Luke 8
8
1တၢ်မၤအသးဝံၤအလီၢ်ခံ တကဲၢ်ဖွိနဲၢ်, ယ့ၣ်ရှူးလဲၤတၢ်ဘျီး ခီဂီၤဝ့ၢ်တလိၣ်လါသဝီတလိၣ်, ဘျီး ဟီတရါတၢ်သးခုကစီၣ်ဘၣ်ဃးကစၢ်ယွၤအဘီအမုၢ်လိ. ဘၠီၣ်တၢ်မၢဖွိတဆ့ခံဂၤ လဲၤပကိးလါအီၤ. 2ဘျီး ဘၠီၣ်မ့ၣ်ပှၢ်တနီၤလိ ယ့ၣ်ရှူးမၤဟါမၢ်ပၤစၢၤအီၤလိ တၢ်ဝ့းတၢ်နါ ဘျီး တၢ်ဆူးတၢ်ဆါတလိၣ်, နီၢ်မၤရံ (လိအဘၣ်တၢ်ကိးနဲၢ်နဲၢ်အီၤလိ ဘၠီၣ်မၤကဒါလၣ်ဖွိ) လိတၢ်နါနွံဒုၣ်ဘၣ်တၢ်နီၤဟးထီၣ်ကွံၤလိ အပူၤ. 3စီၤဃူၤစါလိ အကွၢ်ထွဲစီၤပၤ အတၢ်ဖွိတၢ်လံၤလိ စီၤပၤဟ့ၤရိာ်အနီပူၤတဂၤအမါ နီၢ်ယိၤအၣ်နၣ်, ဘျီးနီၢ်စူၤစၣ်နၤလါ ဘၠီၣ်မ့ၣ်ပှၢ်အဂၤအိၣ်ဘျၢသးလိ အသူအဟီၣ်ခွိၣ်ကပ့ၤဒၣ်ဝဲလိအကမၤစၢၤယ့ၣ်ရှူးဘျီး အခ့အပှၤတလိၣ်, ပိၤအဝဲဒၣ်အခံနဲၢ်နဲၢ်လိ. 4ဘၠီၣ်ထီဖူၣ်ထီခၠၢ ဟဲလိ ယ့ၣ်ရှူးအအိၣ်ခဲနဲအံၤ ခဲနဲအံၤလိ ဝ့ၢ်တဝ့ၢ်ဝံၤတဝ့ၢ်ဘျီးဘၠီၣ်ထီဖူၣ်ထီခၠၢဖးဒွိၣ်ပၤဖှိၣ်အသးနဲၢ်, ယ့ၣ်ရှူးကတိၤတၢ်ကတိၤတထ့ၣ်အံၤလိ. 5ဘၠီၣ်တဂၤ လဲၤဖှ့းလီၤတၢ်အချံလိ. ခါဖဲ အဝဲဒၣ် ဖှ့းတၢ်ချံလိ စံၤပူၤနဲၢ်, တနီၤလီၤဘၣ်လိ ကျဲၣ်လိၤ, တၢ်ယီၢ်တံၢ်အီၤ, ဘျီး ထွိၣ်ဘီၣ်ဖွိတလိၣ်အီၣ်ကွံၤအီၤလိ. 6တနီၤလီၤဘၣ်လိ လၢၢ်ခွိၣ်, ဘျီး တၢ်မုၢ်တၢ်ဘိၣ်တလိၣ်မဲထီၣ်နဲၢ်, မဲၢ်လိ ဟီၣ်ခွိၣ်တၢ်တစူၤစိၣ်ဘၣ်အဃိ, အဝဲဝီၤဃ့ထီကွံၤဝဲဒၣ်လိ. 7အဂၤတနီၤ လီၤဘၣ်ဝဲလိ တၢ်ဆှုၣ်တၢ်မဲအကျၣ်ဘျီး မဲၢ်အဒွိၣ်ထီၣ်ဟူၤဒ်သိးသိး ဘျီး နီၢ်ခဲဘံကွံၤအီၤအဃိ သ့းကွံၤဝဲဒၣ်လိ. 8ဘျီးတၢ်ချံတနီၤနီၤလီၤဘၣ်လိ ဟီၣ်ခွိၣ်ညၣ်ထ့ၣ်ဂ့ၤအလီၢ်လိ. တၢ်မုၢ်တၢ်ဘိၣ်တလိၣ်ဒွိၣ်ထီၣ်ဘျီး သၣ်ထီၣ်တၢ်သၣ်တကယၤလိ.’
ဘျီး ယ့ၣ်ရှူးမၤကတၢၢ်အတၢ်ကတိၤဘျီးစံးဝဲ, ‘လိတၢ်နံၤအဃိ, ဘၠီၣ်အိၣ်လါ အနၢ်လိ အနၢ်ဟူတၢ်သ့းနဲၢ် မ် အဒိကနၣ်တၢ်တကဲၢ်. 9ယ့ၣ်ရှူးအခ့အပှၤတလိၣ်သ့းကွၢ်အီၤလိ တၢ်ကတိၤဒိတထ့ၣ်အံၤအခီပညီမဲၢ်တၢ်မနီၢ်လဲၣ်နဲၢ်လိ. 10ယ့ၣ်ရှူးစံးဆၢဝဲ, ‘တၢ်သံညါနၢ်ပၢၢ်ဘၣ်ဃးဘျီး ကစၢ်ယွၤအဘီအမုၢ်အတၢ်ကိသုၣ်နဲၢ်, တၢ်ဟံပၤစၢၤအီးလိ သုဝဲလ့, မဲၢ်မဲၢ် ဘၠီၣ်အဂၤတလိၣ်နဲၢ်, တၢ်ပၤဖျါထီၣ်အီၤခီဖျိ တၢ်ကတိၤဒိဒ်သိး အဝဲဝီၤ ကကွၢ်တၢ်လၢၤတထ့ၣ်တၢ်ဘၣ်, ဘျီး ကဒိကနၣ်တၢ်လၢၤတနၢ်ပၢၢ်တၢ်ဘၣ်နဲၢ်လိ.’ 11တၢ်ကတိၤဒိတထ့ၣ်အံၤ အခီပညီမဲၢ်ဝဲဒ်အံၤ, တၢ်ချံမဲၢ်ဝဲ ကစၢ်ယွၤအကလုၢ်ကထါလိ. 12တၢ်ချံလိ အလီၤဘၣ်လိ ကျဲၣ်လိၤပၤဖျါထီၣ်ဘၠီၣ်တဖၣ်လိ အနၢ်ဟူဘၣ်တၢ်လၢၤမုၣ်ကီၤလံၢ်ဟဲဘျီး ဟးထီၣ်ကွံၤတၢ်ကလုၢ်ကထါလိ အဝဲဝီၤတလိၣ် အသးကံၢ်ပူၤ, ဒ်သိး အကတြီၤအဝဲဝီၤလိ အသုစူၤက့ၤနၤက့ၤတၢ်ဘျီး ဒိးန့ၢ်ဘၣ်တၢ်အုၣ်က့ၤခီၣ်က့ၤ တဂၤအဂီၢ်နဲၢ်လိ. 13တၢ်ချံလိ အလီၤလိ လၢၢ်ခွိၣ်ပၤဖျါထီၣ်ဘၠီၣ်တဖၣ်လိ အနၢ်ဟူဘၣ်တၢ်ကလုၢ်ကထါဘျီး တူၢ်လိၤဝဲလိ တၢ်သးခုအပူၤလိ. လၢၤမၤအသးဒ်တၢ်ချံလိ အဂံၢ်တအိၣ်သူၣ်လီၤအသးဖးထိနဲၢ်လိ. အဝဲဝီၤစူၤတၢ်နၤတၢ်ထဲ တစိၤဖွိဧိၤ, ဘျီးဖဲတၢ်မၤကွၢ်အဆၢကတီၢ်ဟဲနဲၢ်, အဝဲဝီၤလီၤကိၢ်ကွံၤဝဲလိ. 14တၢ်ချံလိ အလီၢ်ဘၣ်လိ တၢ်ဆှုၣ်တၢ်မဲအလိၤပၤဖျါထီၣ်ဘၠီၣ်တလိၣ်လိ အနၢ်ဟူဘၣ် တၢ်အကလုၢ်ကထါလၢၤ, တၢ်သူၣ်ကွိၢ်သးဂီၤ, တၢ်ထူးတၢ်တီၤဘျီး တၢ်အိၣ်မူအအံၤတဃၣ်အတၢ်မုၣ်တၢ်ပၢၤတလိၣ်နုၤလီၤခဲဘံကွံၤအဝဲဝီၤ ဒ်တၢ်ဆှုၣ်တၢ်မဲအသိး, ဘျီး မၤအသးဒ်တၢ်မုၢ်တၢ်ဘိလိ အသၣ်တမံလၢၤနီတဘျီဘၣ်အသိးနဲၢ်လိ. 15တၢ်ချံလိ အလီၤဘၣ်လိ ဟီၣ်ခွိၣ်ညၣ်ထ့ၣ်အဂ့ၤပၤဖျါထီၣ်ဘၠီၣ်တလိၣ်လိ အနၢ်ဟူဘၣ် တၢ်အကလုၢ်ကထါဘျီး ဟံးဃၤမါတ့န့ဝဲလိ သးလိအဂ့ၤဘျီး စူၤယွၤအကလုၢ်အပူၤဘျီး မၤဝဲဒ့းန့ၤနီၢ်ကီၢ်တုၤဝဲလိ အဝဲဝီၤ သၣ်ထီၣ်တၤသၣ်တဘျီလိ. 16ဘၠီၣ်တဒွဲထီၣ်မဲၣ်အူဒၢဘျီး ကျၢၢ်ဘံအီၤလိ တၢ်တမံၤမံၤမဲၢ်တမဲၢ် ပၤအီၤလိ လီၢ်မံဒါအဖီလၤနီတဂၤဘၣ်. မဲၢ်မဲၢ်တခိ ဘၠီၣ်ပၤအီၤလိ မဲၣ်အူဒၢအလီၢ်, ဒ်သိး ဘၠီၣ်ဟဲနုတလိၣ်ကထ့ၣ်ဘၣ်တၢ်ကပီၤအဂီၢ်လိ. 17တၢ်တမံၤလၢ်လၢ်လိ အဘၣ်တၢ်ပၤကိသုၣ်အီၤနဲၢ်, ကဘၣ်တၢ်ဒုးအိၣ်ဖျါထီၣ်အီၤလိခိဘျီး တၢ်တမံၤလၢ်လၢ်လိ အဘၣ်တၢ်မၤကျၢၢ်ဘံအီၤနဲၢ်, ကဘၣ်တၢ်ထ့ၣ်န့ၢ်ဘျီး လီၣ်ဖျါထီၣ်အီၤနဲၢ်လိ. 18လိတၢ်နံၤအဃိ, သုနၢ်ဟူတၢ်ဒ့းလဲၣ်ခိနဲၢ်, ပလီၢ်သုသးတကဲၢ်. တၢ်ဂ့ၢ်ဒ့းအ့ၤ, ဘၠီၣ်တဂၤလၢ်လၢ်လိ အတၢ်အိၣ်ဝဲ တမံၤမံၤနဲၢ် တၢ်ကဟ့အၣ်ထီၣ်အီၤ, မဲၢ်မဲၢ် ဘၠီၣ်တဂၤလၢ်လၢ်လိ အတၢ်တအိၣ်နီတမံၤနဲၢ်, တၢ်လိ အဝဲဒၣ်ဆိကမိၣ်လိ အအိၣ်လါအီၤပံတံဖွိနဲၢ်နဲၢ်, တၢ်ကဟံးထီၣ်ကွံၤလိ အအိၣ်လိ. 19ယ့ၣ်ရှူးအမွိၢ်လါ အထီပုၢ်ဝဲၢ်တလိၣ်ဟဲလိ အအိၣ်, လၢၤလဲၤတုၤဝီၤလိ အအိၣ်တသ့းဘၣ်. မဲၢ်လိ ဘၠီၣ်အိၣ်နီအဃိလိ. 20ဘၠီၣ်တဂၤစံးဘၣ်ယ့ၣ်ရှူး, ‘နမွိၢ်လါ နထီပုၢ်ဝဲၢ်ခွါတလိၣ်ဆ့ထၢၣ်လိ တၢ်ချၢ, ဘျီးအဲၣ်ဒိးထ့ၣ်နၤလိ.’ 21ယ့ၣ်ရှူးနဲၢ်စံးဘၣ်အဝဲဝီၤ ကိးဂၤဒ့း, ‘ယမွိၢ်လါ ယထီပုၢ်ဝဲၢ်ခွါတလိၣ် မဲၢ်ဝဲ ဘၠီၣ်တလိၣ်လိ အနၢ်ဟူကစၢ်ယွၤအကလုၢ်ကထါဘျီး စူၤဝဲနဲၢ်လိ.’ 22ဘၣ်တနံၤနဲၢ် ယ့ၣ်ရှူးလဲၤနုလါ အခ့အပှၤတလိၣ်ဆူချံတဘ့ၣ်အပူၤဘျီး စံးဘၣ်အဝဲဝီၤ, ‘ပကလဲၤခီပကိးလိ နိၣ်ဘးခိပၤတကဲၢ်.’ ဘျီးအဝဲဝီၤ လဲၤဝဲလိ.’ 23အဝဲဝီၤ လဲၤတၢ်လိ ချံပူၤအဖၢမုၢ်နဲၢ်, ယ့ၣ်ရှူးမံဘၣ်အသးလိ. ကလံၤမုၢ်လီၤလိ အီပူၤဘျီး ထ့နူၤလီၤပှဲၤချံအပူၤ, ဘျီး အဝဲဝီၤကိးဂၤဒ့း အိၣ်လိ တၢ်ကွိၢ်တၢ်ဂီၤဖးဒွိၣ်အပူၤလိ. 24အခ့အပှၤတလိၣ် လဲၤလိ ယ့ၣ်ရှူးအအိၣ်ဘျီး ကိးဂ့ၤထ့အီၤဘျီး စံးဝဲ, ‘ကစၢ်ဧၢ, ကစၢ်ဧၢ ပကသံလိ.’ ယ့ၣ်ရှူးဂ့ၤထ့ဘျီးမၢလီၤအကလုၢ်လိ ကလံၤလါလပီတလိၣ်အလိၤ, အဝဲဝီၤအိၣ်ဘှ့ၣ်ဂ့ၤဝဲဘျီး အိၣ်ဂ့ၤဝဲ ဂၢၢ်တပၢၢ်လိ. 25တုၤနုၤတဘျီး အဝဲဒၣ်စံးဘၣ်အခ့အပှၤတလိၣ်, ‘သုတၢ်စူၤတၢ်နၤအိၣ်ဖဲလဲၣ်ခိ.’ လၢၤဘျီးအဝဲဝီၤ ကမၢကမၣ်ဘျီး သးပလံၤတၢ်ဘျီး စံးလိၤအသးတဂၤလါတဂၤ, ‘ဘၠီၣ်တဂၤအံၤမဲၢ်မတဂၤလဲၣ်. အဝဲဒၣ်မၢလီၤအကလုၢ်လိ ကလ့ၤလါလပီတလိၣ်အလိၤ. ဘျီး အဝဲဝီၤကနၣ်အကလုၢ်နီၢ်လိ.’ 26အဝဲဝီၤလဲၤ, ဘျီးခီဂၤလိ ကီၢ်ကဒါရၤ1လိ အအိၣ်ဖဲကီၢ်ကၤလံၤလါအဘးခိပၤလိ. 27ယ့ၣ်ရှူးစံၣ်လီၤလိ ထ့ကၢၢ်ခွိၣ်နဲၢ်, အဝဲဒၣ်ဘၣ်တၢ်သဂၢၢ်အီၤလိ ဘၠီၣ်ဝ့ၢ်ဖွိဖဲနံၤတဂၤလိ တၢ်နါတလိၣ်အိၣ်လိအလိၤနဲၢ်လိ. အဝဲဒၣ် တကူတသွိးတၢ်လိ အလိၤနဲၢ်ယံၤနီၢ်လ့, ဘျီးတအိၣ်လိဟံၣ်ဘၣ်. မဲၢ်မဲၢ် အိၣ်ဒၣ်ဝဲဖဲတၢ်သွၣ်ခွိၣ်အတၢ်အအွိပူၤတလိၣ်နဲၢ်လိ. 28ဖဲအဝဲဒၣ်ထ့ၣ်ယ့ၣ်ရှူးနဲၢ်ကိးထီၣ်ဝဲလိ အကလုၢ်ဖးဒွိၣ်, ထွိၣ်လီၤပှီၢ်အသးလိ အမံၤညါဘျီး ကတိၤတၢ်လိ အကလုၢ်ဖးဒွိၣ်, ‘တၢ်ထိကတၢၢ်ကစၢ်ယွၤအဖွိခွါယ့ၣ်ရှူးဧၢ, နဘၣ်ဃးလါယၤဒ့းလဲၣ်ခိ. ယဃ့ကညးနၤ, တဘၣ်စံၣ်ညီၣ်ယၤတဂ့ၤ.’ 29အဝဲဒၣ်စံးတၢ်အံၤနဲၢ်, မဲၢ်လိ ယ့ၣ်ရှူးဟီထီၣ်ကွံၤပၤစၢၤလ့တၢ်နါဒ်သိးအကဟးထီၣ်ကွံၤလိ အလိၤအဃိနဲၢ်လိ. တၢ်ခါအံၤဖီၣ်ဃၤနီၢ်အီၤခဲနဲအံၤ, ခဲနဲအံၤဘျီး အဝဲဒၣ်အစုၣ်အခီၣ်ဘၣ်တၢ်စၢၣ်ဃၤအီၤလိ တၢ်နါအဝဲနံၤလိပှၢ်လၤကျၣ်အပူၤလိ. 30ယ့ၣ်ရှူးသ့းကွၢ်အီၤ, ‘နမံၤဒ့းလဲၣ်ခိ.’
အဝဲစံးဆၢဝဲ, ‘ယမံၤမဲၢ် လ့းကူၣ်’ အဂ့ၢ်မဲၢ်လိ တၢ်နါအိၣ်ဘျၢသးလိ လဲၤနုပၤစၢၤလ့လိအပူၤနဲၢ်လိ. 31တၢ်နါတလိၣ်ဃ့ကညးယ့ၣ်ရှူးဒ်သိး အသုတဒုးလဲၤလီၤအဝဲဝီၤလိ တၢ်ပူၤဖးထိတဂ့ၤအဂီၢ်နဲၢ်လိ. 32ထွိးတဖူၣ်အီၣ်အဆၣ်ဘူးလွိၤသးလိ တၢ်လုၢ်အကပၤလိ. တၢ်ဝ့းတၢ်နါတလိၣ်ဃ့ကညးယ့ၣ်ရှူးလိ အကပျၢ်ကွံၤအဝဲဝီၤလဲးနုလိ ထွိးတဖူၣ်နဲၢ်အပူၤဘျီး အဝဲဒၣ် ပျၢ်လီၤကွံၤ အဝဲဝီၤလိ. 33လိတၢ်ဒ့းန့ၤအဃိ, တၢ်ဝ့းတၢ်နါတလိၣ်ဟးထီၣ်ကွံၤလိ ဘၠီၣ်တဂၤနဲၢ်အလိၤဘျီး လဲၤနုလိ ထွိးတဖူၣ်နဲၢ်အပူၤလိ. ထွိးထီဖူၣ်စံၣ်သဖျိလီၤလိလ့ကပၤလိကွံၣ်ပူၤဘျီးလီၤအူးသ့းကွံၤလိ. 34ဘၠီၣ်ကွၢ်ထွိးတလိၣ် ထ့ၣ်တၢ်လိ အမၤအသးလိ. သတးဘျီး အဝဲဝီၤက့ၤစံၣ်ဝဲဘျီး ဒွိးဟူထီၣ်သးလီၤတၢ်ကစီၣ်နဲၢ်လိ ဝ့ၢ်ပူၤဘျီး လိခိခွိၣ်ဒူသဝီတလိၣ်အပူၤလိ. 35ဘၠီၣ်ထီဖူၣ်ထီခၠၢတလိၣ်ဟးထီၣ်ဒ်သိး အကထ့ၣ်ဘၣ်တၢ်လိ အမၤပၤစၢၤအသးတလိၣ်လိ. အဝဲဝီၤ ဟဲလိယ့ၣ်ရှူးအအိၣ်ဘျီး ထ့ၣ်ဘၣ်ဘၠီၣ်တဂၤလိ တၢ်ဝ့းတၢ်နါတလိၣ်ဟးထီၣ်ကွံၤလိ အလိၤ, ဆ့နီၤဖဲယ့ၣ်ရှူးအခီၣ်ထံး, အိၣ်လါ တၢ်ကူတၢ်သွိးလိ အလိၤအိၣ်လါအသးလိအဘၣ်လီၢ်ဘၣ်စး, ဘျီး အဝဲဝီၤ သးပလံၤတၢ်ကိးဂၤဒ့းလိ. 36ဘၠီၣ်လိ အထ့ၣ်ဘၣ်ပၤစၢၤဝဲ တၢ်မၤအသးတလိၣ်စံးဘၣ်ဘၠီၣ်ထီဖူၣ်ထီခၠၢလိ ဘၠီၣ်လိ တၢ်ဝ့းတၢ်နါဒိးပၤစၢၤအီၤတဂၤဘၣ်တၢ်မၤဟါမၢ်ဂ့ၤအီၤလိ ကျဲၣ်ဒ်လဲၣ်ခိ အဂ့ၢ်နဲၢ်လိ. 37တုၤနုၤတဘျီးဘၠီၣ်ထီဖူၣ်ထီခၠၢလိ အအိၣ်ဖဲကီၢ်ကဒါရၤကပွိၤကပၤတလိၣ်ခဲလုၤ မၢယ့ၣ်ရှူးဟးထီၣ်ကွံၤ, တၢ်ဂ့ၢ်မဲၢ်လိအဝဲဝီၤ သးပလံၤနီၢ်သးပလံၤသ့းတၢ်အဃိလိ. သတးဘျီးယ့ၣ်ရှူးနုၤလီၤဆူချံပူၤဘျီး ဟးထီၣ်ကွံၤဝဲဒၣ်လိ. 38ဘၠီၣ်လိတၢ်ဝ့းတၢ်နါ ဟးထီၣ်ကွံၤပၤစၢၤဝဲလိ အလိၤတဂၤနဲၢ် ဃ့ကညးယ့ၣ်ရှူးဘျီးစံးဝဲ, ‘မၢယလဲၤပကိးနၤတကဲၢ်.’ လၢၤဘျီး ယ့ၣ်ရှူးပျၢ်လီၤကွံၤအီၤဘျီးစံးဝဲ, 39‘က့ၤဂ့ၤလိ နဟံၣ်ဘျီး ဒွိးသံညါ ဘၠီၣ်တဂၤတလိၣ်လိ ကစၢ်ယွၤမၤပၤစၢၤတၢ်လိ နဂီၢ်ဒ့းလဲၣ်နဲၢ်တကဲၢ်.’
ဘၠီၣ်တဂၤနဲၢ်လဲၤလိ ဝ့ၢ်ထီဝ့ၢ်ဘျီး စံးဘၣ်ဘၠီၣ်လိ ယ့ၣ်ရှူးမၤပၤစၢၤတၢ်လိ အဂီၢ်ဒ့းလဲၣ်အဂ့ၢ်နဲၢ်လိ. 40ယ့ၣ်ရှူးက့ၤခွိၣ်ခံဂ့ၤလိနိၣ်အဝၢ်ဘးခိတကပၤနဲၢ်, ဘၠီၣ်ထီဖူၣ်ထီခၠၢ တူၤလိၤခီၣ်ဆၢအီၤ, တၢ်ဂ့ၢ်မဲၢ်လိ အဝဲဝီၤ အိၣ်ခိးကွၢ်လၢ် ပၤစၢၤ အကျဲၣ်အဃိနဲၢ်လိ. 41ဖဲနံၤ, ဘၠီၣ်တဂၤလၢ်လၢ်လိ အမံၤမဲၢ်ဝဲ စီၤယၤအ့ၤရူးဘၠီၣ်ခွိၣ်ဘၠီၣ်နၢ်တဂၤ, ဖဲဝ့ၢ်အဘူၣ်ဘျီၣ်လိ အမဲၢ်တၢ်ဘါလီၢ်ဟဲတုၤဝဲဒၣ်လိ. အဝဲဒၣ် ချံလီၤအခီၣ်ဒ့ဖဲယ့ၣ်ရှူးအခီၣ်ထံးဘျီး ဃ့ကညးအီၤဒ်သိး အကလဲၤလိ အဟံၣ်. 42တၢ်ဂ့ၢ်မဲၢ်လိ အဝဲဒၣ် အဖွိမုၣ်လိ အအိၣ်ဝဲတဂၤဧိၤ, ဘျီး အသးအိၣ်ဝဲ တဆ့ခံနံၣ်နဲၢ်ဘူးနီၢ်လိ ကသ့းအဃိနဲၢ်လိ. ဖဲယ့ၣ်ရှူးလဲၤလိ ကျဲၣ်နဲၢ်, ဘၠီၣ်ထီဖူၣ်ထီခၠၢတလိၣ်သနံးအီၤကိးကပၤဒ့းလိ. 43ဘၠီၣ်မ့ၣ်ပှၢ် အိၣ်ဝဲဒၣ်တဂၤလိ အခီၣ်ဘၣ်ပၤစၢၤဝဲတၢ်ဆါသွံၣ်လီၤနီၢ်လိ တဆ့ခံနံၣ်အတီၢ်ပူၤဘျီး အဝဲဒၣ် အတၢ်လၢာ်ဘူၣ်လၢာ်စ့ၤနီလိ ကသံၣ်သရၣ်တလိၣ် ကမၤဟါမၤအီၤအဂီၢ် တုၤနီၢ်လိ တၢ်လိ အအီၣ်လိ အအိၣ်ခဲလုၤဟါလုၤဝဲလၢၤဘၠီၣ်မၤဟါမၢ်တန့ၢ်နိၤနီတဂၤခိ. 44အဝဲဒၣ် ဟဲထီၣ်လိ ဘၠီၣ်ထီဖူၣ်ထီခၠၢ အကျၣ်လိ ယ့ၣ်ရှူးအလီၢ်ခံဘျီး ထွိးယ့ၣ်ရှူးအဆ့ကၤအယဲၢ်ဘျီး အသွံၣ်လီၤနဲၢ် အိၣ်တီၢ်ကွံၤဝဲ တဘျီဃီလိ. 45ယ့ၣ်ရှူးသ့းကွၢ်ဝဲ, ‘မတဂၤထွိးဘၣ်ယၤလဲၣ်.’ ဘၠီၣ်ကိးဂၤဒ့း သမၢဝဲ, ဘျီး စီၤပ့းတရူးစံးဝဲ, ‘ကစၢ်ဧိ ဘၠီၣ်ထီဖူၣ်ထီခၠၢ အိၣ်တရံးတံၤပိၤနၤလါ သနံးနၤလိ.’ 46လၢၤဘျီး ယ့ၣ်ရှူးစံးဝဲ, ‘ဘၠီၣ်ထွိးဘၣ်တဂၤလိ.’ တၢ်ဂ့ၢ်ဒ့းအ့ၤယသံညါယဲဝဲ တၢ်စိတၢ်ကမီၤဟးထီၣ်ကွံၤလိ ယလိၤနဲၢ်လိ. 47ဘၠီၣ်မ့ၣ်ပှၢ်တဂၤနဲၢ်ထ့ၣ်လိ အဝဲဘၣ်တၢ်သံညါ နဲၢ်အီၤ, သတးဘျီး ဟဲဝဲလိ တၢ်ကနိးကစူၤအပူၤဘျီး ထွိၣ်လီၤပှီၤအသးလိ ယ့ၣ်ရှူးအခီၣ်ထံးလိ. ဖဲနံၤလိ ဘၠီၣ်ကိးဂၤဒ့းအမံၤညါ အဝဲဒၣ်စံးဘၣ်ယ့ၣ်ရှူးလိ အဝဲဒၣ်ထွိးဘၣ်ပၤစၢၤအီၤလိ မနီၢ်အဃိ, ဘျီး အဝဲဒၣ်ဘၣ်တၢ်မၤဟါမၢ်အီၤတဘျီဃီ လိကျဲၣ်ဒ်လဲၣ်အဂ့ၢ်နဲၢ်လိ. 48ယ့ၣ်ရှူးစံးဘၣ်ဘၠီၣ်မ့ၢ်ပှၢ်နဲၢ်, ‘ယဖွိမုၣ်ဧိ နတၢ်စူၤနၢ်နၤ မးဟါမၢ်ဂ့ၤနၤလ့. က့ၤဂ့ၤလိ တၢ်သူၣ်မူၤသးမူၤအပူၤတကဲၢ်.’ 49ယ့ၣ်ရှူးကတိၤတၢ်ကတိၤတထ့ၣ်အံၤအဖၢမုၢ်နဲၢ်, ဘၠီၣ်ဆှၢတၢ်ကစီၣ်တဂၤ ဟဲလိ ဘၠီၣ်အခွိၣ်, စီၤယၤအ့ၤရူးတဂၤအံၤ အဟံၣ်ဘျီး စံးဘၣ်ဝဲ, ‘နဖွိမုၣ်သ့းလ့. တဘၣ်မၤတံၤတၤလၢၤ သရၣ်တဂ့ၤ.’ 50လၢၤဘျီး ယ့ၣ်ရှူးနၢ်ဟူတၢ်အံၤဘျီး စံးဘၣ်စီၤယၤအ့ၤရူး, ‘တဘၣ်ဘၣ်ယိၣ်တၢ်တဂ့ၤ. ထဲနၤတၢ်တကဲၢ်. ဘျီး အဝဲဒၣ် ကသါမါထီၣ်ဂ့ၤဝဲလိ.’ 51အဝဲဒၣ်လဲၤတုၤလိ ဟံၣ်နဲၢ်, အဝဲတမၢဘၠီၣ်လဲၤနုပကိးလါ အီၤနီတဂၤဘၣ်. မၢဒၣ်ဝဲထဲစီၤပ့ၤတရူး, စီၤယိၤဟၣ်,စီၤယၤကိာ်လါ ဖွိသၣ်မ့ၣ်ပှၢ်အမွိၢ်အပၢ်တလိၣ်လိ. 52ဘၠီၣ်အိၣ်ဝဲဖဲနံၤကိးဂၤဒ့းဟီၣ်ဝဲယၢၤဝဲလိ ဖွိသၣ်မ့ၣ်ပှၢ်အဃိလိ. ယ့ၣ်ရှူးစံးဝဲ, ‘တဘၣ်ဟီၣ်တဂ့ၤ ဖွိသၣ်မ့ၣ်ပှၢ်နဲၢ် တသ့းဘၣ်. မဲၢ်ဒၣ်အမံဘၣ်အသးလိ. 53အဝဲဝီၤ နံၤဘၣ်ဖၣ်လဲဝဲ, တၢ်ဂ့ၢ်မဲၢ်လိ အဝဲဝီၤ သံညါလိဘၠီၣ်မ့ၣ်ပှၢ်ဖွိသၣ်နဲၢ်, သ့းဝဲအဃိလိ. 54လၢၤဘျီး ယ့ၣ်ရှူးဖီၣ်ဃၤဘၠီၣ်မ့ၣ်ပှၢ်ဖွိသၣ်အစဒ့ဘျီး ကိးထီၣ်ဝဲ, ‘ဘၠီၣ်မ့ၢ်ပှၢ်ဖွိသၣ်ဧိ ဂ့ၤထ့တကဲၢ်.’ 55ဘၠီၣ်မ့ၣ်ပှၢ်ဖွိသၣ်အသးသမူ ဟဲက့ၤခွိၣ်ခံဂ့ၤ, ဘျီး ဂ့ၤထ့ဂ့ၤဝဲတဘျီဃီလိ. ဘျီးယ့ၣ်ရှူးမၢအဝဲဝီၤလိ အကဟ့အီၣ်ဘၠီၣ်မ့ၣ်ပှၢ်ဖွိသၣ်မုၢ်နဲၢ်လိ တၢ်တမံၤမံၤလိ. 56ဘၠီၣ်မ့ၣ်ပှၢ်ဖွိသၣ်အမွိၢ်အပၢ်တလိၣ်ကမၢကမၣ်ဝဲ, လၢၤဘျီး ယ့ၣ်ရှူးမါလွိၤအဝဲဝီၤဒ်သိး အသုတစံးဘၣ်ဘၠီၣ်နီတဂၤတဂ့ၤလိတၢ်မၤပၤစၢၤအသးအံၤအဂ့ၢ်တဂ့ၤနဲၢ်လိ.
Pilihan Saat Ini:
Luke 8: ktpv-rv
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
This translation of the Karen, Paku Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
