum bɛ ni yɛri shɛm maa, dama so n-daa deeri yɛtɔɣa maa lɛbigiri tiri ba. 24Di saha ka Yisifu daa ŋmaligi bɛ sani n-chaŋ ti kum; ka lan lab’ bɛ sanna nti tɔɣisi ba yɛtɔɣa. Ka o daa gbaai Simiɔn n-chɛ ka bɛ lo o mihi bɛ zaa ninni.
Yisifu biɛyanim’ lab’ Keenan
25Ka Yisifu daa bahi noli ni bɛ niŋm’ kawana pali bɛ kpalansi ka labisi bɛ zaa yinoyino liɣiri niŋ bɛ kpalansi maa ni, ka bo bɛ sol’ ni bindirigu ti ba. Ka bɛ daa shiri niŋ lala ti ba. 26Di saha ka bɛ daa zaŋ bɛ kawana ʒili bɛ bunsi lu soli. 27Bɛ ni daa ti paai luɣ’ shɛli bɛ ni yɛn gbe, ka bɛ ni yino lɔrig’ o kpalaŋa ni o niŋ bindirigu ti o buŋa ka nya ka liɣiri be o kpalaŋ’ maa nol’ ni; 28ka o yɛl’ o mabihi maa, “Bɛ zaŋla n liɣiri labisi niŋ ma, dina m-be n kpalaŋ’ ni ŋɔ.” Ka bɛ suhuri daa fuŋ di zuɣu, ka bɛ ni sɔhiri ka bɛ bɔhiri taba, “Ka tuun’ bɔ ka Naawuni lee tum ti ŋɔ?”
29Bɛ ni daa ti paai bɛ ba Yaakubu sani Keenan tiŋgbɔŋ ni, bɛ daa yɛl’ o la dinkam zaa niŋ ba, ka lan yɛl’ o, 30“Do’ so ŋun nyɛ tiŋgbɔŋ maa gomna maa bi tɔɣisi ti suhumahili yɛtɔɣa, ka yɛli ni ti nyɛla puɣisiriba bɛn kana ni ti ti puɣisi o tiŋgbɔŋ maa. 31Amaa ka ti daa yɛl’ o, ‘Ti pala puɣisiriba, ti nyɛla yɛlimaŋyɛriba. 32Ti nyɛla do’ yino bidibisi pinaayi; ka ti ni yino daa kani, ka ŋun nyɛ ti zaa biasani be ti ba maa sani Keenan tiŋgbɔŋ ni.’ 33Di saha ka do’ so ŋun nyɛ tiŋgbɔŋ maa gomna maa yɛl’ ti, ‘Yi ni yɛn niŋ shɛm chɛ ka m baŋ ni yi nyɛla yɛlimaŋyɛriba m-bɔŋɔ: chɛliya yi ni yino n sani, ka zaŋ kawana kuli ti ti yi yiŋnim’ shɛb’ kum ni muɣisi maa; 34ka zaŋ yi tizɔbil’ maa ti ma na, dina n-ni chɛ ka m baŋ ni yi pala puɣisiriba, amaa ka nyɛla yɛlimaŋyɛriba, ka n naanyi zaŋ yi mabia maa tin ya ka yi gɔri kɔhigu tiŋgbɔŋ ŋɔ ni.’ ”
35Bɛ ni daa kpaai bɛ kawana, bɛ zaa liɣiri daa lɔnlomi be bɛ kpalansi ni, bɛ mini bɛ ba ni daa nya liɣiri maa, ka di gari ba. 36Ka bɛ ba Yaakubu yɛli ba, “Yi chɛ ka n kɔŋ m bihi. Yisifu lan kani, ka Simiɔn gba kani, ka yi yɛn zaŋ Bɛnjamin mi chaŋ pumpɔŋɔ, n zuɣu ka yɛla ŋɔ zaa ʒini.”
37Di saha ka Rubin daa yɛl’ o ba, “N yi bi ʒi Bɛnjamin kuna, nyin’ kum’ m bidibis’ ayi ŋɔ, chɛl’ o niŋ n nuu ni, n ni ʒi o kuna ti ti a.” 38Amaa ka o yɛli, “M bia maa ku doli ya chaŋ, dama o biɛli kpiya, ka o kɔŋko n-kpalim. Shɛli yi niŋ o yi ni yɛn chaŋ chandi shɛli ŋɔ ni, yi ni chɛ ka n dɔni kabiri puuni ni n kɔb’ piɛla ŋɔ ni suhugarigu.”
Nke Ahọpụtara Ugbu A:
Piligu 42: DBwDB
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Dagbani Bible with Deuterocanonical Books © Bible Society of Ghana, 2011.