San Pedro Amuzgo - 1992 Edition (Non-Drama NT)

San Pedro Amuzgo - 1992 Edition (NT)

Nnꞌan tmaanꞌ fariseos tondyehan na majndyentyi nnꞌan totsayꞌonhan yo jñꞌoon na toninncyaa Jesús ndoꞌ na jntꞌëhan ntyja ꞌnaanꞌ jon, chintyi joo nnꞌan na tonanꞌjonhan ntyja ꞌnaanꞌ Juan. Majoꞌ chito nquii Jesús totsiquindëëꞌ jon nanꞌñeen. Xiaꞌntyi já nnꞌan na tꞌman jon na conanꞌjö́n yohin, já tontꞌá tsꞌianꞌñeen. Vi na jndë jndyii Jesús na nndaꞌ tondue fariseosꞌñeen, jnduiꞌ jon ndyuaa Judea, tja ntcüeꞌ jon Galilea, sá yohin.
Ndoꞌ na sá joꞌ, tcanhanꞌ na ngüenö́n ndyuaa Samaria. Joꞌ squë́ ncüii tsjoon na jndyu Sicar na mꞌaanhanꞌ juu ndyuaaꞌñeen. Tsjoonꞌñeen ndyo mꞌaanhanꞌ naijon na vaa tyuaa na jndaaꞌ José nnon tsotye jon Jacob. Joꞌ vaa tsuiꞌ na sia nquii Jacobꞌñeen. Ngꞌe na tejndyaaꞌ Jesús na jndyo jon nato, joꞌ tëcjo jon naijon vaa juu tsuiꞌñeen. Xjenꞌñeen mandyo ngueeꞌ yajminꞌhanꞌ. Ndoꞌ juu xjenꞌñeen ncüii tsanscu Samaria tyjeeꞌnon juu na tacüjiꞌ juu ndaatioo. Itso jon nnon juu:
—Ncyaꞌ chjo ndaa ncꞌua. Juu xjenꞌñeen, já nnꞌan na tꞌman jon na quitsayꞌö́n yo jñꞌoon na toninncyaa jon, jndë sá tsjoonꞌñeen, sananꞌjndá chjo ꞌnan na chi ntcüꞌá yohin.
Ndoꞌ tsanscuꞌñeen sintcüeꞌ juu jñꞌoon, itso juu:
—ꞌUꞌ condui tsꞌan judío ndoꞌ ja condui tsꞌan ndyuaa Samaria. Joꞌ ndicüaaꞌ tsꞌön ndu nnön macanꞌ ndaa. Nndaꞌ jñꞌoon tso tsanscuꞌñeen ngꞌe joo nnꞌan judíos tyiꞌquijndooꞌhan nnꞌan Samaria.
Ndoꞌ tꞌa Jesús ꞌndyo juu, itso jon:
—Xe mavaaꞌ tsonꞌ na njon jndyi tsixuan juu naya na ninꞌquitsiquindaaꞌ Tyoꞌtsꞌon ꞌuꞌ, ndoꞌ nin condui ja na macꞌan ndaatioo nnonꞌ, yajoꞌ ꞌuꞌ ntcanꞌ nnön na ninncya ndaa na ntyja ꞌnaanꞌhanꞌ ngüandoꞌ ñuan ꞌnanꞌ.
Joꞌ tꞌa tsanscuꞌñeen, itso juu nnon jon:
—Nndaꞌ ta, taꞌnan ꞌnan cyonꞌ na ncüjiꞌhanꞌ ndoꞌ juu tsuivaꞌ njoon jndyihanꞌ. Yajoꞌ ¿Yuu va ngyonꞌ juu ndaatioo na nnincyaahanꞌ na ngüandoꞌ ñuan njan? Nquii tsotachí Jacob, jntyꞌii jon tsuiꞌva ndë́. Nquii jon toꞌu ndaatioo juuhanꞌ, majoꞌntyi ntsinda jon yo ninꞌquiooꞌ ntsjuenꞌ jon. ꞌUꞌ jeꞌ, ¿Aa njonntyichen condui ꞌuꞌ, chichen nquii jon?
Tꞌa Jesús, itso jon:
—Tsoñꞌen nnꞌan na cove ndaatioomin, ngioo na ninꞌcüe nndaꞌhinhanꞌ. Majoꞌ minꞌcya ro tsꞌan na nninncyaahin ntꞌö, ngioo na tein quiiꞌ tsꞌon juu. Ntsꞌaahanꞌ quiiꞌ tsꞌon juu chaꞌvijon yuu na conduiꞌ tꞌman xtyoꞌ ndaa na tyiꞌjeꞌcanhanꞌ. Naya na matsixuan ja ntsꞌaahanꞌ na tyiꞌjon quintycüii na ngüandoꞌ ñuaanꞌ tsꞌan.
Tꞌa tsanscuꞌñeen, tso juu:
—Ta, quitsaꞌ vi nayaꞌñeen, ncyaꞌ ndaatioova chaꞌ tancüjeeꞌ na ninꞌcꞌuantyëchënhanꞌ min tantsichju na ninnquiiꞌchen ndyocüjiꞌhanꞌ.
Ndoꞌ itso Jesús nnon juu:
—Cjaꞌ, cüanꞌ saꞌ, ndë ncyohoꞌ ntjoohin.
Tꞌa tsanscuꞌñeen ꞌndyo jon:
—Ja taꞌnan sꞌa.
Joꞌ tso Jesús ꞌndyo juu:
—Mayuuꞌ jñꞌoon na tsuꞌ na taꞌnan saꞌ. Ee jndë ꞌon nannon na jndë tomꞌanꞌ yohan, ndoꞌ juu tsꞌan na mꞌaan yo ꞌuꞌ neinhin, chito aa saꞌhin. Jñꞌoon mayuuꞌ na tsuꞌ na nndaꞌ.
Xjen na jndyii tsanscuꞌñeen jñꞌoonvaꞌ, itso juu:
—ꞌUꞌ ta, mavaaꞌ tsꞌön na condui ꞌuꞌ tsꞌan na matsininꞌ jñꞌoonꞌ Tyoꞌtsꞌon ntyja nchu vaa ꞌnan na nndui. Nque ndochí já nnꞌan samaritanos tonanꞌtꞌmaanꞌhan Tyoꞌtsꞌon juu tyoꞌva. Majoꞌ ꞌoꞌ nnꞌan judíos conduehoꞌ na juu tsjoon Jerusalén, joꞌ chuꞌhanꞌ na quitsitꞌmaanꞌ tsꞌan jon.
Ndoꞌ tꞌa Jesús ꞌndyo tsanscuꞌñeen, tso jon:
—ꞌUꞌ tsanscu, cantyja tsonꞌ jñꞌoon matsjö nnonꞌ na mangüentyja xjen na nnanꞌtꞌmaanꞌ nnꞌan tyëhöꞌ minꞌcya ro yuu jon, chito veꞌ xiaꞌntyi tyoꞌva ndoꞌ min aa Jerusalén. ꞌOꞌ nnꞌan Samaria tyiꞌcovaaꞌ nꞌonhoꞌ nchu vaa na conanꞌtꞌmaanꞌhoꞌ. Majoꞌ já nnꞌan judíos conanꞌtꞌmánꞌ Tyoꞌtsꞌon yo na covaaꞌ nꞌö́n. Ee ntyja nján já nnꞌan judíos, joꞌ itsinꞌman jon ñuaan nnꞌan. Majoꞌ ngüentyja xjen, ndoꞌ nein jndë coventyjahanꞌ, na joo nnꞌan na conanꞌtꞌmaanꞌhan nquii tyëhöꞌ, quintꞌahinhanꞌ na cꞌonhan nacje ꞌnaanꞌ Espíritu ndoꞌ yo na xoncüeeꞌ nꞌonhan. Ee ntꞌue jon nnꞌan na nanꞌxuan na nndaꞌ. Nquii Tyoꞌtsꞌon conduihin Espíritu. Mangꞌe joꞌ nque nnꞌan na ninꞌquinanꞌtꞌmaanꞌhan jon, icanhanꞌ na cꞌonhan nacje ꞌnaanꞌ Espíritu Santo, ndoꞌ mantyi quinanꞌtꞌmaanꞌhan jon yo na manchaꞌchen nꞌonhan.
Ndoꞌ juu tsanscuꞌñeen, tꞌa juu, tso juu:
—Ja mavaaꞌ ya tsꞌön na mancüjeeꞌ juu Mesías, nquii jon na conduihin Cristo. Ndoꞌ vi na jndë tyjeeꞌ jon, tsoñꞌen jñꞌoonminꞌ ntsinchuꞌ jonhanꞌ ndëë.
Sintcüeꞌ Jesús jñꞌoon nnon juu:
—Maja na matsinën yo ꞌuꞌ ndö, condui ja nquii tsanꞌñeen na matsuꞌ.

Majuu xjenꞌñeen, já nnꞌan na tqueenꞌ jon na quinanꞌjö́n yo jñꞌoon na toninncyaa jon, squë́ ntcüꞌë na mꞌaan jon. Vacue tꞌoonꞌ nꞌö́n na tsinin jon yo cüii tsanscu. Majoꞌ min na nndaꞌ, tataꞌxꞌë́ nnon juu nin ꞌnan ntꞌue tsꞌon juu. Min taꞌnan jnduë́ nnon ta Jesús ndu na tsinin jon yo tsanscuvaꞌ. Juu xjenꞌñeen jntyꞌii tsanscuꞌñeen tsjööꞌ juu, tja ntcüeꞌ juu tsjoonꞌ juu. Tëquitso juu ndëë nnꞌan na mꞌan joꞌ:
—Ncyohoꞌ na ntsaquijntyꞌiahoꞌ ncüii tsansꞌa na jndë tso jon nnön tsoñꞌen nnon ꞌnan na tyiꞌya na matsꞌa. ¿Aa xeꞌquitsꞌaahanꞌ na conduihin Cristo?
Ndoꞌ joo nanꞌñeen jnduiꞌhan, tyꞌehan naijon na mꞌán yo Jesús. Ndoꞌ vitjachen na ntsquehan, já nnꞌan na tqueenꞌ jon na quitsayꞌö́n yo jñꞌoon na toninncyaa jon, jnduë́ nnon jon:
—ꞌUꞌ ta na matsiꞌmanꞌ ndë́, cüa, cüaꞌ.
Majoꞌ tꞌa jon jndyuë, tso jon:
—Ja yꞌön ꞌnan na ntcüꞌa na tyiꞌcovaaꞌ nꞌonhoꞌ ntyja ꞌnaanꞌhanꞌ.
Yajoꞌ já na tondyë́ jñꞌoon na tso jon, taꞌxꞌë́ nquë́ ndëë ntyjë́, jnduë́:
—¿Aa ntsꞌaahanꞌ na jndyoyꞌoon tsꞌan ꞌnan na tcüaꞌ jon?
Majoꞌ tꞌa Jesús jndyuë́, itso jon:
—Xjen na matsꞌa ꞌnan na ntꞌue tsꞌon nquii jon na jñon ja quiiꞌ ntꞌan nnꞌan ndoꞌ na mavancꞌuë tsꞌian na iꞌua jon nnön, juu tsꞌianꞌñeen incyaahanꞌ najndö chaꞌxjen na incyaahanꞌ najndei tsꞌan na icüaꞌ. Vaa jñꞌoon itsiꞌmanhanꞌ ntyja ꞌnaanꞌ juu jñꞌoon na conanꞌneinhoꞌ. Ee conduehoꞌ na nenque chiꞌ vitja ndoꞌ ntyje nnꞌan ꞌnan na coveꞌ. Majoꞌ ja matsjö ndëëhoꞌ, quinanꞌvehoꞌ nquenhoꞌ, ndoꞌ quijntyꞌia ndëëhoꞌ xeꞌjndio na mꞌan nnꞌan na conduihan chaꞌvijon ntjon na jndë tman na ngüantjon tsꞌan joohan cüentaaꞌ Tyoꞌtsꞌon. Itsijonhanꞌhin chaꞌvijon ntjon na jndë tueeꞌ xjen na ntyjee tsꞌan. Ee chaꞌxjen tsꞌan na ityjee ntjon na tueꞌ, vantjon juu na itsꞌaa juu tsꞌian, mantyi juu tsꞌan na itsiꞌman juu ndëë nnꞌan na ntycyaahan ntꞌö Tyoꞌtsꞌon, cotantjon nanꞌñeen na nanꞌxuanhan na tyiꞌquintycüii na cotandoꞌ ñuaanhan. Ndoꞌ na nndaꞌ, juu tsꞌan na itsiꞌman juu jñꞌoonꞌ jon ndëë nnꞌan, itsicüajonhanꞌ na neiinꞌ tsanꞌñeen chaꞌxjen na neiinꞌ juu tsꞌan na vantjon nanꞌñeen na conduihan cüentaaꞌ Tyoꞌtsꞌon. Ndoꞌ na nndaꞌ, itsiꞌmanhanꞌ na mayuuꞌ juu jñꞌoon na condue nnꞌan na ncüii tsꞌan inonꞌ juu, majoꞌ mañoon tsꞌan ityjeehanꞌ. Na majñön ja ꞌoꞌ quiiꞌ tsꞌian njan, itsijonhanꞌ ntyja ꞌnaanhoꞌ chaꞌvijon na cotsaquityjehoꞌ yuu vijon na tajntꞌahoꞌ jndyaaꞌ. Mañoon nnꞌan jntꞌa jndyaaꞌ na ncꞌoon tsꞌian ꞌnaanꞌ Tyoꞌtsꞌon quiiꞌ nꞌon nnꞌan, ndoꞌ ꞌoꞌ jndë tyequeꞌhoꞌ quiiꞌ juu tsꞌianꞌñeen.

Ndoꞌ nque nnꞌan samaritanos na mꞌanhan juu tsjoonꞌñeen, jndyehan tëntyja nꞌonhan Jesús ngꞌe jñꞌoon ꞌndyo juu tsanscuꞌñeen na sinin jndyoyu juu ndëëhan na itso juu: “Jndë siꞌman jon nnön tsoñꞌen ꞌnan na tyiꞌya na jndë totsꞌa.” Nnꞌan Samariaꞌñeen xjen na squehan naijon mꞌaan Jesús, tanhan nnon jon na quintjohin yohan, ndoꞌ ntjohin yo nanꞌñeen chaꞌ ve xuee. Ndoꞌ xjen na tondye nanꞌñeen jñꞌoon na toninncyaa jon, jndyentyichenhan tëntyja nꞌonhan jon. Ndoꞌ tonduehan nnon tsanscuꞌñeen:
—Nanein chito veꞌ ntyja ꞌnaanꞌ juu jñꞌoon na tsuꞌ ndë́, joꞌ na vantyja nꞌö́n. Ee nquë́ntyë́ jndë jndyë́ jñꞌoon ꞌndyo jon. Ndoꞌ neinhin, covaaꞌ nꞌö́n na mayuuꞌ conduihin Cristo na itsinꞌman jon ñuaan nnꞌan tsonnangue.

Jndë na tenon joo ve xueeꞌñeen, jnduiꞌ Jesús joꞌ, sá ntcüꞌë́ yohin ndyuaa Galilea. Ee nquiintyi jon tjiꞌ jndyoyu jon jñꞌoon na tyiꞌnanꞌtꞌmaanꞌ nnꞌan ncüii tsꞌan na incyaa jñꞌoonꞌ Tyoꞌtsꞌon na ninncüii tsjan tuihin yohan. Ndoꞌ juu xjen na squë́ ntcüꞌë́ Galilea yohin, nnꞌan na mꞌan joꞌ nein jndyihan jon, jnanꞌntjooꞌhan jon. Ee juu xjen na tueeꞌ nguee pascua Jerusalén, mantyi tyꞌe nanꞌñeen joꞌ, ee jndë jntyꞌia ndëëhan tsoñꞌen jnꞌaan tꞌman na totsꞌaa jon joꞌ.
Jndë joꞌ sꞌá nntꞌá yohin Caná ndyuaa Galilea, naijon scüaquen jon ndaa na sꞌaahanꞌ vinonhanꞌ. Ndoꞌ juu tsjoon Capernaum tomꞌaan ncüii tsꞌan na tꞌman tonduihin ntyja ꞌnaanꞌ gobernado. Juu lu, jnda tsanꞌñeen, mꞌaan juu na viiꞌ juu. Ndoꞌ xjen na jndyii tsanꞌñeen na jndë squë́ ntcüꞌë́ ndyuaa Galilea yo Jesús na jnán ndyuaa Judea, yajoꞌ tja tsanꞌñeen na mꞌán. Tcan juu vi nayaꞌñeen nnon Jesús na cja jon vaaꞌ juu na quitsinꞌman jon lu chjoꞌñeen ee ninꞌcueꞌ juu. Ndoꞌ itso Jesús nnon tsanꞌñeen:
—ꞌOꞌ mancüiixjen tyiꞌxeꞌcantyja nꞌonhoꞌ na vaa najndö na condui ja xe na aa tyiꞌjntyꞌia ndëëhoꞌ ncüii nnon ꞌnan na matsꞌa na ndiquindëë na nduihanꞌ na veꞌ ntyja ꞌnaanꞌ naijndei nquii tsꞌan, ꞌnan na ndicüaaꞌ tsꞌon tsꞌan ntyja ꞌnaanꞌhanꞌ.
Tꞌa tsanꞌñeen ꞌndyo Jesús, itso jon:
—Nndaꞌ ta, maninñoonꞌ cjaꞌ vꞌa vitjachen na ngueꞌ jnda.
Tso Jesús nnon jon:
—Cjaꞌ, ee ntcoꞌ ya ntcüeꞌhanꞌhin.
Ndoꞌ juu tsansꞌaꞌñeen, tëntyja tsꞌon jon jñꞌoon na tso Jesús. Tëntcüeꞌ jon vaaꞌ jon. Ndoꞌ viochen xjen na vja ntcüeꞌ jon tsjoonꞌ jon Capernaum, nque mosooꞌ jon saquitjonhin jon. Jnanꞌquindyiihanhin, jnduehan nnon jon:
—Jndë vacoꞌ yahanꞌ lu jndaꞌ.
Ndoꞌ taxeeꞌ jon ndëë nanꞌñeen yuu xjen tyeꞌ na tëcoꞌ yahanꞌhin. Tꞌa nanꞌñeen, jnduehan:
—Vja vi na tenon chjo yajminꞌ jndya tjuenꞌhin.
Ndoꞌ juu tye luꞌñeen taaꞌ tsꞌon jon na maninjuu xjenꞌñeen na tso Jesús nnon jon na ntcoꞌ yantcüeꞌhanꞌ lu jnda jon. Ndoꞌ na nndaꞌ, tëntyja tsꞌon jon Jesús, juu jon ndoꞌ mantyi tsoñꞌen nnꞌan vaaꞌ jon.
Joꞌ tsꞌian na jndë ve na sꞌaa Jesús na tueeꞌ jon Galilea na jnan jon Judea, na tyiꞌxeꞌquinduihanꞌ na veꞌ ntyja ꞌnaanꞌ najndei nquii tsꞌan.

Geere nke a ntị San Juan 4