Piligu 40
40
Yisifu wuhi sarikanim’ zahindi gbinni
1Dimbɔŋɔ nyaaŋa ka Ijipti Naa wain boora min’ o bɔrɔbɔro shɛra daa ti tum birigi bɛ dan’ Ijipti naa maa. 2Ka Firawuna suhu daa yiɣisi bah’ o tumtumdiba ayi bɛn daa nyɛ o wain boora min’ o bɔrɔbɔro shɛriba kpɛm’ zuɣu, 3ka o daa zaŋ ba ti kpɛhi duu o tɔbbihi bɛn daa gul’ o la sapashin’ kpɛm’ yiŋ’ luɣ’ shɛli bɛ ni daa zaŋ Yisifu ti niŋ maa. 4Ka tɔbbihi sapashin’ kpɛm’ maa daa zaŋ ba niŋ Yisifu nuu ni ka o sɔŋdi ba. Ka bɛ daa be duu maa ni n-niŋ daba ayi.
5Ka bɛ niriba ayi bɛn nyɛ Ijipti Naa wain boora min’ o bɔrɔbɔro shɛriba kpɛm’ bɛn daa be duu maa daa ti zahim zahima dahin’ shɛli yuŋ. Sokam zahindi daa bela di ko, ka mali di gbinni. 6Ka Yisifu daa ti kpe bɛ sani asiba n-nya ka bɛ malila suhugarigu. 7Ka o daa bɔhi Firawuna tumtumdib’ shɛb’ bɛn min’ o daa be duu o dan’ yiŋ’ maa, “Bɔ n-niŋ ka yi mali suhugarigu lihigu zuŋɔ.”
8Ka bɛ yɛl’ o, “Ti sa zahimla zahima ka bi nya ŋun ni wuhi ti di gbinni.”
Ka Yisifu bɔhi ba, “Pa Naawuni n-wuhiri zahindi gbinni? N suhiri ya, yɛlimiya ma yi zahima maa.”
9Ka wain booriba kpɛm’ la daa yɛli Yisifu o zahindi ni nyɛ shɛm. O daa yɛl’ o mi, “Zahindi maa ni n sa nyami ka wain tia ʒe n tooni, 10ka tiwula ata be di zuɣu, ka di ni sa kul piligi puhiri vari ka dii daai pum n-wali wala ka di mooi. 11Ka Firawuna pipia daa be n nuu ni, ka m pɔhi wain tiwala maa kahim di kom niŋ Firawuna pipia maa ni n-zaŋ li ti ti ŋun’ Firawuna.”
12Di saha ka Yisifu daa yɛl’ o, “Di gbinni m-bɔŋɔ: Tiwula ata maa nyɛla daba ata. 13Zaŋ chaŋ daba ata dali, Firawuna ni chɛ ka bɛ kana ti yih’ a nti lan zaŋ a labis’ a tuma ni; ka a ni lan zaŋdi Firawuna pipia maa ni binnyura maa ti tir’ o kaman a ni daa pun nyɛ o wain tɔɣira shɛm la. 14Amaa di yi ti niŋ a viɛnyɛla, n suhir’ a, nyin’ teemi n yɛla, ka niŋ ma nirilim n-zaŋ n yɛtɔɣa tɔɣisi Firawuna; ka lala chɛ ka n yi sarika ŋɔ ni. 15Dama yɛlimaŋli, bɛ daa zu ma la Hiburu tiŋgbɔŋ ni na; ka kpe gba, m bi tum taal’ shɛli ka di simdi ni bɛ zaŋ ma kpɛhi sarika.”
16Bɔrɔbɔro shɛriba kpɛm’ la ni daa wum di gbinni ka di viɛl’ maa, ka o daa yɛli Yisifu, “N gba sa zahimla zahindi. Bɔrɔbɔro piɛr’ ata n-sa tam n zuɣu ni, 17ka bindira balibu kam din nyɛ bɛ ni daa she shɛli ti Firawuna be piɛ’ shɛli din tam zuɣusaa ni, amaa ka noombihi lee kana ti diri li n zuɣu ni piɛri maa ni.”
18Ka Yisifu daa garigi yɛl’ o, “Di gbinni m-bɔŋɔ: Piɛr’ ata maa nyɛla daba ata. 19Zaŋ chaŋ daba ata dali, Firawuna ni chɛ ka bɛ kana ti yih’ a ti ŋma a zuɣu, ka zaŋ a yili tia ka noonsi di a nimdi.”
20Zaŋ chaŋ daba ata maa dali, di daa lula Firawuna dɔɣibu dabisili dali, ka o daa laɣim o tumtumdiba zaa na ni bɛ ti puhi di chuɣu; ka daa chɛ ka bɛ chaŋ ti yih’ o wain booriba kpɛm’ la min’ o bɔrɔbɔro shɛriba kpɛm’ maa na ti zal’ o tumtumdiba kpamba maa tooni. 21Ka o daa zaŋ o wain booriba kpɛm’ la labis’ o tuma ni, ka o lan zaŋdi ŋun’ Firawuna binnyura pipia maa ni binnyura maa ti tir’ o, 22amaa ka daa chɛ ka bɛ zaŋ o bɔrɔbɔro shɛriba kpɛm’ maa ti yil’ tia kaman Yisifu ni daa yɛli ba shɛm maa. 23Amaa di zaa yoli, wain booriba kpɛm’ la daa tam Yisifu yɛla ka bi teeg’ o yɛla.
Nke Ahọpụtara Ugbu A:
Piligu 40: DBwDB
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Dagbani Bible with Deuterocanonical Books © Bible Society of Ghana, 2011.