Lükɛ̀n 23
23
Ye sɩ́ Zhezü Pilatɛ̀n zìwú
(Nyɛ́n nyan Matie 27:1-2,11-14; Markɛ̀n 15:1-5; mán Zhan 18:28-38 wrú lɔ mɛ̀n)
1Fɛcüè lɔ fɛn tɔhú kɩ yɔ bɩ́ Zhezü yɔ hɔ́n Pilatɛ̀n zìwú. 2Nanvrɛn lɔ, yɔ bukru yɔ ku nɛ̀n ankà ɛwú kɩ yɔ dɔ̀ le: “Bɔ̀ cɔ́ ɔwrɔn ndɔ lɔ dú fɛcüè zrɛ́n mɛ̀n: nɛ dɔ́ yɔ, ye bɩ́ di anmàn-wɔɛ̀n, kɩ ne bú n'edomɛ̀n nɛ hán ebɩ̀die-wrɔn, ɛnnɛ̀ncüì tɔ̀n.” 3Pilatɛ̀n yrɛ nɛ̀n ankà ankà-dɔ̀ ndɔ hɔ̀n lɔ wú: “È dú Zhüifɛ̀n-bɔ̀ nɛ̀ncüìɛ?” Zhezü mrɛ́n nɛ̀n ɔmùan le: “Hɩ de ɛ dɔ̀ nɔn” 4Zɛtɛn Pilatɛ̀n kɛ dɔ́ Ɔwɔ-cice-bɔ̀ cüìcüì hɔ̀n mán fɛcüè le: “Mɛ́n sɩ́ cɔ́ ɛgbàn-hán-ankà zriɛmɛ́n ɔwrɔn ndɔ lɔ edomɛ̀n.” 5Tɛ́n yɔ vru yɔ dɔ́ ecüìemɛ̀n le: “N'ankà-yé kɛ tán fɛcüè ezì-kɛ̀n. Nɛ̀n bukru Galile, nɛ̀n ci Zhüde kpɔsɔ wú, kɩ zɛtɛ̀ lɔ, nɛ́n và nɛ̀n cɔ́ ɛnu.”
Ye sɩ́ Zhezü Herɔdɛ̀n zìwú
6Ɛnvra léyi Pilatɛ̀n yá ankà hɔ̀n lɔ nɔn, ne yrɛ le: “Ɔwrɔn ndɔ lɔ Galile anmàn-wrɔn dú nɛ̀n hàn?” 7Kɩ ɛnvra léyi Pilatɛ̀n yá le Zhezü dú Herɔdɛ̀n kpɔsɔ wú anmàn-wrɔn nɔn, nɛ̀n hán yɔ bɩ́ Zhezü yɔ hɔ́n sɩ́ Herɔdɛ̀n, ɔmuhí Herɔdɛ̀n mán vá dú Zherüzalɛmɛ̀n ɛnvra ndɔ hɔ̀n lɔ mɛ̀n nɔn. 8Herɔdɛ̀n dú ɛnbɔrɛbruemɛ̀n ɛnvra léyi nɛ̀n kán Zhezü nɔn, ɔmuhi nɛ̀n yá yɛ dɔ́ n'ankà, kɩ ɛnvra sheshemɛ̀n de ne ji nɛ̀n srɔ́n yi ɛsù; nɛ ẅɛn esɛ́ le nɛ lɛ kán yi kɛ hán anvɛmɛ̀n-frɛ́n-ci tɔ̀n. 9Herɔdɛ̀n yrɛ Zhezü ankà bobrebe, tɛ́n Zhezü kè sɩ̀ mrɛ́n nɛ̀n ɔmùan. 10Ɔwɔ-cice-bɔ̀ cüìcüì mán ɛnyanmàn-gbànvri-ankà-yé-bɔ̀ mán dú nanvrɛn kɩ yɔ ẅɛn ɛyɔ̀n-shishi ku Zhezü ɛwú. 11Herɔdɛ̀n mán nɛ́n gɔlie-bɔ̀ kɛ hán nɛ̀n ɛnhyürɛ̀ kɩ kɛ wɔɛ̀n nɛ̀n ankà egbriemɛ̀n. Yɔ cɔ́ nɛ̀n ɛceci fifi tɔ̀n kɩ yɔ vru nɛ̀n ɛmɛẅi nɛ̀n hɔ́n Pilatɛ̀n nanvrɛn. 12Ɛnvra tɔ̀n mɛ̀n lɔ Herɔdɛ̀n mán Pilatɛ̀n ke gbri y'ɛdomɛ̀n, kɩ ɛnbì ndɔ lɔ mɛ̀n yɔ srɔ ɔwrɔn mán nɛ́n nyran anvrɛn.
Ye di Zhezü owúemɛ̀n
(Nyɛ́n nyan Matie 27:15-26; Markɛ̀n 15:6-15; mán Zhan 18:39—19:16 wrú lɔ mɛ̀n)
13Pilatɛ̀n bɔrɛ Ɔwɔ-cice-bɔ̀ cüìcüì, anmàn-cüìcüì-bɔ̀ mán fɛcüè ɛkru, 14Kɩ kɛ dɔ́ yɔ le: “Nyɛ́n bɩ́ ɔwrɔn ndɔ lɔ nyɛ́n và sɩ́ mɛ̀n, kɩ nyɛ dɔ̀ le nɛ zrɛ́n fɛcüè n'ankà-yé mɛ̀n. Zɛtɛn, mɛ̀n yrɛ nɛ̀n ankà nyɛ lɛ fɛn ny'ezìwú kɩ mɛ́n sɩ́ cɔ́ eci gbangbàn léyi nɛ̀n hán hɩ nyɛ dɔ́ ankà ku nɛ̀n ɛwú nɔn. 15Herɔdɛ̀n mán kè sɩ̀ cɔ́ ɛgbàn zriɛmɛ́n n'ewú, nɛ̀n hán yɔ bɩ́ nɛ̀n yɔ vá sɩ́ bɔ̀. Ɔmu lɔ, ɔwrɔn ndɔ lɔ kè sɩ̀ hán ɛgbàn zriɛmɛ́n léyi ká di nɛ̀n owúemɛ̀n nɔn. 16Mɛ lɛ hán ye gorɛ nɛ̀n ɛngbele mɛ̀n, ô mɛ̀n teze nɛ̀n nɛ̀n hɔ̀n.” [17Abùtùkumɛ́n-kɔ́ nyanmán-bì lɔ fɛn, Pilatɛ̀n kɛ tán ɛkɔrɛ-levri ye teze anwɔn-mɛ̀n-wá-wrɔn zri.]
18Tɛ́n yɔ lɔ fɛn yɔ bukru ye di bobo: “Ɛ̀ hán ɔwrɔn ndɔ lɔ kè wù! È teze Barabasɛ̀n!” 19Yɛ ẅɛn Barabasɛ̀n yɛ wá anwɔn-mɛ̀n-wá-wɔn mɛ̀n, ɔmuhi nɛ́n mán nɛ́n nyran hɔ̀n mɛhi anmàn lɔ, yɔ wri ɔwrɔn ɛdrɛ̀-hán mɛ̀n nɔn. 20Ɔmuhi Pilatɛ̀n mán ke ji ke teze Zhezü nɔn, nɛ̀n vru ne yrɛ fɛcüè ankà. 21Tɛ́n fɛcüè ke dí bobo tán nɛ̀n le: “Gɔ́n nɛ̀n brɛ́ ɛgbàn-hán-tɛ̀ tɔ̀n dɔmɛ̀n! Gɔ́n nɛ̀n brɛ́ ɛgbàn-hán-tɛ̀ tɔ̀n domɛ̀n!” 22Pilatɛ̀n bɩ́ ankà-dɔ̀ andɛ̀n-anhɔnmɛ̀n kɩ kɛ dɔ́ yɔ le: “Eci gbàngbàn tán de nɛ̀n hán nɛ́n? Mɛ́n sɩ́ cɔ́ n'ɛwú lɔ, eci gbàngbàn léyi ke le di nɛ̀n owúemɛ̀n nɔn. Mɛ lɛ hán ye gorɛ nɛ̀n ɛngbele mɛ̀n, ô mɛ̀n teze nɛ̀n.” 23Tɛ́n yɔ sán bukru yɔ di bobo, yɔ ji le yɔ gɔ́n Zhezü yɔ brɛ́ ɛgbàn-hán-tɛ̀ tɔ̀n domɛ̀n. Kɩ yɔ bobo-dì lɔ ẅɛn vɔ̀nshɛ́: 24Pilatɛ̀n tán yɔ eci léyi yɔ ji nɔn. 25Nɛ́n teze ɔwrɔn léyi yɔ cüɛ̀n nɔn, nɛ́n léyi yɛ wá nɛ̀n anwɔn-mɛ̀n-wá-wɔn mɛ̀n, hɩ nɛ̀n wri ɔwrɔn ɛdrɛ̀-hán mɛ̀n nɔn, kɩ Pilatɛ̀n tán yɔ Zhezü ô yɔ hán eci léyi yɔ ji nɔn.
Yɛ gɔ́n Zhezü brɛ́ ɛgbàn-hán-tɛ̀ domɛ̀n
(Nyɛ́n nyan Matie 27:32-44; mán Markɛ̀n 15:21-32 wrú lɔ mɛ̀n)
26Ɛnvra léyi yɔ bɩ́ Zhezü yɔ hɔ̀n nɔn, yɔ srɔ́n Simɔn ɛsù, Sirɛnɛ̀n anmàn-wrɔn tɔ̀n; nɛ̀n dú ovomɛ̀n nɛ và. Gɔliɛ-bɔ̀ ẅɛn nɛ̀n ecüemɛ̀n kɩ yɔ wɔrɔ nɛ̀n ɛgbàn-hán-tɛ̀ lɔ, ô nɛ̀n dú Zhezü ɛmɛẅi nɛ̀n nán esù. 27Anwrɔn fɛcüè vri de kɛ kɛ́n nɛ̀n ɛsɛ̀n, ɔmu zri lɔ mán de wúyɔ̀ hɔ̀n ke wú eyú kɩ kɛ hán y'edomɛ̀n jrɛ̀jrɛ̀ Zhezü kruhú. 28Zhezü crɛ̀ nyan wúyɔ̀ hɔ̀n lɔ kɩ kɛ dɔ́ le: “Zherüzalɛmɛ̀n wúyɔ̀, nyɛ́n bɩ́ wú eyú m'ɛkruhú! Nyɛ́n wú eyú nyɛ́n tán ny'edomɛ̀n mán ny'ɛẅì hɔ̀n. 29Ɔmuhi ɛnbì hɔ̀n kɛ lɛ và, kɩ yɛ lɛ dɔ̀ le: ‘Ɛnbɔrɛ-bru dú wúyɔ̀ hɔ̀n léyi ke sɩ̀ bî ɛnẅì rɔ́, hɩ ke sɩ̀ bî mrìmrì, hɩ ke sɩ̀ tán ɛnẅì ɛnyan mrìmrì nɔn!’ 30Zɛtɛn anwrɔn kɛ lɛ bukru kɛ dɔ́ ɛnkpò hɔ̀n le: ‘Nyɛ́n ku bɔ̀ ɛwú!’ mán ɛnkpò-cɛ le: ‘Nyɛ́n bán bɔ̀!’ 31Ɔmuhi ke dú kɛ, ɔmu lɔ de yɛ hán ɛtɛ̀-wɔ̀ nɔn hô, ɛtɛ̀-wri tɛ́n anhɔntan kɛ lɛ hán kè dù tán nɛ̀n nɛ́n?”
32Ye vru ye sɩ́ anwrɔn anhyrɛ̀, ɛci-gbangbàn-hán-bɔ̀, ô ye wri yɔ, yɔ mán Zhezü mɛhi. 33Ɛnvra léyi yɔ cɔ́ ɛyri léyi ye bi “Lokrozì” nɔn, yɔ gɔ́n Zhezü brɛ́ ɛgbàn-han-tɛ̀ domɛ̀n nanvrɛn lɔ, kɩ ɛci-gbangbàn-hán-bɔ̀ anhyrɛ̀ lɔ mán yɔ gɔ́n brɛ́ ɛgbàn-han-tɛ̀ domɛ̀n, ɔtɔ̀n dú nɛ̀n ezì-kɔrɛ̀ kɩ ndɔ lɔ dú nɛ̀n ebrì-kɔrɛ̀ 34Zɛtɛn Zhezü kɛ dɔ̀ le: “Dade, bɩ ɛgbàn ce yɔ, ɔmuhi yɔ sɩ́ nyrí eci léyi yɔ hán nɔn.” Yɔ wá ɛnsànse, kɩ yɛ dɛ́ n'ɛceci hɔ̀n lɔ yɔ bɩ. 35Fɛcüè nyɔn nanvrɛn kɩ kɛ nyan. Zhüifɛ̀n-bɔ̀-cüìcüì kɛ hán nɛ̀n ɛnhyürɛ̀ kɩ kɛ dɔ̀ le: “Nɛ̀n bɩ́ anwrɔn nɛ̀n die; zɛtɛn, nɛ̀n bɩ́ n'edomɛ̀n nɛ̀n díe, ke dú kɛ nɛ̀n dú ebɩdie-wrɔn, nɛ́n léyi Ɔwɔ mrɛ́n nɛ̀n nbɩ nɔn!” 36Gɔliɛ-bɔ̀ mán kɛ hán nɛ̀n ɛnhyürɛ; yɔ sɔnba nɛ̀n ɛtɛsɛ̀n, yɔ yé nɛ̀n ɛntàn-drɔ. 37Ki yɔ dɔ̀ le: “Ke dú kɛ, è dú Zhüifɛ̀n-bɔ̀ nɛ̀ncüì, bɩ v'edomɛ̀n die!” 38N'ɛgbàn-hán-tɛ̀ wú lɔ ye merɛ́n le: “Ɔwrɔn ndɔ lɔ dú Zhüifɛ̀n-bɔ̀ nɛ̀ncüì.”
39Ɛci-gbangbàn-hán-bɔ̀ léyi yɔ gɔ́n brɛ́ ɛgbàn-hán-tɛ̀ domɛ̀n nɔn, ɔtɔ̀n kɛ wɔra nɛ̀n kɩ kɛ dɔ̀ le: “È sɩ̀ dù ebɩdie-wrɔn hàn? È bɩ́ v'edomɛ̀ è die, ô è bɩ́ bɔ̀ è die!” 40Tɛ́n anhyrɛmɛ̀n ci-gbàngbàn-hán-wrɔn lɔ, ke dí nɛ́n nyran lɔ ebrè kɩ kɛ dɔ́ nɛ̀n le: “E sɩ́ sú Ɔwɔ, vɛ́n léyi yɛ hán mɛ́n ɛgbàn zri lɔ nɛ́n? 41Bɔ́ tɛ́n, ɛgbàn-hán ndɔ lɔ vɛ́n bɔ̀, ɔmuhi bɔ́ eci gbangbàn hɔ̀n léyi bɔ̀ hán nɔn, hɩ gbàn wɔɛ̀n de bɔ́ dì nɔn; nɛ tɛn, nɛ̀n sɩ̀ hàn eci gbangbàn zriɛmɛ́n.” 42Zɛtɛn nɛ dɔ̀ le: “Zhezü, m'ankà kè bru mɛ́n, ɛnvra léyi ɛ lɛ và kɛ lɛ hán ɛnnɛ̀ncüì hɔ́ nɔn.” 43Zhezü mrɛ́n nɛ̀n ɔmùan le: “Mɛ dɔ́ mɛ́n annànwɔrɛ mɛ̀n le: Ɛnyɔncì lɔ, mɛ̀n mán vɛ́n mɛhi bɔ́ le bru anhobɩ́.”
Zhezü wú vra
(Nyɛ́n nyan Matie 27:45-56; Markɛ̀n 15:33-41; mán Zhan 19:28-30 wrú lɔ mɛ̀n)
44-45Ncɔ́ ɛnbri shɛ́n mùan, ɛnvra léyi ɛnbri ke sɩ́ vru diɛ nɔn: ɛyri wá sɛ́n anmàn mumù lɔ fɛn, hàn kɩ cɔ́ ɔwɔɛmɛ̀n wacɛ̀n anhɔ̀n. Ɛcàsa léyi yɛ drɛ́n Ɔwɔ-cice-wɔn lɔ mɛ̀n nɔn, kɛ́n anwanzi shà. 46Zhezü di nkù esùva cüìcüìemɛ̀n: “Dade, me bɩ́ m'ɛnhɛ́n lɔ mɛ wá mɛ́n antamɛ̀n.” Ɛnvra léyi nɛ̀n dɔ́ ankà ndɔ hɔ̀n lɔ trɔ nɔn, kɩ nɛ́n wù. 47Gɔliɛ-wrɔn léyi nyɔn nɔn, kán eci léyi wɔɛ̀n nɔn, nɛ mrɛ́n Ɔwɔ kɩ nɛ dɔ̀ le: “Annànwɔrɛ mɛ̀n, ɔwrɔn ndɔ lɔ dú ɔwrɔn anvrɛnvrɛn.” 48Anwrɔn hɔ̀n léyi vá fɛcüè mɛ̀n ô kɛ̀ nyan eci ndɔ lɔ nɔn, kán eci léyi wɔɛ̀n nɔn. Zɛtɛn yɔ vru ɛmɛẅí yɔ hɔ̀n kɩ yɔ gorɛ ankɔ̀rɛ̀ angbà obotomɛ̀n. 49Zhezü nɛ́n nyrán anvrɛn hɔ̀n mán wúyɔ̀ hɔ̀n léyi kɛ kɛ́n nɛ̀n ɛsɛ̀n, hɩ dú Galile nvà nɔn, nyɔn esù she kɛ nyan eci léyi kɛ wɔɛ̀n nɔn.
Yɛ wá Zhezü ezhe-nanmàn mɛ̀n
(Nyɛ́n nyan Matie 27:57-61; Markɛ̀n 15:42-47; mán Zhan 19:38-42 wrú lɔ mɛ̀n)
50-51Ɔwrɔn tɔ̀n ye bi nɛ̀n Zhozɛfɛn, nɛ̀n dú Zhüifɛn-bɔ̀ anmàn léyi ye bi Arimate nɔn wrɔn. Ɔwrɔn ndɔ lɔ zrɔ, kɩ nɛ̀n dú ɛnyrɔn-nan-wrɔn, kɩ nɛ̀n ẅɛn esɛ́ Anhobɩ́ Nɛ̀ncüì-dúyri vá mɛ̀n. Nɛ̀n dú ankà-dɔ̀ trɔ wrɔn tɔ̀n, kɩ nɛ̀n sɩ̀ dù nɛ́n nyran hɔ̀n ankà-dɔ̀-trɔ-bɔ̀ ɛmɛẅi, Zhezü ankà lɔ mɛ̀n. 52Nɛ̀n hɔ́n Pilatɛ̀n nanwrɛn kɩ nɛ sán yi Zhezü dùwrú lɔ. 53Zɛtɛn nɛ̀n mrɛ́n Zhezü duwrú lɔ ɛgbàn-hán-tɛ̀ wú nɛ̀n sɔhɔ́ kɩ nɛ̀n kora yi ɛcàsa wosu, nɛ̀n hɔ̀n nɛ́n wá yi ezhe nanmàn léyi yɛ bɔ́ ɛbù woroko mɛ̀n, hɩ ezhe zriɛmɛ́n kɛ vá dɛ́ ɛmɛ̀n nɔn. 54Ɛnbì lɔ dú ɛnbì-trɔ bì, kɩ ɛnyanmán-bì koran lɔ kɛ vá nkru-bɔ-yri. 55Wúyɔ̀ hɔ̀n léyi kɛ́n Zhezü ɛsɛ̀n dú Galile và nɔn, dú Zhozɛfɛ̀n ɛtɛsɛ̀n; yɔ nyan ezhe nanmàn lɔ kɩ yɔ kán ɔmu le yɛ hán yɛ hɛ́n Zhezü duwrú lɔ nɔn. 56Zɛtɛn yɔ vru ɛmɛẅi yɔ hɔ́n ɛbemɛ̀n, ô yɔ wá ɛnzhì mán ɛnshi bánbán esùva yɔ hɛ́n. Ɛnyanmàn-bì lɔ, yɔ wrɔncüe hán ɔmu le ɛnyanmàn wá tán nɔn.
Nke Ahọpụtara Ugbu A:
Lükɛ̀n 23: ƐAA03
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.