Matius 17
17
Yesus ndom vaga elese adik agagi wene
(Markus 9:2-13; Lukas 9:28-36)
1Andien, nogo 6 yikbaluk, At Yesus en Peterus inim, Yakobus inim, eke, Yakobus aot Yohanes inim, woginiviluk ndom adup ambi vaga unggu lagagwarik, enadik andoma werekma, 2inivaga At eyave adik hunogo agya dugwit, elese amumulip mo abya ovagak ogagya, asum o awiya ovagak mudu-mudu adigat agya, ogagya hegek, 3it Musa Elia iperen Yesus inim wene mbanggu sogogwa.
4Wene mbanggwis inigu lagagwarik, at Peterus en Yesus yugugu dugwit, “Nasin wai. Nit yoma agurik andi mondok sek. Haren sek imbita heyalok, anen eravo henggam ambi Hat, ambi Musa, eke ambi Elia valogo bigigasogon.”
5Wene ao yugugu hegek, hena mudu amumulip menda akoen hwilak bugu hegek, hena anggelekma en ane ambi yugirigya dugwit, “An Nabut nendawi hunik nadenggen okneraliga ako yi atma, At ane henaruk des erogo hunggu dogones.”
6Yugirigya ako it Yesus ane welagwi menda enaruk hunggu lagagwarik, enalon wisane agu dugwit, enelese samulakluk wen vaga ndun yagagwa. 7Ndun yugu lagagwarik, werekma, At Yesus wagya lagagirik, eneyave inggis vaginupu dugwit, “Henalon habuk, mendek eres.” 8Yugirigya lagagimu, inut leklagu lagagwarik, iperen Yesus inim enane yugwi ako degat enogogwa, At adigat andenam inil hagagwa.
9Ndom vaga en wambu wagu dugwit, Yesus en, “An Ap-At Endaklagagis yi, hambuluk lendagwima en ao mondok okbanenggetek hegek, ogagya hinil neyagep ako avakwa mondok yugerabuk,” yiluk, enaruk watigi.
10Enaruk watya lagagimu, At ane welagwi menda akoen Yesus hemekhugu dugwit, “Andi halok, it Ala wene vagago agarwik menda akoen, ‘At Mesias ako wagatek hegek, navi Elia endak warisogon o,’ yiluk, yagalagwi ako andi, nggarogo yiluk yagalagwi?” 11Yiluk, hemekhugu lagagwama, “‘Navi Elia endak wagya dogomindik, yi ogagwi ndi ogagwi nggeraligiluk warisogon o,’ yagalagwi ako andi, avyarat yagalagwi ovara, 12Elia ako vage endak wagagi, ovara it avakwa en at yedok hegetek dugwit, it enendawi umbutugwa vaga at okbagagwa ako wane-wane, An Ap-At Endaklagagis ako novaga anggin-mbanggin erogo banusogom o, yiluk, yukheraliga.”
13Yugirigya lagagimu, At ane welagwi menda akoen, “Wene Elia avok yukneraliga yi, ap Ima Wombabisaliga menda Yohanes avok-at yukneraliga o,” yiluk, enendawi dibagagwa.
Madis avyak endawima en wibagagi wene
(Markus 9:14-29; Lukas 9:37-43)
14Dibagu lagagwarik, avakwa wonggalek ako enadema wambu wagu lagagwama, ap ambi Yesus adema wagya lagagirik, avema seve yiluk, yugugu dugwit, 15-16“Nasin wai. An nabut idup ombok erogo ogagya lagarik, inggis-isok ndogom-ndogom watya dugwit, ndugwis ambi hali hunikmu nunggwigya, ndugwis ambi ima wambigya, wisane ogagya halok anen it Hat hane welagwi menda enadema wolok wagi ovara, iren sek ogarup mondok meyanat inigirikmu, Haren nabwa imbita dugwit, nabut yi sek okbanin o.”
17Yugugu lagagimu, Yesus en, “Avyak! Hit avakwa yogak agipik yi henendawi novaga vanggabaluk, avyarat nembetetek weyak adigat ogarup ombasagwi yi, An hit hinim ndugwis maren dogop, eke An ndugwis maren hit hinim nendawi sagain akluk dogop? Avyak andi, wolok omanes.” 18Yiluk, yugirigya lagagimu, wolok wagu lagagwama, At Yesus en madis ako mberugu lagagimu, madis ako avyak endawima en wunggu hegek, avyak ako andi hudiat sek agagi.
19Sek agya lagagimu, Yesus adigat werekma, At ane welagwi menda ako At adema wagu lagagwarik, “Nit nggarogo yiluk madis nggigilogo wibaup meyan welagyo?”
20Yugugu lagagwama, “Henendawi des erogo avyarat nembetetek ako vaga ogarup meyanat welagep. Hit henendawi novaga vanggabaluk avyarat nombasagwi ako, yo vudok enggen maduk ovagak duklipmu en, ndom yi yugugu dugwit, ‘Yoma en higilogo o andoma elak,’ yiluk, yugugu hinigik, higilogo o andoma lagya helap. Henendawi mondok avyarat numbutu hiniselok, hit ogarup ombasagwi ako ambi ogarup meyan andi dek, ovok erogo ogagu dogogup o.”
[21#Markus 9:29 yokhanes. Yugirigya lagagirik, “Madis anderogo menda andi nano vaga wibaup erek ovara, Ala ake yiluk, erom hunis dugwit samban ogagu hiniselok andi, haryogo wibaup ndak, yiluk yukheraliga o,” yugeragagi.]
“Narusogom o,” yiluk, ambi inim yugeragagi wene
(Markus 9:30-32; Lukas 9:43-45)
22O Galilea andoma wonggalagu lagagwarik, Yesus en At ane welagwi menda ako yugirigya dugwit, “An Ap-At Endaklagagis yi, it avakwa en narupwak yiluk, An neyave vagago wogirigya halok, 23natu dogomima, ndugwis mberen dukluk, ndugwis ambi vaga Ala en niluk erogo mondok okbanisogon o.” Yugirigya lagagimu, At ane welagwi menda ako abwa umbutu dugwit enendawi nggudamup yagagi.
Yesus en Ala awi valek ake yoparip bagagi wene
24Andien, At Yesus inim, At ane welagwi menda inim, o Kapernaum wagu lagagwama, it Ala awi valek ake yoparip wonggalisagwi menda akoen, at Peterus adema wagu lagagwarik, at yugugu dugwit, “Henasin Ngguru akoen Ala awi valek ake pajak yoparip baliga a, dek a?”
25Yugugu lagagwama, Peterus en, “Yu, At baliga.”
Yugirigya lagagirik, umwa nunggwigya lagagimu, At Yesus en Peterus endak yugugu dugwit, “Simon wai. It ap ininis ombok o wen vaga yoma agarwik ako ‘Pajak onggo bas,’ yugerelagwi ako andi, it menda enaburi yugerelagwi a, ata ap huru yugerelagwi a, nggarogo ombasiga?”
26Yugugu lagagimu, Peterus en, “Ap huruat yugerelagwi.”
27Yugugu lagagimu, Yesus en, “Andi halok it enaburi andi belagwidek unat agarwik ovara, nit bagetek niniselok enanggon ninumbutu isaoen, hat inamutmu lagya dogomindik, ikan heda wombabaluk, ikan ambi endak yiduklagya halok, elagap vendarogo baluk, yoparip elagapma agarik akom wigya dogomindik, venak higirogo An nake baninggya, eke, venak hat hake batigya, ogarilalo,” yiluk, yugogogi.
Pilihan Saat Ini:
Matius 17: nbq2013
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
