Génesis 31
31
Jix Snaꞌ Naj Jacob Tzet Oj Yun Yel Tet Naj Labán
1Jaꞌ yet jix yabꞌen naj Jacob, tol jaꞌ ebꞌ scꞌaal naj Labán, lalanxa yalon ecꞌ ebꞌ naj jaxca tiꞌ: Jaꞌ yu masanil tzet jix yiꞌecꞌ jun Jacob tiꞌ tet cu mam, yuxan caw bꞌeomxa, ẍi ebꞌ naj. 2Catuꞌ jix yilon pax oc naj Jacob tol jaꞌ naj Labán, tol jow xacꞌal yilwan oc naj, manxa jaxca oj yet yalantoj. 3Jaꞌ Jehová jix alon tet naj Jacob jaxca tiꞌ: Meltzaantoj bꞌey xꞌotxꞌ naj ja mam icham, jaꞌ tituꞌ eyecꞌ ebꞌ ja wican, oj jin oc cꞌal ja wetoj, ẍi Jehová tet naj.
4Jix lawi tuꞌ, jix yalon Jacob tol chi too tit ebꞌ ix yistil, jaꞌton ix Raquel yetoj ix Lía, yet watxꞌ chi jul ebꞌ bꞌey chi ilwi meꞌ naj. 5Jaꞌ yet jix apni oc ebꞌ ix scꞌatan naj, jix yalon tet ebꞌ ix jaxca tiꞌ:
—Jex txo wistil, jaꞌ tinaniꞌ jaꞌ naj je mam pena xa chi yute scꞌul naj win, man jaxca oj yet yalantoj, yuxan jaꞌ sDiosal jin mam caw chi colwa cꞌal wetoj. 6Jaex tiꞌ, caw je yotaj sicꞌlebꞌil, tol jix jin mulna yetoj masanil jin cꞌul yetoj naj je mam tuꞌ. 7Jaꞌ naj je mam tuꞌ, caw chin yetne naj, ecꞌal el jix sqꞌuextoj stool jin cꞌu naj. Asan xin, jaꞌ sDiosal jin mam, cꞌam chin chaꞌon etex oj. 8Jaꞌ tinaniꞌ, chi yal naj jaxca tiꞌ: Oj jaach jin toolane yetoj masanil noꞌ meꞌ tol tzꞌibꞌintaj yoqui, ẍi naj, jaꞌ yet chi jul yuneꞌ noꞌ, tzꞌibꞌin xacꞌal yuneꞌ noꞌ chi juli, catuꞌ chi yalon pax oj: Oj jaach jin toolane yetoj noꞌ tol jasquiltaj yoc stzꞌibꞌil, ẍi naj; jaꞌ yet chi jul yuneꞌ noꞌ, caw jasquiltaj cꞌal yoc stzꞌibꞌil noꞌ yuneꞌ chi juli. 9Jaxca tuꞌ jix yun yiꞌon ecꞌ Jehová masanil noꞌ sjobꞌbꞌeal noꞌ naj je mam tuꞌ, catuꞌ chi yakꞌon ey jin.
10Jaꞌ yet junel ey jun jin weyich jix oqui, jix wiloni tol chi akꞌle sajcho noꞌ txutxe yu noꞌ icham, jix wiloni tol tzꞌibꞌin cꞌal el noꞌ, yetoj cꞌal noꞌ jasquiltaj yoc stzꞌibꞌil. 11Jaꞌ jix yun wilon yin jun jin weyich tuꞌ, tol jix jin yawte jun yángel Dios, jix jin takꞌwi tet, ti ey jin an, jin chi tet. 12Jix yalon ey jin jaxca tiꞌ: Chi cam ja wiloni, tol jaꞌ noꞌ icham meꞌ chi akꞌon sajcho noꞌ tzꞌibꞌin, cꞌal noꞌ jasquiltaj yoc stzꞌibꞌil tiꞌ, yutol jix wil masanil tzet jix yun Labán ja wetoj. 13Jain Jehová jin, jix jin txꞌox jin bꞌa ey jaach bꞌey Betel, bꞌey jix ja sec can ey aceite olivo yibꞌan chꞌen chꞌen jix ja linbꞌa can aoj, jaꞌton bꞌey jix ja wakꞌcan ja tiꞌ ey jin. Jaꞌ tinaniꞌ xin, bꞌejcan jun txꞌotxꞌ tiꞌ, catuꞌ chach meltzo bꞌey ja txꞌotxꞌal bꞌey jix jaach ali, ẍi Jehová ey jin, ẍi Jacob tuꞌ tet ebꞌ ix yistil.
14Catuꞌ jix takꞌwi ix Raquel cꞌal ix Lía tet naj jaxca tiꞌ:
—Jaon tiꞌ, cꞌamxa tzet chi kechbꞌane, yutol man oj yakꞌ cu majul naj cu mam tiꞌ jon. 15Jaꞌ tiꞌ yet naj, jaxca xacꞌal comon ánima chi cu yute naj jon. Tol jix cu xontoj naj, jix sqꞌueyon el cu tol naj jon, ilaꞌ caw jix jaach mulna yetoj naj ku jon. 16Yel toni, jaꞌ Jehová jix iꞌon ecꞌ masanil sbꞌeomal tet naj cu mam tuꞌ jon, yuxan, jaꞌ tinaniꞌ ket xa yetoj ebꞌ kuneꞌ tiꞌ. Yu jun tuꞌ xin, yun ojabꞌ cꞌal masanil tzet jix yal Jehová ey jaach, ẍi ebꞌ ix tet naj.
Jix El Naj Jacob Bꞌey Padán-aram
17-18Jix lawi tuꞌ xin, jix swaꞌnen ey masanil jantaj stzetyetal naj Jacob tuꞌ, catuꞌ jix meltzotoj naj bꞌey Canaán bꞌey caan smam, jaꞌton naj Isaac, jix yaon atoj ebꞌ scꞌaal cꞌal ebꞌ ix yistil yibꞌan noꞌ camello. Catuꞌ jix yiꞌontoj masanil noꞌ sjobꞌbꞌeal noꞌ jix yiꞌ yin smulnail bꞌey Padán-aram. 19Jaꞌ yet jun cꞌual tuꞌ, eytoj naj Labán tzujo el xil meꞌ bꞌey junxa tujan noꞌ smeꞌ. Jal ix Raquel jix elkꞌanentoj wan sdiosal smam tuꞌ eyoctoj yul sna. 20Jaꞌ naj Jacob, yin ewantajil jix yun stoo naj tet naj Labán. 21Jaxca tuꞌ jix yun yela yetoj masanil stzetyetal; yin eymanil jix skꞌaxbꞌonen jaꞌ miman jaꞌ Éufrates, catuꞌ jix too cꞌal naj sattajto bꞌey wan tzalan yul yet Galaad.
Jix Too Tzajan Naj Labán Yintaj Naj Jacob
22Oxebꞌxa cꞌu stoo naj Jacob tuꞌ, catuꞌ jix yabꞌen oc naj Labán tol jix ela naj. 23Yu jun tuꞌ, jaꞌ naj Labán jix too naj yetoj ebꞌ yican, jix too ebꞌ yintaj Jacob, yin xa sjujebꞌ cꞌual catuꞌ jix tzajlo ebꞌ yintaj bꞌey txꞌotxꞌ tzalquiltaj yul yet Galaad. 24Jaꞌ yet jun akꞌbꞌal tuꞌ, jix xꞌox sbꞌa Jehová tet Labán, naj Arameo tuꞌ. Yin weyicheal jix yun yalon Jehová tet naj jaxca tiꞌ: Man ojabꞌ pena oj yun ja kꞌanabꞌ tet naj Jacob, ẍi Jehová tet naj Labán.
25Jix apni oc tzajan naj Labán yintaj Jacob bꞌey txꞌotxꞌ tzalquiltaj yul yet Galaad. Jaꞌ yet jix apni oc naj Labán yetoj ebꞌ yican jaꞌjun yetoj tuꞌ, catuꞌ jix swaꞌne a skꞌap na ebꞌ bꞌey jix ey bꞌulan ebꞌ. 26Catuꞌ jix cꞌoli yalon oc naj Labán yin sat naj Jacob jaxca tiꞌ:
—¿Tzet yuxan chin ja wetne? ¿Tzet yuxan queytuꞌ cha wute ja bꞌa? Yin xacꞌal ewantajil jix yun ja wiꞌontej ebꞌ ix jin cutzꞌin; jaxca xacꞌal ebꞌ chi too yin jowal, queytuꞌ jix yun ja wiꞌontej ebꞌ ix. 27¿Tzet yuxan jix jin ja wetne? Ma ja wal ja tit ey jin, ta jix ja wal tit ja bꞌa ey jin, jix mi waoc junoj kꞌin, catuꞌ jix cu takꞌele cu bꞌa yin tzalacꞌulal ja wetoj. 28Yin xacꞌal yaxkꞌainajil jix yun ja tita, ma xacꞌal jin tzꞌubꞌ can el stiꞌ ebꞌ ix jin cutzꞌin yetoj cꞌal ebꞌ witxiquin, jaxca xacꞌal tol cꞌam niꞌoj ja naꞌbꞌal, yuxan queytuꞌ jix ja wute ja bꞌa. 29Jain tiꞌ, chi skeꞌ wakꞌon penacꞌulal je yin ta chi yal jin cꞌul, asan xin, jaꞌ yet akꞌbꞌalil jix xꞌox sbꞌa sDiosal ja mam ey jin, jix yaloni: Chi cam cꞌal ja naꞌon tzet oj ja wal tet Jacob; man pena oj yun ja kꞌanabꞌi, ẍi ey jin. 30Yu tuꞌ xin, caw cha woche xacꞌal mi chach pax toj bꞌey sna naj ja mam, yuxan queytuꞌ cha wute ja bꞌa, ¿tzet yuxan jix ja welkꞌanetej wan jin diosal? ẍi naj Labán.
31Catuꞌ jix takꞌwi Jacob tet naj jaxca tiꞌ:
—Yutol chin xiw ey jaach an, yuxan tucꞌal jix jin ewan tit ey jaach. Jaꞌ jix wute jin naꞌoni tala cha tokꞌcan ecꞌ ebꞌ ix ja cutzꞌin tiꞌ ey jin an. 32Jaꞌ yu wan ja diosal tuꞌ, tala cꞌuxan jaꞌ bꞌey junoj ebꞌ eyecꞌ titiꞌ inen ocoj, chi skeꞌ chi cami. Jaꞌ ebꞌ eyecꞌ ketoj tiꞌ chi skeꞌ yoc ebꞌ testigoal. Sey ilaꞌ, ta ey niꞌoj ja tzetyetal iꞌbꞌil oc wu chi skeꞌ ja wiꞌontoj, ẍi Jacob.
Man yotaj oj naj Jacob ta jaꞌ ix Raquel jix elkꞌanentej wan sdiosal smam tuꞌ.
33Jix octoj naj Labán yul sna naj Jacob tuꞌ, jacꞌalaꞌ jix oc cꞌal pax toj naj yul sna ix Lía, yetoj cꞌal sna ebꞌ ix cawan yakꞌomal servil ebꞌ, cꞌam tzet jix ilcha yu ebꞌ. Catuꞌ jix octoj ebꞌ yul sna ix Raquel. 34Jaꞌ ix Raquel jix ewbꞌan el wan echele tuꞌ bꞌey yalan stzꞌuum noꞌ camello, catuꞌ jix ey chotan yibꞌan. Jix lawi cꞌal ecꞌ naj Labán seyon bꞌey masanil yul-laj sna ebꞌ, ma cꞌal ilcha wan sdiosal tuꞌ yu.
35Jix yalon ix Raquel tet naj jaxca tiꞌ:
—Mamin, cꞌam ojabꞌ chi tit ja jowal win, yutol cꞌam chin a waan ja sattaj, yutol jaꞌ tinaniꞌ, yaꞌ jin ey yu jin bꞌisbꞌal xꞌaaw, ẍi ix, jix tzꞌaj yaloni.
Jix lawi cꞌal ecꞌ naj Labán seyon sdiosal tuꞌ, ma cꞌaltaꞌ ilcha oc ebꞌ yu naj. 36Caw jix tit sjowal naj Jacob tuꞌ, jix yalon jaxca tiꞌ:
—¿Tzet wal jin penail jix oc ey jaach? ¿Bꞌeytet jin penail tuꞌ, yuxan chach oc tzajan wintaj an? 37Masanil xacꞌal jin tzetyetal cha sey ja wilaꞌ, ¿tzetyetal jix ilcha oc ja wu tol ja wet? Iꞌtej, txꞌox ey jon yetoj ebꞌ naj jaꞌjun wetoj tiꞌ, yet watxꞌ jaꞌ ebꞌ naj chi skeꞌ yaloni mactxequel jon yel chi kalaꞌ. 38Ilaꞌ tol 20 abꞌil xa yel yich jin mulna ja wetoj, cꞌam junoj ja meꞌ cꞌal noꞌ chiw jix jin chiꞌeytoj, cꞌam cꞌal junoj noꞌ jix el yuneꞌ yet jix jin teynen noꞌ an. 39Cꞌam bꞌey jix wiꞌtej junoj noꞌ meꞌ tol jix chiꞌle eytoj yu noꞌ ooj, jaꞌ tiꞌ wet, tol chin toolane noꞌ, ta ey noꞌ chi too yu elkꞌom yet cꞌualil ma yet akꞌbꞌalil, ilaꞌ tol cha kꞌan stool noꞌ ey jin. 40Jaꞌ yet cꞌualil chin cam yu kꞌakꞌ, jaꞌ yet akꞌbꞌalil chin cam yu siic, cꞌam chi oc jin weyan chi ecꞌ akꞌbꞌal. 41Ilaꞌ tol 20 abꞌil xa weecꞌ ja wetoj; jaxca tuꞌ jix yun stecha cꞌal wu, ey 14 abꞌil jix jin mulna yu cawan ebꞌ ix ja cutzꞌin tiꞌ, jal wajebꞌ xa abꞌil xin, jix jin mulna yu noꞌ ja jobꞌbꞌeal noꞌ tiꞌ, catuꞌ laonel jix ja qꞌuextoj stool scꞌual jin mulnail an. 42Ta man eyoj oc sDiosal Abraham wetoj, cꞌal sDiosal jin mam Isaac, chin ja chej pax toj yin cꞌam niꞌoj tzet ey yul jin kꞌabꞌ, jaꞌ Jehová, jix ilon jin cuscꞌulal cꞌal syaꞌtajilal tzet jix yun jin mulnail, yuxan jaꞌ Jehová jix jaach tenchanen yet maꞌi akꞌbꞌalil.
Swa kꞌane Naj Jacob Yetoj Naj Labán
43Jix yalon naj Labán tet naj Jacob jaxca tiꞌ:
—Jin cutzꞌin ebꞌ ix tiꞌ, catuꞌ wiꞌ jin txiquin ebꞌ tiꞌ la, cꞌal masanil noꞌ meꞌ tiꞌ, wet noꞌ; masanil tzet ey titiꞌ wet cꞌal eloj; jaꞌ tinaniꞌ xin, ¿tzet to wal chi wute ebꞌ ix jin cutzꞌin tiꞌ, cꞌal yetoj yuneꞌ ebꞌ ix tiꞌ? 44Yu jun tuꞌ xin, cu waꞌne can junoj cu wa kꞌane ja wetoj cu cawanil, ẍi naj Labán.
45Catuꞌ jix yiꞌontej jun chꞌen chꞌen naj Jacob, catuꞌ jix slinbꞌa aoj; 46jix lawi tuꞌ, jix yalon tet masanil ebꞌ yican jaxca tiꞌ:
—Yambꞌawejtej chꞌen chꞌen, ẍi Jacob.
Masanil ebꞌ jix yambꞌantej chꞌen chꞌen; jun bꞌulan jix yute ey ebꞌ, catuꞌ jix ey chotan ebꞌ low scꞌatan chꞌen chꞌen tuꞌ. 47Jaꞌ naj Labán, Jegar Sahaduta,#31:47 Jegar Sahaduta, jaꞌ jun tiꞌ yin Arameo, jal pax Galaad, yin Hebreo. Jaꞌ caabꞌ bꞌie tiꞌ chi yal yeloc apnoj “jun bꞌulan aoj, eyoc yin testigoal”. jix yakꞌ yij sbꞌi yin stiꞌ ebꞌ, jal pax Jacob, Galaad jix yakꞌ yij sbꞌi naj.
48Jix lawi tuꞌ, jix yalon pax naj Labán jaxca tiꞌ.
—Jaꞌ tinaniꞌ, jaꞌ jun bꞌulan chꞌen tiꞌ testigo chi yun can oc kin cu cawanil, ẍi. Yu jun tuꞌ, yuxan jix yij can sbꞌi jun txꞌotxꞌ tuꞌ yin Galaad. 49Catuꞌ jix yijon pax sbꞌi Mizpá,#31:49 Jaꞌ yin Hebreo, jun kꞌane Mizpá chi yal yeloc apnoj, “torre chi majon sjul junoj tzetyetal”. yutol jix yal naj Labán jaxca tiꞌ:
—Jaꞌ Jehová chi cu ilon cu cawanil, yet cꞌamxa bꞌey oj kil-le cu bꞌa junjun jon. 50Ta oj ja wetne ebꞌ ix jin cutzꞌin tiꞌ, ma oj ja sey wanojxa ebꞌ ix ix ja wistiloj, caxcꞌal cꞌam mactxequel chi alon ecꞌoj, jaꞌ Jehová chi cꞌal yilaꞌ, ẍi naj Labán.
51Jix yalon pax naj Labán tet Jacob jaxca tiꞌ:
—Jaꞌ jun bꞌulan chꞌen tiꞌ, cꞌal jun chꞌen chꞌen jix ja linbꞌa can a tuꞌ, jaꞌton chꞌen chi cancan txꞌoxbꞌanileal cu nan cu xol cu cawanil. 52Jaꞌton chꞌen chi oc can testigoal kin cu cawanil, tol cꞌamxa chi skeꞌ cu kꞌaxbꞌone junoj jon jun moon tiꞌ, yet cꞌam chi cu cajle a cu bꞌa junjun jon. 53Jaꞌ ojabꞌ sDiosal ja mam icham Abraham cꞌal sDiosal jin mam icham Nahor, chi cu iloni, ẍi naj Labán.
Jix lawi tuꞌ, jix yakꞌon stiꞌ Jacob tet Jehová, bꞌey chi oc naj yin eyilal yetoj smam, jaꞌton Isaac. 54Jix swaꞌne a jun yet xaambꞌal naj Jacob bꞌey sjolom jun wonan tuꞌ, catuꞌ jix yawtentej ebꞌ yican low yetoj. Jix low masanil ebꞌ bꞌey jun wonan tuꞌ, jaꞌ tituꞌ jix ecꞌ akꞌbꞌal yu ebꞌ.
55Jaꞌ yet jix kꞌinibꞌi a yet junxa cꞌu, jix a waan naj Labán, jix stzꞌubꞌon can el stiꞌ ebꞌ ix scutzꞌin, cꞌal stiꞌ ebꞌ yitxiquin, catuꞌ jix yalon can watxꞌ kꞌane yibꞌan ebꞌ, catuꞌ jix meltzo cantoj bꞌey sna.
Pilihan Saat Ini:
Génesis 31: knj
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2016, Wycliffe Bible Translators, Inc. All rights reserved.