Athpariya 2023 WBT (NT) Non-Dramatized

Athpariya 2023 WBT (NT) Dramatized

येसुङा आझै माट्‌सा खाट्‌टुए, “ओछेक्‍छेक् चोक्‍सा युङानि, याप्‌मिचि निमेट्‌मा लोङ्‌सा धारमाकारमा चोक्‍नेनिन्॥ नाड्‌डे आचोगिए भोने टोनालोग्‌ङि युङ्‌ना खानि पाबालाम्‍मा पाक्‍चा इनाम् आटोग्‌निम्‍ना॥ हिट्‌डेउङ् जब खान्‍ङा पाक्‍चा ओवानिगालोङ्‌सा पालोवालो आपिडुचिनाँ हाल्‍लाखाल्‍ला चोक्‍नेन्॥ नाड्‌डेउम्‍टे निङ्‌ग्‍वा ओमाक्‍पाचिङा गोलो याहुदि छुम्‍मापाङ्‌ङि हिट्‌नुङ् लाम्‍बो-कोक्‍पोङि याप्‌मिलाम्‍मा मान् टोक्‍मालोङ्‌सा ओचोक्‌युक्॥ छेम्‍बा डोक्, आङा खानि लोनाँनि, हिट्‌नागाँ टोक्‍माना इनाम् टोक्‍मा उहिडुएसुए॥ टरो खान्‍ङा पाक्‍चा ओवानिगा लोङ्‌सा घुवार आफाडुचिनाँ छुप्‍टाङ् कामुक्‌ङा चोगुना रिङ् फेङ्‌साङ् कामुक्‌ङा ठाहा ओटोगुन्‍चा॥ हिड्‌डेउङ् सोगोप् पिडुचि हिट्‌नुङ् खान्‍ङा पाक् ओचोगुएना हिट्‌ना सोब्‍बे थोक् ठाहा काटोक्‍बा कामाङ्‌हाङ् पाबाङा इनाम् मापियुक्॥


“खानि बिन्‌टि आचोगिनाँ ओमाक्‍पा निङ्‌ग्‍वा उलिसागा गाड्‌डे चोक्‍नेनिन्, पोङ्‌भोने हिट्‌नागाम्‍टे याप्‌मिचिङा उनिसु नुङ् याहुदि छुम्‍मापाङ्‌ङि लोक् लाम्‍बो-कोक्‍पोङि ओयेप्‌युङ् बिन्‌टि चोक्‍मा निङ्‌ग्‍वा ओचोगुगा॥ छेम्‍बा डोक्, आङा खानि लोनाँनि, हिट्‌नागाँ उन्‌चिङा टोक्‍मा कोन्‍ना इनाम् ख्‍वाप्‍पा टोक्‍मा उहिडुएसुए॥ टरो खान् बिन्‌टि आचोक्‍ना बेला कोठा ओहोङ्‌ङि लिगा हिट्‌नुङ् ढुवारिक् छुप्‍टुङ् निनिम्‍ना कामाङ्‌हाङ् पाबाङि बिन्‌टि ठाङ्‌सु, हिट्‌नुङ् खान्‍ङा सोगोप् आचोगुना रिङ् निसुङ् पाबाङा खान् इनाम् मापियुक्॥
“हिट्‌नुङ् खानिङा बिन्‌टि आचोगिनाँ पानिछोङ्‌बाचिङा ओचोगु गाड्‌डे बिथाँङिगा याप्‍मा रिङ्‌ङि एडोक् चोग्‍नेनुम्, पोङ्‌भोने हिट्‌नागाँ उन्‌चि साम्‍माङ्‌ङा हामो सोम्‍मा बिन्‌टि चोगिनाँ एडोक् खेम्‍सुटु नुङ् उमिट्‌युक्॥ टरो खानिम्‍बाक् हिट्‌नागा गाड्‌डे लिनेनिन्, पोङ्‌भोने खानिङा बिन्‌टि चोक्‍मा नुङ्‌ना पाइले डोक् खानिलोङ्‌सा पाक् पाक् चाहाब् लिसाइसेना हिट्‌ना रिङ् खानि माङ्‌हाङ् पाबाङा ठाहा टोगुटु॥ हिट्‌डेउङ् खानि नाड्‌डे पारा बिन्‌टि चोगानि–
‘हाउ टोनालोग्‌ङि आयुङ्‌ना आन्‍याँ माङ्‌हाङ् पाबा,
कानिङ् सेङ्‌सेङ् उलियाक्॥
खान्‍ङाना कामुलुक् ओटायाक्,
कानिङ्‌ग्‍वा टोनालोग्‌ङि पुरो लिसा गाड्‌डे ना नाराङि चा पुरो उलियाक्॥
आन्‍याँलोङ्‌सा लेन्‍सेन् चाहाब् लिना चामागा थोक् हाट्‌ले चा आन्‍याँ याप्‌मिपिडा,
आन्‍याँ पाप छेमा याप्‌मिचोगाबिडा,
हिड्‌डे डोक् आन्‍याँ चा आन्‍याँ बिरुद्‌दाङि पाप ओचोगुगालाउङ्‌सा छेमा पिडुएसुम्‌चिमे॥
निङ्‌ग्‍वा छिक्‍माङि ठामा आन्‍याँ याप्‌मिपिनेन्,
टरो सैतानलाम्‍मा आन्‍याँ याप्‌मिसाम्‍डा॥
पोङ्‌भोने मुलुक्, साक्‌ति लोक् माहिमा सोरोक् खान्‍ङाना डोक्॥ आमेन्॥’
“खानिङा याप्‌मिचिगा पाप छेमा आचोगुम्‌बिडुम्‌चिम्‍मे भोने, टोनालोग्‌ङि युङ्‌ना खानि पाबाङा चा खानि छेमा मापिडिटि॥ टरो खानिङा याप्‌मिचिगा पाप छेमा आचोक्‍नेयाट्‌निम् भोने, खानि पाबाङा खानि पाप छेमा माचोगिबिडिन्‍गा॥

“खानि उपासा आयुङिनाँ निङ्‌ग्‍वा ओमाक्‍पाचि गाड्‌डे खानि नाभाक् माखोयोक् चोक्‍नेनुम्॥ निङ्‌ग्‍वा ओमाक्‍पाचिङा गोलो उपासा युङेएसिङे नुङ् याप्‌मिचि निमेप्‍माचिलाउङ्‌सा उन्‌चि नाभाक् ओसेडुङ् उयुङ्‌युक्॥ छेम्‍बा डोक्, आङा खानि लोनाँनि, हिट्‌नागाँ उन्‌चि इनाम् टोक्‍मा उहिडुएसुए॥ टरो खान् उपासा आयुङ्‌नाँ काटेहेक्‌ङि क्‍या नेक्‍टु हिट्‌नुङ् कानाभाक् वासिडु॥ हिड्‌डेउङ् खान् उपासा आयुङाना रिङ् याप्‌मिचिङा माखाक्, टरो निनिम्‍ना खानि माङ्‌हाङ् पाबाङा एडोक् निसुटु हिट्‌नुङ् इनाम् मापियुक्॥


“आप्‍पे लोङ्‌सा नाराङि माक्‍फेन्‍सुबेन् छुम्‍नेनुम्॥ नाहि छुम्‍सुम्‍गा माक्‍फेन्‍सुबेन्‌ङि फेबा ठायुक्, उहिङा चोउङ् जाखाम् चोगुटु हिट्‌नुङ् याङ्‌काखुट्‌चिङा याङ्उखुट्‌टुङ् ओखाट्‌टुटु॥ टरो आप्‍पेलोङ्‌सा टोनालोग्‌ङि माक्‍फेन्‍सुबेन् छुम्‍सानुम्॥ हिट्‌नि फेबा चा ठानिना, उहिङा चा चोन्‍ना हिट्‌नुङ् याङ्‌काखुट्‌चिङा चा याङ्उखुट्‌टुन्‍ना॥ पोङ्‌भोने खोनि कामाक्‍फेन्‍सुबेन् लियुक्, हिट्‌नि डोक् कानिङ्‌ग्‍वा चा लियुक्॥
“खान्‍ङाना कायेम्‌ङाना कुपिउम्‍बाक् कामिक् ए॥ कामिक्‌ङा ओचेट्‌नुलोक् निसुए भोने, ख्‍वाप्‍पा कायेम् डोक् व्‍हाङ्‌ङा इप्‍टुटु॥ टरो कामिक् नुमानिङ् वाइना भोने, ख्‍वाप्‍पा कायेम् डोक् डुम् लियुक्॥ नाड्‌डेडोक् कानिङ्‌ग्‍वा भिट्‌रा लिसाना व्‍हाङ्‌म्‍बाक् डुम् लिसे भोने, हिट्‌ना आम्‍टेप्‍मा औधि डुम् लियुक्‍ना होला!
“खोनाङा चा इप्‍पाङ् डाङ्‌बाङाना सेवा चोक्‍मा हिडुन्‍ना॥ पोङ्‌भोने हिट्‌नाङा ठिबाङ् चिम्‍मा फुट्‌टुटु हिट्‌नुङ् आरको माया चोगुटु आथाबा ठिबाङ्‌ङा लोडुना रिङ् खेम्‍सुटु हिट्‌नुङ् आरकोम्‍बाक् यान्‍दा डोक् चोगुन्‍ना॥ हिड्‌डेउङ् खानिङा चा माङ्‌हाङ् लोक् माक्‍फेन्‍सुबेन् इप्‍पोक्‌ङाना डोक् सेवा चोक्‍मा आहिनिम्‍ना॥


“हिड्‌डेउङ् आङा खानि लोनाँनि, ना चोलाङि हिङ्‌मा लोङ्‌सा पाक् चामाना, पाक् ठुङ्‌माना हिट्‌नुङ् वाप्‍माना नुङ् सुरटा चोक्‍नेनिन्॥ पाक् ना चोला चामा-ठुङ्‌मा नुङ्‌ना हिट्‌नुङ् ना येम् वाप्‍मा नुङ्‌ना ठेना माखाइ टे? टाङ्‌साङ्‌ङि ओपेगा नुवाचि पुयानुम्‌चिम् टे, खोलो हिट्‌नागाँ लालिक् चा उहिसुन्‍गा, चासोङ् चा ओहेगुन्‍गा हिट्‌नुङ् ढुङ्‌गुरिङि चा उछुम्‍सुङ् उयुङ्‌सुन्‍गा॥ टरो चा टोनालोग्‌ङि युङ्‌ना खानि पाबाङा हिट्‌नागा आहारा पिडुचिगा॥ हिट्‌नागा नुवाचि नुङ्‌ना चा खानि आड्‌डिक् डोक् बाहुमुल्‍ले, माखाइ टे? खानि माड्‌डेङि खोनाङा सुरटा चोगुङ् उन्‍ङाना ओआयु खाट्‌टिप्‍मा केलोक् चोग्‍मा हिडुटुना टे?
“पाक् वाप्‍माना नुङ् खानि पोङ् सुरटा आचोगिटिगा? जाङ्‌गालाङिगा लिलि फुङ्‌चि पुयानुम्‌चिम् टे, हिट्‌नागा खोड्‌डेउङ् ओपोयुग्‍गा, हिट्‌नागा टोॽवा चा ओचोक्‌निगा, हिट्‌नुङ् लोट्‌निङ् चा उफुयुन्‍गा॥ टरो आङा खानि लोनाँनि, सोलोमान हाङ्‌बा आड्‌डिक् जोम् वागाठागा लिसा चा नागा लिलि फुङ्‌चि टेप्‍मा चा ओचेट्‌नुना लोट्‌लिङ् वाडुव्‍ट्‌टुन्॥ हाट्‌ले लिना हिट्‌नुङ् हान्‍डेङ् डोक् मिङि टुनुम्‍ना फुङ् हिट्‌नुङ् राॽवाउम् माङ्‌हाङ्‌ङा स्‍यार चोगुचिगा भोने, पाक् उन्‍ङा नागा नुङ्‌ना चा जोम् नुलोक् खानि मापुइन्‍गै टे? खोलो टे खानि बिस्‍वास?
“नाड्‌डेउङ् ‘पाक् चामाना, पाक् ठुङ्‌माना हिट्‌नुङ् पाक् वाप्‍माना’ नुङ् सुरटा चोक्‍नेनिन्॥ पोङ्‌भोने पानिछोङ्‌बाचिङा गोलो नाड्‌डेगा सोब्‍बे थोक् ओकोलुटु॥ खानि लाउङ्‌सा पाक् थोक्‌चि चाहाब् लियुक्‍ना हिट्‌नागा सोब्‍बे टोनालोग्‌ङि युङ्‌ना खानि टोकुबा माङ्‌हाङ्‌ङा ठाहा टोगुटु॥ टरो पाइले माङ्‌हाङ् उमुलुक् हिट्‌नुङ् उन्‍ङाना धारमिक्‍ता कोलानुम्, हिट्‌नुङ् नागा सोब्‍बे थोक्‌चि खानिलोङ्‌सा उन्‍ङा मापिडिटि॥ नाड्‌डेउङ् हान्‍डेङ्‌ङाना सुरटा चोक्‍नेनिन्॥ हान्‍डेङ्‌ना खाँचो हान्‍डेङ् डोक् मिप्‍मा कोन्‌युक्॥ हाट्‌लेना याङ्‌छामा हाट्‌लेलोङ्‌सा डोक् पुग्‍दो लिसे॥”

Geere nke a ntị मात्‌ति 6