मरकुस 7

शुचा त जुठा भुणे बारे यीशु शिक्षा

मत्ती 15:1-20

1पता, फरीसी त कुछ धर्मशास्त्री जे यरुशलेम शेहर केआं अओ थिए, तसे भेएड़ कठे भोई गे। 2त तेन्हि तसे कुछ चेले तेन्के रिवाजे हेसाब जोई अधोए हथि रौठि खांते काए। 3बोक ई असी कि फरीसी त सोब यहूदी, अपु पुरखी के रिवाज मान कइ जपल तकर सही हेसाब जुए अपु हतेउ न धून्‍तेथ से रौठि ना खांते। 4से त बाजार केआं एई कइ जपल तकर सन्हु न कते; तपल तकर रौठि न खांते। से होर बि सुआ रिवाज मानते जीं कोल, लोठु त टामे भाणे माजुण त धूण।

5तोउं त, तेन्हि फरीसी त धर्मशास्त्री तेस केआं पुछु, “तें चेले पुरखी के रिवाजे मुताविक किस न चलते? किस अधोए हथि रौठि खाई छते?” 6तेन तेन्हि जे बोलु, “यशायाह भविष्य वक्ता तुसी कपटी के बारे सही भविष्य वाणि किओ थी। परमेश्वरे बोलो बोके तेन लिखो असी

‘ई मेह्‍णु मुंहे बइ त में इज्जत कते,

पर अन्के मन मोउं केआं दूर असा।

7ए बेकार अन्तर में पूजा कते,

किस कि ए मनखे बड़ाओ रीति रिवाज परमेश्वरे वचन बणाई कइ मेह्‍णु शिचालते।’”

8“तुस मेह्‍णु के शिक्षा मनुण जे परमेश्वरे नियम टोड़ते।”

9फि यीशु तेन्हि जे बोलु, “तुस अपु रीति रिवाज मनुण जे परमेश्वरे नियम बि कतु चलाकी जोई टोड़ छते! 10किस कि मूसे#7:10 मूसा पुराणे जमाने यक परमेश्वरे सेवक थिआ, जेन इस्राएली मेह्‍णु मिस्र देशे गुलामी केआं छुड़को थिए। परमेश्वरे तसे बेलि इस्राएली मेह्‍णु के धे अपु नियम दुतो थिए। बोलो असु,

‘अपु ईये बोउए इज्जत करे।

जे कोउं अपु ईया बोउ जे बुरु बोलियाल,

से मार छाण चहिए।’”#निसुणे 20:12; 21:17; विधि 5:16; पुजारोठि 20:9

11पर तुस बोते, “ए ठीक असु अगर कोई अपु ईया बोउ जे बोले कि ‘तुं अउगेश करण जे मोउं केईं जे किछ बि थिउ, से सोब परमेश्वर जे चढ़ाई छउ असु’। 12ईं कर कइ तुस तेन्हि अपु ईये बोउए कुछ अउगेश करण न देन्ते। 13तोउं त, तुस अपु बणाओ रिवाजे बझई जोई परमेश्वरे नियम टोड़ छते; त ईं ईं सुआ कम कइ छते”।

14तोउं तेन मेह्‍णु अपु भेएड़ भिए त तेन्हि जे बोलु, “तुस सोब में शुणे, त समझे। 15बाहरीआ कोई बि चीज मेह्‍णु अन्तर घेई कइ तस परमेश्वर सामणि जुठा ना बणान्ती; बल्कि जे चीजे मेह्‍णु अन्तरा निस्ती, सेईंए तेस परमेश्वर सामणि जुठा बणाई छती। 16अगर तुस में बोके ध्यान जोई शुणियेल त तुस समझ घेन्ते।”

17जपल यीशु हसुड़े केआं गी गा, त तसे चेली तेस कथाई बारे तेस केआं पुछु। 18त तेन तेन्हि जे बोलु, “कि तुस बि अपल तकर नासमझ असे ना? तुसी कि किछ समझ ना आउ ना, कि जे चीज बाहरीआ मेह्‍णु अन्तर घेन्ति, से तेस जुठा न कइ सकती? 19किस कि से तसे मन अन्तर न घेन्ति, पर पेट अन्तर घेन्ति त बाहर निस घेन्ति।” ईं बोल कइ तेन सोब खाणे चीज शुची बणाई। 20फि तेन बोलु, “जे मेह्‍णु अन्तरा निस्तु, सेईंए मेह्‍णु जुठु कतु। 21किस कि अन्तरा, मतलब मनखे मन अन्तरा ईं बुरे बुरे विचार एन्ते, नाजायज रिश्ता रखणे सोच एन्ती, केस जोई गलत कम करणे सोच, चोरणे त मेह्‍णु मारणे, 22होरी के चीजे लोभ करणे, बेशर्मे कम करणे, कपट कर कइ मेह्‍णु ठगणे, होरी के भलाई हेर जड़णे त तेन्के मेझर करणे, झूठा रोभ किढ़णे त मुर्खी के कम करणे निस्ती। 23ई सोब बुरी बुरी बोके अन्तरारी निस्ती त मेह्‍णु जुठा बणान्ती।”

यक गैर यहूदी जाति जिल्हाणु विश्वास

मत्ती 15:21-28

24पता यीशु तठिआ खड़ भोई कइ सूर त सैदा इलाके अन्तर आ; त यक मेह्‍णु गी जे गा त से चहन्ताथ कि केसे पता न लौता लगो; पर मेह्‍णु तसे बारे पता लग गा। 25त तसे चर्चा शुण कइ तिखेईं यक जिल्हाणु आई जेसे मठड़ी कुई अन्तर दुष्ट आत्मा थी। से एई कइ तसे खुरी पुठ बिश गई। 26से सुरुफीनीके इलाके यक गैर यहूदीण थी। तेन तसे छनेअरे किउ कि में मठड़ी कुई अन्तरा दुष्ट आत्मा बाहर किढ़। 27त यीशु तेस जे बोलु, “पेहले गभुरु रज्जि भुण दिए, किस कि गभुरु के रौठि नी कइ कुतरे अगर छाण ठीक नेईं”। 28त तेन तेस जे जवाब दुतु, “हाँ प्रभु; तोउं बि कुतर बि चुणि-चाणि खांते, जे गभुरु के हतेउ केआं झड़तु”। 29त तेन तेस जे बोलु, “में बोकी के ईं जवाब देणे बझई जोई दुष्ट आत्मा तें कुई अन्तरा बाहर निस गो असी। अब तु अपु गी जे घेई गा।” 30त तेन अपु गी एई कइ हेरु कि कुई मन्जे पुठ सैलि बिशो असी, त दुष्ट आत्मा बाहर निस गो असी।

यीशु यक लिना टौणा ठीक करण

31पता यीशु सूर इलाके केआं निस कइ सैदा त दिकापुलिस इलाके बइ भुन्ता-भान्‍ता गलीले तथ केईं पूज गा। 32त मेह्‍णु यक टौणा जे लिनियांताथ बि, तसे भेएड़ अण्ह कइ तसे छनेअरे किउ कि तस सुसुर करे। 33त यीशु तस हुसुड़े केआं बखरे घिन गा, त अपु अंगुल तसे कन अन्तर छड़े, त थुक कइ तसे जिभुड़ छु। 34त स्वर्गे कना जे हेर कइ हशाश छड़ा, त तेस जे बोलु, “इप्फत्तह!” मतलब “खुल गा!” 35त तसे कन खुल गा, त तसे जिभुड़ लाठ बि खुल गा, त से सुसुर बोलुण लग गा। 36तोउं तेन हुसुड़े जे निआंग दी कइ बोलु कि केसे जे न बोलुण; पर जत तेन से ठाको थिए, ततुरु से हर जगाई बोते रिहे। 37त तेन्हि हैरान भोई कइ बोलु, “से जे बि कता, खरा कता। से त टौणी शुणणे त गुंगी बोलुणे शक्ति बि देन्ता।”

Pilihan Saat Ini:

मरकुस 7: pgg

Sorotan

Berbagi

Salin