Korwa - WBT (NT) Non Drama

Korwa - WBT (NT) Drama

हना तयोमरे ईसू गलील छतरराः एटाः गाँव सहरकूनरेय दँड़ा सेना। एहूदा होड़कूरिकुःआ मूक होड़कू ईसू ञेड एंडा लगाकू ओंगलेःआ। हनालगा हाँय एहूदिया छतर सेन लगा मेरेय चहाःआ। मनदो एहूदाकूराः कुंबाराः परोब सुदुरुः मेला, ईसूरिकुःआ बोपोहकूतेन हाँय एचेरेकू कताया, “नाःआ छतर अते एहूदिया छतरमे सलाव जुवाः। दो बयाव जुवाः इयाःआ बुताम बुताता हना बुता आमरिकुःआ चेलाकू होंकू ञेल अवेयता। तोनोंगीग होड़ आँयगराः ञाव जगावगे लगाय ओंगलेता दो, हाँय ओकोकियानखन तोनोंगाः बुता ओरोय बुतातेरा। आम नाःआ इया बुताम बुताता दो जमा होड़कू मड़ंगरेम एचे उदुःगोड।” हना बेला वरी हाँयरिकुःआ बोपोहकू हों हाँय एचेरे अरीनकू बिसवासगे।
दो ईसू हँकू एचेरेय कतातेड, “नुँहू वरी परोब सेन लगा ईंगराः बेला अरीन सुदुरुःआ। मनदो अपे तोनोंग बेलापे सेने अवेनता। चउंदीसरिकुःआ होड़कू अपे सुदा मेरकू हिनइस-बिनइस अवेयता। मनदो ईंग हँकूराः बुता बेलूर इदा माःआन हँकू बदीरेयिंग कतातेरा। हनालगा हँकू ईंगकू हिनइस-बिनइसवाता। अपे परोब लगापे सलाव जुवाः। ईंगराः बेला अरीन सुदुरुःआ, हनालगा ईंग नुँहू मेरिंग सेनतना।” नाःआ इया कतातेडखन गनालील छतररेय दोहोयान।
ईसूरिकुःआ बोपोहकूतेन परोब मनाः लगाकू सेनेडा। हना तयोमरे हाँय हों बोसोर उडुंगनेनखन परोब होरे सेनेडा। एहूदाकूरिकुःआ मूक होड़कू ईसूकू ञामा अरूकू होंबरेःआ, “हाँय करे इदानिया?”
होड़कू ईसू बदीरे जहड़ घड़ीन मुरुककू कताया। अदोमकू कताया, “हाँय नपाय होड़ हवे।”
अरू अदोमकू कताया, “हाँय होड़कूय बहकावगोडता।” मनदो एहूदा मूक होड़कूराः बोतोरते तोनोंगीग होड़ हाँय बदीरे हुमइसके मेरकू बड़राःआ।

दो परोब चइर दिन होयानेन दो ईसू भगवानराः ओड़ाःरे सेनेकियानखन होड़कू चेड लगाय बुँहड़ीतेरा। दो एहूदा मूक होड़कू बयावनेनखनकू कताया, “नाँयग होड़ तोनोंगीग गुरुजी अते मेरेय चेडगना दो, नाँय नाःआमिन करा इयाय सुदीकेरा?”
हनते ईसू हँकू एचेरेय कतातेड, “ईंग इनिंग ओंगोलते मेरिंग चेडकूता, मनदो ईंगे वारकेरा हाँयराः ओंगोल इयायिंग चेडकूतना। तोनोंगीग होड़ भगवानराः ओंगोल इया एचेय लगाय चहाःता दो हाँय सुदीगोडता, ईंगराः चेड भगवान अगीते इदा जा ईंग इनिंग ओंगोलतेयिंग कतायतना, माःआन। अनँयग ओंगोलतेय कतायता हाँयग होड़ अनँयग मान मरजइतगुः लगाय चहाःता। मनदो तोनोंगीग हाँये वारकेरा हनाँय मान मरजइतगे लगाय चहाःता दो, हाँय सताय होड़ हवे अरू हाँय एचेरे तोनोंगाः गारबार मेर दोहोनता। मोसेस अपे लगा भगवानराः नियमे एनेमेकेरा। मनदो अपे अते तोनोंगीग हना नियम इया मेरपे सलाःतना। दो अपे चिला लगा ईंग जाः घड़ीन ञेड एंडायिंग लगापे ओंगलेतना?”
दो होड़कू कतातेरा, “आम एचेरे भूत इदा। अले तोनोंगीग आम ञेड एंडा लगा मेरले चहाःतना।”
दो ईसू हँकू एचेरेय कताया, “ईंग मीटोंग बुतायिंग एचेकेरा अरू अपे बयावयनापे। मोसेस अपे एहूदाकू अपेरिकुःआ बेटाकू आठ नमार दिनरे खतनाकू लगाय हुकुमवाडपेःआ। नाःआ नियम मोसेस अपे लगा मेरेय एमेगरा। मनदो हाँय अते मड़ंग अबूरिकुःआ खुटिपरिया होड़कू एचे अगूकेरा। हनालगा अपे लोड़ोनराः दिनरे हों अपेरिकुःआ बेटाकूपे खतनाता। मी होड़ लँइग लोड़ोनराः दिनरेपे खतनायता होले भगवानराः नियम मेर टड़ाःता। मनदो ईंग मी होड़ होड़ लोड़ोनराः दिनरे जमा इयायिंग नपायगेयता दो अपे चिला लगा ईंग एचेरेपे रिसुःता? अनभनिया अहापे फड़ियावगींग, मनदो अउग-बउग नपायते जासकेडखनपे फड़ियावगींग।”

हनते एरुसलेमरिकुःआ होड़कू अते अदोम होड़कू होंबोरतेरा, “ञेड एंडाय लगाकू ओंगलेतना हाँयग होड़ ननाँय हवे जा? मनदो नाँय नुँहू जमाकू मड़ंगरेय उदुःगेतना अरू तोनोंगीग हाँय एचेरे कहिसाः मेरकू कतायतना। मूक होड़कू सुदीगोतेडाकू जा ननाँय सतायरे मसी हवे, माःआन? मसी वेगता दो तोनोंगीग ओरोकू सुदी अवेतेरा हाँय करेयीग हवे, मनदो अले सुदीयतना नाँय करेयीग हवे, माःआन।”
हनते ईसू भगवानराः ओड़ाःरे चेचेड मेला मुरुक सटीय कताया, “अपे ईंगपे सुदीयिंगतना अरू ईंग करा अगीतेयिंग वेगकिया हना होँपे सुसुदीतना। ईंग इनिंगते मेरिंग वेगगना। ईंगे वारकेरा हाँय सताय इदानिया अरू अपे हाँय मेरपे सुदीयतना, मनदो ईंग हाँय अगीतेयिंग वेगकिया हनालगा हाँयिंग सुदीतना।”
हनते एहूदाकूरिकुःआ मूक होड़कू ईसू साबगेय लगाकू ओंगोलतेरा। मनदो हाँय साबराः बेला मेर होयागान, हनालगा तोनोंगीग मेरकू साब अवेगडीग। हनते हों मुरुक होड़कू हाँय एचेरेकू बिसवासतेरा अरूकू कताया, “मसी वेग मेला नाँयग होड़ अते बगरा बयाव जुवाः इयाःआ बुताकूने एचेयता जा?”

ईसूराः बदीरे होड़कू जहड़ बेडेग घड़ीनकू कता होड़ेंगा हना कताकून फरीसी होड़कू अयूमतेरा दो, मरंग पुजउरीकू अरू फरीसी होड़कू मी रायनेनखन ईसू साब लगा भगवानराः ओड़ाःरिकुःआ अगुरादारकूकू वारतेरा। दो ईसू हँकू एचेरेय कतातेड, “ईंग तोनोंग दिन वरी अपे सुदायिंग दोहोनता अरू हना तयोमरे ईंगे वारकेरा हाँय एचेरेयिंग सलाव जुवाःता। अपे ईंगपे ञाम दो ओरोपे ञाम अवेतिरिंगा। अरू ईंग इदानिंगा हना ततेररे अपे ओरोपे सेने अवेतेरा।”
नाःआ अयूमतेडखन एहूदाकूरिकुःआ मूक होड़कू कता होड़ेंगा, “नाँय ओरोबू ञाम अवेतिरिया इया नाँय कराय सेनता? नाँय बेगर एहूदाकू तलारे सितिर-बितिरयनाकू हँकुःआ एहूदाकू एचेरे सेनेकियानखन बेगर एहूदाकू होंय चेडता जा? अपे ईंगपे ञाम दो ओरोपे ञाम अवेतिरिंगा, अरू ईंग इदानिंगा हना ततेररे अपे ओरोपे सेने अवेतेरा, माःआन हाँय कताकेरा नाःआ कताराः मतलोब चिला हवे?”

मइद दिन दोहोना हना परोबराः चबान दिन, ईसू भगवानराः ओड़ाःरे चड़ाँनेनखन मुरुक सटीय कताया, “तोनोंगीग होड़ ततंगतो इदानिया दो हाँय ईंग एचेरेय वेग अरूय ञूय। भगवानराः कागदरे ओजाःतो इदा हनन इया ईंग एचेरेय बिसवासगेता हाँयग होड़राः इंदरी अते मेर टुटीगगुःता जीव एमेता हना दाः, नईराः दाः उड़ी तूःता।” हाँय एचेरेकू बिसवासगेता हँकुःआ होड़कू लगा भगवान एमेयता हाँयग सुद बिरुवाराः बदीरेय कताया। हना बेला वरी भगवान अते ईसू मरंग मान मरजइत अरीने पवाः। हनालगा बिसवासतेराकू हँकुःआ होड़कू लगा सुद बिरुवा अरीने ओवाकुःआ।
हना कता अयूमकेडखन अदोम होड़कू कताया, “सतायरे, भगवानराः बड़रा कतायीग होड़ बदीरे मड़ंगरेकू कतातेरा, हाँयग होड़ ननाँय हवे।”
एटाः होड़कू कताया, “नाँय दो मसी हवे।”
मनदो एटाः होड़कू कताया, “बुरी, मसी गलील छतर अतेय वेगता जा? भगवानराः कागदरे ओजाःतो कोवानेःआ जा, मसी दाऊद राजारीग नइड़-बाँस अते अरू दाऊद दोहोना हना एहूदिया छतरराः बेतलहेम सहर अतेय वेगता, माःआन।” नाःआ इया होड़कू हिगार हटिंगयानकू। अदोम होड़कू ईसू साब लगा होंकू ओंगोलतेरा, मनदो तोनोंगीग होड़ हाँय मेरकू साब अवेगडीग।

तयोमरे भगवानराः ओड़ाःरिकुःआ अगुरा होड़कू मरंग पुजउरीकू अरू फरीसी होड़कू एचेरेकू कुदा सेनेडा, अरू हँकू अगुरा होड़कू एचेरेकू होंबोरतेड, “अपे चिला लगा हाँय मेरपे साब अगूगडीया?”
दो हँकू कतातेड, “तोनोंगीग होड़ हाँयराः कता इया मेरकू कतागरा।”
दो फरीसी होड़कू कता कुदातेरा, “अपे हों हाँयराः कतारेपे बहकावयना जा? मूक होड़कू अरू फरीसी होड़कू अते तोनोंगीग होड़ हाँय एचेरेकू बिसवासतेरा, जा? मनदो भगवानराः नियम बदीरे मेरकू सुदीयता, हँकुःआ बोया होड़कू हाँय एचेरेकू बिसवासकेरा अरू हँकू सती-सरापतो इदानकुःआ।”
फरीसी होड़कू अते मी होड़ होड़ दोहोना अरू मड़ंगरे ईसू एचेरेय सेनेडा, हाँयग निकुदिमूस होंबोरतेरा, “अबूराः नियम इया तोनोंगीग होड़बू डंडियाव अते मड़ंग हाँय चिल चिलाय एचेकेरा हना बदीरे हाँय एचेरे मेरकू होंबरेता जा?”
दो हँकू डंटावतिडिगखनकू कतातेरा, “आम हों गलील छतररीग हवे जा? आम भगवानराः कगदरेम ञाम अरूम सुदीगोडता तोनोंगीग भगवानराः बड़रा कता होड़ गलील छतर अते मेरेय वेगता, माःआन।” [हनते हँकू जमा होड़कू अँननकू अँकू ओड़ाः तोराकू।

Geere nke a ntị एहुना 7