Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወዛቲ ይእቲ አኀውየ ዳግሚትየ ዘጸሐፍኩ ለክሙ መጽሐፈ ከመ አንሥእክሙ በዘክሮ ወትዕቀብዋ በልብክሙ ለጽድቅ። ወከመ ትዘከሩ ቃለ ነቢያት ቀደምት ቅዱሳን ዘይቤሉ ወትእዛዘ እግዚእነ ወመድኀኒነ ኢየሱስ ክርስቶስ ዘአዘዘ ለነ ለሐዋርያት። ወዘንተኒ ቅድሙ አእምሮ ከመ ሀለዎሙ ይምጽኡ በደኃሪ መዋዕል መስተአብዳን ለአስተአብዶ እለ የሐውሩ በፍትወተ ልቦሙ ወይብሉ አይቴ ውእቱ ቃሉ ዘይቤ ከመ ሀለዎ ይምጻእ። ናሁ እመሰ አበዊነ ቀደምት ሞቱ እስመ ኵሉ ግብር ሀለወ በከመ ሀሎ እምፍጥረተ ዓለም። ወኢየአምርዎ ለዝንቱ በፈቃዶሙ ከመ ሰማያትኒ ተፈጥራ እምትካት ወምድርኒ እምነ ማይ ወበማይ ጸንዐት በቃለ እግዚአብሔር። ወዓለመ ትካትኒ ቦቱ አጥፍአ በማየ አይኅ። ወይእዜኒ ሰማይ ወምድር በውእቱ ቃል ዝጉባን ለእሳት ወዕቁባን እሙንቱ እስከ ዕለተ ደይን ወድምሳሴ ኃጥኣን ሰብእ። ወዘንተ ባሕቱ ኢትርስዑ አኀዊነ እስመ አሐቲ ዕለት በኀበ እግዚአብሔር ከመ ዐሠርቱ ምእት ዓመት ወዐሠርቱ ምእት ዓመት ከመ አሐቲ ዕለት። ኢያጐነዲ እግዚአብሔር ቃለ ዘነበበ እስመቦ እለ ይብሉ ከመ ይጐነዲ ወባሕቱ ይትዔገሥ በእንቲኣሆሙ እስመ ኢይፈቅድ መነሂ ያማስን አላ ይነስሑ ለኵሉ ሰብእ ያርሕብ። ወዕለቱሰ ለእግዚአብሔር ግብተ ትመጽእ ከመ ሰራቂ እንተ ባቲ ሰማያትኒ ይትረኀዋ ወይሴስላ ወኵሉ ፍጥረት ዘቀዲሙ በውዕየተ እሳት ይትመሰው ወምድርኒ ወኵሉ ዘላዕሌሃ ግብር ይውዒ። ወዝንቱ ኵሉ ተመሲዎ ጐጕኡ ከመ ተሀልዉ በምግባር ቅዱስ ዘጽድቅ። እንዘ ትሴፈዉ ዕለተ ምጽአቱ ለእግዚአብሔር እንተ ባቲ ሰማያትኒ ይረስና ወይትመሰዋ ወኵሉ ፍጥረት ይውዒ ወይትመሰው። ሐዳሳተ ሰማያተ ወሐዳሰ ምድረ ንሴፎ ዘውስቴቶን የኀድር ጽድቅ። ወይእዜኒ አኀውየ ዘንተ እንዘ ትሴፈዉ ጐጕኡ ይርከብክሙ ዘእንበለ ርስሐት ወዘእንበለ ጌጋይ እንዘ ትሰናአዉ። ወትዕግሥቱሰ ለእግዚእነ የሀብክሙ መድኀኒተ በከመ እኁነ ጳውሎስ ዘናፈቅር ጸሐፈ ለክሙ በእንተ ዘወሀቦ እግዚአብሔር ጥበበ። ዘከመ ሀሎ ውስተ ኵሉ መጻሕፍቲሁ ዘነበበ ውስቴቶን በእንቲኣሁ ለዝንቱ ወዘሰ ነበቡ እሙራን ሰብእ እለ ይሌብውዎ ወእለሰ አልቦሙ ትምህርት እለ ኢለበዉ ይመይጥዎ ለቃለ መጽሐፍ ከመ ሜጥዎን ለብዙኃት መጻሕፍት ለግዕዞሙ ወያማስኑ። ወአንትሙሰ አኀዊነ አቅድሙ አእምሮ ወተዐቀቡ ከመ ኢትስሐቱ በዘኢይበቍዕ ትምህርት ከመ ኢትደቁ እምነ ምጽናዕክሙ። ተባዝኁ በእግዚእነ ወበአኰቴቱ ለኢየሱስ ክርስቶስ መድኃኒነ ወእግዚአብሔር አብ ዘሎቱ ስብሐት ይእዜኒ ወዘልፈኒ ወለዓለመ ዓለም አሜን።

መልአት መልእክተ ጴጥሮስ ዳግሚት።
ወስብሐት ለእግዚአብሔር አሜን።

Geere nke a ntị መልእክተ ጴጥሮስ 2 3