Amaokwu Akwụkwọ Nsọ Ndị Ama Ama siteré na लूका 6

Kesaa

“तूँ पंचे अगर दुसरेन काहीं कुछू देइहा, त परमातिमा के द्वारा तोंहऊँ काहीं दीन जई। उहय नाप माहीं हलाय-हलाइके अउर दबाय-दबाइके पूर भरिके दीन जई, काहेकि जउने नाप से तूँ पंचे दुसरेन काहीं नपते हया, उहय नाप से परमातिमव तोंहरे खातिर नपिहँय।”

इहइमेर निकहा मनई अपने मन के निकहे भन्डार से, निकही बात निकारत हय; अउर बुरा मनई अपने मन के बुरे भन्डार से, बुरी बात निकारत हय; काहेकि जउन मन म भरा रहत हय, उहय ओखे मुँहे से निकरत हय।”

पय तूँ पंचे अपने दुसमनन से प्रेम करा; अउर भलाई करा, अउर दुबारा न पामँइ के आसा रखिके, उधार द्या, तब तोंहईं स्वरग माहीं बड़ा प्रतिफल मिली, अउर तूँ परमप्रधान परमातिमा के सन्तान ठहरिहा, काहेकि परमातिमा उनहूँ के ऊपर जउन धन्यबाद नहीं करँइ, अउर बुरे मनइन के उपरव किरपा करत हें।

जइसन तोंहार पिता परमातिमा दयालू हें, उहयमेर तुहूँ पंचे दयालू बना।”

“कोहू के ऊपर दोस न लगाबा, त परमातिमव तोंहरे ऊपर दोस न लगइहँय। कोहू काहीं दोसी न ठहराबा, त परमातिमव तोंहईं दोसी न ठहरइहँय। अउर तूँ पंचे दुसरेन के गलती माफ करिहा, त परमातिमव तोंहार गलती माफ करिहँय।”

पय हम, तोंहसे सुनँय बालेन से कहित हएन, कि “अपने दुसमनन से प्रेम करा; जउन तोंहसे दुसमनी करँय, उनखर भलाई करा। जउन मनई तोंहईं सराप देंय, उनहीं आसिरबाद द्या; जउन तोंहार अपमान करँय, उनखे खातिर प्राथना करा।

जइसन तूँ पंचे चहते हया, कि दूसर मनई तोंहरे साथ बेउहार करँय, तुहूँ पंचे उनखे साथ उहयमेर बेउहार करा।

जउन तोंहरे एकठे गाल माहीं थापड़ मारय, ओखी कइती दुसरव गाल फेर दिहा; अउर जे तोंहार साल छड़ाय लेय, ओही कुरथव लइ लेंइ दिहा; अगर कोऊ तोंहसे कुछू माँगय, त ओही द्या, अउर जे कोऊ तोंहार कउनव चीज छड़ाय लेय, ओसे न माग्या।

“कउनव निकहा बिरबा अइसा नहीं होय, कि ओमा खराब फर लागँय, अउर कउनव खराब बिरबा अइसा नहीं होय, कि ओमा निकहा फर लागँय।

हरेक बिरबा अपने फरय से पहिचाना जात हय; काहेकि मनई जरबइलन से अंजीर नहीं टोर सकँय, अउर न झरबेरी से अंगूर।