Bayịburu Ezaa

Lẹ mbụlembu bẹ onye ono, bụ Okfu Chileke nọduhawaa. Okfu ono bẹ yẹle Chileke nọhaakwa. Okfu ono bụru Chileke. Onye ono bẹ yẹle Chileke shilewho eshi mbụlembu nọduta. Ọo l'ẹka iya bẹ Chileke shi mee iwhe lile. Ọ tọ dụ-zhidua iwhe Chileke meru ọwhu o meru lẹbe ọ nọ iya. Ọo ya bẹ ndzụ shi l'ẹka, ọ bụru ndzụ ono bẹ bụ iwhoro dụru ndiwhe. Iwhoro ono l'echi l'ẹkpuroochi, ẹkpuroochi ono ta adụje ike sọpyabe iwhoro ono.
O nweru nwoke ọbu Chileke yeru t'ọ bya. Ẹwha iya bụ Jọnu. Iwhe ọ byarụ bụ t'ọ bya ekfua nke iwhoro ono. Ọ byarụ t'ọ bya ekfuaru iya ọha lile, nke ọwhu whẹ l'a-nụ ozhi ono kweta. Ọ tọ kwa yẹbedua, bụ Jọnu bẹ bụ iwhoro ọbu. Iwhe ọ byarụ kwa t'ọ bya akarụ ndiwhe g'iwhoro ono dụ dụ. Ọo iwhoro ono bẹ bụ ọkpobe iwhoro ọwhu bụ iya byarụ l'eli-mgboko-o bya echilahaaru ndiwhe l'owhu.
Onye ono, bụ Okfu Chileke ono nọduhawaa l'eli-mgboko-o. Ọ bụru l'ẹka iya bẹ Chileke shi mee mgboko, ọle ndiwhe ta ahụbedu iya ama. Ọ byakfutaru ndu nkiya, ndu nkiya ono jịka lẹ whẹ ta anatadụ iya. Ọle iwhe bụ ndu natarụ iya nụ, mbụ ndu woru onwowhe ye iya l'ẹka, ndu ono b'ọ meekwaru tẹ whẹ bụru ụnwu Chileke. Abụbu ono, whẹ bụ ụnwu Chileke ta abụkwa gẹ l'aanwụje madzụ b'a nwụru whẹ, tọ bụ l'ọo ẹgu nwa meru a nwụa whẹ, tọ bụ lẹge madzụ rịtaru iya l'obu, onye nwụru whẹ nụ bụakwa Chileke.
Tọ dụ iya bụ lẹ Okfu ono abya abụru madzụ, anyi l'iya buru eburu. Anyi gude ẹnya anyi whụa ọdu-biribiri nkiya, bụ ọdu-biribiri rwuberu iya nụ eshi-ọwhu ọ bụ Nwa nwoke lanụ, Nna iya bụ Chileke nwụtaru. Iwhe bụlewho ndzụ iya bụ eze-iwhe-ọma yẹle ire-lanụ.
Jọnu bya ekfulahaa nke Nwa Chileke ono arya iya aryarya asụje: “O nokwa onye ọbu, mu shi ekfuru unu okfu iya nteke ono, mu sụru unu: ‘Onye l'ee-bekochaa bya bẹ kakwa mu l'ishi ka mu l'ọkpa, o noo nkele a bya l'aanwụ-deshia mbẹdua, onye ono nọduhawaa nụ.’ ”
Eze-iwhe-ọma nkiya kpọru gẹ l'aaa-nọ atụ ọnu iya. Ọ bụru l'eze-iwhe-ọma iya ono bẹ l'ooshije emeru anyi lile eze-iwhe-ọma; o megee ya, ya emeru ọdo tukobe iya. Ọo l'ẹka Mósisu bẹ Chileke shi tụaru anyi iwu. Eze-iwhe-ọma yẹle ire-lanụ shikwanu l'ẹka nke Jisọsu Kuráyisutu bya. O to nwedu onye gudejebuwa ẹnya iya whụ Chileke. Ọo Nwa lanụ ono yẹle Chileke bụ Nna tụgbaru bụru nnanụ ọkpobe iya bẹ bụ onye meru anyi marụ gẹ Chileke dụ dụ.


Tọ dụ iya bụ, ndu Ju Jerúsalẹmu zhi ndu l'agbajẹ ẹja nụ Chileke mẹe ndu ishi l'eri Lívayi tẹ whẹ je ajịta Jọnu sụ iya: “?Ọo onye b'ị bụ?”
Jọnu yelekwaru whẹ who ọnu; ọ tọ jịkakwa l'iya te ekfuduru eyeru whẹ; o kfujalekwaru whẹ iya whọ sụ: “Ọ tọ kwa mbẹdua, bụ Jọnu bẹ bụ Onye-Ndzọta ọbu Chileke kweru ụkwa l'iya l'e-zhi t'ọ bya.”
Whẹ jị iya sụ iya: “?Ọ bụhunuru onye b'ị bụ? ?Ọo ghu bụ Eláyija?”
Jọnu sụ whẹ: “Wawa; mu ta abụkwa Eláyija.”
Whẹ jịpyabe iya ọdo sụ iya: “?Ọo gụbedua bụ onye nkfuchiru Chileke ọbu anyi l'ele ẹnya iya?”
Ọ sụ whẹ: “Wawa.” Whẹ sụ iya: “?Ọ bụ-zhihunua onye b'ị bụ? Yeru anyi ọnu t'anyi marụ iwhe anyi l'e-je ekfuru ndu zhiru anyi. ?Ndẹ-zhihunua g'i kfuru okfu ẹhu ghu?”
Jọnu gude okfu ono, Ayizáya deru l'ẹkwo yeeru whẹ ọnu sụ:
“Ọo mbẹdua bụ onye ono olu mu
l'echi mkpu l'echi-ẹgu asụje:
‘Unu mee ụzo Onye-Nwe-Ọha l'e-shi t'ọ kfụru nsụmini!’ ”
O noo ya, ndu ono byarụ ọjita Jọnu iwhe ono kwa ndu Fárisii bẹ zhiru whẹ iya nụ. Whẹ jịa Jọnu sụ: “Ọ -bụru l'ị tị bụdu Kuráyisutu, tị bụ Eláyija, tị bụkwawho onye nkfuchiru Chileke, ?ọ nwụhunua agha o gude l'iimeje baputizimu?”
Jọnu sụ whẹ: “Ọo mini bẹ mbẹdua gude eme baputizimu. Ọle o nweru onye unu l'iya tso nọdu, unu l'ẹte amaa. Ọo ya bụ onye ọbu l'e-be bya, mbụ onye ka mụbe Jọnu shii, ka mu iya nke ọwhu mu l'edzua gẹ mu l'a-tọfu eri akpọkpa iya.”
Ẹka iwhe lile ono mekotaru bụ lẹ Bétani l'azụ ẹnyimu Jọ́danu azụ iya ọwhu, bụ ẹka Jọnu shi anọduje eme ndiwhe baputizimu.

O be echile iya, Jọnu whụa Jisọsu gẹ l'ooje abyakfuta iya, ọ sụ: “Unu lekwa onye ọbu bụ Nwatụru Chileke. Ọ kwa yẹbedua l'e-gude onwiya gbaa ẹja nwefukota iwhe-dụ-ẹji ndiwhe l'owhu meru. Sụ l'ọ kwa iya bụ onye ono, mu kfuru okfu ẹhu iya nteke ono mu sụru unu l'o nweru onye l'e-be byanụ. L'onye ọbu kakwa mu l'ishi ka mu l'ọkpa, o noo l'aabya l'anwụdeshia mbẹdua bụ Jọnu, onye ono nọduhawanu. Sụ lẹ mbẹdua te eshikwa marụ onye ọbu; ọle ọo nggẹ ndu Ízurẹlu amarụ iya bẹ meru g'o gude mu bya egude mini eme baputizimu.”
Jọnu kfukwaawho iwhe o gude ẹnya iya whụa sụ: “Mu whụru Ume Chileke g'o shi l'imigwe dụ-zhiawho g'ọo ndo bya anọdu iya l'ẹhu. Mbẹdua te eshikwa marụ iya, ọle onye ono, zhiru mu tẹ mu bya egude mini mee baputizimu sụru mu: ‘Ọo onye ono l'ịi-whụ gẹ Ume Chileke shi l'imigwe bya anọdu iya l'ẹhu bụ iya bụ onye ọbu l'e-gude Ume-Dụ-Nsọ eme baputizimu.’ Sụa, ntaa bẹ mu gudewaa ẹnya mu whụa ya, mu kfụkwaruwho ekfu l'ọo onye ono bụ Nwa Chileke ọbu.”

Ọ byakwa ebe echile iya, Jọnu kfụkwaruwho l'ẹka ono yẹle ụmadzu labọ lẹ ndu l'etso ụzo iya. Ọ whụa Jisọsu gẹ l'ọoghata ọ sụ: “Unu lekwa onye ọbu bụ Nwatụru Chileke ọbụ.”
Tọ dụ iya bụ l'ụmadzu labọ ono, l'etso iya nụ anụlewho iwhe ono o kfuru, whẹ haa yẹbe Jọnu tsolahaa Jisọsu. Jisọsu bya aghachi whụa whẹ gẹ whẹ l'etso iya. Ọ sụ whẹ: “Ọo gụnu bẹ unu l'achọ?”
Whẹ sụ iya: “Rábayi, ?ọo awee bẹ l'ịiraduje?” Iwhe Rábayi fụtaru bụ O-zhi-iwhe.
Ọ sụ whẹ: “Unu byanụ bya awhụ iya.” Tọ dụ iya bụ lẹ whẹ etsoru iya je awhụ ẹka ọbu l'ọoraduje. Whẹ l'iya nọfufuwaro mbọku ono. Nteke ono, whẹ byarụ ono bụ l'oke-eswe-urwẹnyashi.
Onye lanụ l'ime ụmadzu labọ ono, nụru okfu Jọnu tsolahaa Jisọsu bụ Ánduru, nwune Sáyịmonu Pyita. Ánduru vuru ụzo lọbaru je achovuada nwune iya Sáyịmonu sụ iya: “Anyi whụakwaru Mezáya ọbu.” Iwhe Mezáya bụkwanu bụ Kuráyisutu. O duta Sáyịmonu dutashiaru Jisọsu.
Jisọsu lee Sáyịmonu ẹnya sụ iya: “Ọo ghu bụ Sáyịmonu nwa Jọnu. Iwhe l'aa-nọje eku ghu ntaa bụ Kífasu” bụ iya bụ Pyita. Iwhe Pyita fụtaru bụ “Ẹwhuru.”

O be echile iya, Jisọsu chịa l'iya l'e-je Gálili. Ọ whụa Fílipu bya asụ iya: “Tsoru mu.” Fílipu ono bụ onye Bẹtusáyida. Ọ kwawhọ Bẹtusáyida ono bụ ẹka a nwụru Ánduru yẹle Pyita. Fílipu kwe iya hm, bya eje achọo Natániyelu chọ-vu sụ iya: “Anyi whụakwaru onye ọbu Mósisu deru okfu ẹhu iya l'ẹkwo iwu, tẹmenu ndu nkfuchiru Chileke dekwaa ya whọ. Ọo ya bụ onye ọbu bụ Jisọsu onye Názaretu nwa Jósẹfu.”
Natániyelu tụfulewho ọnu sụ iya: “?Oo nwezhiaru iwhe dụ ree l'e-shi lẹ Názaretu?”
Fílipu sụ iya: “Byanụ bya awhụ l'ẹnya ghu.”
Jisọsu whụlewho gẹ Natániyelu l'eje abyakfuta iya, ọ sụ: “Onye ọwaa bụ ọkpobe onye Ízurẹlu, l'ẹte abụa onye ntuwhu.”
Natániyelu sụ iya: “?Ndẹhunu g'i meru marụ mu?”
Jisọsu sụ iya: “Mu whụhaadaru ghu rọo nteke whọ i shi nọdu l'ukfu figu whọ tẹmenu Fílipu bya ekua ghu.”
Natániyelu sụ iya: “O-zhi-iwhe, ọo gụbedua bụ Nwa Chileke ọbu. Ọo gụbedua bụ Eze ndu Ízurẹlu ọbu.”
Jisọsu sụ iya: “?Ọ waa l'ọo lẹ mu sụru ghu lẹ mu whụru ghu l'ukfu figu whọ kpatarụ iwhe i kwetaru? Ii-bekwaroo whụbaa iwhe ọdo kabaa ọwa shii.” Sụ: “Iwhe mu l'akarụ unu bụ: unu l'a-whụ g'igweli gheru ọnu, whụkwaawho gẹ ndu ojozhi Chileke l'enyiba enyiba l'imigwe, enyizetakwawho enyizeta awụ awụ-kfuta Abụbu-Ndiwhe.”

Geere nke a ntị Jọnu 1