 If you would like a copy of this version please contact info@davaraudiobibles.org

Surgujia New Testament, CC-BY-SA-4.0, The Love Fellowship. Surgujia New Testament Audio Bible, CC-BY-SA-4.0, Davar Partners International, The Love Fellowship, 2023.

Surgujia New Testament

SurgujiaBible (सरगुजिया) by The Love Fellowship is licensed under Creative Commons Attribution-ShareAlike 4.0 License.

सचेत रईहा! तुमन लोग मन ला दिखाए बर अपन धर्म कर बुता झिन करा, नही त अपन स्वर्गीय दाऊ ले कुछ नी पईहा।
“एकरे बर जब तय दान करबे, त अपन आगू मे तुरही झिन बजवाबे, जईसन कपटी मन, अराधनालय अउ गली मन मे करथे, ताकि लोग मन ओकर बड़ाई करे। मैहर तुमन ले सहिच कहथो कि ओमन अपन फर ला पाए दारिन। लेकिन जब तय दान करबे, त तोर जेवनी हाथ हर करथे, ओला तोर डेरी हाथ झिन जाने पाए। ताकि तोर दान हर छुपल रही, अउ तब तोर दाऊ जेहर छुपल ला देखथे, तोला प्रतिफर देही।”


“जब तय हर प्रार्थना करबे, त कपटी मन कर जईसन झिन करबे, काबर कि लोग मन ला दिखाए बर अराधनालय मन मे अउ डगर मन कर मोड़ मन पर ठड़होए के प्रार्थना करे बर ओमन ला बड़िया लगथे। मैहर तुमन ले सहिच कहथो कि ओमन अपन प्रतिफर ला पाए दारिन। लेकिन जब तय प्रार्थना करबे, त अपन कोठरी मे जा; अउ दूरा ला ढाएक के अपन दाऊ ले जेहर छुपल है प्रार्थना कर। तब तोर दाऊ जेहर छुपल मे देखथे, तोला प्रतिफर देही। प्रार्थना करे जुवार मे दूसर जाएत मन कर नियर बक-बक झिन करबे, काबर कि ओमन समझथे कि ओमन कर ढेरेच बोले जाए ले ओमन कर सुनल जाही। एकरे बर तुमन ओमन कर नियर झिन बनिहा, काबर कि तुमन कर दाऊ हर तुमन कर मांगे कर आगू ही ले जानथे कि तुमन कर का-का जरूरत है।”
“तले तुमन मन ये नियर प्रार्थना करा;
‘हे हमर दाऊ, तय हर स्वर्ग मे हस; तोर नाव पवित्र मानल जाही।
तोर राएज आही। तोर इक्छा जेकस स्वर्ग मे पूरा होथे, ओहिच कस धरती मे भी होए।
हमर दिन भर कर रोटी आएज हमन ला दे।
अउ जे नियर हमन हर अपन अपराधी मन ला छमा करथन, ओहिच कस तय भी हमर अपराध मन ला छमा कर।
अउ हमन मन ला परीक्षा मे झिन लान, लेकिन बुराई ले बचा; (काबर कि राएज अउ पराक्रम अउ महिमा हमेसेच तोर ही है।’” आमीन)।
“एकरे बर अगर तुमन लोग मन कर अपराध ला छमा करिहा, त तुमन कर स्वर्गीय दाऊ हर भी तुमन कर अपराध ला छमा करही। अउ अगर तुमन लोग मन कर अपराध ला छमा नी करिहा त तुमन कर दाऊ भी तुमन कर अपराध ला छमा नी करही।”

“जब तुमन मन उपवास करिहा, त कपटी मन कर नियर मुह मे उदासी झिन छाए रहे, काबर कि ओमन अपन मुह ला बनाए रखथे, ताकि लोग मन ओमन ला उपवासी जाने। मैहर तुमन ले सहिच कहथो कि ओमन अपन प्रतिफर ला पाए दारिन है। लेकिन जब तय उपवास करबे त अपन मूड़ मे तेल लगाव अउ मुह धो, ताकि लोग नही लेकिन तोर दाऊ जेहर छिपल है, तोला उपवासी जाने। ये दशा मे तोर दाऊ जेहर तोला छिपल देखथे, तोला प्रतिफर देही।”


“अपन बर पृथ्वी पर धन झिन जुटावा, जहा किरा अउ काई बिगाड़थे, अउ जहा चोरहा मन सेंध लगाथे अउ चोराथे। लेकिन अपन बर स्वर्ग मे धन जमा करा, जहा न किरा अउ न त काई बिगाड़थे, अउ जहा चोर मन न सेंध लगाथे अउ न चोराथे। काबर कि जहा तोर धन है हुवा तोर मन हर भी लगे रही।”

“देह कर दीया आएख हर है; एकरे बर अगर तोर आएख हर साफ रही, त तोर सबेच देह हर भी इंजोर रही। लेकिन अगर तोर आएख हर बुरा रही, त तोर सबेच देह हर भी अन्धार रही; ये कारन ओ उजियारा जो तोर मे है अगर अन्धार रही त ओ अन्धार कईसन बड़खा अन्धार होही।”


“कोनो लोग मन दूई स्वामी मन कर सेवा नी करे सकही, काबर कि ओहर एक ले बैर अउ दूसर ले प्रेम रखही, या एक ले मिलल रही अउ दूसर ला तुच्छ जानही। तुमन परमेश्वर अउ धन दोनोच कर सेवा नी कईर सकथा। एकरे बर मैहर तुमन ले कहथो कि अपन प्रान बर ये चिन्ता झिन करा कि हमन का खाबो अउ का पीयब; अउ न अपन देह बर कि का पहिनब। का प्रान भात ले, अउ देह कपरा ले बईड़ के नी है? अकाश कर चरई मन ला देखा! ओमन न बुनथे न काटथे अउ न कोठार मे बटोरथे; तबो ले तुमन कर स्वर्गीय दाऊ हर ओमन ला खिलाथे। का तुमन मन ओमन ले ढेरेच किमत नी रखथा? तुमन मन मे कोन है जेहर अपन चिन्ता कईर के अपन उमर मे एक घरी भी बड़हाए सकथे?”
“अउ कपरा बर काबर चिन्ता करथा? जंगल कर सोसन मन कर फूल पर धियान करा कि ओमन मन कईसन बड़थे, ओमन न त मेहनत करथे, न काटथे। तबो ले मैहर तुमन ले कहथो कि सुलैमान राजा हर भी अपन सबेच बैभव मे ले कोनोच कर नियर कपरा पहिनल नी रहिस। एकरे बर जब परमेश्वर हर डांड़ कर घास ला, जेहर आएज है अउ काएल भाड़ मे झोकल जाही, एसन कपरा पहिनाथे, त हे आधा बिश्वास करे बाला मन, तुमन ला ओहर एमन मन ले बईड़ के काबर नी पहिनाही?”
“एकरे बर तुमन मन चिन्ता कईर के ये झिन कईहा कि हमन का खाबो, या का पीबो या का पहिनब। काबर कि दूसर जाएत मन ये सबेच चीज मन कर खोज मे रहथे, पर तुमन कर स्वर्गीय दाऊ हर जानथे कि तुमन ला ये सबेच चीज मन कर जरूरत आहे। एकरे बर आगू तुमन परमेश्वर कर राएज अउ धर्म कर खोज करा त ये सबेच चीज हर भी तुमन ला भेटाए जाही। तले काएल कर चिन्ता झिन करा काबर कि काएल कर दिन अपन चिन्ता आप ही कईर लेही, आएज बर आएज करही दुख ढेरेच है।”

Geere nke a ntị मत्ती 6