Piligu 38
38
Juda mini Tama
1Di saha ka Juda daa yi o mabihi maa sani chaŋ Adulam nti be do’ so ŋun yuli daa booni Hira la sani. 2Ka Juda daa ti nya Keenan do’ so ŋun yuli daa booni Shua la bipuɣiŋga n-kpuɣ’ o; ka daa zaŋ o niŋ o paɣa, 3ka o niŋ pua n-dɔɣi bidibiga, ka o bol’ o yuli Ɛr. 4Ka o paɣ’ maa daa lan niŋ pua n-dɔɣi bidibiga m-bol’ o yuli Onan. 5Ka paɣ’ maa daa ti lan dɔɣi bidibiga m-bol’ o yuli Shɛla. Chɛzib ka o daa be ka dɔɣ’ o.
6Ka Juda daa bo paɣ’ ti o bituuli Ɛr. Paɣ’ maa yuli n-daa booni Tama. 7Amaa ka Juda bituuli Ɛr maa daa nyɛ ninvuɣ’ biɛɣu Yawɛ sani, ka Yawɛ daa ku o. 8Di nyaaŋa ka Juda daa yɛli Onan, “Zaŋm’ a biɛli pakoli maa dɔni, ka niŋ di ni simdi ni a niŋ shɛm wuhi ni o yidan’ tizo n-nyɛ a, ka zaŋ o dɔɣi bihi ti a biɛli maa.” 9Amaa ka Onan daa mi ni o bi yɛn su bihi maa. Dinzuɣu o min’ o biɛli pakoli maa daa yi ti dɔni, o daa yihirila o kom bahi tiŋa ni di chɛ ka o ku dɔɣi bihi ti o biɛli maa. 10Ka o ni daa niŋ shɛm maa bi niŋ Yawɛ nyaɣisim, ka o daa ku o gba. 11Di saha ka Juda daa yɛl’ o bia pakoli Tama, “Kulim’ a ba yiŋ’ ti ʒini pakolim hal ka m bia Shɛla ti zooi.” O daa zɔrimi ni Shɛla gba ti kpi kaman o biɛyanim’ maa ni daa kpi shɛm maa. Dinzuɣu ka Tama daa kul’ o ba yiŋ’ ti ʒiya.
12Dimbɔŋɔ nyaaŋa ka Juda paɣ’ ŋun daa nyɛ Shua bipuɣiŋga la daa kpi. O ni daa mal’ o kuli naai nyaaŋa ka o min’ o zo Hira ŋun daa nyɛ Adulam nir’ la chaŋ Timna ninvuɣ’ shɛb’ bɛn daa chɛr’ o piɛri kɔbiri la sani. 13Ka bɛ daa yɛli Tama, “A yidan’ ba chanila Timna ni o ti chɛ o piɛri kɔbiri.” 14Di saha ka o daa pirig’ o pako’ chinchina sɔŋ ka zaŋ sariga pa m-mulis’ omaŋ’ chaŋ ti ʒini Ɛnaim dunoli din daa be Timna soli zuɣu la shee; dama o daa nyaya ka Shɛla bi doo, ka bɛ bi chɛ ka o kpuɣ’ o.
15Juda ni daa nya o, o daa tɛhiya ni o nyɛla pagɔrili, dama o daa zaŋla sariga m-pil’ lims’ o ninni. 16Ka o daa chaŋ o sani palli naŋgbanyee ti yɛl’ o, “Kamina ti chɛ ka m min’ a dɔni.” Dama o daa bi mi ni o bia pakoli maa m-bala.
Ka o bɔh’ o, “Bɔ ka a yɛn ti ma ka chɛ ka m min’ a dɔni?”
17Ka o daa garigi yɛl’ o, “N ni gbaai m buzɔŋ ni bubil’ polli ti a.” Ka paɣ’ maa bɔh’ o, “Ka bimbɔ ka a yɛn zaŋ ti ma ka di nyɛ alikauli lɔbu shɛhira hal ka a ti zaŋ bua maa ti ma na?”
18Ka Juda bɔh’ o, “Bɔ ka a lee bɔri ni n zaŋ ti a ka di nyɛ alikauli lɔbu shɛhira?”
Ka paɣ’ maa garigi yɛl’ o, “Zaŋm’ a nintua din mali dalinli ŋɔ mini zoligo ŋɔ ni a jaaŋgbee din be a nuu ni ŋɔ ti ma.” Di saha ka o daa zaŋ li ti o, ka zaŋ o dɔni, ka o daa niŋ pua. 19Di nyaaŋa ka paɣ’ maa daa yiɣisi kuli nti paai sariga maa sɔŋ, ka lan zaŋ o pako’ chinchina maa so.
20Ka Juda daa zaŋ bubil’ polli maa ti o zo ŋun daa nyɛ Adulam nir’ la ni o ti ti paɣ’ maa ka deeg’ o neen’ shɛŋa din daa nyɛ alikauli lɔbu shɛhira la na, amaa ka o daa bi nya paɣ’ maa. 21Ka o daa bɔhi tiŋ’ maa ni dɔbba, “Ka jɛmbu duu pagɔr’ so ŋun yi ʒiini Inaim palli naŋgbanyee ŋɔ la lee be ya?” Ka bɛ yɛl’ o, “Pagɔr’ so na ʒi n-ka kpe na.”
22Ka o daa lab’ ti yɛli Juda, “M bi nya paɣ’ maa; ka tiŋ’ maa nim’ yɛli ma ni pagɔr’ so na ʒi n-ka kpe na.”
23Ka Juda daa yɛl’ o, “Chɛ ka o zaŋ nɛma maa leeg’ o dini, di yi pa lala, niriba ni la ti; nyama, n-chɛ ka a zaŋ bubil’ polli maa ni a ti ti o, ka a bi tooi bo n-nya o.”
24Zaŋ chaŋ chira ata saha ka so daa ti yɛli Juda, “Tama ŋun nyɛ a bia pakol’ la gɔrila pagɔrisigu, ka din pahi di zuɣu nyɛla, o niŋla pua o pagɔrisigu maa gɔbu ni.”
Ka Juda daa yɛli, “Zaŋmiy’ o na ti niŋ buɣim nyo o.”
25Bɛ ni daa zaŋ paɣ’ maa yina, ka o tim ti yɛl’ o yidan’ ba Juda, “Do’ so ŋun su nɛma ŋɔ n-ti ma pua maa. N suhir’ a, lihim’ li nya ŋuni n-lee su li. Nɛma maa n-nyɛ: nintua din mali dalinli ŋɔ mini zoligo ŋɔ ni jaaŋgbee ŋɔ.”
26Di saha ka Juda daa baŋ nɛma maa ka yɛli, “Paɣ’ maa nyɛla wuntizɔra n-gari ma, n ni bi zaŋ o ti m bia Shɛla la zuɣu.” Ka o daa bi saɣi ka o mini paɣ’ maa lan dɔni yaha.
27Ka paɣ’ maa dɔɣibu saha daa ti paai ka jahi m-be o puli ni. 28O ni daa wolisira, ka bi’ yino zaŋ o nuu tirina, ka paɣidɔɣisɔtɔɣinda daa zaŋ gali ʒee lo o nuu maa ka yɛli, “Ŋumbɔŋɔ ka bɛ daŋ dɔɣibu.” 29Amaa ka o daa fɔh’ o nuu maa kpɛhi, ka o mabia maa daŋ o yibuna; ka paɣidɔɣisɔtɔɣinda maa yɛli, “A niŋla kpaɣikpaɣi nya soli yina maa!” Dinzuɣu ka bɛ daa bol’ o yuli Pɛrɛz.#38.29 PƐRƐZ: Hiburuli ni yuli ŋɔ gbinni nyɛla, “Kabi yina”. 30Dimbɔŋɔ nyaaŋa ka o mabia maa gba daa yina ka gali ʒee maa lo o nuu, ka bɛ daa bol’ o mi yuli Zɛra.#38.30 ZERA: Hiburuli ni yuli ŋɔ gbinni nyɛla, “Asiba neesim din mɔha”.
Nke Ahọpụtara Ugbu A:
Piligu 38: DBwDB
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Dagbani Bible with Deuterocanonical Books © Bible Society of Ghana, 2011.