Text: © Alliance biblique de Côte d'Ivoire, 2003 Audio: ℗ 2007 Hosanna

Alladian - 2003 Edition (NT)

Alladian: Ɛmɛẅi ankà ankrànkràn © Alliance Biblique de Cote d'Ivoire, 2003.

Tɛ́n Zhezü hɔ́n ɛnkpò cɛ tɔ̀n wú, ɛnkpò léyi ye bi olivie kpò nɔn. Ɛcɛ̀n cüe ɔsɔwrɔ futàn, nɛ̀n vru ɛmɛẅi nɛ̀n hɔ́n Ɔwɔ-cice-wɔn lɔ mɛ̀n, kɩ fɛcüè lɔ fɛn sɔnba nɛ̀n ɛtɛsɛ̀n. Zhezü vriyɛ́, kɩ ke yé yɔ ankà. Ɛnyanmàn-gbànvri-ankà-yé-bɔ̀ mán Ɔwɔ-nyanmàn-sùva-wá-bɔ̀ bɩ́ ɛnnyɔwrɔn tɔ̀n, yɛ ẅɛn nɛ̀n ɛncɔnwrɔn-bi-gbàn hán tɛ̀ mɛ̀n, yɔ vá sɩ́ Zhezü. Yɔ hɛ́n nɛ̀n anwrɔn lɔ fɛn zìwúɛ. Kɩ yɔ dɔ́ Zhezü le: “Ankà-yé-wrɔn, ɛnnyɔnwrɔn ndɔ lɔ, bɔ̀ cɔ́ nɛ̀n ɛncɔnwrɔn-bi-gbàn hán tɛ̀ mɛ̀n. Mohizì wá tán bɔ̀ n'ɛnyanmàn lɔ mɛ̀n le, wúyɔ̀ ndɔ hɔ̀n lɔ, yɛ soran yɔ ɛbù ye wri yɔ. Vɛ tɛn ankà tán ɛ dɔ̀a?”
Yɔ dɔ́ ɔmu lɔ, ô yɔ krɔn nɛ̀n antanwrɔn, ô yɔ cɔ́ ɛyri ye kù nɛ̀n ankà ɛwú. Tɛ́n Zhezü sɩ́ n'edomɛ̀n ɛnhi kɩ bɩ́ ɛtieẅì bukru ke merɛ́n eci ɛnhibɩ́. Ɔmuhi ye dú nɛ̀n ankà-yrɛ mɛ̀n nɔn, Zhezü wrɔ́n ɛwú kɩ kɛ dɔ́ yɔ le: “Ny'ɛmɛ̀n lɔ ɔwrɔn léyi kɛ vá hán ɛgbàn mrìmrì nɔn, kɛ̀ gɔ̀ sɔ́n nɛ̀n kpàpkà bù.” Zɛtɛn nɛ̀n vru nɛ̀n sɩ́ n'edomɛ̀n ɛnhi kɩ nɛ̀n bukru ne merɛ́n eci ɛnhibɩ. Ɛnvra léyi yɔ yá ankà léyi Zhezü dɔ̀ nɔn, yɔ nán hɔ́n nzri zri, bukru ɛcüìcüì-bɔ̀ mɛ̀n. Wɔrɔ Zhezü mán ɛnnyɔwrɔn lɔ zri kɩ vru nyɔn nɛ̀n ezìwúɛ. Zɛtɛn Zhezü wrɔ́n ɛwú, kɩ kɛ dɔ́ nɛ̀n le: “Ɛnnyɔnwrɔn zɛtɛn yɔ tɔwà? Ɔwrɔn zriɛmɛ́n kè sɩ̀ di mɛ́n owúemɛ̀n hàn?” Ɛnnyɔnwrɔn lɔ mrɛ́n nɛ̀n ɔmùan le: “Ankà-yé-wrɔn, ɔwrɔn zriɛmɛ́n kè sɩ̀ di mɛ̀n owúemɛ̀n.” Kɩ Zhezü kɛ dɔ́ nɛ̀n le: “Mɛ̀n mán, mɛ́n sɩ̀ di mɛ́n owúemɛ̀n, ɛ̀ hɔ̀n, ô e bɩ́ vru hán ɛgbàn hàn.”]

Zhezü vru bɩ́ ankà-dɔ̀ kɩ kɛ dɔ́ fɛcüè le: “Mɛ̀n dú ɛnhibù yri-kàn. Ɔwrɔn léyi kɛ kɛ́n mɛ̀n ɛsɛ̀n nɔn, kɛ lɛ cɔ́ ɔkɔrɛ̀ yri-kàn kɩ nɛ́n sɩ̀ nán esù ɛyri yɔwɔ mɛ̀n mrìmrì.” Ɔwɔ-nyanmàn-sùva-wá-bɔ̀ kɛ dɔ́ nɛ̀n le: “E dí v'edomɛ̀n dalɛfuɛ; ankà léyi ɛ dɔ̀ nɔn ke sɩ̀ ẅɛ̀n vɔ̀nshɛ́.” Zhezü mrɛ́n yɔ ɔmùan le: “Hɩ mán ke dú kɛ me dí m'edomɛ̀n dalɛfuɛ hô, ankà léyi mɛ dɔ̀ nɔn, dú annanwɔrɛ, ɔmuhi mɛ̀n nyri ɛyri léyi mɛ́n dù mɛ và, mán ɛyri léyi mɛ hɔ̀n nɔn. Tɛ́n, nyɛ́n, nyɛ́n sɩ̀ nyrì ɛyri léyi mɛ́n dù mɛ và mán ɛyri léyi mɛ hɔ̀n nɔn. Nye ci ɛmrɛ̀n anwrɔn-wiemɛ̀n; mɛ tɛn, mɛ́n sɩ́ ci ɔwrɔn zriɛmɛ́n ɛmrɛ̀n. Tɛ́n, ke dú kɛ me le ci ɛmrɛ̀n hô, m'ɛmrɛ̀n-ci lɔ ẅɛn vɔ̀nshɛ́, ɔmuhi ke sɩ̀ dù mɛ́n zri de mɛ́n ci ɛmrɛ̀n nɔn, tɛ́n Dade léyi wá mɛ̀n ɔkɔ̀hɔ̀n nɔn nɛ́n mɛhi bo dù. Ye merɛ́n ny'ɛnyanmàn lɔ mɛ̀n le, ke dú kɛ anwrɔn anhyrɛ̀ ke di dalɛfuɛ ankà zri lɔ mɛ̀n hô, dalɛfuɛ-dì ndɔ lɔ ẅɛn vɔ̀nshɛ́. Me di m'edomɛ̀n dalɛfuɛ kɩ Dade léyi wá mɛ̀n ɔkɔhɔ̀n nɔn, nɛ́n mán ne dí mɛ̀n dalɛfuɛ.” Yɔ yrɛ nɛ̀n le: “Tɛyri ezi dùɛ?” Zhezü mrɛ́n ɔmùan le: “Nyɛ́n sɩ̀ nyrì, mɛ̀n mán Dade mɛhi; ke dú kɛ nyɛ́n nyri mɛ̀n hô, nye le nyri Dade mán.”
Zhezü dɔ́ ankà ndɔ hɔ̀n lɔ ɛnvra léyi ne yé ankà Ɔwɔ-cice-wɔn lɔ mɛ̀n, ɛyri léyi ɛcice tɛ̀ wroko hɔ̀n lɔ ndù nɔn. Ɔwrɔn zriɛmɛ́n kè sɩ̀ ẅɛn nɛ̀n, ɔmuhi nɛ́n wacɛ̀n kɛ vá cɔ̀ nɔn.

Zhezü vru kɛ dɔ́ yɔ le: “Mɛ lɛ hɔ̀n kɩ nye le ji mɛ̀n, tɛ́n nye le wú ny'ɛgbàn lɔ mɛ̀n. Nye sɩ̀ hɔ́n ɛyri léyi mɛ hɔ̀n nɔn rɔ́.” Zhüifɛ̀n-bɔ̀ kɛ dɔ́ y'edomɛ̀n le: “N'edomɛ̀n nɛ vá ɛwrí yriɛ̀, ɔmuhi nɛ dɔ̀ le: ‘Nyɛ́n sɩ̀ hɔ́n ɛyri léyi mɛ hɔ̀n nɔn rɔ́a’?” Zhezü mrɛ́n yɔ ɔmùan le: “Nyɛ́n dú ɛnu ɛnhi bɔ̀, tɛ́n mɛ tɛn, mɛ̀n dú ɛwú-wrɔn. Nyɛ́n dú ɛnhibù ndɔ lɔ n'anwrɔn, tɛ́n mɛ tɛn mɛ̀n sɩ̀ dù ɛnhibù ndɔ lɔ n'ɔwrɔn. Hɩ le kruhú de mɛ̀n dɔ́ nyɛ̀n le, nye le wú ny'ɛgbàn hɔ̀n lɔ mɛ̀n. Ɔmuhi nye le wú ny'ɛgbàn hɔ̀n lɔ mɛ̀n ke dú kɛ nyɛ́n sì bùtan le ‘Mɛ̀n dú ɔwrɔn léyi dú mɛ̀n nɔn’.” Yɔ yrɛ nɛ̀n le: “Antɔn dú mɛ́n hán?” Zhezü mrɛ́n yɔ ɔmùan le: “Ɔwrɔn léyi mɛ̀n dɔ́ nyɛ̀n n'ankà ɛnkrubɔmɛ̀n hán hɛ́n nɔn. Mɛ̀n ẅɛn ankà-dɔ̀ bobrebe mán ɛmrɛ̀n-cì ny'ɛwú. Tɛ́n ɔwrɔn léyi wá mɛ̀n ɔkɔhɔ̀n nɔn kɛ dɔ́ ankà annanwɔrɛ, kɩ me yé ɛnhibù ankà léyi nɛ̀n yé mɛ̀n nɔn.”
Yɔ sɩ̀ nyriɛn le nɛ dɔ́ nɛ́n Zi ankà. Zɛtɛn Zhezü kɛ dɔ́ yɔ le: “Ɛnvra léyi, nye le sɩ́ ɔwrɔnẅì Ẅì ɛwú nɔn, nye le nyrì le ‘Mɛ̀n dú ɔwrɔn léyi dú mɛ̀n nɔn’; nye le nyrì le mɛ́n sɩ́ hán eci zriɛmɛ́n mɛ́n dùku m'ɛkɔrɛ̀-levriemɛ̀n: mɛ dɔ́ ankà zri léyi Dade yé mɛ̀n nɔn. Ɔwrɔn léyi wá mɛ̀n ɔkɔhɔ̀n nɔn mɛhi bɔ́ dù; nɛ̀n sɩ̀ teze mɛ́n zriɛ, ɔmuhi mɛ hán ɛnvra lɔ fɛn eci léyi nɛ cüɛ̀n nɔn.” Ankà ɔmu léyi Zhezü kɛ dɔ́ nɔn, anwrɔn bobrebe ẅɛn ankaẅì-bùtan n'ɛwú.

Zɛtɛn Zhezü kɛ dɔ́ Zhüifɛ̀n-bɔ̀ léyi ẅɛn ankaẅì-bùtan n'ɛwú nɔn le: “Ke dú kɛ nyɛ ẅɛn m'ankà-yé lɔ ɔmùan zriemɛ̀n nyɛ hɛ́n, nyɛ́n dú m'ɛsɛnkɛn-bɔ̀ annanwɔrɛ hɔ̀n; ɔmu lɔ de nye le nyri annanwɔrɛ ankà kɩ annanwɔrɛ ankà kɛ lɛ srɔ nyɛ̀n anwrɔn kora.” Yɔ mrɛ́n nɛ̀n ɔmùan le: “Bɔ́ dú Abrahamɛ̀n mɛẅi bɔ̀, kɩ bɔ́ vá dú ɔwrɔn wɔ̀n-wrɔn ɛnbì zriɛmɛ́n. Anhɔntan de ɛ lɛ dɔ́ bɔ̀ tɛ̀ le: ‘Nyɛ lɛ srɔ anwrɔn kɔra hɔ̀n nɛ́n’?” Zhezü mrɛ́n yɔ ɔmùan le: “Mɛ dɔ́ nyɛ̀n, annanwɔrɛmɛ̀n le: ɔwrɔn totɔtɔ̀n léyi kɛ hán ɛgbàn nɔn, nɛ̀n dú ɛgbàn wɔ̀n-wrɔn tɔ̀n. Ɔwɔ̀n-wrɔn ke sɩ̀ dú ɛnvra lɔ fɛn ɛmɛ̀n mɛ̀n wrɔn, tɛ́n ɛnẅì dú ɛnvra lɔ fɛn ɛmɛ̀n mɛ̀n wrɔn. Ke dú kɛ Ɛnẅì lɔ ke srú nyɛ̀n ze hô, zɛtɛn, nye le dú anwrɔn kora hɔ̀n annanwɔrɛ. Mɛ̀n nyri ɔmu le nyɛ́n dú Abrahamɛ̀n mɛẅi-bɔ̀. Tɛ́n nye ji nyɛ́n wri mɛ̀n, ɔmuhi nyɛ́n sɩ́ ji nyɛ́n bɩ́ m'ankà-yé lɔ nɔn. Mɛ dɔ́ ankà léyi Dade yé mɛ̀n nɔn, tɛ́n nyɛ tɛn, nyɛ hán eci léyi nyɛ́n zi dɔ́ nyɛ̀n nɔn.” Yɔ mrɛ́n nɛ̀n ɔmùan le: “Bɔ zi dú Abrahamɛ̀n.” Zhezü kɛ dɔ́ yɔ le: “Ke dú kɛ nyɛ́n dú Abrahamɛ̀n ẅì hɔ̀n annanwɔrɛ mɛ̀n hô, nyɛ́n lɛ hán ɛci hɔ̀n léyi nɛ̀n hán nɔn. Tɛ́n zɛtɛ̀ léyi mɛ̀n dɔ́ nyɛ̀n ankà annanwɔrɛ léyi mɛ̀n cɔ́ Ɔwɔ yri nɔn, nye ji ɛyri nyɛ́n wri mɛ̀n. Abrahamɛ̀n ke sɩ̀ hàn eci kɛ̀ cà ndɔ lɔ! Nyɛ hán ɛci zri hɔ̀n léyi nyɛ́n zi (anwawrɔn) kɛ hán nɔn.” Yɔ mrɛ́n nɛ̀n ɔmùan le: “Bɔ̀ sɩ̀ dù ɛmɛ̀ntɛ̀-wá-ẅì hɔ̀n. Bɔ̀ ẅɛ̀n bɔ zi zri dú Ɔwɔ.” Zhezü kɛ dɔ́ yɔ le: “Ke dú kɛ Ɔwɔ kè dú nyɛ́n zi annanwɔrɛ, nyɛ lɛ cüɛn mɛ̀n, ɔmuhi mɛ̀n dú Ɔwɔ yri mɛ́n và kɩ mɛ̀n dú ɛnu lɔ n'ɛkruhú nɔn. Mɛ̀n sì và mɛ́n dùku m'ɛkɔrɛ̀levriemɛ̀n, tɛ́n nɛ́n de nɛ̀n wá mɛ̀n ɔkɔ̀hɔ̀n nɔn. Cɛci kruhú kɛ nyɛ́n sɩ́ yá ankà léyi mɛ dɔ́ nyɛ̀n nɔn nɛ́n? Ɔmuhi nyɛ́n sɩ̀ ẅɛ̀n nukù nyɛ́n yá m'ankà-dɔ̀ lɔ nɔn. Nyɛ́n zi dú anwawrɔn kɩ nye ji nyɛ́n hán eci léyi nyɛ́n zi anwawrɔn ke ji nɔn. Nɛ̀n dú ɔwrɔn wri-wrɔn ɛnkrubɔmɛ̀n hán hɛ́n. Ɛnbi zriɛmɛ́n nɛ vá nyɔn annanwɔrɛ ankà mɛ̀n, ɔmuhi annanwɔrɛ bada nɛ̀n ɛmɛ̀n nɔn. Ɛnvra léyi nɛ dɔ́ ɛyɔ̀n ankà, nɛ dɔ́ yi kɛ hán n'edù-ci hɔ́, ɔmuhi nɛ́n dú ɛyɔ̀n wrɔn mán ɛyɔ̀n nɛ́n zi nɔn. Tɛ́n, mɛ tɛn mɛ dɔ́ ankà annanwɔrɛ, kɩ hɩ le kruhú de nyɛ́n sɩ́ bú m'ankà nyɛ́n tán ankaẅì nɔn. Ny'ɛmɛ̀n lɔ antɔn de ke le yé tɛ̀ le mɛ́n hán ɛgbàn nɛ́n? Kɩ ke dú kɛ mɛ dɔ́ ankà annanwɔrɛ, cɛci kruhú kɛ nyɛ́n sɩ́ bú m'ankà nyɛ́n tán ankaẅìɛ? Ɔwrɔn léyi dú Ɔwɔ tɛn nɔn, ne die Ɔwɔ ankà nukùɛ. Tɛ́n nyɛ́n sɩ̀ dù Ɔwɔ tɛn, hɩ le kruhú de nyɛ́n sɩ́ die nukùɛ nɔn.”

Zhüifɛ̀n-bɔ̀ mrɛ́n Zhezü ɔmùan le: “Hɩ le bɔ́ dɔ̀ le, è dú Samari anmàn-wrɔn léyi ɛnhɛ́n gbangbàn dú edomɛ̀n nɔn, hɩ lɔ mán b'ankà kè sɩ̀ zrɔa?” Zhezü mrɛ́n ɔmùan le: “Ɛnhɛ́n gbàngbàn bada mɛ̀n edomɛ̀n, tɛ́n mɛ wá Dade kɩ nyɛ tɛn, nyɛ́n sɩ́ ji nyɛ́n wá mɛ̀n. Mɛ́n sɩ́ ji m'ecizrɔ. Ɔwrɔn tɔ̀n ndù ke ji m'ecizrɔ kɩ ke ci ɛmrɛ̀n tán mɛ̀n. Mɛ dɔ́ nyɛ̀n ankaẅì annanwɔrɛ mɛ̀n le: ɔwrɔn léyi ke die m'ankà-dɔ̀ nukùɛ nɔn, nɛ́n sɩ̀ wú mrìmrì.”
Zhüifɛ̀n-bɔ̀ kɛ dɔ́ nɛ̀n le: “Zɛtɛ̀ lɔ, bɔ́ nyri annanwɔrɛ mɛ̀n le, ɛnhɛ́n gbangbàn dú mɛ́n edomɛ̀n! Abrahamɛ̀n nwù, Ɔwɔ-mùanwú-ankà-dɔ́-bɔ̀ mán nwù, kɩ vɛ tɛn ɛ dɔ̀ le: ‘Ɔwrɔn léyi ke die m'ankà-dɔ̀ nukùɛ nɔn, nɛ́n sɩ̀ wú mrìmrì’. Abrahamɛ̀n bɔ́ zí nwù: e tro le, è sevri ɛ̀ vrán nɛ́n? Ɔwɔ-mùanwú-ankà-dɔ́-bɔ̀ mán nwù. Ecitan e bú v'edomɛ̀n ɛ hán?” Zhezü mrɛ́n yɔ ɔmùan le: “Ke dú kɛ mɛ zrɔ m'edomɛ̀n eci hô, m'eci-zrɔ lɔ, dú eci woro. Ɔwrɔn léyi kɛ zrɔ m'eci nɔn, dú Dade, nɛ́n léyi nyɛ dɔ̀ le: ‘Nɛ̀n dú b'Ɔwɔ’, tɛ́n nyɛ́n sɩ̀ nyri nɛ̀n. Mɛ tɛn mɛ̀n nyri nɛ̀n. Ke dú kɛ mɛ dɔ̀ le mɛ̀n sɩ̀ nyri nɛ̀n hô, me le dú ɛyɔ̀n-wrɔn kɛ lɛ hán nyɛ́n hɔ́. Tɛ́n mɛ̀n nyri nɛ̀n, kɩ mɛ wá n'ankà-dɔ̀. Abrahamɛ̀n, nyɛ́n zi, pɔpüɛ̀ nbrà, ɔmuhi nɛ̀n tro le nɛ lɛ kán me bî vra; nɛ̀n kán ɛnvra lɔ, kɩ nɛ̀n dú ɛnbɔrɛbruemɛ̀n.” Zhüifɛ̀n-bɔ̀ kɛ dɔ́ nɛ̀n le: “E sɩ̀ ẅɛ̀n ɛnnanwàn kru ɛkoẅi-anhyrɛ̀ mán ɛẅì-ɛvà, kɩ ɛ̀ kán Abrahamɛ̀n hàn?” Zhezü mrɛ́n yɔ ɔmùan le: “Mɛ dɔ́ nyɛ̀n annanwɔrɛ mɛ̀n le: yɛ vá bî Abrahamɛ̀n, kɩ ‘Mɛ́n dù’.” Zɛtɛn, yɔ bi ɛbù, ô yɔ kɔ̀n sɔnran nɛ̀n. Tɛ́n Zhezü bán kɩ dú Ɔwɔ-cice-wɔn lɔ mɛ̀n srɔ ɛntrɛ.

Geere nke a ntị Zhan 8