The Kisi Old Testament

Kisi Bible © Bible Society in Liberia, 2015.

Ko̍na̍ po̍o̍nyi̍a̍ŋ a̍ wānāa̍ fu̍la̍ o̍ pūlāle̍ A̍dāmnde̍ŋ chōo̍ wa̍ cho̍ ho̍ō ni̍. Tōōsīāā Mɛ̄lɛ̄ka̍ tōōsi̍a̍a̍ wāna̍ chi̍o̍o̍ wo̍, ō tōōsi̍a̍a̍ ndu̍ mātōōsīāā māā vēla᷅ŋ ndɔ̍, ndu̍ Mɛ̄lɛ̄ka̍ pīla̍. Mbo̍ tōōsīāā nda̍, wānā pɔ̍nɔ̍ɔ̍ a̍ wānā la̍nɔ̍ɔ̍. O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ dūāū nda̍ sa̍lā. Mɛ̄ɛ̍ o̍ to̍o̍si̍a̍a̍ dɔ̍ɔ̍ nda̍, mbo̍ kē nda̍ dīōla̍ŋ āā, wāŋndā chīe̍ēya̍. A̍dām wa̍ wɔ̄sīla̍ŋ kɛ̄mɛ̄ a̍ be̍le̍-ya̍a̍ (130) mbo̍ vīālū vɛ̄lɛ̄ pōo̍, ndu̍ pi̍la̍ vēla᷅ŋ ndɔ̄ɔ̍ yɛ̍ŋgɛ̍sɛ̍ɛ̍. Mbo̍ kē ndu̍ dīōla̍ŋ āā Sɛ̍ɛ̍tī. O̍ ndu̍ kɔ̍ɔ̍lī, mi̍ A̍dām vi̍a̍lū vɛ̄lɛ̄ chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ bōōndi̍i̍ o̍ ve̍lū Sɛ̍ɛ̍tī ve̍, mi̍ A̍dām chu̍ā vɛ̄lɛ̄ wɔ̄sīla̍ŋ kɛ̄mɔ̄ɔ̍ lē ŋɔ̄ma̍a̍ (800). Mɛ̄ɛ̍, A̍dām wa̍ wɔ̄sīla̍ŋ fa̍ū fa̍ū, kɛ̄mɔ̄ɔ̍ lē ŋɔ̄ma̍hīɔ̍ɔ̍lu̍ a̍ be̍le̍-ya̍a̍ (930) mbo̍ wū.
Sɛ̍ɛ̍tī wa̍ wɔ̄sīla̍ŋ kɛ̄mɛ̄ a̍ lā ŋūɛ̍ɛ̍nu̍ (105) mbo̍ vīālū I̍nɔ̍ɔ̍sī. O̍ ndu̍ kɔ̍ɔ̍lī mi̍ Sɛ̍ɛ̍tī vi̍a̍lū vɛ̄lɛ̄ chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ bōōndi̍i̍ o̍ ve̍lū I̍nɔ̍ɔ̍sī ve̍, mi̍ Sɛ̍ɛ̍tī chu̍ā vɛ̄lɛ̄ wɔ̄sīla̍ŋ kɛ̄mɔ̄ɔ̍ lē ŋɔ̄ma̍a̍ a̍ lā ŋɔ᷄mmɛ̍ū (807). Mɛ̄ɛ̍, Sɛ̍ɛ̍tī wa̍ wɔ̄sīla̍ŋ fa̍ū fa̍ū, kɛ̄mɔ̄ɔ̍ lē ŋɔ̄ma̍hīɔ̍ɔ̍lu̍ a̍ tɔ̍ a̍ lā tīɔ̍ɔ̍ŋ (912), mbo̍ wū.
I̍nɔ̍ɔ̍sī wa̍ wɔ̄sīla̍ŋ be̍le̍-ŋɔ̄ma̍hīɔ̍ɔ̍lu̍ (90) mbo̍ vīālū Ke̍nāŋ. O̍ ndu̍ kɔ̍ɔ̍lī mi̍ I̍nɔ̍ɔ̍sī vi̍a̍lū chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ bōōndi̍i̍ o̍ ve̍lū Ke̍nāŋ nde̍, mi̍ I̍nɔ̍ɔ̍sī chu̍ā vɛ̄lɛ̄ wɔ̄sīla̍ŋ kɛ̄mɔ̄ɔ̍ lē ŋɔ̄ma̍a̍ a̍ tɔ̍ a̍ lā ŋūɛ̍ɛ̍nu̍ (815). Mɛ̄ɛ̍ I̍nɔ̍ɔ̍sī wa̍ wɔ̄sīla̍ŋ fa̍ū fa̍ū, kɛ̄mɔ̄ɔ̍ lē ŋɔ̄ma̍hīɔ̍ɔ̍lu̍ a̍ lā ŋūɛ̍ɛ̍nu̍ (905) mbo̍ wū.
Ke̍nāŋ wa̍ wɔ̄sīla̍ŋ be̍le̍-ŋɔ̍mmɛ̍ū (70) mbo̍ vīālū Māhāla̍lɛ̄l. O̍ ndu̍ kɔ̍ɔ̍lī, mi̍ Ke̍nāŋ vi̍a̍lū vɛ̄lɛ̄ chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ bōōndi̍i̍ o̍ ve̍lū Māhāla̍lɛ̄l ve̍, mi̍ Ke̍nāŋ chu̍ā vɛ̄lɛ̄ wɔ̄sīla̍ŋ kɛ̄mɔ̄ɔ̍ lē ŋɔ̄ma̍a̍ a̍ be̍le̍-hi̍ɔ̍ɔ̍lu̍ (840). Mɛ̄ɛ̍, Ke̍nāŋ wa̍ wɔ̄sīla̍ŋ fa̍ū fa̍ū, kɛ̄mɔ̄ɔ̍ lē ŋɔ̄ma̍hīɔ̍ɔ̍lu̍ a̍ tɔ̍ (910), mbo̍ wū.
Māhāla̍lɛ̄l wa̍ wɔ̄sīla̍ŋ be̍le̍-ŋɔ̍mpu᷅m a̍ lā ŋūɛ̍ɛ̍nu̍ mbo̍ vīālū Cha̍lu̍ɛ̍dī. O̍ ndu̍ kɔ̍ɔ̍lī, mi̍ Māhāla̍lɛ̄l vi̍a̍lū vɛ̄lɛ̄ chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ bōōndi̍i̍ o̍ ve̍lū Cha̍lu̍ɛ̍di̍ ve̍, mi̍ Māhāla̍lɛ̄l chu̍ā vɛ̄lɛ̄ wɔ̄sīla̍ŋ kɛ̄mɔ̄ɔ̍ lē ŋɔ̄ma̍a̍ a̍ be̍le̍-ya̍a̍ (830). Mɛ̄ɛ̍, Māhāla̍lɛ̄l wa̍ wɔ̄sīla̍ŋ fa̍ū fa̍ū kɛ̄mɔ̄ɔ̍ lē ŋɔ̄ma̍a̍ a̍ be̍le̍-ŋɔ̄ma̍hīɔ̍ɔ̍lu̍ a̍ lā ŋūɛ̍ɛ̍nu̍ (895) mbo̍ wū.
Cha̍lu̍ɛ̍dī wa̍ wɔ̄sīla̍ŋ kɛ̄mɛ̄ a̍ be̍le̍-ŋɔ̍mpu᷅m a̍ lā tīɔ̍ɔ̍ŋ (162) mbo̍ vīālū I̍nɔ̍kī. O̍ ndu̍ kɔ̍ɔ̍lī, mi̍ Cha̍lu̍ɛ̍dī vi̍a̍lū chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ bōōndi̍i̍ o̍ ve̍lū I̍nɔ̍kī ve̍, mi̍ Cha̍lu̍ɛ̍dī chu̍ā vɛ̄lɛ̄ wɔ̄sīla̍ŋ kɛ̄mɔ̄ɔ̍ lē ŋɔ̄ma̍a̍ (800). Mɛ̄ɛ̍, Cha̍lu̍ɛ̍dī wa̍ wɔ̄sīla̍ŋ fa̍ū fa̍ū, kɛ̄mɔ̄ɔ̍ lē ŋɔ̄ma̍hīɔ̍ɔ̍lu̍ a̍ be̍le̍-ŋɔ̍mpu᷅m a̍ lā tīɔ̍ɔ̍ŋ (962) mbo̍ wū.
I̍nɔ̍kī wa̍ wɔ̄sīla̍ŋ be̍le̍-ŋɔ̍mpu᷅m a̍ lā ŋūɛ̍ɛ̍nu̍ mbo̍ vīālū Mɛ̄tu̍si̍lā. O̍ ndu̍ kɔ̍ɔ̍lī, mi̍ I̍nɔ̍kī vi̍a̍lū vɛ̄lɛ̄ chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ bōōndi̍i̍ o̍ ve̍lū Mɛ̄tu̍si̍lā ve̍, mi̍ I̍nɔ̍kī chu̍ā vɛ̄lɛ̄ wɔ̄sīla̍ŋ kɛ̄mɔ̄ɔ̍ lē yāa̍ (300), ndu̍yɛ̍ a̍ bōōndi̍i̍ ke̍ŋ kpo̍u̍, ō wa̍ o̍ dīōm pīlɔ̍ɔ̍ ni᷄ŋ nda̍ Mɛ̄lɛ̄ka̍. Mɛ̄ɛ̍, I̍nɔ̍kī wa̍ wɔ̄sīla̍ŋ fa̍ū fa̍ū, kɛ̄mɔ̄ɔ̍ lē yāa̍ a̍ be̍le̍-ŋɔ̍mpu᷅m a̍ lā ŋūɛ̍ɛ̍nu̍ (365). Ndu̍yɛ̍, a̍ bōōndi̍i̍ I̍nɔ̍kī wa̍ chi̍e̍ēŋ nde̍, ō wa̍ o̍ dīōm pīlɔ̍ɔ̍ ni᷄ŋ nda̍ Mɛ̄lɛ̄ka̍. O̍ ko̍ŋ kɔ̍ɔ̍lī, mbo̍ lō lēpīlɛ̍ pɛ̍, wānā chi̍ lɛ̍ ndu̍ le̍. Kāni̍ fu̍u̍le̍, mi̍ Mɛ̄lɛ̄ka̍ hēlnu᷄ŋ a̍ ndu̍ cho̍o̍ cho̍o̍.
Mɛ̄tu̍si̍lā wa̍ wɔ̄sīla̍ŋ kɛ̄mɛ̄ a̍ be̍le̍-ŋɔ̍ma̍a̍ a̍ lā ŋɔ᷄mmɛ̍ū (187) mbo̍ vīālū La̍mɛ̍kī. O̍ ndu̍ kɔ̍ɔ̍lī, mi̍ Mɛ̄tu̍si̍lā vi̍a̍lū chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ bōōndi̍i̍ o̍ ve̍lū La̍mɛ̍kī ve̍, mi̍ Mɛ̄tu̍si̍lā chu̍ā vɛ̄lɛ̄ wɔ̄sīla̍ŋ kɛ̄mɔ̄ɔ̍ lē ŋɔ᷄mmɛ̍ū a̍ be̍le̍-ŋɔ̍ma̍a̍ a̍ lā tīɔ̍ɔ̍ŋ (782). Mɛ̄ɛ̍, Mɛ̄tu̍si̍lā wa̍ wɔ̄sīla̍ŋ fa̍ū fa̍ū, kɛ̄mɔ̄ɔ̍ lē ŋɔ̄ma̍hīɔ̍ɔ̍lu̍ a̍ be̍le̍-ŋɔ̍mpu᷅m a̍ lā ŋɔ̄ma̍hīɔ̍ɔ̍lu̍ (969) mbo̍ wū.
La̍mɛ̍kī wa̍ wɔ̄sīla̍ŋ kɛ̄mɛ̄ a̍ be̍le̍-ŋɔ̍ma̍a̍ a̍ lā tīɔ̍ɔ̍ŋ (182) mbo̍ vīālū pōo̍. Mbo̍ dīmī āā, “Ho̍ō chō tōsā mī ŋ̄ sɔ̄la̍ ti᷄ŋ pɛ̄ŋgīo̍o̍ a̍ wa̍li̍ īchīɛ̄ɛ̄ kālā ka̍lāa̍ ho̍ō o̍ lɛ̄ŋnde̍ŋ chōo̍, lē Mɛ̄lɛ̄ka̍ Ya̍a̍wɛ̄ɛ̄ o̍ ha̍ndu̍ le᷅ŋ sēndi̍o̍o̍ lēchōo̍ le̍ŋ.” Le̍ he̍ī, mbo̍ kē ndu̍ dīōla̍ŋ āā, Nu̍u̍wā. O̍ ndu̍ kɔ̍ɔ̍lī, mbo̍ vīālū vɛ̄lɛ̄ chūāūwāā chēle̍ŋ, pūa̍a̍ a̍ wāŋ lāāndūa̍a̍. Chɔ̍ŋ a̍ bōōndi̍i̍ La̍mɛ̍kī ve̍lū Nu̍u̍wā ve̍, mbo̍ chūā vɛ̄lɛ̄ wɔ̄sīla̍ŋ kɛ̄mɔ̄ɔ̍ lē ŋūɛ̍ɛ̍nu̍ a̍ be̍le̍-ŋɔ̄ma̍hīɔ̍ɔ̍lu̍ a̍ lā ŋūɛ̍ɛ̍nu̍ (595). Mɛ̄ɛ̍, La̍mɛ̍kī wa̍ wɔ̄sīla̍ŋ fa̍ū fa̍ū, kɛ̄mɔ̄ɔ̍ lē ŋɔ᷄mmɛ̍ū a̍ be̍le̍-ŋɔ̍mmɛ̍ū a̍ lā ŋɔ᷄mmɛ̍ū (777) mbo̍ wū.
Mɛ̄ɛ̍ Nu̍u̍wā chu̍a̍ wɔ̄sīla̍ŋ kɛ̄mɔ̄ɔ̍ lē ŋūɛ̍ɛ̍nu̍ (500) mbo̍ vīālū Si̍ɛ̄m, a̍ Ha̍ām, a̍ Cha̍fɛ̍tī.

Geere nke a ntị Chɛ̄nɛ̍se̍ē 5