San Mateo 9
9
Jesús‑ni beyonie ttu benne daa yatti latie
(Mr. 2:1-12; Lc. 5:17-26)
1Nianna tti beyapi Jesús‑ni lo barcuha nna deyye betebie lo indatooha nna besine lhe'esi geeha. 2Niha bisin lenkana ttu benne daa yatti latie ata du Jesús‑ni, xuakinna benneha lo ttu breta. Tti bilani Jesús‑ni deki gwa riaba lekani gebie, nianna tti ree benne raniha:
―¡Xi'ini to, bodú itta lelu! Chiba uxía elha xen lasi ge ka tulha gelu‑na.
3Ttu chupa ka nu rule'ekinna ka benne nu ra lo bia bennabi bodha'an Moisés‑ni nna belaba lhi'u lekani rákana: “Nubiyú du nii, Tata Do Yebáha nuná rilhida gaana tti rinnena aná.”
4Ttaka kumu Jesús‑ni rite dábanie nu rulaba lhi'u lekaniha, nianna tti ree kana:
―¿Beaka rulaba lele nu anka satsa? 5Gwalinnáchu, ¿bí nuha nu sattiru innári'i? ¿Si innári'i: “Chiba bixú elha xen lasi ge ka tulha gelu‑na” ak? o ¿innári'i: “Beyadha nna bedá”? 6Ttaka nnanna ule'enia le kini uyú lole deki neti benne daya yebáha, yiesi lo yu‑ni gwa teeba lo neda kia ki dhia elha xen lasi ge ka tulha ruin ka benne.
Nianna tti ree benne daa yatti latieha:
―Beyadha nna bodaxxu nu xualu loin‑na nna beyya lisilu.
7Benne biyúha nna beyadha ttebe deyye lisieha. 8Ka benne saa niha, nna uka tébakanie tti bilákanie nu ukaha, nianna tti ráke:
―Xxeniba ra le Tata Do Yebáha de betebie lo neda ge ka benne se'e yiesi lo yu‑ni kini reyoinke ka benne rani.
Jesús‑ni raxie Mateo‑ni kini sanalhane
(Mr. 2:13-17; Lc. 5:27-32)
9Tti chi bedá Jesús‑ni ata dueha, deyu'ube neda deyye. Nianna bilánie ttu nubiyú lána Mateo dona ata rukixana belhiu nu daa lo ka benne rigixake ge Roma‑ni. Nianna tti ree Mateo‑ni:
―Utá betenalha neti.
Nianna tti udú liina nna gwanalhane.
10Tti chi do Jesús‑ni go yetta lhe'e lisi Mateo‑ni, ixeba ka gwekixa lhe adíru ka nu tekinna lákani deki ankakana ka nu ruin satsa, bisinkana nna use'ekana ro'o mexaha ro lenkane yetta. Niha‑gaba se'e ka benne rudhetinieha lhe. 11Tti bilákin fariseo‑ni doe len ka nuha, nianna tti rákana ka benne rudhetinieha:
―¿Beaka ro maestru gele‑na yetta len ka gwekixa‑na lhe len ka nu ruin satsa‑na lhe?
12Ttaka labie tti biyieninie nu ra ka nuha, nianna tti bekabie gekani, ree:
―Ka nu bittu rani‑na, labí riyasakin nuná nu eyoinna kana, sinuki ka nu rani‑na nuná riyasakinna nu eyoinna kana. 13Gwaleyya nna gwalutte daa bí diani nu ra lo ka yetsi ge Tata Do Yebáha tti ree: “Neti raka lasia satua lele ka benne, laa rakaga lasia uttile ttu nimala nna utele na úna kia.” Laxkala neti labí daya raxia ka nu runi nu dika ixú; neti dalaa raxia ka nu ruin satsa kini odúna kana nna odaxxukana neda ge Tata Do Yebáha.
Jesús‑ni rigixxi'abie nuka dika utte ubina lhe'e ka benne
(Mr. 2:18-22; Lc. 5:33-39)
14Ka benne rudhetini Juan benne rugadi indaha, ubigake ata du Jesús‑ni nna ráke bie:
―¿Beakala ri'itu lhe ka fariseo‑na lhe rutte xxatta ubina lhe'etu a rotu, nna ka nu rudhetinlu‑na nna labí rutte ubina lhe'e ka nuná?
15Jesús‑ni nna bekabie gekani, ree:
―Gwalinnáruga. ¿Laaba ganna labí dikana ka nu biyaxi dha'aha, tse'ekana ku'u elhutti ikikani laka du nubiyú rutsá nániha lenkana? Ttaka ganna chi bisia sá itua nubiyúha, anúruna dhu lenkana, la'anialigaba nna chi utte ubina lhe'ekani.
16’Anágaba nna lanú ttu benne do rotábie ttu ro'o lari kubi ro'o xo yaxxu geeha, kumu ganna otábie nuha, la'ania nna galhiba lari kubiha ro'o lari yaxxuha, la'ania nna adíla satsa ireda xoeha. 17Nigaba labí riga'akana vinu kubi lhe'e ka yieti yaxxu, kumu ganna aníha uinkana, la'ania nna ganna chi gala vinu kubiha nna itsúbana ka yieti yaxxuha, nna ilaliba vinuha lhe tse'e loogaba ka yietiha lhe. Laxkala teeki ita'a vinu kubiha lhe'e ka yieti kubi, kini aníha nna abittu tse'e loo ixpakana.
Jesús‑ni beyonie ttu benne nuila lhe beyoingabe xi'iniunná Jairo‑ni lhe
(Mr. 5:21-43; Lc. 8:40-56)
18Laka du Jesús‑ni rigixxi'anie ka benneha iyá nuha, nianna bisin ttu nu loni ge ka nu Israel‑ni, bedú xibini arloe nna rane:
―Xi'iniunná to kiaha si utti ttebi, ttaka ganna kwinalu italu ixxua nálu ikibi, la'ania nna gweyaka benbabi.
19Jesús‑ni nna udú lii ttebe die len nubiyúha lhe diagaba ka benne rudhetinieha lhe.
20Laka yu'uke neda diake nna ttu benne nuila chi uka tsi'inu (12) ida ridoe reni, nianna tti ubige daka kwe'e Jesús‑ni nna gwattáne ro'o lari nuku benneha, 21kumu belaba lebie, rakanie: “Kwadiba ro'o lari nuku Jesús‑ni dhaaya sattánaa, la'ania nna gweyakabaa.” 22Jesús‑ni nna bodeki loe nna ree benne nuilaha:
―Bodú itta lelu xa xi'ini to. De ugía lelu deki gwadaabaa eyonia lu, de nuha nna chiba beyakalu.
Looraha tteba nna beyaka nuilaha.
23Tti bisin Jesús‑ni lhe'e lisi nu ankana nu loni ge ka nu Israel‑ni, niha bilánie ka benne se'e gwekwesi lhe ka benne se'e ribesi xxattake lhe. 24Nianna tti ree ka benneha:
―Gwaleria nii, kumu nuila to‑ni laa uttiga bi'in‑ni, suna te'adhiba bi'in‑ni.
Ttaka ka benne se'e niha nna ruxisilake gebie. 25Iki de chi bebeabie ka benne saa niha, nianna tti uta'abie nna bedaxxue ná nuila toha. Nuila toha nna beyadha tteba bi'iniha. 26Nianna itúba ka daka niha ugwadhi tisa ge nu benieha.
Jesús‑ni beyonie chupa ka benne xua loke
27Tti chi bedá Jesús‑ni niha, chupa ka benne a raka ilákanie danalhake bie, ribesi'abake ráke:
―¡Benne datia David, gwatuachi lelu ri'itu!
28Tti chi uta'abie lhe'e yo'oha nna ubiga tteba ka benne xua lokeha ata dueha, nianna tti unnaba tise ka benneha, ree ke:
―¿Si gwa ria lele deki gwadaabaa eyonia le?
Ka benneha nna bekabike ráke:
―Gwadaa galálu eyoinlu ri'itu xa tata.
29Nianna tti utane ka iyya lo ka benneha nna ree ke:
―Kumu de gwa riaba lele kia nna gwakaba nu rinnabale‑na.
30Nianna beyali tteba lo ka benneha. Jesús‑ni nna bodha'an tsitsie len ka benneha, ree:
―Nuttu nu kixxi'enle ge nu uka‑ni.
31Ttaka ka benneha nna tti bedáke niha, nna utixxi'a ttebakanie ka benne se'e itúba ka daka niha ge nu ben Jesús‑ni.
Jesús‑ni beyonie ttu benne anke biría
32Si bedá gaaba ka benne beyali lokeha lhe'e yo'oha, nianna tti bisin lenkana ttu benne anke biría, yu'u ttu espíritu xxegwi latie. 33Tti chi bebea Jesús‑ni espíritu xxegwiha lati benne anka biríaha nna udulo tteba benneha unnee. Ka benne se'e niha, nna bebanabakanie nna ráke:
―Ni tsa labí chi bilenri'i aka ttu luesi nu uka‑ni lo yu ge Israel‑ni.
34Ttaka ka fariseo‑ni nna rákana:
―Xxana ka espíritu xxegwiha‑ba rixuin nuná kini rebeana ka espíritu xxegwi lati ka benne‑na.
Ixeba ka benne riyasakanie iyienkanie ka tisa ge Tata Do Yebáha
35Lhe'e iyába ka yiesi xeni‑na lhe lhe'e iyába ka yiesi xka'a to‑na lhe, lhe'e ka nuná ata sia ka yo'o ata rudheti ka benne ka tisa ge Tata Do Yebáha reki Jesús‑ni rule'enie ka benne, lhe anágaba rigixxi'agabe ka tisa tse, delába rigixxi'e gasina innabia Tata Do Yebáha ka benne, lhe anágaba nna reyoingabe iyá looba ka isagwe lhe ata rilhen latike lhe. 36Tti bilani Jesús‑ni ixe juisiru ka benne se'e niha, nianna gwatua lebie ke kumu si'iba du leke lhe sun labake se'e, lanú tee ki edí edenna ke. Ankabake attiba ka neru to anú xxanakani tee ki uyúna kana. 37Nianna rabie ka benne rudhetinieha:
―Yalhá ixeni lena tee exú, ttaka ka benne edíke lena‑ni ttu chuparubake raka, kumu ixeba ka benne se'e riyasakanie iyienkanie ka tisa ge Tata Do Yebáha, ttaka ka benne rigixxi'ake ka tisa geeha, ttu chuparubake raka. 38De nuha nna gwalinnaba len Tata Do Yebáha, delába benne anke Xxana ka benne riyasakanie iyienkanie ka tisaha, kini idhelharue ka benne kixxi'akanie ke.
Nke Ahọpụtara Ugbu A:
San Mateo 9: zae
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2014, Wycliffe Bible Translators, Inc. All rights reserved.