San Marcos 16
16
Jesús iiu phiidʉtarr
(Mt. 28:1-10; Lc. 24:1-12; Jn. 20:1-10)
1Mag thumaam khʉʉn jua ʉ̃i kheeujem ed kheubaadeewai María Magdalena, ãbakhai María Santiago ãd maimua Salomé dʉi amach thãrjupam khʉʉnau jʉ̃gdee perkha sĩujierram aajem, agua Jesús kha phuraan maag. 2Maimua ag noram domighed ãspa eebaadeewai edaupherre õor mor dawaa aadem ee, i aukhertarr jẽbdi aar oon wetjierram aajem, mag jʉ̃gdeeu i kha phuraag. 3Mag wetwi amach appai khʉd ee, —Keena ¿khaíuta chi jẽbdi ʉ̃rʉm mok maachig chawag pʉreu deejuuta mʉg wetúma? a iyʉʉ wenʉrrajim aajem.
4Mamʉ mag iyʉʉ wetmamua barimanaa ooimaawai, chi jẽbdi i ee mok por pom simua joothʉ sĩerr jũrr chawag pʉreupʉi thʉnʉm ooimajierram anaabá. 5Magbaawai warag ierr dubwi ooimaa, woun ãb ẽwanaa khitʉmta sĩi khajũa bäpphä khajũa bʉ etherr jũa simta mag jẽbdeg juachaar gar jup oo sim ooimajierram aajem. Amachdeu mag oobaawai warre jãphierr phobaadejim aajem. 6Mag ʉʉin jãphierr phobaadem oowi chi woun khajũa bäpphä jũa sĩerrau amag, —Oob jãphierrmiet ajim anʉm. Mua khaphʉ chirʉm, pãrau Jesús Nazaretpierr ar pakuls gaai meerphe thõotarrta jʉr wenʉrrʉm. Pari i mʉig khaba sĩebahab ajim anʉm, ya iiu phiidʉwi petarr aawai. Pãade oobat i aukhertarr ee sĩi khãidu parii simgui ajim anʉm. 7Maimua amag, Ereubaadewi i khapeen tagam khʉʉnagjã jaauwi Pedroogjã jaaubat ajim anʉm: “Ichin ya pãar nawe Galileaag petam. Nau jamta i ooimaju” a jaaubat ajim anʉm, ichdeu amachigcha ag nawe jaautarrjo.
8Amachig magbaawai jãphierr nʉm iekhau bʉ duui durrumta eerpamjo dawag oberdʉtkhawi khaphig phobaadejim aajem. Maimua chi Jesús khapeen aar bardʉtkhaimaawaijã, agtha jãphierr narr aawai, bʉ̃ʉrjã iwiir ãbam khʉʉnagjã jaaubajierram aajem.
Jesuu María Magdalenaag ich oopitarr
(Jn. 20:11-18)
[ 9Maimua mag domighed ãspaau Jesús iiu phiidʉwia María Magdalenaagta nacha ich oopijim aajem, i aig oberchewia. Ich mag ʉʉi mor eem ajim aajem, ag nawe ich Jesuu mepeen khaigbam khʉʉn siete dau daau jʉrkhʉʉipʉitarr. 10Ichdeu mag oobaawai chi Jesús dʉi wenʉrraajerr khʉʉn gaai machgau bĩe durrum aar mawia amag jaauwimajim anaabá. 11Mamʉ mag amachig ich daúacha Jesús iiu phiidʉwi nem moná nʉrrʉm oojim a jajaaukhamjã i iek ʉkhabajierram aajem.
Jesús õor numí khʉd ee wetmarr khʉʉn aig oberchetarr
(Lc. 24:13-35)
12Magtarr khur deeu ũwaai deeum khĩir thegnaa ich khapeen numí phobor eemua khʉd ma sim ee wetmarr khʉʉnagjã ich oopijim aajem. 13Mag amachig ich oopibaawai makhʉʉnaujã agjo deeu ewag wetwi ich agjo chi i dʉicha ogdʉba wenʉrraajerr khʉʉnag jaauwimajierram aajem. Pari makhʉʉn iekjã bʉ̃ʉrjã ʉkhabajim anaabá.
Jesuu ich khapeen once narr aig beewia ich oopitarr
(Mt. 28:16-20; Lc. 24:36-49; Jn. 20:19-23)
14Maimua ãbmiecharam gaai paawai Jesuu ich khapeen once ãbam aig thach kho narr aig beewia ich oopijim aajem. Maimua iyʉʉmamua amag meeurrau sĩujim anaabá. Mag meeurrau sĩutarran, maan ich iiu phiidʉwi nʉrrʉm ootarr khʉʉnau jaau nʉmjã amach jʉ̃g theegau bʉ̃ʉrjã ʉkhaba arr gaaimuata mag meeurrau sĩujim aajem. 15Maimua ich Jesuu magjim anʉm amag:
—Jãimua ereu phobaadewi Ẽwandamau õor peerdʉ aaujem iekta durrpierram magwe thumaam khʉʉnag jaaupetat ajim anʉm. 16Chi mʉ iek ʉkhawi ich por choopi sim khʉ ʉu peerdʉju. Mamʉ chi mʉ iek jaau nʉm ũr simjã ʉkhaba sim chan Ẽwandamau i peerdʉ auba warag i isegpʉijugui ajim anʉm. 17Chi mʉ iek thãraucha ʉkha nʉm khʉʉnau mʉchdeu aajerrjo, mua mʉch juapá deebarmua õor mor eem mepeerjã obeerpi jaaubaawai chadcha dau daau obeerpʉimajugui ajim anʉm. Magnaa ĩchab deeum meu ich meu khabamta ag nawe iekhaajerrjo iekhaju. 18Nemkhõr benen paraam gaai juau pʉrbaawai khaakhiinjã bʉ̃ʉrjã chig abaju. Õor thõojem pakher khãijã õrau dopipʉiwiajã bʉ̃ʉrjã chig abaju; mag nʉm dʉi ĩchab õor mor masim khʉʉn kõit Ẽwandamag jeeunaa am gaai juadamau pʉrbarmuapai monaaupʉimaju a jaaujim aajem. Mua pãrag mag nem waupi chirʉmʉn, mag pãachdeu wau nʉm gaaimua õraujã mʉ iekta pãrau jaau nʉm khap amkhĩraugui ajim aajem.
Jesús ʉ̃gthar matarr
(Lc. 24:50-53)
19Jesuu ich bʉ ogdʉba aajerr khʉʉnag mag jaau aaipabaadeewai ich Ẽwandamaucha maach Por Jesús ich aar aujim anaabá, ʉ̃gthar. Mag Jesús ʉ̃gthar pabaimaawai warre ich Ẽwandam bigaau i juachaar garta jupimajim aajem, ag nawe ichdeu amag jaaujerrjo. 20Magbaawai i khapeenau wetwi chadcha amachig jaautarrjo durrpierram magwe maach peerdʉajem iek õrag jaau wenʉrrajim aajem. Mag amau jaau wenʉrrʉmpierr ĩchab ich Jesuu am juag oojeejim anaabá, ag na õrau ooba aajem nempa amag waupi sim gaaimua. Magʉm gaaimuata õrau chadcha khaphʉ aajeejim aajem, amau i iekta jaau nʉm.]
Nke Ahọpụtara Ugbu A:
San Marcos 16: noaA
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2011, Wycliffe Bible Translators, Inc. All rights reserved.