Matius 26
26
Yesus waruguluk avok mbinggugwa wene
(Markus 14:1-2; Lukas 22:1-2; Yohanes 11:45-53)
1At Yesus wene ako ovok erogo yugirigya lagagirik, it At ane welagwi menda ako yugirigya dugwit, 2“Nogo mberen yikbaluk, isogo Vasika isarup hinilup atma, isagu dugwit An Ap-At Endaklagagis yi, yo winik vaga lobalogo banupwak yiluk, neyave vagarogo avakwa wogerasogom o,” yiluk, yugeragagi.
3O andi vaga it ap imam-imam enasini inim, avakwa enasini inim, ap imam-imam enasin inis ombok Kayapas awi mbanggutmu andenam wonggalagu lagagwarik, 4At Yesus mbauk hwilagago vakbaluk, warusogom aro, yiluk, avok mbinggu dugwit, 5“It avakwa enane anggonggol hosek yugu saoen, isogo isagwi vaga vagarup andi dek,” yagagwa.
Hwa ambien amburup Yesus ovaga ndibagagi wene
(Markus 14:3-9; Yohanes 12:1-8)
6At Yesus o Betania ap ambi inis Simon o endak agap vaga amu hunik wisane welagagi ako amwa werekma, 7hwa ambi amburup amben sek onggo ombok menda iwak helep mendago vaga nudik wolok nunggwigya lagagirik, At Yesus erom ninggya hegek, endawima en wa imbita dugwit, amburup Yesus unggul vaga ndibagagi.
8-9Ndibagagi ako, it Yesus ane welagwi menda inil hugu lagagwarik, hwa ako mberugu dugwit, “Yo amburup amben sek menda yi vaga onggo ombok yoparip wisane hubaluk, avakwa ininggidek menda wogeraup sek ovara, nggarogo yiluk enam warogo ndibagen?”
10Yugugwis ako Yesus yedok inigu lagagirik, it yugirigya dugwit, “Hwa yien mondok sek okbenanggarikmu, nggarogo yiluk, mberisagwi? 11It ininggidek andi, hinim mondok dogogup ovara, An andi, hit hinim mondok dogosogonbuk. 12Hwa yien amburup novaga ndibenanggas ako andi, An hambigya neyalok, neyave wimu mabanup ako yiluk, dikduk erogo benanggarikmu, hekbas. 13Hivis Sek Wene wolok yi awi ndi awi yugeregek nagu dugwit, hwa yi oknetas ako, enape wenggelek dogopwak yiluk, yugeregek nagu dogosogom, yiluk, avyarat yukheraliga o,” yugeragagi.
Yudas en Yesus warupwak yiluk yonggo lagagi wene
(Markus 14:10-11; Lukas 22:3-6)
14Yugirigya lagagimu, it ap 12 menda ambi inis Yudas Ikariot akoen it ap imam-imam enasini enadema lagya lagagirik, yugirigya dugwit, 15“Yesus wokhirigya neyalok, onggo nano woknirumwi?” yiluk, yugirigya lagagimu, onggo yoparip mbusi perak andi enggen 30 wogogogwa. 16Wogogogwa andi hudi vaga en at Yudas ako, “Eyave vagarogo wogeraup nanonggal nggenam agya hami?” yiluk, abyam welagagi.
Isogo Vasika isagago nunggugwa wene
(Markus 14:12-21; Lukas 22:7-23; Yohanes 13:21-30)
17Isogo Adenggen Erom Roti Virisigadek menda ako ogagusim, ndugwis endak vaga, it Yesus ane welagwi menda akoen Yesus adema wagu lagagwarik, At yugugu dugwit, “Isogo Vasika naup nit nggoma dikduk erogo belauk?”
18Yugugu lagagwama, Yesus en, “Hit o kota andoma nunggugu dogomundik, ap andoma menda ambi yugugu dugwit, ‘At Ngguru en, “An okbanup enek agarik ako, vage horok ari wagarikmu, it An nane welagwi menda ninim hat hamwa andoma isogo Vasika isagago nasogom,” yiluk, yagas,’ yugerop.” 19Yugirigya lagagimu, it At ane welagwi menda ako At Yesus yugeragagi ako wane-wane ogagu dugwit, isogo Vasika ako isagago belagagwa.
20O hup agya lagagimu, Yesus At ane welagwi menda 12 ako inim lagu lagagwarik, hora yiluk, 21erom nunggu dugwit, At Yesus en, “Ap hit menda ambien An narupwak yiluk avakwa yugerayogon higi, yiluk, avyarat yukheraliga.”
22Yugirigya lagagimu, enendawi mondok burup yugu lagagwarik, at ambien Yesus yugigik ogagu dugwit, “Ai, Nasin. An dek ai?”
23Yugugu lagagwama, Yesus en, “Erom roti niperen nininggis virin vaga longgalogo nelagwi yien, An neyave narupwak yiluk, yugerayogon. 24An Ap-At Endaklagagis yi, An okbanup wene navok dirup warek agarik ako wane-wane ogari layogon ovara, aren it avakwa neyave narupwak yiluk yugerayogon andi, mondok anggin iya erogo ovaga arugwi. At ap andi endaklaklipuk en, at segat duklip ovara!”
25Yugirigya lagagimu, at Yudas Yesus eyave warupwak yiluk yugerayogon akoen Yesus yugugu dugwit, “Ai, Ngguru. An ogo dek ai?”
Yugugu lagagimu, Yesus en, “Yu, harenat yagaliga andi,” yugogogi.
Erom roti inim anggur agas inim nunggu dogop yugeragagi wene
(Markus 14:22-26; Lukas 22:15-20; 1 Korindus 11:23-25)
26Yugugu lagagirik, erom nunggu dugwit, At Yesus en roti inggimu wigya lagagirik, “Nasin Ala wa,” yiluk, ugurogo, At ane welagwi menda ako wogirigya dugwit, “Roti yi, An neyave atma, hininggimu wugu dogomundik nanes.”
27-28Yugirigya lagagirik, anggur agas iwak elola nudik ako inggimu wigya lagagirik, “Nasin Ala wa,” yiluk, wogirigya dugwit, “Hit ap wisane henomaduk degerogo bigigiluk, Ala hinim dambubigigaup wene nggatuk erogo yukheraliga yi, hit avyarat ombarovovok yiluk, namuya wilisogon yi atma, hit ovok erogo nanes. 29Eke, An andi, o yogak yi hudien hivis An Nasin avema bisaligama andoma en, anggur agas swi menda ninim naup ako ao ari wagetek hegek, An anggur agas yi, nenggetek-at dogosogon, yukheraliga o,” yugeragagi.
30Yugirigya lagagirik, it ako ndawi wakbaluk, wunggu lagagwarik, ndom Saitun vaga unggugwa.
Peterus en “Yesus ninggut,” yisogon, yugogogi wene
(Markus 14:27-31; Lukas 22:31-34; Yohanes 13:36-38)
31 #
Zakharia 13:7 yokhanes. Ndom Saitun vaga unggu lagagwarik, andenam dugwit, At Yesus en Ala Wene Endak ambi iri dugwit:
“‘An Ala en At wam ndomba vagenombogo agarik ako watya dogomima,
ndomba wonggalek ako hoda sak yusogom o,’
yiluk, Ala yagagi dirup warek agarik atma, o hup yi vaga, hit ovok erogo ‘Ap andi, ninunggut o,’ yiluk, An hekbaniluk, hoda wulusogom. 32Anderogo ovara, An niluk erogo mondok okbaninggya halok, nendak o Galilea ari layogon o,” yiluk, yugeragagi.
33Yugirigya lagagimu, at Peterus akoen, “Dek o. It ovok erogo, ‘Yesus ninunggut o,’ yiluk, hekbagaluk wunggusigik ovara, an andi, hekbagaluk mondok wilisogonbuk.”
34Yugugu lagagimu, At Yesus en, “Yogak o hup yi vaga ayam ane ao yegetek hegek, hat elap henggam vaga, ‘Yesus andi, an ninggut,’ yisogon o, yiluk, avyarat yukhisiga.”
35Yugugu lagagimu, at Peterus en, “An niperen hambup halok, segat ovara, Yesus ninggut andi an mondok yisogonbuk.” Yugugu lagagimu, it At ane welagwi menda ako ovok erogo anderogoat yugogogwa.
O Nggesemani en, Yesus samban ogagagi wene
(Markus 14:32-42; Lukas 22:39-46)
36Andi okbaluk, Yesus At ane welagwi menda ako inim o inis Nggesemani ari lagu lagagwarik, Aren yugirigya dugwit, “An akilisim samban ogari landiga atma, hit yenam horaik dogones.” 37Yugirigya lagagirik, Peterus inim, at Sevedius aburi mberen ako inim, woginiviluk lagya lagagirik, endawi burup iri dugwit, endawi anggin wisane agagi. 38Anggin agya dugwit, “Ap yoma. An nendawi burup iri dugwit, hambup-at okneraliga atma, nogo yigitek, ninim yenam dugwit, nenova hwalogo dogosogom.”
39Yugirigya lagagirik, lirup erogo lagya lagagirik, elese samup erogo wen vaga nggik yiluk, Ala yugugu dugwit, “Ai, Nasin. An idup-mbidup okneraup yi, dek okbaup sek imbita heyalok, dek okbain. Eke, dek halok, An ogarup ombasiga andi asugen. Hat ogarup embeten akoat ogarisogon o,” yiluk, samban ogagagi.
40Samban ogagya lagagirik, At ane welagwi menda it henggam ako enadema wagagi. Wagya lagagirik, nogo yugusim il inigu lagagirik, Peterus yugugu dugwit. “Avyak. Hit mo il ambiat vaga ninim henova hwalogo dogop meyan halok, nogo adigat yilagwi? 41Henendawi en sek ogarup ombasagwi ovara, heneyave en ogarup meyan okhinivisiga atma, weyak ogarup henendawima ari wagya haoen, henova hwalogo dugwit, samban ogagu dogones.”
42Yugugu lagagirik, hekbisiluk elap ambi inim lagya lagagirik, Ala yugugu dugwit, “Ai, Nasin. An idup-mbidup okneraup yi, dek okbaup meyan halok, hat henendawi ombasiga ndatak-at ogarisogon o,” yiluk, samban ogagagi.
43Samban okbaluk, eyami vaga wagya lagagirik, it ap ako, nogo inil oginipigirikmu, nogo yugu sogogi. 44Nogo yugusigik, hekbisiluk, lagya lagagirik, endak elap mberen vaga Ala yugogogi ako, hivis elap ambi inim samban ogagya dugwit, anderogoat yugogogi.
45Samban okbaluk, it At ane welagwi menda ako enadema wagya lagagirik, yugirigya dugwit, “Hit sat yangganggu dugwit, nogo adigat yugu dogop ombasagwi yi? It weyak ogasagwi menda en An Ap-At Endaklagagis neyave narupwak yiluk wogeraup ako vage horok ari wagarikmu yi hanes. 46At neyave narupwak yiluk, nonggo mbanggas ako vage horok yi wandiga atma, laguluk, mendek eres,” yiluk, yugeragagi.
Yesus vagatugwa wene
(Markus 14:43-50; Lukas 22:47-53; Yohanes 18:1-12)
47At Yesus ao yugirigya hegek, it imam-imam enasini inim, avakwa enasini inim, it akoen ap ambi homago veram wugwi, yo mbandugul wugwi, ogakluk, lakbisa wagagwa ako wagu lagagwama, it ap 12 menda enaswe Yudas ako inimat wagagwa. 48Eke, At Yesus eyave warupwak yiluk, onggo wogogi akoen, endak inim wene yugirigya dugwit, “Yedok havovok yiluk, anen At ambi domatya neyalok, ‘Ap ako andi aro,’ umbutu dugwit, vagarup,” yiluk, wene ovok endak yugeragagirikmu, 49at ako mbikit Yesus adema lagya lagagirik, “Nasin Ngguru wa,” yiluk, domatbagagi.
50Domatbagya lagagimu, At Yesus en, “Wa, naswe! Hat ogarup yiluk wagen ako ogaru.”
Yugugu lagagimu, it ap ako Yesus adema hondo yilagu dugwit, vagatugwa. 51Vagatu lagagwama, ap ambi Yesus inim welagagwa menda en veram nggigis erogo ap imam-imam enasin inis ombok ayeloman ako aruk sobalogo lakbagagi.
52Sobalogo lakbagya lagagimu, At Yesus en yugugu dugwit, “It ap veram vaga inituselok, iren onggo veram vaga-at enasagwi atma, hovaram andi, awi elola yekbain. 53An nidi yupwak yiluk, yogak yi vaga it malaikat wisane eneyave 12 hudi homago lakbisa warupwak yiluk, An Nasin nggino yugurup meyan embeten? 54Nggino yugurup segat ovara, yugugu neyalok, An okbanup navok dirup warek agarik ako nggarogonggan en atma des yup embeten? Atma des yupwak yiluk, An yugigitek-at agirik.”
55Yugugu lagagirik, o andi vaga At Yesus en it avakwa homago hagalwik ako yugirigya dugwit, “Ap enonggop agodem welagwi menda vaginivisagwi ako hak, An anderogoat vakneraguluk, yaga veram inim, yo mbandugul inim, wolok wagep yi? Hutun-howam Ala awi valekma yugirigya neyagek, vaknetetek welagep ovara, 56it Ala en yugirigya hegek yugurugu lagagwa navi-navi en dirup watugwa ako atma des yupwak yiluk, vaknera wagep atma, sek aro.”
Yugirigya lagagimu, At ane welagwi menda akoen Yesus hekbaluk, hoda wunggugwa.
Yesus owak dinggugwa wene
(Markus 14:53-65; Lukas 22:54-71; Yohanes 18:13-24)
57Hoda wunggu lagagwama, it Yesus vagatugwa akoen eyave wolok ap imam-imam enasin ombok Kayapas adema it ap Ala wene vagago welagagwa menda inim, it Yakuri enasini inim, wonggalek werekma, lagagwa. 58Lagusigik, at Peterus ako enambetaga yamamek imam-imam enasin ombok ako awi mbumbumu ilim erogo nunggwigya lagagirik, werekma, “Nggarogo okbagu sami?” yiluk, at imam-imam enasin ombok ako aori enanggelekma inimat hora yi lagagi.
59Horaik werekma, it imam-imam enasini inim, it Yakuri enawene amburup mbalisagwi menda ovok erogo inim, “At Yesus waruguluk, sanien huluk wene At ovaga bagu samwi?” yiluk, 60ap wisane en huluk wene ovaga baguluk wagagwa ovara, adem sigam agetek-at welagagi. Andien, hivis ap mberen wagu lagagwarik, yugurugu dugwit, 61“Ap yien, ‘An Ala awi valek masalogo baluk, ndugwis henggam vaga valugwis,’ yagagi.”
62Yugurugu lagagwama, at imam-imam enasin ombok ako, mendek yi lagya lagagirik, Yesus yugugu dugwit, “It ap yi, wene yegen hovaga bagalyagwi atma, onggo ambi yugeraup ombasiga a, dek a?” 63Yugogogi ovara, At Yesus ako anedek mbuverek-at welagagi.
Mbuverek werekma, at imam-imam enasin ombok en, “Hat Ala Abut enogo mondok okbagagi Mesias ako heyalok, sigam erogo yukneranok yiluk, At Ala iluk agarik inis vaga yukhisiga.”
64Yugugu lagagimu, At Yesus en yugirigya dugwit, “Harenenat anderogo yegen ovara, An ambi hit ovok erogo yukherayogon. O yogak yi hudien An Ap-At Endaklagagis yi, At Anye Adigat Agarik menda inggis amotkan horaik dugwit, mbogot vaga hena anggelekma wambu wagya neyagup o, yiluk, yukheraliga.”
65Yugirigya lagagimu, at imam-imam enasin ombok akoen asum libilhidigya dugwit, “Avyak! At Ala wiyiknom-weyaknom erogo baliga yi hegep? Wene ambi ngga inim yuknirigya haoen yiluk, holek agipik? At Ala wiyiknom-weyaknom erogo bagas nit ovok hunggup atma, 66nggarogo ogarup ombasagwi?”
Yugirigya lagagimu, iren, “Mondok-at warup,” yagagwa.
67Yugu lagagwarik, waris suvurogo elese vaga bagwi, ininggis dinggilik vaga watwis, eke, nin ininggis obak vaga watwis, ogagu dugwit, 68“Hat Keretus wai. Saen hatya haliga? Iru!” yiluk, yugugu lagagwa.
Peterus en “Yesus andi, an ninggut,” yagagi wene
(Markus 14:66-72; Lukas 22:56-62; Yohanes 18:15-27)
69Yugugusigik, at Peterus ako mbumbumu andenam horaik werekma, hwavyak enayeloman ambi wagya lagagirik, “Hat ogo, At Yesus o Galilea menda hinim nagu lagen akoat heyaliga.”
70Yugugu lagagimu, at Peterus it ovok inivaga, “Hat yegen andi, an mondok ninggut!”
71Yugugu lagagirik, mbanggutmu ari nunggwigya lagagimu, hwavyak ambien Peterus il higya lagagirik, it andoma welagagwa ako yugirigya dugwit, “Ap yi ako Yesus Nasaret menda inim higi.”
72Yugirigya lagagimu, at Peterus ambi inim iri dugwit, “An ap andi, mondok ninggut avyarat yukheraliga!” yiluk, ombao inis hanum mbanggigi.
73Hanum mbabaluk werekma, andien, it ugun andenam mendek welagagwa ako ap ambien Peterus adema wagya lagagirik, yugugu dugwit, “Hane Galilea enane yagaliga andi vaga, hat it menda avyarat yedok heyalagwi.”
74Yugugu lagagimu, “An ap andi, mondok ninggut, nombao vidis!” yiluk, ombao inis ao hanum mbanggya hegek, ayam ane yagagi.
75Ayam ane iri lagagimu, At Yesus en, “Ayam ane ao yegetek hegek, hat hane elap henggam vaga, ‘Yesus andi, an ninggut,’ yisogon o,” yiluk, yugogogi ako, at Peterus ape wenggenggu dugwit, wunggu lagagirik, endawi burup iri dugwit, yup iya erogo yagagi.
Pilihan Saat Ini:
Matius 26: nbq2013
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
