Matius 7
7
Henane anye vaga avakwa enowak dilubuk wene
(Lukas 6:37-38, 41-42)
1“Ala en ane anye vaga henowak dinggu haoen, hiren henane anye vaga avakwa enowak dilubuk. 2‘Hit weyak ogagep,’ yiluk, henane anye vaga enowak dilisagwi hak, Ala en hit ogo anderogoat ane anye vaga henowak dinggu hagup. Wakhegek ako vaga wal okhelok, avakwa wogerelagwi ako ndatak, wal okhelok wokhirigya hagup.”
3“Yo agako mbalek hinimu winik agarik ako dibagetek dugwit, hit henaswe yo iluvulu imu nonggagas ako nggarogo yiluk dibelagwi? 4Eke, yo agako mbalek hit hinimu wikhegetek dugwit, ‘Naswe. Yo iluvulu himu nonggagas ako wikheyayogon,’ andi nggarogo yugurup ombasagwi? 5Ii! Henagavoval yagalagwi! Yo agako mbalek hit hinimu winik agarik ako endak wikhelok, henaswe imu wikhaup andi, sigamat hagup o,” yiluk, yugeragagi.
6“Yangge en dagaulogo aik hivithinupu haoen, Ala ake enek eyave sek menda ako wogerabuk. Eke, wam inisok vaga sovalogo balin lagu saoen, helep mudu elose sek onggo ombok menda mutiara ako wam enanggelekma mbo helabuk,” yiluk, yugeragagi.
Nggino yuguguselok, wogirigya, belangguselok, havethedugwi, sogop dolen-dolen ogaguselok, sup hutbugu, ogarup wene
(Lukas 11:9-13)
7-8“It avakwa en nggino yuguguselok, wogirigya, belangguselok, havethedugwi, sogop dolen-dolen ogaguselok, sup hutbugu, ogasagwi. Ogasagwima, hiren Ala nggino yugugu dogop. Nggino yugugu hiniselok, Aren wokherayogon. Sek menda andi At ovaga belanggu dogones. Belanggu hiniselok, At elola en havethedasogom. Sogop dolen-dolen ogagu dogones. Sogop dolen-dolen ogagu hiniselok, Aren sup hurogo bigigayogon o.”
9“Henaburi ambien ‘Erom wokniru,’ yukhirigya halok, helep wogirup ombasagwi? 10Eke, ‘Ikan ambi wokniru,’ yukhirigya halok, mbas idup menda wogirup ombasagwi? 11Dek. Hit ap weyak ogasagwi menda ovara, henaburi en nggino yukhiruguselok, sek menda wogerelagwi ako ndatak, hit Henasin mbogot vaga agarik ako en, nggino yugugu hiniselok, sek menda wokherayogonbuk ombasagwi? Avyarat wokherayogon aro,” yiluk, yugeragagi. 12Hiren, ‘Anderogo okbininaup sek ai,’ ombasagwi ako ndatak avakwa sek adigat okbigik nagu dogones. Ala Wene Musa en dirup watigi inim, it navi-navi Ala yugirigya hegek yagagwa inim, eyave anderogoat agarik atma, ogagu dogones,” yiluk, yugeragagi.
Sup maduk vaga nunggup wene
(Lukas 13:24)
13Yugirigya lagagirik, “Avakwa eneyave dek ari lendagwima akoma nunggup sumbanggut ombok yendalek andi, sup lendagwima ogo obak erogo yago halok, avakwa wisane sup andi vaga lendagwi ovara, hit andi, sumbanggut maduk yendalek ako vaga nunggugu dogones. 14Iniluk asagwima nunggup andi, sumbanggut maduk yendalek, eke, sup lendagwima ogo nggarogo labuk erek atma, avakwa ambukumat havethidugu lagarwik, nunggwisagwi o,” yiluk, yugeragagi.
Yo enggen yiliga wene
(Lukas 6:43-44)
15Yugirigya lagagirik, ambi inim yugirigya dugwit, “It ap Ala wene huluk molalogo yukherelagwi menda akoen henambukmu unggu saoen, dibagu dogones. It ap andi ndomba elose ovagak okhedelok henadema wendagwi ovara, enendawi andi, yangge do ovagak enaninis wisane agarwik. 16It ap andi, ogarit nagu dugwit, enggen yugup vaga hinilup arusogom. Hit anggur enggen ako yo bondo aik werek vaga yugumu, welagwi ombasagwi? Eke, yo widis enggen ako heda sogonaik vaga heralisagwi ombasagwi? 17Dek o. Yo sek menda halok andi, enggen sek menda-at yiliga. Eke, yo weyak menda halok andi, enggen weyak menda-at yiliga. 18Yo sek menda andi, enggen weyak menda yiligadek. Eke, yo weyak menda andi, enggen sek menda yiligadek. 19Yo enggen sek menda yiligadek halok andi, murogo hali hunikmu akoma mbo mabayogon. 20Anderogo atma, it ap Ala wene huluk molalogo yagan lendagwi menda ako, enggen yugup vaga hinilup arovovok yiluk, yukheraliga o,” yiluk, yugeragagi.
Ala endawi ombasiga menda ogaguselok, At avema bisayogon wene
(Lukas 13:25-27)
21Yugirigya lagagirik, wene ambi inim yugirigya dugwit, “It avakwa enane vaga en ‘Ai, Nenasin. Ai, Nenasin,’ yuknisagwi ako, ovok erogo At mbogot vaga menda avema bisagwibuk. Ata, An Nasin mbogot vaga menda endawi ombasiga ako wane-wane ogaguselok, adigat At avema bisagwi. 22O hivis oklarugwi andi vaga it avakwa wisane en yugu dugwit, ‘Ai Nenasin. Hat hinis vaga Ala wene yugurugu lagagup.’ ‘Ai, Nenasin. Hat hinis vaga madis nggigilogo wibugu lagagup.’ ‘Ai, Nenasin. Hat hinis vaga nggarogo ogarubuk menda wisane erogo ogagu lagagup ako.’ 23Yuknirumwi ovara, Anen it yugirigya dugwit, ‘Hit An ninggut. Hit weyak ogasagwi menda yi, yenam en wilitales,’ yiluk, yugeragwis o,” yugeragagi.
Ap wes inim, ap endawi werek inim iperen o vanggugwa wene
(Lukas 6:47-49)
24Yugirigya lagagirik, ambi inim yugirigya dugwit, “Yi ap ndi ap An nane enaruk hobaluk, des erogo ogasagwi ako andi, ap endawi werek dugwit awi helep vaga valhedagagi ako hak, it ndatak agarwik. 25Vabaluk werekma, o musu ninggya, is nggut ombok wagya, o havut lavuliluk wagya, ogagya dugwit, o valek ako vonggalevet hagagi ovara o helep vaga valekma, masanggitek-at welagagi.”
26“Eke, it yi ap ndi ap An nane enaruk hobaluk, des erogo ogasagwidek halok andi, ap wes en awi yinggi vaga valhedagagi ako hak, it ndatak agarwik. 27Vabaluk werekma, o musu ninggya, is nggut ombok wagya, o havut lavuliluk wagya, ogagya dugwit, o ako vonggalevet higya dugwit, masalogo ilumukmut erogo mondok alonedok erek ogagagi,” yiluk, yugeragagi.
Yesus ane anye vaga yugirigya halok, vok yagagwa wene
28-29At Yesus en wene yi ako ovok erogo yugirigya lagagimu, it avakwa wonggalek welagagwa ako At ane mamulirigya enaruk hunggu lagagwarik, “Ayai! Ap yi, it Ala wene vagago agarwik menda en yuknerelagwi ako hak, At yukneraligadek o. At endawi werek dugwit ane anye vaga yugatneraliga yi, wi!” yiluk, vok yagagwa.
Pilihan Saat Ini:
Matius 7: nbq2013
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
