Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወአስተርአየ ተኣምር ዐቢይ በውስተ ሰማይ ብእሲት እንተ ትለብስ ፀሓየ ወወርኅ ታሕተ እገሪሃ ወዲበ ርእሳኒ አክሊል ዘዐሠርቱ ወክልኤቱ ከዋክብት። ወፅንስት ይእቲ ብእሲት ወትግዕር ወተሐምም ለወሊድ። ወአስተርአየ ካልእ ተኣምር በውስተ ሰማይ አርዌ ዐቢይ ወቀይሕ ዘሰብዐቱ አርእስቲሁ ወዐሠርቱ አቅርንቲሁ ወውስተ አርእስቲሁ ሰብዐቱ ቀጸላ። ወበዘነቡ ይስሕብ ሣልስተ እዴሆሙ ለከዋክብተ ሰማይ ወያወርዶሙ ውስተ ምድር ወቆመ ውእቱ አርዌ አንጻረ ይእቲ ብእሲት ከመ ሶበ ወለደት ይብላዕ ሕፃና። ወወለደት ወልደ ተባዕተ ዘውእቱ ይርዕዮሙ ለኵሉ አሕዛብ በበትረ ኀጺን ወመሠጥዎ ለውእቱ ሕፃን ወወሰድዎ ኀበ እግዚአብሔር ወኀበ መንበሩ። ወጐየት ይእቲ ብእሲት ውስተ ገዳም ወውስተ መካን ዘአስተዳለወ ላቲ እግዚአብሔር ከመ ትትዐቀብ በህየ በኵሉ መዋዕል ዐሠርተ ወክልኤተ ምእተ ወስሳ ዕለተ። ወጸብእዎ በሰማይ ለውእቱ አርዌ ሚካኤል ወመላእክቲሁ ወተጻብኦሙ ውእቱ አርዌ ምስለ መላእክቲሁ። ወስእኖሙ ወኢረከበ እንከ መካነ በውስተ ሰማይ። ወወድቀ ውስተ ምድር ውእቱ አርዌ ዐቢይ ወአርዌሰ ዐቢይ ውእቱ ቀዲሙ ዘአስሐቶ ለኵሉ ዓለም ዘስሙ ሰይጣን ወወድቀ ውስተ ምድር ወመላእክቲሁኒ ወድቁ ምስሌሁ ውስተ ምድር። ወሰማዕኩ ቃለ ዐቢየ በውስተ ሰማይ ዘይብል ኮነት መድኀኒት ወኀይል ወመንግሥት ለአምላክነ ወሥልጣን ለመሲሑ እስመ ወድቀ መስተዋድይ ዘአስተዋደዮሙ ለአበዊነ ቅድመ እግዚአብሔር መዐልተ ወሌሊተ። ወሞእዎ እሙንቱ በእንተ ደመ በግዑ ወበእንተ ቃለ ጽድቆሙ እስመ ኢያብደሩ ነፍሶሙ እስከ ለሞት። ወበእንቲኣሆሙ ተፈሥሑ ሰማያት ወእለ ይነብሩ ውስቴቶን አሌ ላ ለምድር ወለባሕር እስመ ወረደ ሰይጣን ውስቴቶሙ ምስለ ዐቢይ ሕምዙ እስመ የአምር ከመ ውኁድ መዋዕል ተርፎ። ወሶበ ርእየ ዝክቱ አርዌ ከመ ወድቀ ውስተ ምድር ዴገና ለእንታክቲ ብእሲት እንተ ወለደት ሕፃነ ተባዕተ። ወተውህባ ለይእቲ ብእሲት ክልኤ ክንፍ ከመ ዘዐቢይ ንስር ከመ ትሥርር ውስተ ገዳም ወውስተ መካን ኀበ ትትዐቀብ በኵሉ መዋዕል ዘመነ ወአዝማነ ወመንፈቀ ዘመን እምቅድመ ገጹ ለውእቱ አርዌ ወሠረረ ወዴገና ውእቱ አርዌ። ወአውፅአ እምነ አፉሁ ውእቱ አርዌ ማየ ብዙኀ እንተ ድኅሬሃ ለይእቲ ብእሲት ከመ ፈለግ ዐቢይ ከመ ይንሥኣ ውኂዙ። ወረድአታ ምድር ለይእቲ ብእሲት ወአርኀወት አፉሃ ምድር ወሰረበቶ ለውእቱ ውኂዝ ዘአውኀዘ ውእቱ አርዌ እምነ አፉሁ ወኢያእመረ ከመ ተውህበ ላቲ ክንፍ። ወተምዐ ውእቱ አርዌ ላዕለ ይእቲ ብእሲት ወሖረ ይጽብኦሙ ለእለ ተርፉ ውሉዳ ወለእለ የዐቅቡ ትእዛዘ እግዚአብሔር ወይሄልዉ በጽድቁ ለኢየሱስ ክርስቶስ። ወቆመ ውእቱ አርዌ ላዕለ ኆፃ ባሕር።

Geere nke a ntị ራእዩ ለዮሐንስ 12