Mʉkpanganɨa 21
21
Nɔtanɨa ngɨyɔ Isaka
1MAKWƆƁƗƗ ɔ꞉mɨkɨa Sala isingo ta ndʉ aka a꞉sugo jɛnɛ-ɔɔ, nɔ, ɔ꞉minjo ɨkyɛmʉ ngɨangɔ a꞉mʉpanaka jɛnɛ. 2Kʉdɔ, ɨyɔ Sala ɔ꞉tɔsio ɓʉa, ngbinga ngɨa Abalaama a꞉ɓio-ɔɔ tɨa mʉdɔɓɛ. Nɔ, ɔnɔta mwna ata gue, kʉ angbinga ngɨa Asɔɓɨɨ a꞉sugo jɛnɛ-ɔɔ. 3Kʉdɔ, Abalaama a꞉mʉsʉa mwana ngɨananɨ angɔ, Sala a꞉mʉnɔtɨa, ino ɓɔ Isaka. 4Ɨyɛ ndʉ Isaka, a꞉ndaniso makwaa ɓɛgɨna, nɔ, akpatanakɨa nɔ ʉpanʉ ngʉwa Asɔɓɨɨ e꞉njo, Abalaama ɔ꞉mukio mwana angɔ ɨgʉnɨ. 5Isaka a꞉nɔtanɨa ɓɔ Abalaama ɔ꞉ɓieni tɨa nɔ mago mɨa mʉngana.
6Kʉdɔ, Sala ɔ꞉sugo ɓɔ: «Asɔɓɨɨ ɔ꞉nawiso ɓaka ɨmɨ nɔa nɔ ɨgyagya-ee, dɔ, mombi muɓomu ngɨa ɔ꞊ka suo, ɨsaʉ ngɨyɛkɛ, a꞊nɔa suo kʉ ɨhɔ nɛmɨ. 7Eeɓe! Ya꞉ɓio ndɨ jɛnɛ kʉɔ adaa ngɨa ɓaɓɨa-ɔɔ Abalaama ɓɔ ɨmɨ, Sala na꞊mwiso sina kʉɔ ɓana maɓɛɨ? Ɨnadɔ, nɔmʉnɔtɨɔ gwa ta gue mʉngana, ɔɓieni ɨyɔ tɨta mʉkʉʉ.» 8Ɨyɛ ndʉ Isaka a꞉pipo kyɛnda ɓɔ gba, ɓɔ꞉mutaiso maɓɛɨ. Kʉdɔ, nɔ ɓisi ngʉɓɔnanɨ, Abalaama ɔ꞉dyiso ʉmbɔ wɔta ʉja.
Abalaama ɔkponyɔ atɨ Hagalɨ nɔ Ɨsɨmaɛlɨ
9Ɓisi mʉngana, Sala ɛ꞉na Ɨsɨmaɛlɨ, mwana ɔ Abalaama ngɨa Hagalɨ, muto wɔ Ɓamisili ɔngɔ, a꞉mʉnɔtɨa, ɔɓieni akɔnononoko. 10Ga Sala nɔ Abalaama ɓɔ: «Yɔsisekiomʉ pɔ bele, ɓɔ mwana ngɨa ɔ mombi ɔ tɛa, ɨdya mʉgyɛndɔ wɔ maɓɨɨ, ɨhɔ nɔ mwana ngɨasɛmɨ Isaka. Ɨyɔ ɨhɔ nɔ inye, ɓʉkponyo ta kponyo.» 11Kʉdɔ, yaka ngɨyɛnɛnɨ, ya꞉mʉkɨa Abalaama amʉtɨma ɓɨɓɨ nɔgbɛ, dɔ, Ɨsɨmaɛlɨ a꞉ɓio kʉ mwana angɔ. 12Yakamɛngana, Asɔɓɨɨ ɔ꞉sigio Abalaama ɓɔ: «Yaka ngɨyɔ Ɨsɨmaɛlɨ nɔ ɨyɔ mombi ɔ tɛa ngɨananɨ, yatɨnakɨamʉ amʉtɨma ɓɨɓɨ. Kɨa pɨ-sɨ ʉwɛ, ta yaka ngɨyɛ Sala anɔwɛ anʉngɨa. Dɔ, wɛ꞊nɨanɨa sungo nɔ ɓanɔnɔ ngʉɓɔsɔɔ ɓɔ kpɛ, ta akɔ ʉsʉkʉa ngʉwɔ Isaka. 13Nɔ, akɔ yaka yɔ mwana ɔ mombi ɔ tɛa ngɨasɔɔ, na꞊mikiso ɨyɔ kʉ ɨsɛngʉʉ ɔ ɨbaba yɔ ɓombi yɛta ɨja, dɔ ɨyɔ, a kʉ mwana asɔɔ.»
14Abalaama a꞉jʉkana nekuɓa ngɨyɔmɔ nɔ igbandindi, ɔ꞉sɨka ɨkyɛmʉ yɛta ɨdyɛ, nɔ mipo amati ɔ ʉmba wɔ nama, ɔ꞉mʉnapɨa Hagalɨ amapaka ga ja, ɔ꞉minjo nɔ mwana kʉtaa. Nɔ, ɔ꞉mutoso ga gbʉ. Ɨyɔ Hagalɨ ɔ꞉ngwɨa kyɛnda, ɔ꞉pʉnga yɛnganaka amati ɔ mukengu wɔ Bɛlɨ-Sɛba. 15Ɨyɛ ndʉ mipo ka꞉musio amati ɔ ʉmba ga gba, Hagalɨ ɔ꞉mʉsɨa mwana aigoɓi ɛsɨ ɔ mwana ɔ ɓʉtɨ ga vu. 16Kʉdɔ, ɔ꞉sa anuwolo ɗu ɓɔ kɛlɛ, adaa ɔ ɓʉta ɓɔ giso ikopi. Ɔ꞉pʉnga yakanaka amati angɔ ɓɔ: «Eeɓee! Natɨnamʉ gɔ pɛpɛ aka mwana ngɨasɛmɨ achwɛiso-ɔɔ mʉtɨma.» Ɨyɔ ɓawele-sɨ ta ananɨ, ɔ꞉natɨa, nɔ ndɨa ɓɔ hikihiki. 17Asɔɓɨɨ ɔ꞉mʉka mwana ngɨananɨ ndɨa, nɔ malaika wɔ Asɔɓɨɨ ɔ꞉misoko Hagalɨ anɨngwa ta inani akʉʉ ɔ ɓisi, nɔ, ɔ꞉musigio ɓɔ: «Hagalɨ, ɨmanɨ yɔ꞉nakɨɔ? Watɨkumomʉ, dɔ, Asɔɓɨɨ ɔ꞉kɔ ndɨa yɔ mwana asɔɔ ʉkanɨ, ta inani a-ɛɛ. 18Ɨmaa, kʉdɔ, wɔmʉsɨka mwana, nɔ, wɔmupoto iɗo, dɔ, na꞊muchiso akɔɓio ɨbaba yɛta ɨja yɔ ɓombi.» 19Asɔɓɨɨ ɔ꞉muɓoo Hagalɨ mesu, nɔ, ɛ꞉na ʉpɨa wɔ mipo. Kʉdɔ, ɔ꞉huso mipo amati ɔ ʉmba wɔ nama ga kyɛɛ, nɔ, ɔ꞉mumwiso tɨa kʉ nɔ mwana angɔ.
20Asɔɓɨɨ ɔ꞉mʉpɛmakɨa Ɨsɨmaɛlɨ, nɔ, ɔ꞉kɨa ɓakʉʉ. Ɨyɔ, a꞉wolo ɨkʉmbʉ tɨa kʉ ananɨ amukengu. A꞉tɨgisonoko nɔ ɓopi kʉ gisonokoni. 21A꞉wolo ɨkʉmbʉ amukengu wɔ Palanɨ, nɔ, inye Hagalɨ ɔ꞉musikiso moi, muto Ɓamisili ɔngɔ.
Atɨ Abalaama ɓɔkɨa agɔmɛ nɔ Abɨmɛlɛkɨ
22Ngbinga ngɨananɨ, atɨ Abɨmɛlɛkɨ ɨɓɔ nɔ Fɨkɔlɨ, ngama ɔ ɓasʉda ngɨangɔ, ɓɛ꞉ka anʉngɨa Abalaama ɓɔ: «Akɔ yaka iɓomu ngɨyɛ wakɨkɨa suo, Asɔɓɨɨ a ɨhɔ nɔwɛ. 23Ɨtakɨtakɨ ngɨyɛ, anakio silika, akɔ ino yɔ Asɔɓɨɨ, ɓɔ wangɔnapɛta sinani ɨmɨ, pɔ ɓana ɓɔsɛmɨ, pɔ ɓanɔnɔ ɓɔ ɓanɔnɔ ɓɔsɛmɨ. Ngbanga nɔ iɗo iɗo ngɨyɛ na꞉nakɨa, amati ɔ ɨkʉmbʉ ngɨyɛ wa-ɔɔ, ndʉ mɛɛka ayɛ, wa꞊nakɨa sina ɨmɨ kʉ ɓanɨ.» 24Ga Abalaama aka ɓɔ: «Nɔkio silika kioni.»
25Yakamɛngana, ɓombi ɓɔ tɛa ngʉɓɔ Abɨmɛlɛkɨ ɓa꞉hɨnɨa jɛnɛ Abalaama ʉpɨa wɔ mipo ngʉwangɔ. Kʉdɔ, ɨyɔ Abalaama, ɔ꞉mʉyakɨa Abɨmɛlɛkɨ, akʉʉ ɔ yaka yɔ ʉpɨa ngʉwɔnanɨ. 26Abɨmɛlɛkɨ ɔ꞉mutosio ɓɔ: «Ɨmɨ, nangɛmbɨa mombi ngɨa akɨa yaka ngɨyɛnɛnɨ. Nɔ, wa꞉naɓɨamʉ jɛnɛ ɨmɨ kʉɓanɨ. Nʉka nga yɛsɛmɨ, tɨa kʉ ɓʉɓʉnʉ ngɨa.» 27Kʉdɔ, Abalaama ɔ꞉sɨka ɓakɔndɔlɔ, nɔ ɓamɛmɛ, kʉ nɔ ngɔmbɛ, ɔ꞉ɓinjo Abɨmɛlɛkɨ. Ɨɓɔ ɓaɓomu ɓapɨnɨ, ɓɔ꞉kɨa agɔmɛ ati eɓo. 28Abalaama ɔ꞉napɨa ɓasaɓakyɛ ɓɔ ɓakɔndɔlɔ mɛɗɨanɛka anambamba ɓɔ. 29Ga Abɨmɛlɛkɨ nɔ Abalaama ɓɔ: «Ha gue, wɔ꞉napɨɔ ɓasaɓakyɛ ɓɔ ɓakɔndɔlɔ mɛɗɨanɛka ngʉɓa anambamba dɔtanɨ?» 30Abalaama ɔ꞉mutosio ɓɔ: «Ɓakɔndɔlɔ ɓɔsɔɔ ʉɓɔnanɨ. Nɔkɨɔ ɓanɨ, ta akɔpananiso ɓɔ ɨmɨ ingainga akɛ, nɔ꞉mba jɛnɛ ʉpɨa wɔ mipo ngʉwa.» 31Yaka ngɨyɛ ɓa꞉sʉa-ɔɔ ɨda ngɨyɛnɛnɨ ino ɓɔ Bɛlɨ-Sɛba#21:31 Bɛlɨ-Sɛba: pɔ ɓɔ ɨsɨ yɔngɔ ɓɔ ʉpɨa wɔ mipo wɔ mɛɗɨanɛka pɔ ɓɔ ʉpiya wɔ mipo wɔ agɔmɛ nɔ Ebelenia ya꞉kwa ɓanɨ, dɔ ɨɓɔ ɓaɓomu ɓapɨnɨ, ɓa꞉kɨa agɔmɛ ati eɓo ananɨ. 32Ɓa꞉kɨa agɔmɛ ananɨ anɔ Bɛlɨ-Sɛba ɓanɨ. Mbise ɔngɔ, atɨ Abɨmɛlɛkɨ nɔ Fɨkɔlɨ ngama ɔ ɓasʉda ngɨangɔ, ɓɔ꞉ngwɨa ɨɓɔ kyɛnda atɔwa tɨa kʉ aɨkʉmbʉ ngɨyɔ Ɓafilisitina.
33Abalaama ɔ꞉tɔhʉna ɓʉtɨ mʉngana ɓɔ ɨsa, inani anɔ Bɛlɨ-Sɛba, nɔ, ɛ꞉ta akɔ ino yɔ MAKWƆƁƗƗ, Asɔɓɨɨ ngɨa wɔ mago nɔ mago. 34Ɨyɔ Abalaama, a꞉kwaa inani akɔ ɨkʉmbʉ ngɨyɛnɛnɨ yɔ Ɓafilisitina, ɓɔ ndɨɨ ndʉ mɛɛka.
Pilihan Saat Ini:
Mʉkpanganɨa 21: buuN
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2021, Wycliffe Bible Translators, Inc.