Matìyò 3
3
Ziʼi Joyn wù ku Amù
1A be ndiʼ tò mətsi ayì, Joyn wù ku à mù zìtə̀ sə shə̀ʼtə̀ kənyʉ̀ kə Nyìngòŋ a viʼi a nsè zɨm yì a ghə̀ ndiʼ a Judiyà, gàʼà la, 2“Ghə̀ŋ kwitə tətyɨm təŋtə fà a ghə̀ŋ a mbyɨsə byìʼàndo soʼ fòyn Nyìngòŋ boʼsə li” 3Joyn ghèn diʼ wen yì a nshə̀ʼtə̀ Isayà nlù gàʼ kùmə̀ wen la,“Wutsen zɨmə gàʼà a nse zɨm la,‘Ghə̀ŋ shɨtə jì Bobo, ghə̀ŋ ne məjìtə mə wen mə nàyn’” 4A ndiʼ alì mu Joyn mòʼ ndisə mu və bo nə̀ nyɨŋsə nyàm tsen a və dzàŋə̀ nə̀ Kàmel, ə kwiʼ kətəŋ mu və shɨ̀tə̀ nə̀ gwʉ̀ nyàm, fozhɨvə wen ndiʼ tò ngùməsə nə̀ fədyom fə. 5Joyn vì sə nziʼi, Viʼi vyì à wen mu və lù fa Jelusalèm bènə̀ fa məshə̀ tsèm a loʼ Judiyà, vətsen və vì mu və lù fa mbyì mo Jodàn. 6Vəwenə nvì alì əbyɨmə mbyɨsə vəwenə à wen, ghə̀ ku mu a vəwenə a mù mə Jodàn. 7Joyn ne yen ando viʼi Falàsi nə̀ viʼi Sadùsi mbe vì no və ghoʼo la ghə̀ ku mu à vəwenə kèn la vəwenə kwitə li tətyɨm tə vəwenə, ghə̀ mù gàʼ à vəwenə la,“Zhusə byɨ sènsə, a tofsə ndò ghə̀ŋ, ghə̀ŋ sə kəŋ nyɨŋ ngəʼ yì a Nyìngòŋ kəŋ tɨm a ghə̀ŋ a? 8Ghə̀ŋ nè nyʉ a və diʼi la ghə̀ŋ kwitə li tətyɨm təŋtə fa mbyɨsə. 9Kə ghə̀ŋ ne kwòʼtə la ghə̀ŋ zì ghə̀ŋ nyɨŋ ngəʼ Nyìngòŋ ayì tò byiʼàndo ghə̀ŋ gàʼ à la ghə̀ŋ diʼ vu vunə Ablaham. Ma shə̀ʼtə̀ a ghə̀ŋ la Nyìngòŋ zì ghə̀ nè ngùʼ sènsə sə kaʼkə a vunə ghə̀ ku a Ablaham. 10Ghə̀ŋ kɨ la ndzam ti a tì nkòʼ luwen, mu a faŋ tə fəkòʼ fə ko ke kumə ashɨ jùŋ ghə̀ mu və a bvaʼ ə mòʼ a zhìʼ. 11Mà ku mu à ghə̀ŋ tò nə̀ mu mə Amù ədiʼ la ghə̀ŋ kwitə li tətyɨm təŋtə fà ghə̀ŋ a mbyɨsə, alì wìʼ yì a ghə̀ vì fa mò a bàm, chò mò, a mà ko kwʉ̀ʼ no fa mpfen əshyèʼ a wen a nə̀ kəkòs kə byèʼè gwʉsə aghʉ wen. Ghə̀ ne ku mu à ghə̀ŋ nə̀ kəzhwì kə ŋwoʼkə be chòsə̀ viʼi vətsen və a zhìʼ. 12A zhʉ a ghèn, ghə̀ a kiʼi kyeʼ lyelə wen a wenə kəvu, əfwoftə asaŋ ə ghʉ a wenə kàŋ, ali və nyùʼ yabyabsə shi nè zhiʼ a ghə̀ ko lə lɨmə no fa mpfen”.
Yesò shi mu
13A ndiʼ tò mətsi a yì, Yesò lù fa Galìlì ə vì yen Joyn la ghə̀ ku mu à wen a mù. 14Joyn sə̀ mwòmsə ətensə kənyʉ̀ akì mù gàʼ la,“A yì ndiʼ ku wù ku mu à mò, wu bòŋsə nvì la mà ku mu à wù ale?” 15Yesò gàʼ à wen la,“Yowù nè tò alə̀ luwèn ku tò ku byiʼàndo à diʼ tò a ji a ghèn a vəghəŋ diʼi nè nyʉ̀ vyi a Nyìngòŋ kəŋ.” Joyn mù byɨmə əku. 16Yesò shi mu ə sə fʉ kuʼ tò kuʼu fa mù alə̀, kaŋ boʼmə̀, ghə̀ yen kəzhwì kə Nyìngòŋ, kə shiʼi vì ə bvʉ̀ à wen kətʉ diʼ tò nə̀ kəlàto. 17Tò a zhʉ a ghèn, gɨ fʉ vì fa kàŋ ə gàʼ la,“Ghèn diʼ wàyn kòŋ mò, mà saŋlə byìʼì wen nə̀ kwoŋ.”
Nke Ahọpụtara Ugbu A:
Matìyò 3: bbkDBLnt
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye