The copyright is jointly and equally held by:Copyright© 2020 The Word for the World International All Rights Reserved Copyright© 2020 Nahali Vishwaseen Mandli, Toranmal, Nandurbar. (MH). All Rights Reserved This creative commons license allows for redistribution, commercial and noncommercial, as long as it is passed along unchanged and in whole, with credit to the original author. Requests for revision/remix may be sent to translation.samithi@gmail.com or The Word For The World at www.twftw.org Audio: ℗ 2024 Hosanna For church use only

Nahali 2020 TWFTW (NT) Drama

The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020 

तेवी चोखालो जीव यीशुह उजाड़ी माय ली गीयो काय सैतानान उगे रेन तान पारेख एय। तो चालीह दिह, एने चालीह रात उपास माय रिनो, तेवी ताह बुख लागी। तेवी सैतान यीशुन आहने आवो एने केयो, “केदी तु बोगवानान बिटोख एय, ते ज्या देगड़ाह केय दे काय रूटो बोण जाय।”
पुण यीशु ताह जापाप आप्यो, “वचन माय इहकेरीन लेख मीलेल हे, ‘माणुह रोटा केरीन ओलोस नाह, पुण एकेक वचन जो बोगवानान मुयाम रेन निकलेह, जीवतालो रेय।’”
तान पासाण सैतान ताह यरूशलेम हेयरा माय ली गीयो, एने मोंदिरान चुटा पोर उबराख दिनो, एने यीशुह केयो, “केदी तु बोगवानान बिटोख एय ते न्या रेन बुंदे कुदजा, काहाकाय वचन माय इहकेरीन लेख मीलेल हे:
“बोगवान तान हेरोगदुताह तुवाह वोचाड़नेन केरता उकुम आपी,
एने ता तुवाह आथा माय उपरूस विस लेती,
केदी ओहलो नाय एय काय तारा पाया माय दिगोड़ नाय लागे।”
पुण यीशु ताह केयो, वचन माय इहकेरीन बी लेख मीलेल हे:
“तु मालीक तारा बोगवानान पारेख मा किरहे।”
ओवतो सैतान ताह एक उचाच बोयड़ा पोर ली गीयो, एने ताह दुनियान आखो राज एने तान बोड़ाय देखाड्यो। एने सैतान ताह केयो, “केदी तु पाया पोड़ीन मारी बोक्ती किरहे ताहार ज्य सोब मी तुवाह आप देह।”
तेवी यीशु ताह जापाप आप्यो, “एय सैतान सिटो एय जा, काहाकाय वचन माय लेख मीलेल हे: ‘तु तारा मालीक बोगवानाह ओलोस बोक्ती केर, एने तान उलोस उपास केर।’”
तेवी सैतान ताह सोड़ीन जात रिनो, एने दिखो, हेरोगदुत आवीन तान सेवा चाकरी केऱ्या।


जेवी यीशु ज्य होमल्यो काय बपतीस्मा केरनार योहान देराय जायेल हे, ते तो गेलील माय जात रिनो। एने यीशु नासरत सोड़ीन कफरनहूम हेयरा माय, जो देरीयान देड़े जबुलून एने नप्तालीन ईलाका माय हे, जाईन रेणे बाज गीयो। काहाकाय जो यशाया जाणकारान द्‍वारे कियेल एतो, तो पुरो एय:
“जबुलून एने नप्तालीन देस,
देरीयान वाटी पोर, यरदन नेदीन दिड़े,
बिगेर यहुदिन देस गेलील माय,
जा माणहे आदारा माय बोह रियेल एता,
ता एक मोटलो उजोड़ देख्या;
एने जा मोतीन सावलान देसाम बोह रियेल एता,
ता पोर उजोड़ चोमेकनो।”
तुलबूखे रेन यीशु खोबरीन पारचार सुरू केर दिनो, “तुमरा पापाम रेन मोन फिरावो, काहाकाय हेरगान राज आहने आव लागेल हे।”


जेवी यीशु गेलील ने देरीयान दिड़े दिड़े जाणे बाजरियेल ईतो, तेवी तो दुय बायाख देरीयाम जाल टाकताला दिख्यो, शमोन मतलब, जो पतरस केवाथे, एने तान बायाख अन्द्रियासाह। काहाकाय ता मासऱ्या एता। यीशु ताह केयो, “मार पासाण आवो, मी तुमूह माणहाह बोगवाना फाय किहीक लावणु तो हिकाडुह।” ता यीशुन वात होमलीन जालीह जागेस सोड़ीन तान पासाण चाल देना।
ओवतो यीशु थोड़ोक ओंगाण चालीन गीयो, तेवी जब्दीन सोरा याकुब एने तान बायाख योहान ज्या दुय जाणे आबाख हेऱ्या डोंडह्या पोर बोहीन तान जाल हुदारने बाजरियेल एता। तेवी यीशु ताह देखीन हाद्यो। ता चालोच डोंडह्यो एने तान आबाख सोड़ीन यीशुन पासाण चाल देना।


यीशु आखा गेलील माय फिरतेन एने तान बोक्ती केरन्या गेरा माय हिकाड़ते, एने हेरगान राज ने हाजाली खोबरीन पारचार किरतेन, एने माणहान आखी बातीन बेमारीह हुदाऱ्यो एने कोमजोरीह सिटो केरते रिनो। एने आखा सीरीया देसाम तान खोबेर पोसरी गियी; केरीन माणहे आखा दुखाऱ्याह, जा बाती बातीन बेमारी एने दुखा माय पोड़ रियेल एता, एने जा माय खाराब जीव रिग रियेल एतो, एने फेपरान बेमारी वाला एने लोखवान दुखाऱ्याह, ता फाय लावा एने यीशु ताह हुदार दिनो। केरीन गेलील, दोह हियोर दिकापुलिस, यरूशलेम, यहुदिया एने यरदन नेदीन ती उगेवाला आखा माणहे टोलान टोला यीशुन पासाण चाल देना।

Geere nke a ntị मत्ती 4