Matɨyu 3
3
Joun A'amumo Mijo Kiyoma'mojo sohwo hungkuno loma'mentisofoho.
(Mak 1:2-8; Luk 3:1-18; Joun 1:19-28)
1Oso hohosohonta Joun A'amumo Mijo Kiyoma'mojo sohwo i'mofaponto hwaho Jutiya a'amu mohumunyo sopo nohumanto hungkuno loma'mentisofoho mohumunyo sopo. 2Ole ulɨmento, Sekwoe honɨngkano wonyoso hohujo fikinjaopmno. Sɨmeho fɨwolo'mokumno. Anɨtuye sɨkuno nakumo yokumpohn'nyo nemokosyohumayo'ne mofoneponoho. Ose lutɨhwamentisofoho. 3Hwe Aisaiya sohumo Anɨtu hungkuno uyahonɨngki lɨmojo sohwo Jounɨmne'no olo hungkuno hohonta mtɨ'mokumentisofoho. Hungkuno hiso ole,
Upa'nɨmno. Hwaho a'amu mohumunyo fi'mo hwe fihwoe mampaho engo ole ho'nɨmento,
Hwe Engo sohumne'no honɨngkano ito'no fesyohumamno.
Kakoe hano emoyo'ne so'no honɨngkano hiso ito'no mɨhwatɨmno.
4Jounɨye nem'no manji'mofo hwaho fi'nyohwe yahu kamel lohwa so'nji mtɨ'mokumentisofoho. Yahu paho ahulohoso loho'nɨmentisofoho. Kako kusɨmo'nji wosopayo tɨme mijo'ntnnohini nɨmojo hweho. 5Hohosohonta a'amu pone engo Jelusalem mta'ango so'nji a'amu hwaho Jutiya mta'ango so'nji a'amu hopi'nonohino Mijo Joutan tɨfo nesoponjo so'nji hofɨko Jounɨmo u'ma'mentohofofoho. 6A'amu hiso hofɨkoe wonyo yoloho lɨjwaofahonɨngkofi Joun hofɨkimo Mijo Joutan sohumo kiyoma'mentisofoho.
7A'amu Falisi pi'nɨngo sohwanji a'amu Satɨyusi sohwanji hofɨko mijo wokiyonemano lontɨfi nopahonɨngkofi Joun nuhwononto ulɨmento, Sekwo homa mehomi soku, tɨhwo selɨmasoto. Anɨtu a'amufe wonyo honɨngkano somne'no tohino mɨkunɨmposo uyo somne'no i'waho fiyɨmno. Ose tɨhwo selahonɨngki nɨ'mahofo kulo. 8Sekwoe honɨngkano wonyo somne'no hohujo ukinjaofano lɨfijo'manji e'wano wopɨngo'nohini utɨhwa'nyopo fiyɨmno. 9Sekwoe sɨmeho mo'mo ole syafɨsyɨkutoho. Nakwo Apɨlohamɨye imu hn'nɨmo oso tohino engo hiso mone'manehoho. Oseso nohnnɨngkutoho. Ngko hungkuno nehopi'nohino waselɨmonne'no yohono. Olo sojo loso Anɨtu kako Apɨlohamɨye imuhwa wamtɨ'mokumo loso'manji kako hopoeno wamtɨ'mokumontonoho. 10Anɨtu kako iyomo mɨngo lofo'ne iwa'mɨngo ikafe'mo mokosyalohofoho. Iyo ipisayo wopɨngo minto'nyo'njo somo nolofehwosi tohomo wolofae'mtonoho.
11A'amuso hofɨkoe honɨngkano wonyomne'no sɨmeho tango umnɨngkahonɨngki nɨhu'nahone hohujo ikinjaofo somo ngko sekumo mijo'nohini kiyosemawo'nɨngkohe hwo'nyoho. I oso'no nje yofe we'e hwaho lopo weho. Hwe tɨfinjo sohwo kakoe yofe engo yokintahopo nje yofemo nɨyakolofonefoho. Kakoe yofe engo mɨkunɨmposo so'no ngko sohwo'ni kakimo momayo ulohofiyo'ne hwo'nyoho. Hwangku oso hwe huhwo sohwo kako a'amu sekumo Anɨtuye Towahuno Wopɨngo sohwo'nji toho'nji wokiyosema'montonoho. 12Kako hwahomo mno ijiyo'neso mokosyohumunyo hweho. Kako hwahomo mno ijɨhwosi neso ijomahwosi pahoso wae yaofɨhwosi wosopayo neso kakoe angomo woho'nahumontonoho. Pahoso toho masɨmpe'nyo ne'no sijɨwo'nɨngkiso somo woho'nae'montonoho.
Joun Jisasɨmo mijo kiyoma'mentisofoho.
(Mak 1:9-11; Luk 3:21-22; Joun 1:29-34)
13Oso hohosohonta Jisas hwaho Ngkalili ulɨko'manto Mijo Joutan ne'no nowento Joun mijo wokiyonɨmano lonto Jounɨmo u'ma'mentisofoho. 14Nu'mahonɨngki Joun ulɨmento, O'o, kɨko ngkimo mijo kiyonɨmayoso hoponoho. Ngkiyepono pipine'no pohino. 15Ose ulahonɨngki Jisas ulɨmento, O'o, kɨko mijo kiyonɨmayo so'no nekwo ole yasoso Anɨtuye honɨngkano lakisiyo imentohofo somo imokiyoso hoponoho. Oseso Joun kakoe hungkunomo tɨfi inɨngkawento mijo kiyoma'mentisofoho.
16Mijo kiyomahonɨngki Jisas mijomo kunto'no ulɨko'manto sɨmentisofoho. Nosahonɨngki ahwomo mtampo lohofahonɨngki uhwonɨmentisoso Anɨtuye Towahuno yɨhufo ntolofiyo hopa imo'nonto Jisasɨmo wekehumapmmentisofoho. 17Mampaho ahwomo mta'ni ho'nɨmento, Olo nje Hwomu hweho. Ngko sɨmeho wopɨngo mɨkunɨmposo uyɨwo'nɨngkohe hweho. Kakine'no yo'mayo wopɨngo iwo'nɨngkiso so'no nje sɨmeho wopɨngo nɨmo'nantofoho.
Pilihan Saat Ini:
Matɨyu 3: apzNT
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2013, Wycliffe Bible Translators, Inc. All rights reserved.
